Ang Pagpanambal Pinasukad sa Pagtuo Giuyonan ba sa Diyos?
“NAKAKITA kami ug kahibulongang mga butang karong adlawa!” Oo, ang mga nakakita nakadayeg. Usa ka grabe paralitikong tawo naayo sa atubangan sa ilang mga panan-aw mismo. Ang mananambal nag-ingon sa tawo: “Bangon ug dad-a ang imong gihigdaan ug pumauli ka sa imong balay.” Ug kana gayod ang gibuhat sa tawo! Siya dili na paralitiko. Dili ikatingala nga kadtong atua didto “naghimaya sa Diyos”! (Lucas 5:18-26) Kining pagtambal, nga gihimo ni Jesu-Kristo hapit 2,000 ka tuig sa miagi, tin-aw kaayo nga may pag-uyon sa Diyos.
Unsa naman karong adlawa? Ang milagrosong pagpanambal ba sa gihapon usa ka maayong kahigayonan alang kanilang walay makaplagan nga kaayohan sa medikal? Si Jesus naghimo ug milagrosong pagpanambal. Ang mga mananambal pinasukad sa pagtuo karong adlawa nangangkon nga nagsundog kaniya. Sa unsang paagi nato lantawon ang ilang mga pangangkon?
Ang pagpanambal pinasukad sa pagtuo gihubit ingong “usa ka metodo sa pagtambal sa mga sakit pinaagig pag-ampo ug pagbaton ug pagtuo sa Diyos.” Ang Encyclopædia Britannica nag-uyon: “Ang kasaysayan sa pagpanambal pinasukad sa pagtuo diha sa Kristiyanidad nagsugod sa kahibulongang personal nga ministeryo ni Jesus ug sa mga apostoles.” Oo, si Jesus nagpahinabo ug talagsaong pagpang-ayo. Ang mga mananambal pinasukad sa pagtuo karong adlawa naghimo bag mga milagro sama sa iyang gihimo?
Pagtuo—Kinahanglanon?
Sumala sa Black’s Bible Dictionary, si Jesus “nagtino sa [pagtuo] ingong usa ka kinahanglanon alang sa iyang mga milagrosong pagpanambal.” Apan tinuod ba kana? Si Jesus ba naghangyo nga ang masakitong tawo may pagtuo ayha pa niya ayohon? Ang tubag maoy dili. Ang pagtuo kinahanglan sa bahin sa mananambal apan dili hinungdanon sa bahin sa masakitong tawo. Sa usa ka higayon ang mga tinun-an ni Jesus napakyas sa pag-ayo sa usa ka patulon nga batang lalaki. Giayo ni Jesus ang batang lalaki ug human niadto giingnan niya ang iyang mga tinun-an kon nganong wala nila siya maayo. “Siya miingon kanila: ‘Tungod sa kagamay sa inyong pagtuo.’”—Mateo 17:14-20.
Sumala sa Mateo 8:16, 17, si Jesus “nag-ayo sa tanan nga grabe na gayod.” Tinuod, kining mga tawhana may usa ka sukod sa pagtuo kang Jesus nga nagtukmod kanila sa pagduol ug paghangyo kaniya nga tambalan sila. (Mateo 8:13; 9:22, 29) Sa kadaghanang kaso sila nangadto ug mihangyo una pa sila ayoha niya. Hinuon, walay pagpahayag sa pagtuo ang gikinahanglan alang sa paghimo sa milagro. Sa usa ka higayon giayo ni Jesus ang usa ka bakol nga lalaki nga wala ngani makaila kon kinsa si Jesus. (Juan 5:5-9, 13) Sa gabii sa pagdakop kaniya, gibalik ni Jesus ang napalong nga dalunggan sa alagad sa hataas nga saserdote, bisan tuod kining tawhana usa sa grupo sa mga kaaway ni Jesus nga miabot sa pagdakop kaniya. (Lucas 22:50, 51) Sa pagkatinuod, may higayon, si Jesus ngani nagbanhaw sa patay!—Lucas 8:54, 55; Juan 11:43, 44.
Sa unsang paagi nahimo ni Jesus ang maong mga milagro? Tungod kay siya nagsalig sa balaang espiritu, o aktibong gahom sa Diyos. Mao kini ang nagpahinabo ug pagpang-ayo, dili ang pagtuo sa masakitong indibiduwal. Kon imong basahon ang mga asoy diha sa Ebanghelyo, ikaw makamatikod usab nga ang mga pagpanambal ni Jesus gihimo nga may diyutay nga seremonyas. Walay mapasiatabong pagpasundayag o pagpahimulos sa mga pagbati. Dugang pa, bisag unsang sakita, wala mapakyas si Jesus. Siya kanunay nga malamposon, ug wala gayod siya magpabayad.—Mateo 15:30, 31.
Modernong Pagpanambal Susama sa Kang Jesus?
Ang sakit teribleng suliran, ug sa dihang kana mohapak, kinaiyanhong kita mangita ug kaayohan. Unsa, ugaling, kon kita nagpuyo sa usa ka dapit diin ang “katawhan, ilabina kadtong mga kabos, gitratar sa propesyonal nga mga kawani sa panglawas ingong mga butang ug dili ingong tawo”? Mao kana ang kahimtang nga naobserbahan sa usa ka doktor sa usa ka nasod sa Latin-Amerika. Ug unsa naman kon kita nagpuyo sa usa ka dapit diin, kokaamgid sa maong nasod, ‘40 porsiento lamang sa mga doktor mediko ang may katakos sa pagpadapat sa iyang propesyon’?
Dili ikahibulong nga ang daghan, kay wala nay kapaingnan, naglantaw sa pagpanambal pinasukad sa pagtuo sa labing menos maayong sulayan. Apan, ang mga naayo nga gipangangkon sa mga mananambal pinasukad sa pagtuo lantugionon. Pananglitan, ang gibanabana nga 70,000 nagtambong sa usa ka tigom sa São Paulo, Brazil, diin duha ka mananambal ‘nagtamak sa ginatos ka mga antiyohos nga gilabay sa tumatan-aw, nga nagsaad sa dali motuong mga tag-iya sa pagpasig-uli sa ilang panan-aw.’ Usa sa mga mananambal sa kamatinud-anon nag-angkon sa usa ka interbiyo: “Dili ako makasulti nga kadtong tanan nga masakiton nga among giampoan mamaayo. Depende kana sa ilang pagtuo. Kon motuo ang usa ka tawo, siya mamaayo.” Iyang gipasangil ang bisag unsang wala mamaayo sa kakulang sa pagtuo sa bahin sa masakiton. Hinumdomi, hinuon, sama sa una natong nakita, nga gipasangil ni Jesus ang kapakyasan sa pag-ayo sa kakulang sa pagtuo sa bahin sa nagatambal!
Laing mananambal nagsaad sa pag-ayo sa kanser ug paralisis. Unsay nahitabo? Segun sa magasing Veja, “ang saad, tataw, nga wala matuman.” Ug paminawi ang paagi sa paggawi sa tawo sa iyang kaugalingon: “Sulod sa hapit duha ka oras, [ang mananambal pinasukad sa pagtuo] nag-abiba sa tumatan-aw pinaagig mga wali, pag-ampo, pagsiyagit, ug pag-awit—ngani naggamit ug mga sukmag, sa pagtuo nga mapalagpot ang mga demonyo nga nagpuyo diha sa mga lawas sa matinuohon. Sa kataposan, iyang gilabay ang iyang kurbata ug panyo sa nalamat nga tumatan-aw ug gipasa ang plato aron sa pagkolekta sa ‘boluntaryong mga amot.’” Si Jesus ug iyang mga apostoles wala gayod mangayog kuwarta alang sa milagrosong pagpang-ayo, ug wala gayod sila maghimo sa maong mga pasundayag.
Nan, dayag, ang maong modernong mga mananambal pinasukad sa pagtuo wala magbuhat sa gihimo ni Jesus. Ug lisod tuohan nga ang Diyos mouyon sa ilang ginahimo. Bisan pa, siya ba nag-uyon sa bisan unsang milagrosong panambal karong adlawa? O may bisan unsang laing paagi ba nga ang atong pagtuo makatabang kanato sa dihang ang atong hinigugma magkasakit?