Ang Dalan Padulong sa Pagkaayo

HUMAN sa usa ka atake sa kasingkasing, ang usa ka tawo kasagarang mahadlok ug mabalaka. Atakehon kaha ako pag-usab? Mainutil kaha ako o malimitado ang lihok tungod sa sakit ug pagkawala sa kusog ug kalagsik?

Si John, nga gihisgotan sa ikaduha namong artikulo, naglaom nga sa lakat sa panahon, ang adlaw-adlaw nga laing paminaw sa lawas ug sakit sa dughan mokalma. Apan human sa pipila ka bulan, siya miingon: “Hangtod karon kini wala mokalma. Tungod niini, duyog sa pagkadaling kapoyon ug pagbutokbutok sa akong dughan, ako kanunay nga mangutana sa akong kaugalingon, ‘Hapit na ba usab akong atakehon?’”

Si Jane, nga taga-Tinipong Bansa, usa ka batan-ong biyuda panahon sa iyang atake sa kasingkasing, miangkon: “Abi nakog mamatay na ako o atakehon ako pag-usab ug mamatay. Giabot akog labihang kahadlok, kay aduna koy tulo ka anak nga atimanonon.”

Si Hiroshi, sa Hapon, miasoy: “Nakurat ako sa giingnan nga ang akong kasingkasing dili na moobra nga sama sa nangagi; ang akong gikusgon sa pagbomba mius-os ug 50 porsiyento. Halos natino ko na nga kinahanglang menosan ko ang pipila sa akong mga buluhaton ingong ministro sa mga Saksi ni Jehova, kay ang akong mahimo menos na sa katunga sa gibuhat ko sa nangagi.”

Sa dihang atubangon sa usa ang limitadong kusog, mahimong mahitabo ang mga atake sa depresyon ug mga pagbati sa kaway-pulos. Si Marie, usa ka 83-anyos nga Australiana nga nagdeboto sa iyang kaugalingon nga bug-os-panahon sa buluhatong pagsangyaw sa mga Saksi ni Jehova, mimulo: “Ang akong kawalay katakos nga maaktibo nga sama sa nangagi nakapasubo kanako. Inay motabang sa uban, ako karon ang nagkinahanglag tabang.” Sa Habagatang Aprika, si Harold mikomento: “Wala ako makatrabaho sulod sa tulo ka bulan. Ang nahimo ko lang mao ang paglakaw libot sa tanaman. Makapaguol kadto!”

Gikinahanglan ang bypass nga siruhiya human makaagom si Thomas, nga taga-Australia, sa iyang ikaduhang atake sa kasingkasing. Matod niya: “Dili ako makaagwantag sakit, ug ang pagpaopera sa dakong operasyon dili nako buot nga palandongon.” Si Jorge, nga taga-Brazil, mikomento bahin sa pagkahuman sa operasyon sa kasingkasing: “Tungod sa akong kakabos, nahadlok ako nga mabiyaan nako ang akong asawa nga nag-inusara ug walay tabang. Gibati ko nga ako dili na magdugay sa kinabuhi.”

Pagkaayo

Unsay nakatabang sa daghan nga maayo ug mahimong lig-on pag-usab? Si Jane miingon: “Sa mobati akog labihang kahadlok, ako moampo kanunay kang Jehova ug magtugyan sa akong mga palas-anon kaniya ug pasagdan kana dinha.” (Salmo 55:22) Ang pag-ampo motabang sa usa ka tawo nga makabatog kusog ug kalinaw sa hunahuna nga kinahanglanon sa dihang mag-atubang siyag mga kabalaka.​—Filipos 4:6, 7.

Si John ug Hiroshi misalmot sa mga programa sa rehabilitasyon. Ang maayong diyeta ug ehersisyo naglig-on sa ilang mga kasingkasing, mao nga silang duha nakabalik sa trabaho. Ug ilang gipasidungog ang ilang pagkaayo sa panghunahuna ug sa emosyon ngadto sa makapalig-ong gahom sa espiritu sa Diyos.

Tungod sa pagpaluyo sa iyang Kristohanong mga igsoon, si Thomas nakabaton ug kaisog sa pag-atubang sa iyang operasyon. Siya miingon: “Sa wala pa ang operasyon, ang usa ka magtatan-aw miduaw kanako ug siya miampo uban kanako. Sa mainiton kaayong pangaliyupo, gihangyo niya si Jehova nga lig-onon ako. Niadtong gabhiona gihatagan kog bug-os nga pagtagad ang iyang pag-ampo ug mibating bulahan kaayo nga nakabaton ug mga ansiyano nga sama kaniya kansang empatiya panahon sa emosyonal nga mga yugto sa kaugalingon maoy bahin sa proseso sa pagkaayo.”

Si Anna, nga taga-Italya, misagubang sa depresyon niining paagiha: “Kon ako maluya, akong hunahunaon ang tanang panalangin nga ako nang nadawat ingong usa sa mga alagad sa Diyos ug ang mga panalangin nga moabot ubos sa Gingharian sa Diyos. Kini magtabang kanako nga mabatonan pag-usab ang kalinaw.”

Si Marie mapasalamaton sa tabang ni Jehova. Ang iyang pamilya nagpaluyo kaniya, ug siya nag-ingon: “Ang akong espirituwal nga mga igsoong lalaki ug babaye, nga ang matag usa may kaugalingong lulan nga pas-anon, migahin ug panahon sa pagduaw kanako, pagtelepono kanako, o pagpadalag mga kard. Sa unsang paagi ako magpabiling masulub-on tungod niining tanang gugma nga gipakita?”

Walay Mamingawong mga Kasingkasing

Gikaingon nga ang nagakaayong kasingkasing kinahanglang dili mamingawong kasingkasing. Ang pagpaluyo sa pamilya ug mga higala adunay dako, positibong bahin sa pagkaayo niadtong kansang mga kasingkasing kinahanglang sa literal ug masambingayon maalim.

Si Michael, nga taga-Habagatang Aprika, mikomento: “Lisod ang pagpatin-aw ngadto sa uban kon sama sa unsa ang pagkamasub-anon. Apan inigsulod nako sa Kingdom Hall, ang pagkamahunahunaon nga gipakita sa mga igsoon makapadasig ug makapalipay kaayo nako.” Si Henry, nga taga-Australia, nalig-on usab sa lalom nga gugma ug pagkamasinabtanon nga gipahayag sa iyang kongregasyon. Siya miingon: “Gikinahanglan ko gayod ang maong malumong mga pulong nga makapalig-on.”

Gipasalamatan ni Jorge ang lalom nga pagkamahunahunaon nga gipakita sa uban pinaagi sa pagtabang sa panalapi sa iyang pamilya hangtod nga siya nakaarang sa pagtrabaho. Si Olga, nga taga-Sweden, samang nagmapasalamaton sa praktikal nga tabang nga gihatag kaniya ug sa iyang pamilya sa daghang espirituwal nga mga igsoong lalaki ug babaye. Ang uban maoy namalit alang kaniya, samtang ang uban naghinlo sa iyang balay.

Kasagaran, ang mga masakiton sa kasingkasing kinahanglang magkunhod sa ilang pag-apil sa mga kalihokan nga ilang gusto. Si Sven, nga taga-Sweden, miasoy: “Usahay kinahanglang molikay ako sa pagsangyaw sa dihang ang panahon hanginon ug bugnaw kaayo, kay modasig kini sa pagkulo sa ugat. Gipasalamatan ko ang pagkamasinabtanon nga gipakita sa daghang kauban kong Saksi niining bahina.” Ug sa dihang maglubog sa banig, si Sven makapamati sa mga tigom tungod kay ang mga igsoon sa kamahigugmaon magrekord niana sa teyp. “Kanunay nila akong pahibaloon kon unsay nagakahitabo sa kongregasyon, ug tungod niana gibati ko nga samag usa ka entrante.”

Si Marie, nga naglubog sa banig, mibating bulahan tungod kay kadtong iyang ginatun-an sa Bibliya maoy moanha kaniya. Sa maong paagi siya makapadayon sa paghisgot sa kahibulongang umaabot nga iyang gipanan-aw sa unahan. Si Thomas mapasalamaton sa pagkamahunahunaon nga gipakita kaniya: “Ang mga ansiyano may dakong konsiderasyon ug nagkunhod sa mga asaynment nga ilang ginahatag kanako.”

Mga Pamilya Nagkinahanglag Pagpaluyo

Ang dalan mahimong samang lisod alang sa mga membro sa pamilya ug sa biktima. Sila mailalom sa hilabihang kapit-osan ug kahadlok. Mahitungod sa kabalaka sa iyang asawa, si Alfred, nga taga-Habagatang Aprika, miingon: “Sa pagpauli nako gikan sa ospital, sa makadaghan pukawon ako sa akong asawa sa magabii aron pagsusi kon maayo ra ba ako, ug pugson niya ako sa pagduaw sa doktor matag tulo ka bulan alang sa tsek-ap.”

Ang Proverbio 12:25 nagpahayag nga ‘ang pagkamabalak-on sa kasingkasing makapatikuko niini.’ Si Carlo, nga taga-Italya, miingon nga sukad sa iyang atake sa kasingkasing, ang iyang mahigugmaon ug mapaluyohong asawa “nahitumpawak sa depresyon.” Si Lawrence, nga taga-Australia, miingon: “Usa sa mga butang nga pagabantayan mao nga ginaatiman ang imong kapikas. Mahimong dako kaayo ang kalisdanan diha sa kapikas.” Busa, kinahanglang ibutang nato sa hunahuna ang mga panginahanglan sa tanan sa pamilya, lakip ang mga anak. Ang kahimtang makadaot sa ilang emosyon ug lawas.

Si James, nga gihisgotan sa among ikaduhang artikulo, nahimong hilomon human sa atake sa kasingkasing sa iyang amahan. Miingon siya: “Gibati ko nga ako dili na makalingawlingaw tungod kay sa dihang ako maglingawlingaw, may daotan nga mahitabo.” Sa pagpahayag sa iyang kahadlok ngadto sa iyang amahan ug pagpaningkamot nga maugmad ang maayong pagpakigkomunikar sa uban nakatabang sa paghupay sa iyang kabalaka. Nianang panahona may laing gihimo si James nga may dakong epekto sa iyang kinabuhi. Matod niya: “Gipauswagan ko ang akong personal nga pagtuon sa Bibliya ug pagpangandam alang sa among Kristohanong mga tigom.” Tulo ka bulan sa ulahi iyang gipahinungod ang iyang kinabuhi kang Jehova ug gipasimbolohan kana pinaagig bawtismo sa tubig. “Sukad niadto,” matod niya, “akong naugmad ang suod kaayong relasyon uban kang Jehova. Daghan gayod kaayo ang angay nakong pasalamatan kaniya.”

Human sa usa ka atake sa kasingkasing, ang usa kinahanglang magsusi pag-usab sa kinabuhi. Pananglitan, ang panglantaw ni John nausob. Matod niya: “Makita nimo ang kakawangan sa kalibotanong mga pangagpas ug makaamgo kon unsa ka hinungdanon ang gugma sa pamilya ug mga higala ug kon unsa ka bililhon kita kang Jehova. Ang akong relasyon uban kang Jehova, sa akong pamilya, ug akong espirituwal nga mga igsoong lalaki ug babaye labi pang hinungdanon karon.” Sa paghinumdom sa kasakitan sa iyang kasinatian, siya midugang: “Ako dili gayod makasagubang niini kon wala ang atong paglaom sa usa ka panahon nga pagatul-iron na kining mga butanga. Sa dihang ako masulub-on kaayo, akong palandongon ang umaabot, ug ang nagakahitabo karon mahimong daw walay bili.”

Samtang sila makaagom sa mga kalipayan ug mga kasub-anan sa dalan padulong sa pagkaayo, kining mga naluwas sa atake sa kasingkasing lig-ong nag-angkla sa ilang paglaom diha sa Gingharian nga alang niana gitudloan kita ni Jesu-Kristo sa pag-ampo. (Mateo 6:9, 10) Ang Gingharian sa Diyos magpatungha alang sa mga tawo sa kinabuhing walay kataposan diha sa kahingpitan sa usa ka paraisong yuta. Unya ang sakit sa kasingkasing ug ang tanang ubang depekto mawagtang na hangtod sa hangtod. Ang bag-ong kalibotan anaa lang sa unahan. Sa pagkatinuod, ang labing maayong kinabuhi maoy umaabot pa!​—Job 33:25; Isaias 35:5, 6; Pinadayag 21:3-5.

[Hulagway sa panid 13]

Ang pagpaluyo sa pamilya ug mga higala adunay positibong bahin sa pagkaayo