Kon Unsay Kahulogan sa Gingharian sa Diyos Alang sa Kadaghanan
SI Jesu-Kristo masubsob nga naghisgot bahin sa Gingharian sa Diyos. Bahin niini ang manalaysay nga si H. G. Wells misulat: “Talagsaon gayod ang importansiya nga gihatag ni Jesus sa pagtulon-an nianang iyang gitawag nga Gingharian sa Langit, samtang gipakawalay-bili kini sa paagi ug pagtulon-an sa kadaghanang mga relihiyon sa Kakristiyanohan. Kini nga doktrina sa Gingharian sa Langit, nga mao ang pangunang pagtulon-an ni Jesus, ug nga nagadula lamang ug gamayng bahin diha sa Kristohanong mga doktrina, sa pagkamatuod mao ang usa sa lahi kaayo nga mga doktrina nga nakapukaw ug nakausab sukad sa tawhanong hunahuna.”
Nganong ang mga relihiyon sa Kakristiyanohan gamay ra man kaayog gisulti bahin sa Gingharian sa Diyos? Ang usa ka rason tingali mao ang pagduhaduha mahitungod sa Gingharian. Unsang mga hunahuna ang gituohan bahin niana?
Kon Giunsa Paglantaw ang Gingharian
Gilangkit sa pipila ang Gingharian sa Diyos uban sa Iglesya Katolika. Human gidawat sa mga obispo si Imperador Constantino ingong ilang pangulo diha sa Konsilyo sa Nicaea sa tuig 325 K.P., ang iglesya miapil-apil sa politika, ug ang mga tawo gisultihan nga miabot na ang Gingharian. Ang Encyclopædia Britannica misaysay nga sumala sa teolohiya ni Augustine (354-430 K.P.), “ang Gingharian sa Diyos nagsugod na niining kalibotana dungan sa pagkatukod sa iglesya” ug nga “anaa na sa mga sakramento sa iglesya.”
Gilantaw sa uban ang Gingharian sa Diyos ingong usa ka tawhanong paningkamot. Ang mao gihapong ensiklopedia nag-ingon: “Ang Repormasyong mga iglesya . . . sa ulahi nahimong institusyonal rehiyonal nga mga iglesya, nga sa baylo misugpo sa pagpaabot sa kataposan-sa-panahon” mahitungod sa pag-abot sa Gingharian sa Diyos. Si H. G. Wells misulat: “Gibayloan sa mga tawo diha sa ilang mga kinabuhi ang Gingharian sa Diyos ug ang panag-igsoonay sa katawhan ug mas buhi nga mga kamatuoran, Pransiya ug Inglaterra, Balaang Russia, Espanya, Prussia . . . Sila mao ang tinuod ug buhi nga mga diyos sa Uropa.”
Sa modernong panahon usab, ang Gingharian gihimong sekular. Ang Encyclopædia Britannica misaysay: “Pananglitan niini mao ang kaisipan nga ang tawo mao ang mangandam sa usa ka hingpit nga katilingban sa umaabot pinaagi sa pagtukod ug pag-organisar niini ug nga ang ‘paglaom’ ug ‘pagpaabot’ gipulihan sa tawhanong paningkamot.” Mahitungod sa “sosyal nga ebanghelyo,” ang mao gihapong reperensiyang basahon nagpadayon: “Gilantaw niining kalihokana ang Kristohanong mensahe sa Gingharian sa Diyos ingong usa ka panukmod alang sa pag-organisar pag-usab sa sekular nga mga kahimtang sa katilingban sumala sa sukdanan sa Gingharian sa Diyos.”
Gilantaw usab sa daghang mga Hudiyo ang Gingharian ingong makab-ot sa tawo. Sa 1937 nga komperensiya sa Reform nga mga rabbi sa Columbus, Ohio, U.S.A., miingon: “Atong gilantaw kini ingong atong makasaysayanhong buluhaton ang pakigkooperar uban sa tanang tawo diha sa pagkatukod sa gingharian sa Diyos, sa unibersohanong panag-igsoonay, hustisya, kamatuoran ug pakigdait sa yuta. Kini mao ang atong mesiyanikong tumong.”
Laing kaylap nga gituohang kaisipan mao nga ang Gingharian sa Diyos maoy usa ka kondisyon sa kasingkasing sa tawo. Sa Tinipong Bansa, pananglitan, ang Southern Baptist Convention sa 1925 mideklarar: “Ang Gingharian sa Diyos mao ang pagmando sa Diyos diha sa kasingkasing ug kinabuhi sa indibiduwal diha sa matag tawhanong relasyon, ug diha sa tanang porma ug institusyon sa organisadong katilingban. . . . Ang Gingharian sa Diyos mabug-os na dihang ang matag hunahuna ug kabubut-on sa tawo mabihag sa kabubut-on ni Kristo.”
Busa, ang iglesya ba mao ang Gingharian sa Diyos? Kana ba nga Gingharian mapatungha sa sekular nga paagi? Kini ba maoy kondisyon sa kasingkasing? Ug unsay kahulogan sa Gingharian sa Diyos alang kanimo?