Gasa ni Jehova nga Balaang Espiritu

“Unsa pa gayod ka labaw pa nga ang Amahan sa langit mohatag ug balaang espiritu sa mga nagapangayo kaniya!”​—LUCAS 11:13.

1, 2. (a) Unsang saad ang gipahayag ni Jesus mahitungod sa balaang espiritu, ug nganong kini tinuod makapalipay? (b) Unsa ang balaang espiritu?

SA TINGHUNLAK sa tuig 32 K.P. samtang si Jesus nagwali sa maayong balita sa Judea, siya namulong ngadto sa iyang mga tinun-an bahin sa kamahinatagon ni Jehova. Gigamit niya ang pila ka gamhanang sambingay ug unya gipahayag ang usa ka kahibulongang saad, nga miingon: “Kon kamo, bisan pag daotan, mahibalo nga mohatag ug maayong mga gasa ngadto sa inyong mga anak, unsa pa gayod ka labaw pa nga ang Amahan sa langit mohatag ug balaang espiritu sa mga nagapangayo kaniya!”​—Lucas 11:13.

² Makalipay gayod ang maong mga pulong! Samtang ginaantos nato ang kagubot sa kataposang mga adlaw niining kalibotana, ginasagubang ang pagdumot ni Satanas ug sa iyang mga demonyo, ug ginabuntog ang atong kaugalingong daotan nga mga hilig, makapadasig gayod ang pagkahibalo nga kita lig-onon sa Diyos pinaagi sa iyang espiritu. Sa pagkamatuod, imposible ang matinumanon nga pag-antos kon wala ang maong pagpaluyo. Nasinati ba nimo ang gahom sa maong espiritu, nga mao ang aktibong gahom sa Diyos? Nasabtan ba nimo unsa ka dako kini makatabang nimo? Gigamit ba nimo kini sa bug-os?

Ang Gahom sa Balaang Espiritu

3, 4. Iilustrar ang gahom sa balaang espiritu.

³ Tagda pag-una ang gahom sa balaang espiritu. Hinumdomi ang tuig 1954. Kana ang panahon nga ang usa ka bomba idrohena gipabuto sa Bikini Atoll sa South Pacific. Usa ka gutlo tapos sa pagbuto sa bomba, ang maong matahom nga isla nalukoban sa dako kaayong bolang kalayo ug gibatibati sa buto nga katumbas sa puwersa sa buto sa 15 milyong toneladang TNT. Diin ba gikan ang maong gahom sa paglaglag? Kadto resulta sa pagkabalhin ingon nga enerhiya sa gamay rang tipik sa uranium ug idrohena nga naglangkob nga uyok sa bomba. Apan, unsa man kon mahimo sa mga siyentipiko ang tugbang sa nahimo nila sa Bikini? Pananglit sila makasikop niadtong tanang kalayonhong enerhiya ug balhinon kanang pila ka librang uranium ug idrohena. Pagkatagsaon gayod unya ang maong kahimoan! Hinuon, gihimo ni Jehova ang susama apan sa dako kaayong sukod sa dihang “sa sinugdan gilalang [niya] ang mga langit ug ang yuta.”​—Genesis 1:1.

⁴ Si Jehova nagbaton ug labihan ka dakong reserba sa dinamikong enerhiya. (Isaias 40:26) Sa paglalang, gigamit gayod niya ang bahin sa maong enerhiya sa giumol niya ang tanang materya nga naglangkob sa uniberso. Unsay gigamit niya sa maong paglalang? Balaang espiritu. Mabasa nato: “Pinaagi sa pulong ni Jehova ang mga langit mismo nabuhat, ug pinaagi sa espiritu sa iyang baba ang tanan nilang panon.” (Salmo 33:6) Ug ang asoy sa paglalang sa Genesis mabasa: “Ang aktibong gahom [balaang espiritu] sa Diyos nagngadto-nganhi ibabaw sa nawong sa katubigan.” (Genesis 1:2) Pagkagamhanang puwersa ang balaang espiritu!

Milagrosong mga Buhat

5. Sa unsang hamiling mga paagi nagalihok ang balaang espiritu?

⁵ Ang balaang espiritu nagalihok pa sa hamili kaayong mga paagi. Nagagiya ug nagatultol kini sa langitnong organisasyon ni Jehova. (Ezekiel 1:20, 21) Sama sa enerhiyang ipagawas sa bomba idrohena, magamit kini sa malaglagong paagi aron ipatuman ang hukom diha sa mga kaaway ni Jehova, apan naglihok usab kini sa ubang mga paagi nga makadasig kanato sa pagkahingangha.​—Isaias 11:15; 30:27, 28; 40:7, 8; 2 Tesalonica 2:8.

6. Sa unsang paagi ang balaang espiritu nagpaluyo kang Moises ug sa mga anak sa Israel sa ilang mga pakiglabot sa Ehipto?

⁶ Pananglitan, mga 1513 W.K.P., si Jehova nagpadala kang Moises aron sa pag-atubang kang Paraon sa Ehipto aron pangayoon ang kagawasan alang sa mga anak sa Israel. Sulod sa nangaging 40 ka tuig, si Moises usa ka magbalantay ug kahayopan sa Midian, busa nganong si Paraon magpatalinghog man sa usa ka magbalantay? Tungod kay si Moises mianha sa ngalan sa bugtong matuod nga Diyos, si Jehova. Sa pagpamatuod niadto, si Jehova mihatag niyag gahom sa paghimog mga milagro. Katingalahan kaayo kadto sila nga bisan mga paring Ehiptohanon napugos sa pag-admitir: “Kini ang tudlo sa Diyos!”a (Exodo 8:19) Gipahinabo ni Jehova ang napulo ka hampak sa Ehipto, nga ang kataposan nagpugos kang Paraon sa pagpagawas sa katawhan sa Diyos gikan sa Ehipto. Sa dihang sa pagkagahian si Paraon uban sa iyang kasundalohan ming-agpas nila, ang mga Israelinhon nakaikyas sa dihang milagrosong gibuksan ang usa ka dalan agi sa Pulang Dagat. Ang Ehiptohanong kasundalohan nangapas nila ug nangalumos sa dagat.​—Isaias 63:11-14; Haggeo 2:4, 5.

7. (a) Unsa ang pila ka katarongan ang balaang espiritu nagpahinabog mga milagro? (b) Bisan pag ang mga milagro nga gipahinabo sa balaang espiritu wala na mahitabo, nganong ang talaan niana diha sa Bibliya makapalipay?

⁷ Oo, si Jehova pinaagi sa iyang espiritu mihimog gamhanang mga milagro alang sa mga Israelinhon sa panahon ni Moises, ug sa ubang panahon usab. Unsa ang katuyoan sa maong mga milagro? Gipausbaw nila ang mga katuyoan ni Jehova, gipahinabo nga ang iyang ngalan mailhan, ug gipasundayag ang iyang gahom. Ug may panahon, sama kang Moises, bug-os gipamatud-an niana nga ang usa ka indibiduwal nagbaton sa pagpaluyo ni Jehova. (Exodo 4:1-9; 9:14-16) Bisan pa niana, ang mga milagrong gipahinabo sa balaang espiritu panagsa ra sa tibuok kasaysayan.b Lagmit, kadaghanang indibiduwal nga nagpuyo sa panahon sa Bibliya wala gayod makasaksig milagro, ug karong adlawa sila wala na mahitabo. Bisan pa niana, samtang kita karong adlawa nakigbisog sa mga problema nga morag dili mabuntog, dili ba makapalipay ang pagkahibalo nga kon kita mangayo kang Jehova diha sa pagtuo, ihatag niya kanato ang samang espiritu nga nagpaluyo kang Moises sa atubangan ni Paraon ug nagbukas sa dalan alang sa mga Israelinhon agi sa Pulang Dagat?​—Mateo 17:20.

Dinasig nga mga Sinulat

8. Unsa ang papel sa balaang espiritu sa paghatag sa Napulo ka Sugo?

⁸ Tapos sa pagkagawas nila sa Ehipto, gidala ni Moises ang mga Israelinhon ngadto sa Bukid sa Sinai, diin gihimo ni Jehova ang usa ka pakigtugon uban kanila ug gihatag kanila ang iyang Kasugoan. Usa ka dakong bahin sa maong Kasugoan nga gihatag pinaagi ni Moises mao ang Napulo ka Sugo, ug ang orihinal nga mga kopya niana nakulit ibabaw sa mga papan nga bato. Sa unsang paagi? Pinaagi sa balaang espiritu. Ang Bibliya nagaingon: “Karon sa natapos [si Jehova] sa pagpakigsulti kaniya sa Bukid sa Sinai siya mihatag kang Moises ug duha ka papan nga bato sa Pamatuod, mga papan sa bato nga gisulatan sa tudlo sa Diyos.”​—Exodo 31:18; 34:1.

9, 10. Sa unsang paagi ang balaang espiritu aktibo sa pagsulat sa Hebreohanong Kasulatan, ug sa unsang paagi dayag kini gikan sa mga ekspresyong gigamit sa mga tinun-an ni Jesus?

⁹ Dugang sa Napulo ka Sugo, si Jehova pinaagi sa iyang espiritu mihatag sa Israel ug gatosan ka mga balaod ug mga kalagdaan aron magagiya sa kinabuhi sa matinuohong mga lalaki ug mga babaye. Ug dugang kasulatan ang umaabot pa. Kasiglohan tapos sa adlaw ni Moises, ang mga Levihanon mipamatuod diha sa usa ka publikong pag-ampo kang Jehova: “Ikaw nagmatinugoton [sa mga Israelinhon] sa daghang katuigan ug padayong nagpamatuod batok kanila pinaagi sa imong espiritu pinaagi sa imong mga propeta.” (Nehemias 9:5, 30) Daghang dinasig nga tagna nga gipahayag sa maong mga propeta nahisulat. Dugang pa, ang balaang espiritu mitukmod sa mga tawong matinuohon sa pagsulat sa sagradong mga kasaysayan ug kinasingkasing nga mga awit sa pagdayeg.

¹⁰ Si Pablo naghisgot niining tanang sinulat sa miingon siya: “Ang tibuok nga Kasulatan gidasig sa Diyos.” (2 Timoteo 3:16; 2 Samuel 23:2; 2 Pedro 1:20, 21) Sa pagkamatuod, sa pagkutlo niining mga kasulatana, ang unang-siglong mga tinun-an ni Jesus sagad mogamit sa mga ekspresyong sama sa “ang balaang espiritu namulong . . . pinaagi sa baba ni David,” “ang balaang espiritu tukmang namulong pinaagi kang Isaias,” o yanong “ang balaang espiritu nagaingon.” (Buhat 1:16; 4:25; 28:25, 26; Hebreohanon 3:7) Pagkadakong panalangin nga ang samang balaang espiritu nga nag-impluwensiya sa pagsulat sa Balaang Kasulatan nagtipig kanila aron kini makagiya ug makahatag kanatog kalipay niining adlawa!​—1 Pedro 1:25.

Pagsalig sa Balaang Espiritu

11. Unsang kalihokan sa espiritu ang nakita labot sa pagtukod ug tabernakulo?

¹¹ Samtang nagkampo ang mga Israelinhon sa tiilan sa Bukid sa Sinai, gisugo sila ni Jehova sa pagtukod ug usa ka tabernakulo ingong sentro sa matuod nga pagsimba. Sa unsang paagi mabuhat nila kana? “Si Moises miingon ngadto sa mga anak sa Israel: ‘Tan-awa, si Jehova nagtawag pinaagi sa ngalan kang Bezalel nga anak ni Uri nga anak ni Hur sa tribo sa Juda. Ug iyang gipuno siya pinaagi sa espiritu sa Diyos sa kinaadman, sa salabotan ug sa kahibalo ug sa tanang matang sa pagkabatid sa buhat.’” (Exodo 35:30, 31) Ang balaang espiritu mipausbaw sa kinaiyanhong kahanas nga naangkon ni Bezalel, ug siya malamposong nakadumala sa pagtukod niadtong talagsaong tinukod.

12. Sa unsang paagi ang espiritu naglig-on sa mga indibiduwal sa talagsaong mga paagi tapos sa panahon ni Moises?

¹² Sa ulahing panahon, ang espiritu ni Jehova milihok diha kang Samson, nga mihatag niyag labaw-tawhanong kusog aron makaluwas siya sa Israel gikan sa mga Pilistehanon. (Maghuhukom 14:5-7, 9; 15:14-16; 16:28-30) Sa ulahi pa, si Solomon gihatagag linaing kinaadman ingong hari sa piniling katawhan sa Diyos. (2 Cronicas 1:12, 13) Ilalom niya, ang Israel nagmauswagon kaayo, ug ang malipayong kahimtang niadto nahimong sumbanan alang sa mga panalangin nga mapahimuslan sa katawhan sa Diyos ilalom sa Milenyong Paghari ni Kristo Jesus, ang Labaw nga Solomon.​—1 Hari 4:20, 25, 29-34; Isaias 2:3, 4; 11:1, 2; Mateo 12:42.

13. Sa unsang paagi madasig kita karong adlawa sa talaan sa paghatag sa espiritu ug kusog kang Bezalel, Samson, ug Solomon?

¹³ Pagkadakong panalangin nga si Jehova nagpahinabo nga makabaton kita sa mao mismong espiritu! Sa dihang mobati kita nga kulang ug katakos sa pagtuman sa usa ka asaynment o pagpakig-ambit sa buluhatong pagwali, kita makahangyo kang Jehova nga ihatag kanato ang samang espiritu nga iyang gihatag kang Bezalel. Sa dihang kita may sakit o magaantos ug paglutos, ang samang espiritu nga naghatag kang Samson ug ekstraordinaryong kusog magpalig-on kanato, bisan tuod, siyempre, dili sa milagrosong paagi. Ug sa dihang moatubang kitag lisod nga mga suliran o kinahanglang mohimog importanteng mga desisyon, kita makahangyo kang Jehova, kinsa mihatag kang Solomon ug ekstraordinaryong kinaadman, sa pagtabang nato nga molihok nga maalamon. Dayon, sama kang Pablo, kita moingon: “Alang sa tanang butang ako adunay kusog tungod kaniya nga nagahatag ug gahom kanako.” (Filipos 4:13) Ug ang saad ni Santiago mapadapat kanato: “Kon may si bisan kinsa kaninyo nga kulang ug kaalam, papangayoa siya sa Diyos, kay siya nagahatag nga madagayaon sa tanan ug dili mamuyboy; ug kini igahatag kaniya.”​—Santiago 1:5.

14. Kinsa, sa karaang panahon ug karong adlawa, ang gisuportahan sa balaang espiritu?

¹⁴ Ang espiritu ni Jehova diha usab kang Moises sa iyang buluhaton sa paghukom sa nasod. Sa gitudlo ang uban pa aron sa pagtabang kang Moises, si Jehova miingon: “Pagakuhaon ko ang pipila sa espiritu nga anaa kanimo ug ibutang ko kana kanila, ug sila magatabang kanimo sa pagpas-an sa lulan sa katawhan aron dili nimo kana pas-anon, nga ikaw lamang.” (Numeros 11:17) Busa, kadtong mga lalakiha dili kinahanglang molihok sa ilang kaugalingong kusog. Gisuportahan sila sa balaang espiritu. Atong mabasa nga sa ulahing mga okasyon, ang espiritu ni Jehova diha sa ubang indibiduwal. (Maghuhukom 3:10, 11; 11:29) Sa gidihogan ni Samuel si David ingong umaabot nga hari sa Israel, ang talaan nagaingon: “Gikuha ni Samuel ang sungay sa lana ug gidihogan siya sa taliwala sa iyang mga igsoon. Ug ang espiritu ni Jehova misugod sa paglihok diha kang David sukad niadtong adlawa.” (1 Samuel 16:13) Kadtong si kinsa karong adlawa may bug-at nga mga responsabilidad​—pamilya, kongregasyon, o organisasyonal​—malipay sa pagkasayod nga ang espiritu sa Diyos nagasuportar gihapon sa iyang mga alagad samtang ginaatiman nila ang ilang mga katungdanan.

15. Sa unsang paagi ang balaang espiritu nagpalig-on sa organisasyon ni Jehova (a) sa mga adlaw ni Haggeo ug Zacarias? ug (b) karong adlawa?

¹⁵ Mga usa ka libo ka tuig tapos sa adlaw ni Moises, ang mga matinuohon gikan sa taliwala sa mga anak sa Israel namalik sa Jerusalem gikan sa Babilonya nga may komisyon nga tukoron pag-usab ang templo. (Esdras 1:1-4; Jeremias 25:12; 29:14) Ugaling lang, mitungha ang lisod nga mga kababagan ug sila naluya sulod sa daghang katuigan. Sa kataposan, gipatungha ni Jehova ang mga propeta nga si Haggeo ug Zacarias aron sa pagdasig sa mga Hudiyo nga dili mosalig sa kaugalingon nilang kusog. Apan sa unsang paagi malampos ang buluhaton? “‘Dili pinaagi sa kusog militar, ni sa gahom, kondili pinaagi sa akong espiritu,’ nagaingon si Jehova sa mga panon.” (Zacarias 4:6) Ug tungod sa pagpaluyo sa espiritu sa Diyos, ang templo natukod. Ang katawhan sa Diyos karong adlawa susamang dakog nahimo. Ang pagwali sa maayong balita nakalapnag sa tibuok yuta. Minilyong mga tawo ginatudloan sa kamatuoran ug pagkamatarong. Ang mga kombensiyon giorganisar. Ang mga Kingdom Hall ug mga sangang-buhatan gitukod. Kadaghanan niini nahimo bisan pa sa mapait nga pagsupak. Apan ang mga Saksi ni Jehova wala mangaluya, kay nasayod nga ang tanan nga ilang nahimo maoy, dili sa kusog militar, ni sa gahom sa tawo, kondili pinaagi sa espiritu sa Diyos.

Espiritu sa Diyos sa Unang Siglo

16. Unsa ang kasinatian sa una-Kristohanong mga alagad ni Jehova bahin sa kalihokan sa espiritu sa Diyos?

¹⁶ Sumala sa atong nakita, ang una-Kristohanong mga alagad sa Diyos nasayod kaayo sa gahom sa espiritu sa Diyos. Sila nagsalig niana sa pagtabang nila sa pagtuman sa bug-at nga mga katungdanan ug sa pagbuhat sa kabubut-on sa Diyos. Nahibalo usab sila nga ang Kasugoan ug ubang sagradong mga kasulatan maoy dinasig, nga gisulat ubos sa impluwensiya sa espiritu ni Jehova, ug sa ingon kana maoy ‘Pulong sa Diyos.’ (Salmo 119:105) Apan, komosta man ang bahin sa Kristohanong panahon?

17, 18. Unsay pipila ka milagrosong pagpadayag sa espiritu sa Kristohanong panahon, ug unsang katuyoan ang naalagaran niini nila?

¹⁷ Ang unang siglo sa atong Komong Panahon nakakita usab ug kahibulongang mga kalihokan sa espiritu sa Diyos. Dihay pagpanagna nga gidasig sa espiritu. (1 Corinto 14:1, 3) Ingong katumanan sa saad ni Jesus kanang maong balaang espiritu magpahinumdom sa iyang mga tinun-an sa tanang butang iyang gipamulong ug magatudlo kanilag dugang mga bahin sa kamatuoran, nga daghang basahon nasulat ubos sa impluwensiya sa balaang espiritu. (Juan 14:26; 15:26, 27; 16:12, 13) Ug dihay mga milagro, sumala sa pagahisgotang bug-os pa sa among sunod artikulo. Sa pagkamatuod, ang unang siglo gipasulod pinaagig usa ka talagsaong milagro. Sa mga tuig 2 W.K.P., natawo ang usa ka linaing bata, ug ingong ilhanan, ang iyang batan-ong inahan usa ka ulay. Sa unsang paagi nahitabo kana? Pinaagi sa balaang espiritu. Ang talaan nagaingon: “Ang pagkatawo ni Jesu-Kristo maoy niining paagiha. Sa panahon nga ang iyang inahan nga si Maria gikasaad sa kaminyoon alang kang Jose, siya nakaplagan nga nagsamkon pinaagi sa balaang espiritu una sila mahiusa.”​—Mateo 1:18; Lucas 1:35, 36.

¹⁸ Sa dihang dako na si Jesus, siya nagpagulag mga demonyo, nag-ayo sa mga masakiton, nagbanhaw pa sa mga patay sa gahom sa balaang espiritu. Pipila sa iyang mga sumusunod naghimo usab ug mga milagro ug gamhanang mga buhat. Kadtong linaing mga katakos maoy mga gasa sa espiritu. Unsa ang katuyoan niadto? Sama sa nahimo sa unang mga milagro, kadto nagpausbaw sa mga katuyoan sa Diyos ug nagpadayag sa iyang gahom. Dugang pa, kadto nagpasundayag sa katiunay sa pangangkon ni Jesus nga siya gipadala sa Diyos; ug sa ulahi, kadto nagpamatuod nga ang unang-siglong Kristohanong kongregasyon mao ang piniling nasod sa Diyos.​—Mateo 11:2-6; Juan 16:8; Buhat 2:22; 1 Corinto 12:4-11; Hebreohanon 2:4; 1 Pedro 2:9.

19. Sa unsang paagi ang atong pagtuo napalig-on sa asoy sa Bibliya bahin sa mga milagro ni Jesus ug sa iyang mga apostoles?

¹⁹ Bisan pa niana, si apostol Pablo miingon nga kadtong milagrosong mga pagpadayag sa espiritu maoy iya sa pagkabag-o pa sa kongregasyon ug mahanaw ra, busa karong adlawa kita wala makakita sa maong mga milagro nga gipahinabo sa balaang espiritu. (1 Corinto 13:8-11) Sa gihapon, ang mga milagro nga gihimo ni Jesus ug sa iyang mga apostol dili lamang makaiikag sa makasaysayanhong paagi. Kana nagapalig-on sa atong pagtuo diha sa saad sa Diyos nga ang sakit ug kamatayon wala na unyay dapit ilalom sa pagmando ni Jesus diha sa bag-ong kalibotan.​—Isaias 25:6-8; 33:24; 65:20-24.

Kaayohan Gikan sa Balaang Espiritu sa Diyos

20, 21. Sa unsang paagi kita makapahimulos sa tagana nga balaang espiritu?

²⁰ Pagkagamhanan kining maong espiritu! Apan sa unsang paagi ang mga Kristohanon karong adlawa makabaton niana? Nahauna, si Jesus miingon nga angay kitang mangayo niana, busa nganong dili himoon kana? Pag-ampo kang Jehova nga hatagan ka niining kahibulongang gasa dili lang sa panahon sa kalisod kondili sa tanang higayon. Dugang pa, basaha ang Bibliya aron ang balaang espiritu makasulti kanimo. (Itandi ang Hebreohanon 3:7.) Palandonga ang imong gibasa ug ipadapat kana aron ang balaang espiritu mahimong impluwensiya diha sa imong kinabuhi. (Salmo 1:1-3) Dugang pa, pakig-uban​—sa tinagsa, diha sa mga kongregasyon, ug panahon sa mga asembliya—​sa uban nga nagasalig sa espiritu sa Diyos. Tugob kaayo nga ang balaang espiritu nagalig-on niadtong si kinsa nagadayeg sa ilang Diyos “diha sa nagkatigom nga mga panon”!​—Salmo 68:26.

²¹ Dili ba si Jehova usa ka mahinatagon nga Diyos? Siya nagaingon nga kinahanglang kita mangayo lamang sa balaang espiritu ug iya kanang igahatag kanato. Pagkabinuang ang pagsalig sa atong kaugalingong kaalam ug kusog sa dihang ang maong gamhanang tabang mahimo natong mabatonan! Hinuon, adunay ubang mga butang nga may kalabotan sa espiritu sa Diyos nga magaapektar kanato ingong mga Kristohanon, ug kini pagahisgotan sa sunod artikulo.

[Footnote]

Makatubag Ka ba sa Mosunod nga mga Pangutana?

◻ Giunsa paglalang ni Jehova ang tanang materya sa uniberso?

◻ Unsa ang pila ka paagi ang balaang espiritu naglihok sa una-Kristohanong panahon?

◻ Sa unsang paagi makapalipay kanato ang pagkasayod kon unsay nahimo sa balaang espiritu sa karaang panahon?

◻ Sa unsang paagi kita makapahimulos sa tagana nga balaang espiritu?

[Hulagway sa panid 10]

Ang espiritu nga mihatag kang Samson ug labaw-tawhanong kusog makahatag natog gahom alang sa tanang butang