Mga Pangutana Gikan sa mga Magbabasa

Si Paraon ba sa aktuwal naminyo kang Sara, ang asawa ni Abraham, ingon sa gipakita sa hubad sa Genesis 12:19 diha sa pila ka mga bersiyon sa Bibliya?

Wala, si Paraon napugngan sa pagkuha kang Sara (Sarai) ingong iyang asawa. Busa, ang dungog ug dignidad ni Sara wala makompromiso.

Kita matabangan sa pagsabot niini pinaagi sa pagsusi sa kahimtang diha sa iyang konteksto. Usa ka kagutom ang nakapugos ni Abraham (Abram) sa pagdangop sa Ehipto sa makadiyot. Siya nakuyawan nga ang iyang kinabuhi mameligro didto tungod sa iyang matahom nga asawa, si Sara. Si Abraham wala pa makabatog anak nga lalaki pinaagi ni Sarah, busa kon siya mamatay sa Ehipto, ang linya sa Binhi maputol, ang Binhi nga pinaagi kaniya mapanalanginan ang tanang mga pamilya sa yuta. (Genesis 12:1-3) Busa si Abraham nagsugo kang Sara sa pagpaila sa iyang kaugalingon ingong iyang igsoong babaye, sanglit sa pagkatinuod siya iyang igsoong babaye sa amahan.​—Genesis 12:10-13; 20:12.

Ang iyang kahadlok dili kay walay pasikaranan. Ang eskolar nga si August Knobel nagsaysay: “Si Abram naghangyo kang Sarai sa pagpresentar sa iyang kaugalingon ingong iyang igsoong babaye sa Ehipto aron siya dili patyon. Kon siya pagailhon ingong usa ka minyong babaye, ang usa ka Ehiptohanon makakuha kaniya pinaagi sa pagpatay sa iyang bana ug tag-iya; kon siya pagaisipon ingong usa ka igsoong babaye, dunay kalagmitan sa pag-amoral kaniya gikan sa iyang igsoong lalaki pinaagig panagsabot.”

Ang Ehiptohanong mga prinsipe, hinuon, wala makigsabot kang Abraham mahitungod sa pagpakigminyo ni Paraon kang Sara. Sila sa yano nagdala sa maanyag nga Sara ngadto sa balay ni Paraon, ug ang magmamando sa Ehipto naghatag ug mga gasa sa iyang gituohang igsoong lalaki, si Abraham. Apan human niini, si Jehova mihapak sa panimalay ni Paraon pinaagi ug mga hampak. Sa dihang ang tinuod nga kahimtang napadayag ngadto kang Paraon diha sa wala mahisgoti nga paagi, siya nag-ingon kang Abraham: “Nganong ikaw nag-ingon, ‘Siya akong igsoong babaye,’ mao nga ako hapit nang mokuha kaniya ingong akong asawa? Ug karon ania ang imong asawa. Dad-a siya ug lumakaw!”​—Genesis 12:14-19.

Ang The New English Bible ug ubang mga hubad sa Bibliya naghubad sa itaas italikong bahin sa bersikulo “mao nga ako mikuha kaniya ingong usa ka asawa” o susamang pagkapulong. Samtang dili gayod usa ka sayop nga paghubad, ang samang pamulong mahimong makahatag ug panabot nga si Paraon sa aktuwal naminyo kang Sara, nga ang kaminyoon maoy usa ka natapos nga hitabo. Tingali mamatikdan nga diha sa Genesis 12:19 ang Hebreohanong berbo nga gihubad “mokuha” maoy naa sa di-hingpit nga kahimtang, nga nagatimaan sa usa ka buhat nga wala pa matapos. Ang New World Translation naghubad niining Hebreohanong berbo nga uyon sa konteksto ug sa paagi nga sa tataw nagasumbalik sa kahimtang sa berbo “mao nga ako hapit nang mokuha kaniya ingong akong asawa.”a Bisag si Paraon maoy “hapit nang mokuha” kang Sara ingong iyang asawa, siya wala pa moagi sa bisan unsang mga tulomanon o seremonya nga nalangkit.

Si Abraham sa subsob gisaway tungod sa iyang paagi sa pagsulbad sa kahimtang, apan siya milihok alang sa intereses sa gikasaad nga Binhi ug sa ingon sa tanang katawhan.​—Genesis 3:15; 22:17, 18; Galacia 3:16.

Sa ikatanding nga kahimtang nga lagmit kuyaw, si Isaac nagsugo sa iyang asawa, si Rebeka, sa paglikay sa pagtug-an sa iyang minyong kahimtang. Sa maong yugto ang ilang anak nga lalaki si Jacob, nga pinaagi kaniya ang linya sa Binhi moabot, natawo na ug dayag usa na ka batan-ong lalaki. (Genesis 25:20-27; 26:1-11) Bisan pa niana, ang motibo luyo ning makataronganong taktika mahimong sama gayod sa kang Abraham. Sa panahon sa kagutom si Isaac ug iyang pamilya nanimuyo diha sa teritoryo sa Pilistihanong hari nga ginganlag Abimelech. Kon iyang mahibaw-an nga si Rebeka maoy minyo kang Isaac, basin si Abimelech magtinguha sa pagpatay sa tanan nga nahibilin sa pamilya ni Isaac, nga magkahulogan unta sa kamatayon alang kang Jacob. Niining kasoha usab, si Jehova nanghilabot aron pagpanalipod sa iyang mga alagad ug sa linya sa Binhi.

[Footnote]