“Ang Iyang Mahigugmaong-Kalulot Napamatud-ang Dako”

SUMALA SA GIASOY NI JOSÉ VERGARA OROZCO

Ikaw ba naghunahuna nga ang imong kinabuhi mahimong mapuno ug bag-ong kadasig sa 70 ka tuig nga panuigon? Ang akoa nahimo. Ug kadto maoy 35 ka tuig kanhi. Pinaagi sa

mahigugmaong-kalulot ni Jehova, sukad sa 1962, ako nakaalagad ingong usa ka regular payunir ug sukad 1972, ako usa ka magtatan-aw payunir nga ministro sa El Carrizal Congregation sa mga Saksi ni Jehova diha sa estado sa Jalisco, Mexico. Tugoti ako sa pagsugilon kaninyo sa akong kaagi.

AKO natawo sa estado sa Michoacán, sa Mexico, sa Agosto 18, 1886. Ang akong amahan usa ka Mason, busa ang among pamilya wala magatambong sa Katolikong Simbahan, ni kami nagaapil sa bisan unsang relihiyosong selebrasyon sa Katoliko ni dunay mga relihiyosong imahen sa among balay.

Sa dihang ako 16 anyos na, ang akong amahan mibiya sa pagtrabaho sa Tinipong Bansa, apan siya naghikay nga may usa ka tawo nga motudlo nako sa usa ka matang sa trabaho. Duha ka tuig sa ulahi, hinuon, ang tawo nagdala kanako sa Siyudad sa Mexico aron bansayon sa militaryong akademya. Pagkahuman niana ako misugod ug usa ka karera diha sa Mexicanong kasundalohan.

Pagsundalo ug Human Niana

Ako nakig-away sa Rebolusyon sa Mexico nga nagsugod niadtong 1910. Kaming tanan nga mga batan-ong lalaki sa akademya mipaluyo kang Francisco I. Madero, kinsa usa ka rebolusyonaryong misupak sa pagkadiktador ni Porfirio Díaz. Among gipaluyohan si Madero hangtod sa iyang kamatayon niadtong 1913, ug human niana, among gisuportahan si Venustiano Carranza, kinsa nag-alagad ingong presidente sa Republika gikan 1915 hangtod 1920. Kami gitawag ug Carranzistas.

Sa upat ka lainlaing hitabo, ako misulay, nga wala molampos, sa paggawas sa pagkasundalo. Sa kataposan ako milayas ug nahimong kagiw. Ingong sangpotanan, ang akong amahan, kinsa nakabalik sa Mexico, gibilanggo. Usa ka adlaw, nga nagpakaaron-ingnon nga pag-umangkon, akong gibisitahan siya sa bilanggoan. Kami nagkomunikar pinaagig pagsulatay sa gamayng mga piraso sa papel aron ang mga guwardiya dili makadungog kanamo. Sa pagsanta kang bisan kinsa sa pagdiskobre kon kinsa ako, akong gikaon ang papel.

Human mapahigawas ang akong amahan gikan sa bilanggoan, gibisitahan niya ako ug gihangyo sa pagsurender sa mga awtoridad. Gihimo nako kadto, ug sa akong katingala ang heneral nga gitokahan wala moaresto kanako. Inay, siya misugyot kanako nga ako mobalhin ngadto sa Tinipong Bansa. Akong gisunod ang iyang sugyot ug nagpuyo didto gikan sa 1916 hangtod 1926.

Niadtong 1923, giminyoan nako ang usa ka Mexicana nga nagpuyo usab sa Tinipong Bansa. Ako nakakat-on sa trabaho sa konstruksiyon, ug kami nagsagop ug usa ka batang babaye. Sa dihang siya 17 ka bulan pa lamang, kami mingbalik sa Mexico ug nagpuyo sa Jalpa, Tabasco. Unya ang ‘Cristero nga rebelyon’ nagsugod, ug kini milungtad gikan 1926 hangtod 1929.

Ang mga Cristeros gusto nga moapil ako kanila. Ang akong pamilya ug ako, hinuon, nagpalabi sa pagkalagiw ngadto sa Estado sa Aguascalientes. Pagkatapos magpuyo sa lainlaing mga dapit sa republika sa Mexico, pagka 1956 mipuyo kami sa Matamoros, Tamaulipas, diin ako nagsugod pagkapatas sa mga trabaho sa konstruksiyon.

Kausaban sa Akong Kinabuhi

Kini mao ang panahon sa dihang ang akong kinabuhi nagsugod sa pagbag-o. Ang akong anak babaye, kinsa pagkakaron naminyo ug nagpuyo tabok sa utlanan diha sa Brownsville, Texas, T.B.A., mobisita kanamo kanunay. Usa ka adlaw siya miingon: “Dad, daghang mga pamilya nagatigom diha sa lawak tigomanan sa komunidad. Mangadto ta ug atong tan-awon kon bahin sa unsa man kana.” Kadto maoy asembliya sa mga Saksi ni Jehova. Ang akong anak babaye, umagad, apo nga lalaki, asawa, ug ako mitambong sa tanang upat ka adlaw nga asembliya.

Sukad niadtong tuiga padayon, kami nagtambong sa Kristohanong mga tigom sa mga Saksi ni Jehova. Miuswag ako sa espirituwalidad didto sa Mexico, samtang ang akong anak babaye nakaarang didto sa Tinipong Bansa. Sa wala madugay ako nagsugilon sa akong mga kauban sa trabaho sa mga kamatuoran sa Bibliya nga akong nakat-onan. Ako nagdawat ug napulo ka mga magasin sa matag isyu sa Ang Bantayanang Torre ug Pagmata!, nga akong iapod-apod sa akong mga kaubanan sa trabaho. Lima niadtong diha sa opisina ug tulo ka mga enhinyero maingon sab sa pila ka mga trabahante nahimong mga Saksi.

Oh, bugnaw kadto nga Disyembre 19, 1959, sa dihang ako gibawtismohan sa suba! Ang tanan nga gibawtismohan nianang adlawa nagmasakit tungod sa hilabihang katugnaw sa tubig. Ang akong anak babaye nabawtismohag una nako, ug ang akong asawa, bisag wala gayod siya mabawtismohi, nakaabot na sa punto sa pagkahibalo sa kamatuoran sa Bibliya, ug siya mapaluyohon kaayo.

Ang Bug-os-Panahong Pagministeryo

Ako mibati nga utangan ngadto sa Diyos alang sa tanang iyang mahigugmaong-kalulot, busa sa Pebrero 1962, sa dihang ako 75 anyos, ako nagsugod sa bug-os-panahon nga ministeryo ingong usa ka payunir. Pila ka tuig sa ulahi, sa 1968, ang akong asawa namatay. Buot nakong moalagad sa laing nasod, apan tungod sa akong edad, ang mga kaigsoonan wala maghunahuna nga kini makaayo. Hinuon, sa 1970, ako giasayn ingong usa ka payunir sa Colotlán diha sa estado sa Jalisco, diin dihay gamay nga kongregasyon.

Sa pagka Septiyembre 1972, ang magtatan-aw sa sirkito nagsugyot nga ako mobalhin ngadto sa gamayng lungsod sa El Carrizal, nga duol sa Colotlán. Pagka Nobyembre nianang tuiga, usa ka kongregasyon gitukod didto, ug ako gitudlo nga ansiano. Bisan tuod kini hilit kaayo nga lungsod, mokabat ug 31 ang nagatambong sa mga tigom sa kongregasyon.

Bisan pa sa akong edad, ako sa gihapon aktibo diha sa ministeryo, nga nagatinguha pag-ayo sa pagtabang sa mga tawo sa pagpangatarongan bahin sa ilang mga tinuohan. Pananglitan, diha sa Rosaryo ang sinserong mga Katoliko nagasublisubli sa Maghimaya Ka Maria: ‘Maghimaya ka, Maria, napuno ka sa grasya; ang Ginoo nagauban kanimo.’ Ang pag-ampo nagadugang: ‘Santa Maria, Inahan sa Diyos.’ Akong sukiton sila: ‘Sa unsang paagi kana mahitabo? Kon ang Diyos mao ang usa nga makaluwas ni Maria, sa unsang paagi nga Siya sa samang panahon iyang anak?’

Ako karon 105 anyos na ang katigulangon ug nagaalagad ingong ansiano ug ingong regular nga payunir sa El Carrizal, Jalisco, latas sa hapit 20 ka tuig. Nabati nako nga kini kabubut-on ni Jehova nga ako mabuhi ning daghang katuigan, sanglit pinaagi niini ako makabawi sa panahon nga akong nawala sa dihang ako wala magaalagad Kaniya.

Usa ka butang akong natun-an mao nga kita kinahanglan kanunay magbatog pagsalig nga ang atong Supremong Maghuhukom nagabantay kanato gikan sa iyang matarong nga trono ug nagatagana kanato sa atong panginahanglan. Sama sa gihubit diha sa Salmo 117:2: “Alang kanato ang iyang mahigugmaong-kalulot napamatud-ang dako.”