Ang Hunahuna sa Bibliya

Pagpasakop sa Asawa—Unsay Kahulogan Niini?

ANG Pulong sa Diyos, ang Bibliya, nag-ingon sa Efeso 5:22: “Papasakopa ang mga asawa sa ilang mga bana sama ug ngadto sa Ginoo.” Unsay eksaktong kahulogan niini? Kinahanglan bang ang asawa magpasakop ngadto sa tanang butang nga gusto sa bana, bisan unsa man kana? Dili ba gayod niya magamit ang iyang kaugalingong inisyatibo o magbaton ug mga opinyon nga lahi sa iyaha?

Tagda ang asoy sa Bibliya bahin kang Abigail. Milihok siya sa maalamong paagi apan supak sa gusto sa iyang dato nga bana, si Nabal. Bisan pa sa kalulot nga gipakita kang Nabal sa mga sumusunod ni David, kinsa mao ang pinili sa Diyos aron mahimong hari sa Israel, si Nabal “misinggit ug mga panampalas kanila.” Si David, kay napungot sa pagkaingrato ni Nabal, gusto nang mopatay kang Nabal. Nakaamgo si Abigail nga nameligro ang tibuok niyang panimalay. Nalukmay niya si David. Sa unsang paagi?​—1 Samuel 25:2-35.

Giangkon ni Abigail kang David nga si Nabal maoy “walay-pulos nga tawo” ug gihatagan si David sa mga pagkaon nga wala ihatag ni Nabal. Kasagaran, sayop nga ang usa ka bana o asawa magmantala sa mga sayop sa usa ka kapikas. Si Abigail usa ba ka rebelde sa pagsulti ug paglihok sa maong paagi? Dili. Gitinguha niya ang pagluwas sa mga kinabuhi ni Nabal ug sa iyang panimalay. Walay timailhan nga iyang gibatasan ang pagkadili-matinahuron o pagkaindependente. Ni ang lisod-pahimut-ang si Nabal nagpahayag ug kadili-matagbawon sa paagi sa pagtabang niya pagdumala sa iyang dakong kayutaan. Apan sa maong makuyaw nga kahimtang, ang kaalam nagdiktar nga iyang sundon ang iyang kaugalingong inisyatibo. Dugang pa, ang Bibliya naghisgot nga may pag-uyon sa gibuhat ni Abigail.​—1 Samuel 25:3, 25, 32, 33.

Dugay na una pa sa adlaw ni Abigail, may mga panahong ang mga asawa sa mga patriarka nagpahayag sa mga punto de bista ug mihimog mga lihok nga lahi sa gusto sa ilang mga bana. Bisan pa niana, ang maong “mga babayeng balaan nga naglaom sa Diyos” gipadayag ingong mga sulondan sa pagpasakop alang sa Kristohanong asawa. (1 Pedro 3:1-6) Pananglitan, sa dihang gibati ni Sara nga ang anak ni Abraham nga si Ismael nahimong kapeligrohan alang sa ilang anak, si Isaac, iyang gihukom nga si Ismael kinahanglang papahawaon. Kadto “wala gayod makapahimuot kang Abraham.” Apan ang Diyos miingon kang Abraham: “Ayaw itugot nga ang bisan unsa nga padayong ginasulti kanimo ni Sara dili makapahimuot kanimo mahitungod sa batang lalaki . . . Pamati sa iyang tingog.”​—Genesis 21:11, 12.

Pagkamailahon Gikinahanglan

Nan, dili maalamon nga ang usa ka asawa mobating mapugos pagbuhat sa butang iyang nasayran nga dili gayod maalamon o maglapas sa diyosnong mga prinsipyo, nga mangatarongan nga siya nagpasakop lamang. Ni angay nga mobati siyang sad-an sa paglihok nga kinaugalingon sa usa ka hinungdanong butang, sama sa gibuhat ni Abigail ug Sara.

Ang pagpasakop sa asawa wala magkahulogang ang asawa kinahanglang sa kanunay mosunod gayod sa tanang butang nga gusto sa usa ka bana. Unsay mohimog kalainan? Kon nameligro ang matarong nga mga prinsipyo, siya mahimong mosupak sa iyang bana. Bisan pa niana, angay nga ipadayag gihapon niya ang katibuk-ang espiritu sa diyosnong pagpasakop.

Siyempre, ang usa ka asawa angay nga magbantay nga dili molaktaw sa gusto sa iyang bana tungod sa pagkamabuotbuoton, pagpanimalos, o ubang daotang mga motibo. Kinahanglang siya mailahon, “maayog panghukom,” sama kang Abigail.​—1 Samuel 25:3.

Sa Dihang ang Bana Molikay sa Responsabilidad

Ang pangunang tumong ug diwa sa diyosnong pagpasakop sa usa ka asawa mao ang pagpahimuot kang Jehova pinaagi sa pagpakigtambayayong sa iyang bana ug pagpaluyo sa iyang mga desisyon. Kini may pagkasayon kon ang bana maoy hamtong sa espirituwal. Kini mahimong lisod kon siya dili.

Sa maong kahimtang, sa unsang paagi ang asawa makasagubang? Mahimong siya mohangyo kaniya nga tim-os o mosugyot ug mga desisyon nga labing makaayo sa pamilya. Kon itugot niya nga ang bana ‘maoy manimon sa barko,’ lagmit siya mahimong mas hanas niana. Ang kanunayng pagsaway sa bana maglapas sa diwa sa tukmang pagpasakop. (Proverbio 21:19) Apan, kon ang kaayohan sa pamilya tin-awng nameligro sa iyang polisa, ang asawa tingali mopili sa pagsugyot, sama sa gibuhat ni Sara, sa usa ka natul-id nga paagi.

Kon ang bana dili magtutuo, labaw ang kalisdanan sa asawa. Bisan pa niana, angay nga siya magpasakop basta ang bana dili magsugo kaniya sa paglapas sa mga balaod sa Bibliya. Kon himoon niya kana, ang pagsanong sa Kristohanong asawa angay nga sama sa iya sa mga disipulo sa dihang ang usa ka hukmanan nagmando nga ilang lapason ang mga sugo sa Diyos: “Kinahanglang sugton namo ang Diyos ingong magmamando inay sa mga tawo.”​—Buhat 5:29.

Tungod sa kakulang sa kasinatian ug limitadong kaalam, hinunoa, bisan ang maayog-tuyo nga mga bana ug mga asawa makalapas sa ilang mga papel. Ang bana tingali kulang ug konsiderasyon; ang asawa mahimong mapugsanon kaayo bahin sa iyang mga kagustohan. Unsay makatabang? Ang makasaranganong paghunahuna sa kaugalingon mahinungdanon alang sa duruha, sanglit “kitang tanan mapandol sa makadaghan.”​—Santiago 3:2.

Daghang lalaki ang makadangat sa pagpabili sa matinud-anong inisyatibo sa usa ka asawa kon iyang gamiton kanang maalamon. Ug mapausbaw ang panagtambayayong kon ang duha mangayog pasaylo kon sila makahimog mga sayop. Maingon nga si Jehova nagpasaylo sa atong adlaw-adlaw nga mga kahuyangan, kita usab angay nga magpasaylo sa uban. “Kon ang mga sayop mao ang imong gibantayan, Oh Jah, Oh Jehova, kinsa ang makabarog? Kay adunay tinuod nga kapasayloan uban kanimo.”​—Salmo 130:3, 4.

‘Pagpasakop sa Usag Usa’

Nan, sa atong kaayohan ngatanan ang Kasulatan nagtambag: “Magpasakop sa usag usa diha sa pagkahadlok kang Kristo.” Ihatag sa usag usa ang mahigugmaong pagtinahuray; ayaw pagbabag ni makig-indig. Ang kasulatan nagpadayon: “Papasakopa ang mga asawa sa ilang mga bana sama ug ngadto sa Ginoo, tungod kay ang bana maoy ulo sa iyang asawa maingon nga ang Kristo usab maoy ulo sa kongregasyon.”​—Efeso 5:21-23.

Ang Gregong pulong nga gigamit ni Pablo sa Efeso 5:21, 22 nagpasabot sa pagpasakop sa kaugalingon, dili mapugos sa pagpasakop. Ug ang pagpasakop maoy alang sa Ginoo, dili tungod lamang sa panag-uyon sa kaminyoon. Ang dinihogang kongregasyon ni Kristo nagpasakop sa kaugalingon nga kinabubut-on, nga malipayon kang Kristo. Sa dihang ang sama himoon sa asawa alang sa iyang bana, nan ang kaminyoon lagmit kaayo nga magmalipayon ug magmalamposon.

Ang Kasulatan nag-ingon usab: “Higugmaon gayod sa matag [bana] ang iyang asawa ingon sa iyang ginahimo sa iyang kaugalingon,” nga madagayaon. (Efeso 5:33; 1 Pedro 3:7) Angay nga ibutang sa hunahuna sa bana nga siya usab angay nga magpasakop ngadto sa iyang ulo, kay ang Bibliya nag-ingon: “Ang ulo sa matag lalaki mao ang Kristo.” Oo, ang lalaki angay nga magpasakop sa mga pagtulon-an ni Kristo. Si Kristo, sa baylo, nagapasakop sa iyang ulo: “Ang ulo sa Kristo mao ang Diyos.” Busa, ang tanan gawas kang Jehova adunay usa ka ulo. Ug bisan siya nagatuman sa iyang kaugalingong mga balaod.​—1 Corinto 11:3; Tito 1:2; Hebreohanon 6:18.

Ang Kristohanong pagpasakop maoy timbang ug mapuslanon sa lalaki ug babaye. Kini magdala sa kaminyoon ug panag-uyon ug katagbawan nga ikatagana lamang sa atong mahigugmaong Maglalalang.​—Filipos 4:7.

[Picture Credit Line sa panid 14]

Leslie’s