Kon sa Unsang Paagi ang Pagtuo Makatabang sa Masakiton

ANG mga asoy sa milagrosong pagpang-ayo diha sa Bibliya nagpasalig pag-usab kanato nga ang Diyos may kabalaka mahitungod sa atong kaayohan, ug sila nagpakita sa iyang gahom sa pag-ayo. Sanglit kining milagrosong mga pag-ayo naghimaya sa Diyos ug nagdala ug hilabihang kalipay, makataronganong mangutana, Ang gasa ba sa pagpanambal sa balaang espiritu sa gihapon nagalihok?

Ang tubag sa maong pangutana maoy dili​—ug ang rason lagmit makapakurat sa pila. Kadtong milagrosong pagpang-ayo niadtong unang siglo nakatuman sa ilang katuyoan. Ang The Illustrated Bible Dictionary sa husto nag-ingon: “Ang katuyoan sa milagrosong panambal maoy teolohikal, dili medikal.” Unsa ang pila ka teolohikal nga katuyoan ang gisilbihan niadtong mga milagroha?

Sa usa ka butang, ang mga milagrosong pagpanambal ni Jesus nagsilbi sa katuyoan sa pagpaila kaniya ingong Mesiyas. Ug pagkatapos sa iyang kamatayon, sila nagtabang sa pagpalig-on nga ang panalangin sa Diyos maoy sa ibabaw sa bag-ong Kristohanong kongregasyon. (Mateo 11:2-6; Hebreohanon 2:3, 4) Dugang pa, sila nagpasundayag nga ang saad sa Diyos sa pag-alim sa katawhan diha sa bag-ong kalibotan mamatuman. Sila nagpalig-on sa atong pagtuo nga ang panahon moabot gayod sa dihang “wala nay molupyo ang magaingon: ‘Ako masakiton.’ Ang katawhan nga nanagpuyo sa yuta mao kadtong gipasaylo sa ilang kasal-anan.” (Isaias 33:24) Sa dihang kining unang-siglo nga mga katuyoan nakab-ot, ang mga milagro dili na kinahanglan.

Takos tagdon nga ang unang-siglong mga tinun-an ni Jesus mismo nag-antos ug mga balatian nga wala tambali sa milagroso. Kini maoy dugang pamatuod nga ang milagrosong pagpang-ayo ni Jesus maingon usab sa gihimo sa mga apostoles gilaraw sa pagtudlo sa hinungdanong mga kamatuoran, dili sa pagtagana ug serbisyo medikal. Sa dihang nagsugyot ug terapiya alang sa masubsob nga pagmasakit ni Timoteo, si Pablo nagtuboy sa paggamit sa bino ingong tambal, dili pagtambal pinasukad sa pagtuo. Si Pablo, nga naghimog milagro sa pagpanambal, wala mahupayi gikan sa “tunok sa unod” nga padayong “naghapak” kaniya.​—2 Corinto 12:7; 1 Timoteo 5:23.

Sa dihang namatay ang mga apostoles, ang gasa sa panambal nahanaw. Si Pablo mismo nagpasabot nga kini mahitabo. Sa pagpakasama sa Kristohanong kongregasyon ngadto sa usa ka bata, si Pablo miingon: “Sa bata pa ako, nagsulti ako nga ingon ug bata, sa paghunahuna ingong bata, nagpangatarongan ako nga ingon ug bata; apan sa nahamtong na ako, gihiklin ko ang mga paaging binata.” Ang punto sa iyang ilustrasyon mao nga ang milagrosong mga gasa sa espiritu maoy bahin sa pagkabata sa Kristohanong kongregasyon. Sila maoy “mga kinaiya sa bata.” Mao nga, matud niya: “Sila [milagrosong mga gasa] igahiklin ra.”​—1 Corinto 13:8-11.

Makatabang ba ang Pagtuo sa Dihang Kita Magkasakit?

Hinuon, bisan pa kon kita dili mosalig sa panambal pinasukad sa pagtuo, walay duhaduha haom ang pag-ampo sa Diyos alang sa tabang sa dihang kita magkasakit. Ug seguradong walay daotan sa pag-ampo sa uban alang kanato. Apan ang mga pag-ampo kinahanglang realistiko ug uyon sa kabubut-on sa Diyos. (1 Juan 5:14, 15) Walay mabasa sa Bibliya nga nagsugo kanato sa pag-ampo alang sa panambal pinasukad sa pagtuo.a Inay, moampo kita kang Jehova alang sa mahigugmaong pagpaluyo sa panahon sa mga pagsulay nga ipahinabo sa balatian.

Ang Bibliya nagpakita kon unsay puwedeng iampo sa mga matinuohon labot sa pagkasakit sa dihang miingon: “Si Jehova magapalig-on kaniya sa ibabaw sa higdaanan sa kasakitan; ang tanan niyang higdaanan sa tino imong ilisan sa panahon sa iyang balatian.” (Salmo 41:3) Ang pagpamalandong sa Pulong sa Diyos makatabang nilang nagaantos sa emosyonal nga sakit. Ang salmista nagsulat: “Ang imong mahigugmaong-kalulot, Oh Jehova, nagsapnay kanako. Sa dili maisip nga mga hunahuna nga ania kanako, ang imong mga paglipay nakapahimuot sa akong kalag.”​—Salmo 94:18, 19; tan-awa usab ang 63:6-8.

Ingong dugang, kinahanglan natong ipakita ang maayong salabotan sa mga butang labot sa panglawas, ug ang Bibliya nagatambag kanato mahitungod niini. Labawng maayo ang magkinabuhi sumala sa mga prinsipyo sa Bibliya kaysa pag-abusar sa droga, pagpanabako, pag-inom ug daghan, o hinobrang pagkaon ug unya sa dihang ang sakit mosunod, moliso sa kawalay paglaom ngadto sa panambal pinasukad sa pagtuo. Ang pag-ampo alang sa milagro sa dihang gihampak ang usa sa sakit dili ikabaylo sa maalamong paggawi sa paglikay sa arang malikayan nga mga sakit, sama sa pinaagig pagkaon sa masustansiyang pagkaon kon mabatonan o sa pagpangita sa kalipikado nga tabang sa medikal kon posible.

Ang Pulong sa Diyos nagadasig usab kanato sa pag-ugmad ug makapahimsog nga mga tinamdan sa hunahuna nga makahatag kaayohan sa atong panglawas. Ang basahong Proverbio nagatambag: “Ang usa ka malinawong kasingkasing maoy kinabuhi sa unod, apan ang kasina maoy pagkadunot sa kabukogan.” “Ang kasingkasing nga malipayon maayo nga tambal, apan ang espiritu nga magul-anon makapauga sa kabukogan.” (Proverbio 14:30; 17:22) Ang pag-ampo alang sa balaang espiritu sa pag-ugmad sa kalinaw ug kalipay dinha kanato makahatag lamang ug maayong epekto sa atong pisikal nga kahimsog.​—Filipos 4:6, 7.

Unsa Naman ang Panambal Pinasukad sa Pagtuo?

Tinuod, bisan pa kon ang tawo magkinabuhi ug himsog nga pagkinabuhi ingon sa itugot sa iyang kahimtang, ang sakit sa gihapon mohapak. Unya unsa man? May daotan ba sa pag-adto sa usa ka mananambal pinasukad sa pagtuo tungod sa paglaom nga mamaayo? Oo, may kadaot. Ang modernong mananambal pinasukad sa pagtuo tagsa rang motambal nga walay bayad. Ug ang paggugol ug salapi sa mananambal pinasukad sa pagtuo sa dihang ang salapi ikagasto sa medikal nga tabang dakong kapildihan kanato. Gawas pa, nganong mohatag ug salapi sa mga indibiduwal nga nagpahimulos sa kamatuotuohon sa tawo?

Ang pila mahimong mangatarongan: ‘Segurado, ang panambal pinasukad sa pagtuo mahimong may pila ka bili kon bisan gamay nga porsiento kanilang mopatambal sa “mga mananambal” mamaayo.’ Apan lantugionon kon kaha ang mga mananambal pinasukad sa pagtuo sa pagkatinuod nakaayo kang bisan kinsa sa dumalayon. Ang Encyclopædia Britannica nag-angkon: “Kon itandi diyutay rang pagdukiduki ang nalampos bahin sa daghang wala hisayring mga butang labot sa pagpanambal pinasukad sa pagtuo.”

Bisan pa morag nangaayo ang pipila, kini dili ebidensiya sa paglihok sa balaang espiritu. Sa Sermon sa Bukid, si Jesus nag-ingon: “Daghan unya ang magaingon kanako niadtong adlawa, ‘Ginoo, Ginoo, dili ba nanaghimo man kamig mga propesiya tungod sa imong ngalan, ug nanagpagula sa mga yawa tungod sa imong ngalan, ug nakahimo sa daghang mga milagro tungod sa imong ngalan?’ Ug unya magaingon ako kanila: ‘Wala ko gayod kamo igkaila! Pahawa kanako, kamong mga mamumuhat ug daotan.” (Mateo 7:22, 23) Si Jesus usab nag-ingon nga may pipila, bisan tuod wala uyoni sa Diyos, modanig pagtagad ngadto sa ilang mga kaugalingon pinaagi sa mga ilhanan: “Kay motungha ang mga mini nga mga Kristo ug mini nga mga propeta ug magapakitag dagkong mga ilhanan ug mga katingalahan aron sa pagpahisalaag, kon mahimo, bisan pa sa mga pinili.” (Mateo 24:24) Tino, ang modernong mananambal pinasukad sa pagtuo mahimong ilakip sa kapadapatan niining mga pulonga, tungod sa ilang dramatikong mga presentasyon, kanunayng paghangyo ug kuwarta, ug pangangkon sa milagrosong pagpanambal.

Sila wala magasunod sa mga lakang ni Jesus. Nan, kinsa, ang ilang ginasunod? Ang apostol nga si Pablo naghatag kanato ug ilhanan sa dihang siya nag-ingon: “Si Satanas nagatakoban man sa iyang kaugalingon ingon nga manulonda sa kahayag. Busa dili ikahibulong kon ang iyang mga sulugoon magatakoban usab sa ilang kaugalingon ingong nga mga ministro sa pagkamatarong. Ang ilang dangatan mahisibo ra unya sa ilang mga binuhatan.” (2 Corinto 11:14, 15) Kon ang mga mananambal pinasukad sa pagtuo wala makaayo sumala sa ilang gipangangkon, nan sila mga limbongan, nanagsunod sa dalan ni Satanas, “ang maglilimbong sa tibuok gipuy-ang yuta.” (Pinadayag 12:9) Apan unsa man kon, sa diyutay minoriya nga mga kaso, sila nakaayo? Dili ba kita makahinapos nga ang ilang “gamhanang mga buhat” gipahinabo sa gahom ni Satanas ug sa iyang mga demonyo? Oo, kana gayod ang kahimtang!

Ang Panahon sa Tinuod nga Pagpang-ayo

Ang milagrosong panambal ni Jesus gihimo uban sa tabang sa balaang espiritu sa Diyos. Sila nagpasundayag sa iyang katuyoan sa pagsulbad sa tanang suliran sa panglawas sa tawo sa iyang tinudlong panahon. Si Jehova nagsaad sa “pag-ayo sa kanasoran.” (Pinadayag 22:2) Ug dili lang niya ayohon ang mga sakit apan molaglag sa kamatayon. Si Juan nagsaysay nga si Jesus mianhi “aron ang tanan nga magbutang ug pagtuo kaniya dili malaglag apan may kinabuhing walay kataposan.” (Juan 3:16) Pagkadalayegong pagpang-ayo kana unya! Si Jesus magahimo usab ug mga pagpang-ayo susama niadtong natala diha sa Bibliya apan sa mas dagkong sukod. Iya pa ganing banhawon ang patay! (Juan 5:28, 29) Anus-a kaha kini mahitabo?

Sa bag-ong kalibotan sa Diyos, nga, sumala sa tanang ebidensiya, duol na kaayo. Kanang bag-ong kalibotana, nga pasudlon pagkatapos ang pagkadaotan niining sistema sa mga butang mahanaw na sa walay kataposan, mahimong tinuod nga panalangin alang sa maayog-kasingkasing nga katawhan. Kana mao unyay kalibotan nga walay pag-antos. “Iyang [Diyos] pagapahiran ang tanang luha gikan sa ilang mga mata, ug ang kamatayon wala na, wala nay pagminatay ni paghilak ni kasakit. Ang unang mga butang nangagi na.” (Pinadayag 21:4) Pagkadakong kalainan sa kon unsay atong makita sa palibot karong adlawa!

Busa, sa kaso sa mga sakit, pag-ampo sa Diyos alang sa tabang. Ug kaha maysakit o himsog, kat-oni sa unsang paagi ang kinabuhing dayon nga walay sakit sa pagkatinuod mahimong posible. Palig-ona ang imong pagtuo niining kasaligang saad sa Diyos pinaagi sa pagtuon sa daghang mga reperensiya bahin niana diha sa Bibliya. Kat-oni sa unsang paagi ang katuyoan sa Diyos niining bahina nagkaduol sa katumanan sumala sa iyang kaugalingong tagal. Ayaw pagduhaduha, tungod kay ang Pulong sa Diyos nagpasalig kanato: “Gilamoy niya ang kamatayon hangtod sa walay kataposan, ug ang Soberanong Ginoo nga si Jehova sa tino mopahid sa luha gikan sa tanang mga nawong.”​—Isaias 25:8.

[Footnote]

[Hulagway sa panid 7]

Ang milagrosong pagpanambal ni Jesus nakalampos sa ilang katuyoan

[Hulagway sa panid 8]

Si Jesus magasubli ug magapilo sa mga milagro sa pagpang-ayo