Ang mga Larawan ba Makapasuod Kanimo sa Diyos?

DAGHANG Ehiptohanon, Babilonyanhon, ug Gresyanhong mga larawan nagpuno sa mga museo karong adlawa. Ang mga estatuwa nga niadto gihimaya karon gidispley ingong karaang mga obra maestra. Ang ilang gahom maoy handurawan lamang sa mga tawong nagsimba kanila. Sa pagdagan sa panahon ang mga tawo nga naghimaya kanila, ang ginaingong gahom sa mga larawan nahanaw usab. Ang larawan giyagyag ingong walay-gahom​—nga sa tinuod ingon sila niana sukad—​walay-kinabuhing mga butang nga hinimo sa kahoy, bato, o metal.

Unsay ikasulti mahitungod sa mga larawan nga gihimaya ug gisimba sa mga tawo karon? Kini bang mga larawana mas gamhanan kay sa karaang Ehiptohanon, Babilonyanhon, ug Gresyanhong mga larawan? Sila ba tinuod nga kasangkapan sa pagtabang sa tawo nga labi pang masuod sa Diyos?

Uban sa paglabay sa matag kaliwatan, ang katawhan mopatim-aw nga dugang ug dugang nagakalayo gikan sa Diyos. Ug unsay mahimo sa tanang mga larawan sa kalibotan niana? Kon pasagdan, matigom lamang diha kanila ang abog ug sa ulahi matata o kaha madunot. Kon sila dili makaatiman sa ilang kaugalingon, labi nang wala silay mahimo alang sa mga tawo. Labing hinungdanon, hinunoa, unsay gipamulong sa Bibliya mahitungod niining butanga?

Mahalon, Inadornohan, Apan Walay-Kapuslanan

Dili ikahibulong, giyagyag sa Bibliya ang mga larawan ingong walay-kapuslanan ug dili gayod makatabang sa nagdeboto kanila nga labi pang masuod sa Diyos. Bisag mahal ug inadornohan ang relihiyosong mga larawan, ang Bibliya nagpakita sa ilang tinuod nga bili sa dihang kini nag-ingon: “Ang ilang mga diyosdiyos mao ang salapi ug bulawan, binuhat sa mga kamot sa mga tawo. Sila adunay baba, apan sila dili makasulti; sila adunay mga mata, apan dili sila makakita; sila adunay mga igdulongog, apan sila dili makadungog. Sila adunay mga ilong, apan sila dili makapanimaho. Sila adunay mga kamot, apan sila dili makahikap. Sila adunay mga tiil, apan sila dili makalakaw; ni makasulti sila pinaagi sa ilang tutunlan. Ang mga nanagbuhat kanila nahisama kanila, ang tanan nga mosalig kanila.”​—Salmo 115:4-8.

Dili lamang giyagyag sa Bibliya ang mga diyosdiyos ingong walay-kapuslanan kondili naghisgot usab kini nga mahukmanon mahitungod sa mga larawan ug sa mga nagasimba kanila: “Sila sama sa mga pahoy diha sa kaumahan sa pepino, ug dili makasulti. Sila kinahanglang pas-anon, kay dili man makalakaw. Ayaw kahadlok kanila, kay dili sila makabuhat ug daotan ug, ni makahatag sila ninyo ug kaayohan. Ang tagsatagsa ka tawo nagalihok nga walay-salabotan mao nga sila walay-kahibalo. Ang tagsatagsa ka magsasalsal sa bulawan mapakaulawan tungod sa linilok nga larawan; kay ang iyang tinunaw nga larawan kabakakan man, ug walay gininhawa diha kanila. Sila kakawangan man, usa ka buhat sa limbong.”​—Jeremias 10:5, 14, 15.

Ang Hunahuna sa Katoliko

Daghan, matuod, sa nagduko, nag-ampo, ug nagdagkot ug mga kandila ug naghalok sa relihiyosong mga larawan wala maglantaw sa ilang kaugalingon nga mga magsisimbag mga diyosdiyos o mga magsisimbag larawan. Pananglitan, nangangkon ang mga Katoliko nga sila naghimaya sa mga larawan ni Kristo ug Maria, dili tungod kay ang mga larawan mismo may pagkadiyos, kondili ang gihawasan sa mga larawan. Ang The World Book Encyclopedia nag-ingon nga “sa Romano Katoliko nga Iglesya, ang mga larawan gihimaya ingong mga simbolo sa mga tawo nga gihawasan nila.” Ang Katolikong kaklerohan nagwali nga tukma ang paghimaya sa usa ka larawan basta ang paghimaya mas ubos sa kalidad nga igahatag ngadto sa Diyos mismo.

Ang kamatuoran mao nga kining maong mga larawan gihimaya. Bisan ang New Catholic Encyclopedia miadmiter nga ang maong paghimaya maoy “usa ka buhat sa pagsimba.” Apan, si Jesu-Kristo wala magtugot sa paggamit ug mga larawan ingong mga tabang sa pagduol sa Diyos dihang siya miingon: “Walay bisan kinsa ang makaadto sa Amahan gawas kon pinaagi kanako.” (Juan 14:6) Nan, dili ikahibulong, nga ang unang-siglong mga Kristohanon wala mogamit ug mga larawan sa pagsimba.

Bisan pa, karong adlawa ang mga relihiyon sa Kakristiyanohan nanghawod sa tanang ubang relihiyon sa pagbaton ug daghang mga larawan. Oo, bisan pa sa tanang makasaysayanhon ug Kasulatanhon nga ebidensiya nga nagyagyag sa kabuangan sa paghimaya sa usa ka larawan, ang nagaangkong mga Kristohanon sa tibuok-kalibotan nagpadayon sa pagduko ug pagsimba atubangan sa mga larawan sa ilang tim-os nga pagpangita sa Diyos. Ngano?

Nabitik sa Usa ka Kaaway

Ang propetang si Isaias miingon nga ang mga magsisimba sa larawan sa iyang adlaw napakyas sa pagkakita sa kabuangan sa ilang mga buhat tungod kay ang ilang mga mata “gitaptapan aron sila dili makakita, aron ang ilang mga kasingkasing dili makasabot.” (Isaias 44:18) Kinsa ang posibleng makahatag ug ingon niana nga impluwensiya sa mga tawo? Ang konsilyo sa 754 K.P. nga nagabatok sa pagsimbag mga larawan mideklarar nga ang pagsimbag mga larawan gipailaila ni Satanas alang sa katuyoan sa pagbitik sa tawo palayo gikan sa matuod nga Diyos. Husto ba kining konklusyona?

Oo, kay kini nahisubay sa dinasig nga Bibliya, nga nag-ingon sa kasiglohang milabay nga ang pangunang kaaway sa Diyos, si Satanas nga Yawa, “nagabuta sa mga hunahuna” sa mga tawo aron ang kamatuoran “dili makadan-ag.” (2 Corinto 4:4) Busa dihang maghimaya ug usa ka larawan, inay masuod sa Diyos, ang usa aktuwal nga nagaalagad sa intereses sa mga demonyo.​—1 Corinto 10:19, 20.

Magpasuod sa Diyos

Ang mga larawan dili makatabang kanato sa pagpasuod sa Diyos. Ang Dakong Maglalalang, si Jehova nga Diyos, nagadumot sa pagsimba ug mga larawan. (Deuteronomio 7:25) “Si Jehova nga Diyos nagapangayo ug eksklusibong debosyon.” (Nahum 1:2) Siya nag-ingon: “Ako mao si Jehova. Kini mao ang akong ngalan; ug ang akong himaya dili nako igahatag sa uban, ni ang akong pagdayeg sa linilok nga mga larawan.” (Isaias 42:8) Busa, ang Bibliya nagpasidaan nga kadtong nagasimba sa mga larawan “dili makapanunod sa gingharian sa Diyos.”​—Galacia 5:19-21.

Bisan pa, si Jehova maoy usa ka maluloy-on ug mapinasayloon nga Diyos. Ang Bibliya naghisgot mahitungod niadtong nagadangop sa Diyos gikan sa ilang mga diyosdiyos ug gipahayag nga matarong human mihunong sa ilang mga buhat sa pagsimba ug mga diyosdiyos. (1 Corinto 6:9-11; 1 Tesalonica 1:9) Ilang gisunod ang mga pulong ni Jesus: “Ang Diyos Espiritu, ug ang magasimba kaniya kinahanglang magasimba kaniya sa espiritu ug sa kamatuoran.”​—Juan 4:24.

Ang usa ka matukion nga pagtuon sa Bibliya mopadayag nga dili malisod ang magpasuod sa Diyos. (Buhat 17:26-28) Siya maoy usa ka mainiton, mahigugmaon, dali nga maduol nga personalidad, ug iya kita nga gidapit ug nagadahom nga atong ugmaron ang usa ka suod nga relasyon uban kaniya.​—Isaias 1:18.

Ang mga Saksi ni Jehova nagadapit kanimo sa pagkuha ug kahibalo bahin sa atong langitnong Amahan ingong Persona, sa pagtuon mahitungod sa iyang ngalan, si Jehova, ug bahin sa iyang mga hiyas ug mga pakiglabot sa katawhan. Pinaagi sa mga panid sa iyang Pulong, ang Bibliya, ikaw makadangat sa pagkahibalo nganong dili na kinahanglan pa ang mga tabang sa panan-aw, sama sa mga rebulto ug mga larawan, sa pagduol sa Diyos. Oo, “magpasuod sa Diyos, ug siya magpasuod kanimo.”​—Santiago 4:8.

[Kahon sa panid 6]

Ang mga Manalaysay Nag-ingon Nga . . .

◻ “Iladong kamatuoran nga ang Buddhismo, nga natukod sa ikaunom nga siglo WKP, wala makakita sa unang larawan sa magtutukod niini hangtod sa mga unang siglo KP.”

◻ “Sa daghang kasiglohan, ang tradisyon sa Hindu sa lintunganay walay mga imahen ug mga larawan.”

◻ “Ang Hinduismo ug Buddhismo nagsugod nga walay mga imahen ug mga larawan ug anam-anam nga midawat sa mga larawan sa ilang pagsimba. Ang Kristiyanidad mao usay gihimo.”​—The Encyclopedia of Religion, ni Mircea Eliade.

◻ “Gikan sa nagkalainlaing mga asoy sa Bibliya matin-aw nga ang tinuod nga pagsimba sa Diyos walay mga larawan. . . . Diha sa BT [Bag-ong Tugon], usab, ang pagsimba sa langyaw nga mga diyosdiyos ug mga imahen ginadili.”​—New Catholic Encyclopedia.

◻ “Ang mga larawan wala-hiilhi sa pagsimba sa unang mga Kristohanon.”​—Cyclopedia of Biblical, Theological, and Ecclesiastical Literature, ni McClintock ug Strong.

◻ “Wala gayoy makita diha sa Bag-ong Tugon, ni sa bisan unsang tinuod nga mga sinulat sa unang katuigan sa Kristiyanidad, nga gigamit ang mga rebulto o mga larawan sa pagsimba sa mga Kristohanon, sa publiko man o sa pribado.”​—A Concise Cyclopedia of Religious Knowledge, ni Elias Benjamin Sanford.

◻ “Ang unang mga Kristohanon malisang unta nga motan-aw bisan sa yanong pagsugyot sa pagbutang ug mga larawan diha sa mga simbahan, ug nagaisip sa pagduko o pagsimba sa atubangan kanila nga samag pagsimba ug mga diyosdiyos.”​—History of the Christian Church, ni John Fletcher Hurst.

◻ “Sa unang iglesya, ang paghimo ug paghimaya sa mga hulagway ni Kristo ug sa mga santo gisupak gayod.”​—The New Encyclopedia Britannica.

◻ “Bisan tuod ang unang Iglesya dili supak sa arte, kini walay mga larawan ni Kristo.”​—Schaff-Herzog Encyclopedia of Religious Knowledge.

[Hulagway sa panid 7]

Gipasiugda ni Jesus nga ang Diyos nagapangita niadtong “nagasimba sa Amahan sa espiritu ug sa kamatuoran”