Pablo Batok Plato Bahin sa Pagkabanhaw

SI APOSTOL Pablo nagsulat bahin sa pagkabanhaw diha sa 1 Corinto 15:35-58 ug 2 Corinto 5:1-10. Sa nagsulat, misunod ba siya sa mga ideya ni Plato ug sa Gregong mga pilosopo nga ang kalag dili-mamatay, o mao bay iyang gisunod ang pagtulon-an ni Jesus ug sa nahibilin sa Kasulatan?

Ang pulyetong Immortality of the Soul or Resurrection of the Individual: St. Paul’s View with Special Reference to Plato, nga gisulat niadtong 1974 ug giduso sa arsobispo sa Greek Orthodox Church sa Amihanan ug sa Habagatang Amerika, naghatag ug mabutyagong tubag. Human naghisgot sa kinaiyahan sa pagkabanhaw bahin sa gihisgotan sa ibabaw nga mga kasulatan ug sa Helenistikong mga impluwensiya sa panahon, ang awtor nakaabot sa mosunod nga paghinapos:

“Si Plato nagtudlo nga ang kalag magpadayon diha sa walay-paghunong ug walay-pagkatapos nga paglungtad, nga bulag sa lawas. Ang kalag alang kang Plato sa kinaiyanhon dili gayod mamatay . . . Si San Pablo wala magtudlo nianang hunahunaa ni nangangkon nga nagtudlo niana . . .

“Si Apostol Pablo wala mabalaka sa pagkadili-mamatay sa psyche o espiritu ingong bulag ug lahi nga mga bahin kondili sa pagkabanhaw sa katibuk-ang kalag-espiritu nga lawas sa tawo nga maoy resulta sa pagkabanhaw ni Kristo. Ang pagtuo ni Pablo bahin sa lawas nga banhawon walay kalabotan sa pagbuhi pag-usab sa patayng mga lawas gikan sa lubnganan.

“Ang iyang pagtuo bahin sa pagkabanhaw sa lawas mas maayong ikapahayag ingong pagbuhat-pag-usab, paglalang-pag-usab, ug pagtukod-pag-usab, pinaagi sa gahom sa Diyos, sa kabug-osang paghiusa sa tawo, sa mao gihapon nga tawo, sa personalidad, sa organismo sa lawas ug hunahuna, sa tinuod nga indibiduwal nga dunay mental ug pisikal nga mga hiyas. Ang atong umaabot nga pagkabanhaw mahitabo dili ingon nga atong kinaiyanhong kabtangan, kondili ingong harianong gasa sa Diyos.”

Oo, ang pagkadili-mamatay dili maoy usa ka kinaiyanhong kabtangan sa bisan unsang tawo. Hinunoa, kini maoy hamili ug mapuangurong gasa gikan ni Jehova pinaagi sa atong Ginoong Jesu-Kristo ngadto sa nagalangkob dinihogang Kristohanong kongregasyon.​—1 Corinto 15:20, 57; Filipos 3:14.

[Hulagway sa panid 9]

Gregong pilosopong si Plato

[Credit Line]

Hulagway gikan sa Vatican Museum