Mga Mini nga Propeta Karong Adlawa

SI Jeremias nag-alagad nga usa ka propeta sa Diyos sa Jerusalem sa panahong ang siyudad puno sa pagsimbag diyosdiyos, sa imoralidad, sa kahiwian, ug sa pag-ula sa inosenteng dugo. (Jeremias 7:8-11) Dili lang siya ang propeta nga aktibo niadtong panahona, apan kadaghanan nga uban maoy interesado-sa-kaugalingon ug hiwi. Sa unsang paagi? Nagpahayag si Jehova: “Gikan sa propeta bisan ngadto sa saserdote, ang matag usa nagagawi nga malimbongon. Ug sila nagsulay sa pag-ayo ug diyutay lamang sa kadaotan sa akong katawhan, sa pag-ingon, ‘Adunay pakigdait! Adunay pakigdait!’ sa diha nga walay pakigdait.”​—Jeremias 6:13, 14.

Gisulayan paghulagway sa mga mini nga propeta nga bisan pa sa tanang kahiwian sa yuta, ang kahimtang maayo, ug ang katawhan may pakigdait uban sa Diyos; apan kana dili tinuod. Naghulat kanila ang paghukom sa Diyos, sumala sa maisogong gimantala ni Jeremias. Ang tinuod nga propeta nga si Jeremias, dili mga mini nga propeta, nabayaw sa dihang gisunog sa Babilonyanhong mga sundalo ang Jerusalem niadtong 607 W.K.P., nga gilaglag ang templo, ug ang katawhan gipatay kaha o gidalang binihag ngadto sa halayong Babilonya. Ang makaluluoy nga pipilang nahibilin sa yuta mingkalagiw ngadto sa Ehipto.​—Jeremias 39:6-9; 43:4-7.

Unsay gibuhat sa mga mini nga propeta? “‘Ako batok sa mga propeta,’ nagaingon si Jehova, ‘ang mga nangawat sa akong mga pulong, ang tagsatagsa gikan sa iyang isigkatawo.’” (Jeremias 23:30) Gipangawat sa mga mini nga propeta ang gahom ug epekto sa mga pulong sa Diyos tungod sa pagdasig sa katawhan sa pagpamati sa kabakakan inay sa matuod nga pasidaan gikan sa Diyos. Sila nagsugilon, dili sa “kahibulongang mga butang sa Diyos,” kondili sa ilang kaugalingong mga ideya, mga butang nga buot madungog sa katawhan. Ang mensahe ni Jeremias tinuod nga gikan sa Diyos, ug kon ang mga Israelinhon nagsunod sa iyang mga pulong, maluwas unta sila. Ang mga mini nga propeta ‘nangawat sa mga pulong sa Diyos’ ug nag-agak sa katawhan ngadto sa katalagman. Kadto maoy sumala gayod sa gisulti ni Jesus mahitungod sa maluibong relihiyosong mga pangulo sa iyang adlaw: “Mga buta sila nga giya. Nan, kon ang usa ka tawong buta magagiya sa usa ka tawong buta, silang duha mahulog sa gahong.”​—Buhat 2:11; Mateo 15:14.

Sama sa adlaw ni Jeremias, nagalungtad karong adlawa ang mga mini nga propeta nga nag-angkong nagahawas sa Diyos sa Bibliya; apan sila usab nangawat sa mga pulong sa Diyos pinaagi sa pagwali sa mga butang makapalinga sa katawhan gikan sa tinuod ginasulti sa Diyos, pinaagi sa Bibliya. Sa unsang paagi? Tubagon nato kanang pangutanaha pinaagi sa paggamit, ingong sukdanan, sa paninugdang pagtulon-an sa Bibliya bahin sa Gingharian.

Ang Kamatuoran Mahitungod sa Gingharian

Gingharian sa Diyos ang dakong ulohan sa pagpanudlo ni Kristo, ug gihisgotan kinig kapin sa usa ka gatos ka beses diha sa Mga Ebanghelyo. Sa sinugdan sa iyang ministeryo, si Jesus miingon: “Kinahanglang ipahayag ko ang maayong balita sa gingharian sa Diyos, tungod kay alang niini ako gipadala.” Gitudloan niya ang iyang mga sumusunod sa pag-ampo: “Umanhi ang imong gingharian.”​—Lucas 4:43; 11:2.

Nan, unsa ba ang Gingharian? Sumala sa The New Thayer’s Greek English Lexicon, ang Gregong pulong gihubad “gingharian” diha sa Bibliya nagkahulogan nga nahauna, “harianong gahom, pagkahari, dominyo, pagmando” ug ikaduha, “ang teritoryo nga ilalom sa pagmando sa usa ka hari.” Gikan niini kita makataronganong makahinapos nga ang Gingharian sa Diyos maoy usa ka literal nga kagamhanan nga gidumala sa usa ka Hari. Matuod ba kini?

Oo, matuod, ug ang Hari walay lain kondili si Jesu-Kristo. Una sa pagkatawo ni Jesus ang manulondang si Gabriel miingon kang Maria: “Kini siya mahimong dako ug pagatawgong Anak sa Labing Hataas; ug igahatag kaniya ni Jehova nga Diyos ang trono ni David nga iyang amahan.” (Lucas 1:32) Ang pagdawat ni Jesus ug usa ka trono nagapamatuod nga siya usa ka Hari, Magmamando sa usa ka kagamhanan. Nagapamatuod usab nga ang Gingharian usa ka literal nga kagamhanan mao ang tagna ni Isaias: “Alang kanato ang usa ka bata natawo, alang kanato ang usa ka anak lalaki gihatag: ug ang kagamhanan igatungtong sa iyang abaga . . . Sa kauswagan sa iyang kagamhanan ug sa pakigdait walay kataposan.”​—Isaias 9:6, 7, King James Version.

Asa magamando si Jesus? Sa Jerusalem? Dili. Nakita sa propetang si Daniel ang usa ka panan-awon mahitungod sa pagdawat ni Jesus sa Gingharian, ug gipaila sa iyang panan-awon nga si Jesus didto sa langit. (Daniel 7:13, 14) Uyon kini sa paagi sa paghisgot ni Jesus sa Gingharian. Subsob niya kining gitawag “ang gingharian sa mga langit.” (Mateo 10:7; 11:11, 12) Uyon usab kini sa mga pulong ni Jesus kang Pilato sa gihusay si Jesus atubangan niya: “Ang akong gingharian dili bahin niining kalibotana. Kon ang akong gingharian bahin pa niining kalibotana, ang akong mga alagad makig-away unta aron ako dili igatugyan ngadto sa mga Hudiyo. Apan, sumala sa mao kini, ang akong gingharian dili gikan dinhi.” (Juan 18:36) Ang imo bang ministro o pari nagtudlo nimo nga ang Gingharian ni Jesus usa ka tinuod nga kagamhanan, nga nagmando gikan sa langit? O nagtudlo ba kini kanimo nga ang Gingharian mao lamay butang nga nagalungtad diha sa kasingkasing? Kon mao, siya nangawat sa mga pulong sa Diyos gikan kanimo.

Unsa ang relasyon tali sa kagamhanang Gingharian ug sa tanang nagkalainlaing matang sa tawhanong kagamhanan? Sumala sa The Encyclopedia of Religion, nga giedit ni Mircea Eliade, ang Repormador si Martin Luther, sa naghisgot ug Gingharian, misugyot: “Ang kalibotanong kagamhanan . . . mahimo usab nga tawgong gingharian sa Diyos.” Gitudlo sa pipila nga ang mga tawo, pinaagi sa kaugalingon nilang paningkamot, makapahimo sa tawhanong mga kagamhanan nga sama sa Gingharian sa Diyos. Niadtong 1983 ang Konsilyo sa mga Iglesya sa Kalibotan milig-on: “Samtang kita magpamatuod bahin sa atong tiunay nga tinguha alang sa kalinaw pinaagig tinong mga lihok, ang Espiritu sa Diyos makagamit sa atong huyang nga paningkamot sa pagdala sa mga gingharian niining kalibotan nga mas duol sa gingharian sa Diyos.”

Matikdi, hinunoa, nga sa Pag-ampo sa Ginoo (ang “Amahan Namo”) si Jesus nagtudlo sa iyang mga sumusunod sa pag-ampo nga moabot ang Gingharian sa Diyos ug niadto lamang nagsugo nila sa pag-ampo: “Mamatuman ang imong [sa Diyos] kabubut-on, dinhi sa yuta, maingon didto sa langit.” (Mateo 6:10) Sa laing pagkasulti, ang mga tawo dili mahimo nga magpaanhi sa Gingharian pinaagi sa pagbuhat sa kabubut-on sa Diyos. Ang pag-anhi sa Gingharian ang mopahinabo nga ang kabubut-on sa Diyos matuman sa yuta. Sa unsang paagi?

Pamati sa ginaingon sa tagna sa Daniel kapitulo 2, bersikulo 44: “Sa mga adlaw nianang mga haria [tawhanong mga magmamando sa panahon sa kataposan] ang Diyos sa langit magatukod ug usa ka gingharian nga dili gayod malaglag. . . . Kini magadugmok ug magalaglag niining tanan nga gingharian.” Dili katingad-an nga si Jesus miingon nga ang iyang Gingharian dili bahin niining kalibotana! Hinunoa, ang Gingharian magalaglag sa mga gingharian, sa mga kagamhanan, niining yutaa ug mopuli sa pagmando sa katawhan. Ingong ang hinatag-Diyos nga kagamhanan sa katawhan, kini unya magtino nga ang kabubut-on sa Diyos matuman sa yuta.

Ang hinungdan sa maong grabeng paglihok sa bahin sa Gingharian mas matin-aw sa dihang atong tagdon kon kinsay nagamando niining kalibotana. Misulat si apostol Juan: “Ang tibuok nga kalibotan nahiluna sa gahom sa usa nga daotan.” (1 Juan 5:19) “Ang usa nga daotan” mao si Satanas nga Yawa, si kinsa gitawag ni Pablo “ang diyos niining sistema sa mga butang.” (2 Corinto 4:4) Dili mahimo nga ang mga institusyon sa usa ka kalibotan kansang diyos mao si Satanas nga Yawa ikalangkit sa Gingharian sa Diyos.

Kini usa ka hinungdan nganong si Jesus wala mag-apil-apil sa politika. Sa diha nga gisulayan sa Hudiyong mga makinasod nga himoon siyang hari, siya milikay kanila. (Juan 6:15) Sumala sa atong nakita, prangka niyang giingnan si Pilato: “Ang akong gingharian dili bahin niining kalibotana.” Ug nahiuyon niini, siya miingon mahitungod sa iyang mga sumusunod: “Sila dili bahin sa kalibotan, maingon nga ako dili bahin sa kalibotan.” (Juan 17:16) Busa, ang relihiyosong mga pangulo nga nagatudlo nga ang pag-abot sa Gingharian sa Diyos mapadali pinaagi sa kauswagan sulod niining sistema sa mga butang ug nagadasig sa ilang mga panon sa pagsingkamot alang sa maong tumong maoy mga mini nga propeta. Ginakawat nila ang gahom ug epekto sa tinuod ginasulti sa Bibliya.

Nganong Hinungdanon Kini?

Kini bang tanan pangatarongan lamang nga intelektuwal? Dili gayod. Ang sayop nga mga pagtulon-an bahin sa Gingharian sa Diyos nakapahisalaag sa daghan ug nakaapektar sa dagan sa kasaysayan. Pananglitan, ang basahong Théo, usa ka Romano Katolikong ensiklopedia, nagaingon: “Ang katawhan sa Diyos nagaabante padulong sa Gingharian sa Diyos nga gisugdan ni Kristo sa yuta . . . Ang simbahan mao ang binhi sa maong Gingharian.” Ang paglangkit sa Iglesya Katolika sa Gingharian sa Diyos mihatag sa simbahan ug dako kaayong gahom sekular panahon sa matuotuohong Edad Media. Bisan karong adlawa, ang mga awtoridad sa simbahan nagasulay sa pag-impluwensiya sa dagan sa kahikayan sa kalibotan, nga nagabuhat pabor sa pila ka sistema politika ug kontra sa uban.

Usa ka komentarista mipahayag ug laing hunahuna nga kanat karong adlawa sa miingon siya: “Ang paagi sa rebolusyon mao ang gingharian kay ang rebolusyon mao ang pagkahiusa sa katawhan diha sa usa ka bag-ong katawhan, nga gihulhogan sa usa ka balaang simbolo nga gihatag pinaagi sa tawo sa kamatuoran​—si Jesus . . . si Gandhi . . . ang mga Berrigan.” Ang pagtudlo nga ang Gingharian sa Diyos mahimong mapauswag pinaagig politikanhong aktibismo ug dili pagtagad sa matuod nga mga kamatuoran bahin sa Gingharian miagak sa relihiyosong mga pangulo sa pagkandidato alang sa politikanhong katungdanan. Kana miagak sa uban nga malangkit sa sibil nga kagubot ug bisan pag-apil sa gerilyang pakig-away. Walay bisan hain niini nahiuyon sa kamatuoran nga ang Gingharian dili bahin niining kalibotana. Ug ang relihiyosong mga pangulo nga dulot nalangkit sa politika halayo sa pagkadili bahin sa kalibotan, sumala sa giingon ni Jesus nga mamao ang tinuod niyang mga tinun-an. Ang nagatudlo nga ang Gingharian sa Diyos makab-ot pinaagig politikanhong aksiyon maoy mga mini nga propeta. Ginakawat nila ang mga pulong sa Diyos gikan sa katawhan.

Kon ang relihiyosong mga pangulo sa Kakristiyanohan magtudlo gayod sa ginasulti sa Bibliya, ang ilang mga panon mahibalo nga ang Gingharian sa Diyos magsulbad gayod sa mga suliran sama sa kakabos, sakit, rasanhong kawalay-panag-angay, ug pagdaugdaog. Apan kana mao unyay sa nahaigong panahon sa Diyos ug sa paagi sa Diyos. Kana dili pinaagi sa reporma sa politikanhong mga sistema, nga mangahanaw inig-abot sa Gingharian. Kon ang maong mga klerigo maoy mga tinuod nga propeta, sila magtudlo unta sa ilang mga panon nga samtang magpaabot sa paglihok sa Gingharian sa Diyos, makaplagan nila ang tinuod, hinatag-Diyos, praktikal nga tabang sa pagsagubang sa mga sulirang gipahinabo sa mga pagkawalay-panag-angay niining kalibotana.

Sa kataposan, sila magtudlo unta sa ilang mga panon nga ang nagkadaotang mga kahimtang sa yuta nga nagpahinabog labihan nga kasakitan gitagna na diha sa Bibliya ug usa ka ilhanan nga duol na ang pag-abot sa Gingharian. Oo, ang Gingharian sa Diyos duol nang mobalda ug mopuli sa politikanhong mga gambalay karon. Pagkadako unya kana nga panalangin!​—Mateo 24:21, 22, 36-39; 2 Pedro 3:7; Pinadayag 19:11-21.

Katawhan Ilalom sa Gingharian sa Diyos

Unsay kahulogan sa pag-abot sa Gingharian sa Diyos alang sa katawhan? Aw, mahanduraw ba nimo nga ikaw mobangon matag buntag nga piskay kaayo? Walay usa nga imong kaila ang masakiton o himalatyon. Bisan ang imong mga minahal nga namatay gipasig-uli na kanimo pinaagi sa pagkabanhaw. (Isaias 35:5, 6; Juan 5:28, 29) Wala nay mga kabalaka sa pangabuhi nga gipahinabo sa hakog nga komersiyalismo o walay-panag-angay nga mga sistema ekonomiko. Ikaw may kaugalingong hayahay nga balay ug dakong yuta nga katamnan sa tanan nga gikinahanglan nimo sa pagpakaon sa pamilya. (Isaias 65:21-23) Bisan asa makalakaw ka sa bisan unsang takna sa adlaw o gabii nga dili mahadlok sa atake. Wala nay mga gubat​—walay bisan unsa nga maghulga sa imong kasegurohan. Ang tanan mabalak-on sa imong kaayohan. Wala na ang mga daotan. Magahari ang gugma ug pagkamatarong. Mahanduraw ba nimo ang ingon nga panahon? Kini ang matang sa kalibotan nga ipatungha sa Gingharian.​—Salmo 37:10, 11; 85:10-13; Miqueas 4:3, 4.

Usa ba lang kini ka panghanduraw? Dili. Basaha ang mga kasulatan nga gihisgotan sa naunang parapo, ug imong hisayran nga ang tanang gipamulong dinha nagsumbalik sa tinong mga panaad sa Diyos. Kon karon ka lang kahatagi ning tinuod nga hulagway kon unsay mabuhat ug buhaton sa Gingharian sa Diyos alang sa katawhan, nan may nangawat sa mga pulong sa Diyos gikan kanimo.

Ikalipay, ang kahimtang dili kinahanglang magpabilin sa ingon. Si Jesus miingon nga sa atong adlaw “kining maayong balita sa gingharian igawali sa tibuok gipuy-ang yuta alang sa usa ka pamatuod sa tanang nasod; ug unya ang kataposan moabot.” (Mateo 24:14) Ang magasin nga imong ginabasa maoy bahin sa maong buluhaton sa pagsangyaw. Gidasig ka namo sa paglikay nga malimbongan sa mga mini nga propeta. Tugkara ang Pulong sa Diyos sa pagkaplag sa kamatuoran mahitungod sa Gingharian sa Diyos. Unya, magpasakop sa maong Gingharian, nga usa ka tagana sa Dakong Magbalantay, si Jehova nga Diyos. Sa pagkamatuod, kini mao lamang ang paglaom sa tawo, ug dili kini mapakyas.

[Hulagway sa panid 5]

Mitudlo si Luther nga ang tawhanong kagamhanan mahimong isipon nga Gingharian sa Diyos

[Credit Line]

Kortesiya sa Trustees of the British Museum

[Hulagway sa panid 7]

Sama sa usa ka mahigugmaong Magbalantay, si Jehova pinaagi sa iyang Gingharian magpatunghag mga kahimtang nga dili ikapatungha sa tawo