Molampos ba ang mga Plano Alang sa Internasyonal nga Kasegurohan?

“ANG Bugnawng Gubat, nga mihakop sa kalibotan sa kapig 40 ka tuig, sa tabang sa Diyos morag natapos na,” mipahayag ang One World, usa ka magasin sa WCC (World Council of Churches). “Ang makahuloganong mga panghitabo sa Sentral ug Silangang Uropa . . . morag maayo nga timailhan sa kalinaw ug kasegurohan sa Uropa ug sa ubang bahin sa kalibotan,” midugang ang Anglikanong manunulat si John Pobee, sa Programme on Theological Education sa WCC.

Ang mga hawas sa WCC dili mao lamang ang naglangkit sa Diyos uban sa mga plano sa tawo alang sa internasyonal nga kasegurohan. Sa Abril 1991, dili dugay pagkatapos sa gubat sa Persianhong Gulpo, si Papa Juan Paulo nagpadalag usa ka mensahe ngadto sa nianang panahona sekretaryo-heneral sa HK si Javier Pérez de Cuéllar nga niana siya nag-ingon: “Ang mga obispo sa Katolikong mga Simbahan sa Tungang Sidlakan ug sa Kasadpan may pagsalig sa trabaho sa Hiniusang Kanasoran . . . Nagalaom sila nga, pinaagi sa Hiniusang Kanasoran ug sa iyang espesyalisadong mga organisasyon, kadtong si kinsa nabutang sa usa ka kahimtang nga may grabeng kawalad-on tungod sa gubat dili mapakyas sa pagkaplag sa internasyonal nga pagkamabination ug pagkausa.”

Dugang pa, ang Batikano maoy usa sa 35 ka Estado nga mipanday ug mipirma sa 1975 Helsinki nga Kasabotan ug sa 1986 Stockholm nga Dokumento. Sa gideklarar sa Hiniusang Kanasoran ang 1986 ingong “Internasyonal nga Tuig sa Kalinaw,” ang papa mibalos pinaagi sa pagdapit ug mga hawas sa dagkong mga relihiyon sa kalibotan nga mosalmot sa usa ka saulog sa “Tibuok-Kalibotang Adlaw sa Pag-ampo Alang sa Kalinaw.” Niadtong Oktubre 1986, ang mga hawas sa Buddhista, Hindu, Islamiko, Shinto, Anglikano, Luterano, Gregong Ortodokso, Hudiyo, ug ubang mga relihiyon nagkauban sa paglingkod sa Assisi, Italya, ug nagbanosbanos sa pag-ampo alang sa kalinaw sa kalibotan.

Pila ka tuig sa ulahi, diha sa usa ka sermon nga gipahayag niya sa Roma, ang Anglikanong Arsobispo sa Canterbury naghinumdom sa okasyon sa itaas. “Sa Assisi,” matud pa niya, “atong nakita nga ang Obispo sa Roma [ang papa] makapatingob sa Kristohanong mga Simbahan. Kita makaampo sa tingob, makapahayag sa tingob ug makabuhat sa tingob alang sa kalinaw ug kaayohan sa katawhan . . . Niadtong maong inisyatibo sa pag-ampo alang sa kalinaw sa kalibotan gibati ko nga diha sa presensiya sa Diyos nga miingon ‘Tan-awa akong ginabuhat ang usa ka bag-ong butang.’”

Ang ubang mga relihiyon, bisan tuod walay hawas didto sa Assisi, malaomon usab mahitungod sa mga plano sa tawo alang sa internasyonal nga kasegurohan. Usa ka editoryal diha sa Die Kerkbode, ang opisyal nga magasin sa Dutch Reformed Church sa South Africa, miingon: “Atong nasinati ang pagkabalhin ngadto sa usa ka bag-ong kahikayan sa kalibotan. Ang butang nga daw dili mapalandong pila ka tuig kanhi nagakahitabo atubangan sa atong mga mata mismo. Ang pag-uliay nga nagakahitabo sa dako pang talan-awon sa kalibotan tali sa Unyon Sobyet ug sa Kasadpan dunay kahulogan sa luag pang rehiyon. Sa atong bahin sa kalibotan, ang naandan magkaatbang nga mga partido ug dili-magkauliay nga mga kaaway nagaestoryahay sa usag usa, ug ang awhag padulong sa ‘kalinaw’ nagagimaw sa bisan diin . . . Gikan sa Kristohanong panglantaw, ang tanang paningkamot sa pagpatunghag kalinaw tali sa katawhan angay kahinangpan. Kita makaampo alang sa kalinaw sa atong panahon.”

Ang Diyos nagapanalangin ba sa mga plano sa tawo alang sa internasyonal nga kasegurohan?

Unsay Ginaingon sa Bibliya?

Kon mahitungod sa pagsalig sa tawhanong mga paningkamot, ang Bibliya nagahatag ug prangkang pasidaan: “Ayaw ninyo ibutang ang inyong pagsalig diha sa mga tawong hamili, ni diha sa anak sa yutan-ong tawo, nga kaniya walay kaluwasan. Ang iyang espiritu mogula, siya mobalik sa iyang yuta; nianang adlawa ang iyang mga hunahuna mahanaw.” (Salmo 146:3, 4) Ang pag-uswag karong adlawa padulong sa kalinaw morag makapadasig. Apan kinahanglang magmaminatud-on kita. Limitado ang mga gahom sa mga tawo. Sagad, ang mga panghitabo dagko pa kay kanila. Sila talagsa rang makasabot sa mga nagpahiping katuyoan, sa natagong mga puwersa, nga makapatuwang sa ilang maayong-pagkapahimutang nga mga plano.

Pito ka gatos ka tuig una sa panahon ni Jesus, sa mga adlaw sa propetang si Isaias, ang Hudiyong mga lider nagplano alang sa kasegurohan pinaagig internasyonal nga mga tratado uban sa kasikbit nga mga nasod sa paaging susama sa nagakahitabo karong adlawa. Niadtong mga adlawa usab, gipaluyohan sa relihiyosong mga pangulo ang gibuhat sa mga politiko. Apan nagpasidaan si Isaias: “Planoha ninyo ang usa ka laraw, ug kini mabungkag! Isulti ang usa ka pulong, ug kini dili mobarog.” (Isaias 8:10) Ang ilang laraw misangpot nga usa ka malaglagong kapakyasan. Ang samang butang mahitabo ba karong adlawa?

Oo, kini mahimong mahitabo, sanglit pinaagi sa mao mismong propeta, ang Diyos mipahibalo nga Siya dunay Iyang kaugalingong paagi sa pagpatunghag kasegurohan sa yuta. Kini unya maoy, dili pinaagig tawhanong organisasyon, kondili pinaagi sa usa ka kaliwat sa Israelinhong hari nga si David. (Isaias 9:6, 7) Ang maong Manununod ni Haring David mao si Jesu-Kristo, si kinsa, sa gisukitsukit ni Poncio Pilato, miangkon nga siya usa ka Hari apan miingon: “Ang akong gingharian dili bahin niining kalibotana.” (Juan 18:36; Lucas 1:32) Sa pagkamatuod, ang Gingharian ni Jesus maoy langitnon. Ug kini​—dili ang Hiniusang Kanasoran o bisan unsang yutan-ong politikanhong nasod​—ang magpatunghag malungtaron, kasaligan nga kasegurohan nganhi ning yutaa.​—Daniel 2:44.

Gitagna ni Jesu-Kristo nga ang iyang Gingharian magsugod sa pagmando gikan sa mga langit sa usa ka panahon sa dihang aduna unyay “mga gubat ug mga dinungogdungog sa mga gubat,” uban sa ‘nasod nga motindog batok sa nasod ug gingharian batok sa gingharian.’ Ang pagkatuman sa tagna nagatimaan sa 1914 ingong panahon sa pagkahitabo niana ug nagapaila sa katuigan sukad niadto ingong “ang konklusyon sa sistema sa mga butang.”​—Mateo 24:3, 6-8.

Unsay kahulogan niini? Nga ang panahong nahibilin alang niining kahikayan karon sa kalibotan maoy limitado, ug sa dili madugay kini matapos na. Kana ba usa ka hinungdan sa kabalaka o kasubo? Dili kon atong hinumdoman ang kapintasan, inhustisya, pagdaogdaog, panaggubat, ug tanang pag-antos nga nagtimaan niining sistema sa mga butang. Tinong usa ka kahupayan unya nga mailalom sa usa ka magmamando nga mahitungod kaniya ang Pulong sa Diyos, ang Bibliya, nagaingon: “Diha kaniya ang espiritu ni Jehova mopuyo, ang espiritu sa kaalam ug pagsabot, ang espiritu sa tambag ug kagahom, ang espiritu sa kahibalo ug ang pagkahadlok kang Jehova.”​—Isaias 11:2.

Tinuod nga Kasegurohan sa Yuta

Sa tinuod, walay tinuod nga kasegurohan sa yuta hangtod nga, ubos sa Gingharian sa Diyos, ang tagna ni Isaias matuman sa tibuok-kalibotang gilapdon: “Ako nagalalang sa bag-ong mga langit ug sa usa ka bag-ong yuta; ug ang unang mga butang dili na pagahinumdoman, ni motungha pa sa kasingkasing.” (Isaias 65:17) Walay sapayan unsa ka daghang pag-ampo ang itanyag sa relihiyosong mga lider alang niining kalibotana, ang tawhanong mga plano alang sa internasyonal nga kasegurohan dili makapuli sa paagi sa Diyos sa pagpatunghag kalinaw ug kasegurohan.

Ang tibuok-kalibotan, permanenteng kasegurohan nga ipasulod sa Gingharian sa Diyos maoy mahimayaon unya. Aniay usa ra sa mga kabatbatan nga hikaplagan diha sa Bibliya: “Ilang pagasalsalon ang ilang mga espada ngadto sa mga punta sa daro ug ang ilang mga bangkaw ngadto sa mga galab. Sila dili mobakyaw ug espada, nasod batok sa nasod, ni sila makakat-on pa sa gubat. Ug sila magalingkod, ang matag usa ilalom sa iyang parras ug ilalom sa kahoyng iyang igira, ug walay mausa ang makapakurog kanila; kay ang baba mismo ni Jehova sa mga panon ang nagsulti niini.”​—Miqueas 4:3, 4.

Ang kasegurohan lamang nga gipasalig sa Diyos mismo ang mahimong permanente ug kasaligan. Busa, imbes ibutang ang imong pagsalig diha sa mga tawong hamili, nganong dili ibutang ang imong pagsalig diha kaniya? Unya imong hisayran nga matuod ang mga pulong sa salmista: “Malipayon ang usa nga nagbaton sa Diyos ni Jacob alang sa iyang panabang, kansang paglaom maoy diha kang Jehova nga iyang Diyos, ang Magbubuhat sa langit ug sa yuta, sa dagat, ug sa tanan nga anaa diha kanila, ang Usa nga nagabantay sa kamatuoran hangtod sa panahong walay katinoan.”​—Salmo 146:5, 6.

[Kahon sa panid 7]

Ang Iglesya Katolika ug Internasyonal nga Politika

“Bisan tuod si Kristo miingon nga ang iyang gingharian ‘dili niining kalibotana,’ ang tag-as-katungdanang mga klerigo ug ang papado ingong usa ka institusyon mingsalmot nga mainiton sa internasyonal ug nasodnong mga panagbangi sa politika sukad sa panahon ni Constantino.”​—The Catholic Church in World Politics, ni Propesor Eric Hanson sa Jesuit Santa Clara University.