Nahinumdom Ka Ba?

Nakaplagan mo bang mapuslanon kanimo ang dili pa dugayng mga isyu sa Ang Bantayanang Torre? Nan nganong dili sulayan ang imong panumdoman sa mosunod:

▫ Unsa ang pangunang katuyoan sa mga pagpang-ayo ni Jesus? Kini gipasundayag, alang sa pagdasig sa dakong panon sa samag-karnero nga mga tawo karong adlawa, ang mga makalabang-buhi sa Armageddon pagaayohon sa dili madugay human sa Armageddon. (Isaias 33:24; 35:5, 6)​—12/15, panid 12.

▫ Nganong atong gikinahanglan ang kanunayng pahinumdom: “Lumahutay kamo sa pag-ampo”? (Roma 12:12) Ang mga kapit-os sa kinabuhi ug mga responsabilidad tingalig mabug-at ra kaayo kanato nga usahay kita makalimot sa pag-ampo. O kaha madaog kita sa mga problema, mopahinabo kanato sa paghunong sa pagmaya sa paglaom sa Gingharian, mohunong pa gani sa pag-ampo. Busa, atong gikinahanglan ang mga pahinumdom nga modasig kanato sa pag-ampo ug niining paagiha mas masuod pa kita kang Jehova.​—12/15, panid 14.

▫ Unsay nagpamatuod nga ang Lunop sa adlaw ni Noe maoy dili-makalimtan sa tawhanong rasa? Gibanabana nga kapin sa 500 ka kasugiran sa Lunop ang gikasugilon sa kapin sa 250 ka tribo ug katawhan. Ang pila ka paninugdang kaamgiran makita niining tanang mga kasugiran.​—1/15, panid 5.

▫ Sa unsang paagi ang bakak nga mga propeta karon maoy sama sa bakak nga mga propeta sa adlaw ni Jeremias? Ang bakak nga mga propeta karong adlawa nagpangangkon nga naghawas sa Diyos, apan nangawat sila sa mga pulong sa Diyos pinaagi sa pagmantala sa mga butang nga makabalda sa mga tawo sa pagpamati sa tinuod nga gipamulong sa Bibliya. Ilabinang matuod kini labot sa pagtulon-an sa Gingharian. (Jeremias 23:30)​—2/1, panid 4.

▫ Unsay gipasabot sa dihang ang usa pagabawtismohan diha sa ngalan sa balaang espiritu? Kini nagpasabot nga ang usa nga gibawtismohan andam nga mokooperar sa espiritu, dili mohimog bisan unsa sa pagbalda sa paglihok niini taliwala sa katawhan ni Jehova. Busa, ang usa kinahanglang mokooperar uban sa matinumanon ug maalamong ulipon ug sa kahikayan sa ansiano sa kongregasyon. (Hebreohanon 13:7, 17; 1 Pedro 5:1-4)​—2/1, panid 18.

▫ Nganong ang pagsimba sa larawan makadaot gayod sa magsisimba? Ang Bibliya nagpakita nga ang mga larawan maoy dulumtanan alang kang Jehova nga Diyos ug dili makatabang sa ilang mga magsisimba nga masuod sa Diyos. (Deuteronomio 7:25; Salmo 115:4-8) Si Satanas nga Yawa “nagbuta sa mga hunahuna” sa mga tawo aron ang kamatuoran dili “mosidlak.” (2 Corinto 4:4) Busa sa dihang magsimba ug larawan, ang usa sa aktuwal nagaalagad sa mga intereses sa mga demonyo. (1 Corinto 10:19, 20)​—2/15, panid 6-7.

▫ Nganong ang karnero giisip nga usa ka bililhong kabtangan sa panahon sa Bibliya? Ang delana maoy usa ka propidad nga nagatubo ug maggamit sa paghimog sapot alang sa pamilya o ikabaligya. Ang mga sungay sa mga turo nga karnero gigamit aron sa pagpahibalo sa Jubilee o maggamit sa pagpalanog sa alarma o sa pagdirekta ug mga maniobra sa gubat. Sanglit ang karnero maoy usa sa hinlo nga mga hayop nga mahimong kan-on sa mga Israelinhon, ang usa ka panon sa karnero motaganag seguradong suplay sa pagkaon, ug kini motaganag regular nga suplay sa gatas aron imnon o himoong keso.​—3/1, panid 24-5.

▫ Unsay ginahangyo sa mga mahigugmaon sa Diyos sa dihang sila moampo nga moabot ang Gingharian sa Diyos? (Mateo 6:10) Sila nagahangyo nga ang langitnong Gingharian sa Diyos mohimog mahukmanong aksiyon pinaagi sa paglaglag sa hinimog-tawong mga sistema sa kagamhanan, nga napakyas sa pagtuman sa ilang gisaad sa pagdalag kalinaw ug kasegurohan. (Daniel 2:44)​—3/15, panid 6.

▫ Kinsa ang mga Maglalaban, ug nagtudlo ba sila ug Trinidad? Ang mga Maglalaban maoy mga sakop sa simbahan nga nagkinabuhi sa hinapos nga bahin sa ikaduhang siglo. Sila nagsulat sa paglaban sa Kristiyanidad nga ilang nahibaloan batok sa supak nga mga pilosopiya nga kaylap sa Romanong kalibotan. Walay usa kanila ang nagtudlo ug Trinidad.​—4/1, panid 24-9.

▫ Si Zacarias ba, ang amahan ni Juan Bawtista, gihimong bungol ug amang, nga daw maoy gipadayag sa Lucas 1:62? Si Gabriel miingon nga ang sinultihan ni Zacarias maapektohan, dili ang iyang pandungog. (Lucas 1:18-20) Ang Lucas 1:64 nag-ingon: “Dihadiha nabuka ang iyang [Zacarias] baba ug naluag ang iyang dila ug siya misugod sa pagsulti.” Matikdi, nga walay gihisgotan dinhi mahitungod sa iyang pandungog nga naapektohan sa bisan unsang paagi. Ang paghisgot sa “mga sinyas” diha sa Lucas 1:62 mahimong nagpasabot nga dihay gihimong pangompas aron mapasiugda ang desisyon ni Zacarias.​—4/1, panid 31.