Pagpanambal Pinasukad sa Pagtuo—Gikan ba sa Diyos?

ANG tawo nagsakit sulod sa 38 ka tuig. “Buot ba nimong mamaayo?” nangutana si Jesus. Kon ikaw pa ang maong tawo, dili ba motubag kang maikagon oo? Giingnan siya ni Jesus: “Bumangon ka, alsaha ang imong katre ug lumakaw ka.” Ang epekto niadtong mga pulonga? “Ang tawo dihadiha naayo sa sakit, ug iyang gialsa ang iyang katre ug milakaw.”​—Juan 5:5-9.

Kining tagsaong buhat sa balaang pagpanambal usa lamang sa daghan nga gihimo ni Jesus panahon sa iyang ministeryo sa yuta. (Mateo 11:4, 5) Ang mga mananambal pinasukad sa pagtuo karong adlawa nagaangkong ang Diyos nagahimo pa sa maong pagpanambal, ug sila gipaluyohan sa mga pamatuod sa linibong nagaangkong ilang naayo.

Dagkong mga Kalainan

Ang pagtuon sa Bibliya mopadayag sa daghang dagkong mga kalainan tali sa mga pagkaayo nga gitaho sa Bibliya ug sa mga gitaho sa mga mananambal pinasukad sa pagtuo karong adlawa. Pananglitan, si Jesus ug iyang mga disipulo wala gayod magpabayad sa ilang mga pagpang-ayo. “Inyong nadawat nga walay bayad, ihatag ninyo nga walay bayad,” mitudlo si Jesus. (Mateo 10:8) Sa ingon ilang gisunod ang panig-ingnang gihatag ni Eliseo, nga wala modawat sa gasa gikan sa tawong ginganlag si Naaman nga giayo ni Eliseo sa sanla. (2 Hari 5:1, 14-16) Busa, dihang magpabayad ang mga mananambal pinasukad sa pagtuo sa ilang mga serbisyo, ilang ginalapas ang maong Kasulatanhong panig-ingnan.

Mamatikdan usab nga ang mga pagpang-ayo nga gihimo sa panahon sa Bibliya maoy dihadiha o gibuhat sa madali. Sa nakita ni apostol Pedro ang usa ka lalaki “nga bakol gikan sa tiyan sa iyang inahan,” iyang giingnan ang tawo: “Sa ngalan ni Jesu-Kristo nga Nasareno, lumakaw ka!” Ang asoy nagapadayag: “Dihadiha ang lapalapa sa mga tiil [sa tawong bakol] ug ang mga bukog sa iyang mga buolbuol nalig-on; ug, nga milukso, siya mitindog ug milakaw.” (Buhat 3:1-8) Basaha sa imong kaugalingon ang ubang pananglitan sa Buhat 5:15, 16 ug 14:8-10.

Hinunoa, ang mga pagpang-ayo karong adlawa sa pagpanambal pinasukad sa pagtuo, kadaghanan dangtag mga adlaw, mga semana, o mga bulan pa aron moobra! Mamatikdan, usab, mao ang kamatuorang ang mga mananambal pinasukad sa pagtuo lagmit mosentro sa mga sakit maylabot sa obra, sama sa pagkabuta, paralisis, o pagkabungol​—mga sakit nga usahay may sikolohikanhong pasikaranan. Matud sa siruhanong si Paul Brand: “Sa dihang ang usa ka organikong kamatuoran dili malalis​—nawalang mga batiis, mga mata, o mga punoan sa buhok​—tagsa rang mahitabo ang mga milagro.” Si Jesus, hinunoa, nag-ayo sa “tanang matang sa sakit ug tanang matang sa kaluyahon,” apil ang mga depektong dayag organiko sa kinaiya, sama sa mikuyos nga kamot.​—Mateo 9:35; Marcos 3:3-5.

‘Kulang ang Imong Pagtuo!’

Ikasubo, daghang tawo nga grabeg sakit motambong sa ‘mga krusada sa pagpang-ayo’ nga unya mopauli lamang nga masakiton gihapon. Ang mga mananambal pinasukad sa pagtuo mosaysay sa hinungdan sa maong mga kapakyasan pinaagi sa pag-angkon, ‘Kulang ang ilang pagtuo!’ Kini, hinunoa, gitiman-an sa panglimbong. Sumala sa giingon ni Dr. William Nolen: “Lahi sa naandang doktor, ang sikikong mananambal dili gayod modawat sa responsabilidad inigkapakyas sa iyang pagpanambal. Akong angkonon nga nagustohan ko ang kapaingnan nga makadangop sa maong pasangil kon makatagbo akog pasyenteng dili nako maayo.”

Ang mga propeta sa Diyos, si Jesus, o ang mga disipulo ni Jesus wala gayod mohatag ug pasangil nga ang masakiton wala maayo kay siya kulag pagtuo. Tinuod, tungod sa kakulang sa pagtuo diyutay rang mga tawo ang miduol aron magpatambal. Apan niadtong miduol, ang bug-os nga pagkaayo nahitabo sa tanang panahon!​—Marcos 6:5, 6.

Sa pagkamatuod, sa pila ka kaso giayo ang mga tawo nga dayag kulang ug pagtuo. Si Naanam, ang pangulo sa Siryanhong kasundalohan, pananglitan, wala bug-os motuo nga siya maayo sa iyang sanla sa paaging gisugo ni Eliseo. Sa pagkatapos lamang sa iyang pagkaayo nga siya miangkon: “Ania karon, ako nahibalo gayod nga walay Diyos sa bisan diin sa yuta gawas sa Israel.” (2 Hari 5:11-13, 15) Ang mahuyang nga mga pasangil sa mga mananambal pinasukad sa pagtuo sa ingon dili makabarog.

Pagpanambal​—Usa ka Gasang Nahanaw Na

Apan dili ba tinuod nga ang milagrosong mga gasa sa pagpang-ayo kasagaran sa unang mga Kristohanon? (1 Corinto 12:9) Oo, apan may maayong hinungdan ang mga milagro nga nahitabo niadtong panahona. Sa usa ka milenyo ug tunga, ang nasod sa unodnong Israel mao ang piniling katawhan sa Diyos; apan sa unang siglo sa atong Komung Panahon, ang Israel gisalikway tungod sa kakulang niini sa pagtuo ug gipulihan sa bag-ong Kristohanong kongregasyon. Kadtong unang mga Kristohanon nagkinahanglag talagsaong tabang sa paglig-on sa ilang pagtuo ug sa pagpamatuod sa kalibotan sa gawas nga sila gipaluyohan sa Diyos.

Busa, ang milagrosong mga gasa, apil ang pagpang-ayo, gihatag sa bata pang Kristohanong kongregasyon. Kadto nagsilbing “usa ka ilhanan” alang sa mga dili-magtutuo ug usa ka paagi sa paglig-on sa pagtuo sa mga magtutuo. (1 Corinto 14:22) Ugaling lamang, sa halos duha ka libo ka tuig sa ulahi, ang Kristiyanidad dili na bata. (Itandi ang 1 Corinto 13:9-13.) Ang Bibliya dugay nang nakompleto ug napanagtag sa minilyong kopya. Busa ang matuod nga mga Kristohanon karong adlawa daling makapunting sa mga dili-magtutuo ngadto sa mga panid niini sa pagpaluyo sa ilang ginatudlo. Ang milagrosong mga pasundayag dili na kinahanglan.

Dugang gipaila ni Pablo nga ang labaw-kinaiyanhong mga gasa “mahanaw.” (1 Corinto 13:8) Ang maong mga gasa gipasang laktud o sa atubangan sa mga apostol ni Kristo Jesus. (Buhat 8:18-20; 10:44-46; 19:6) Sa pagkamatay sa mga apostol, mihunong ang milagrosong mga pasundayag.

Ang Cyclopedia of Biblical, Theological, and Ecclesiastical Literature ni McClintock ug Strong (Tomo VI, panid 320) miingon nga “dili malalis ang pahayag nga sa unang usa ka gatos ka tuig sa pagkamatay sa mga apostol diyutay ra o walay atong nadungog nga nahitabo ang mga milagro nahitabo pinaagi sa unang mga Kristohanon.”

Hinungdan sa Pagbantay

Si Jesu-Kristo nagpasidaan nga moabot ang panahon dihang daghan ang moingon kaniya: “Ginoo, Ginoo, wala ba kami managna sa imong ngalan, ug magpagulag mga demonyo sa imong ngalan, ug magbuhat sa daghang milagro sa imong ngalan?” Apan si Jesus moingon kanila: “Wala gayod ako makaila kaninyo! Pamahawa kamo gikan kanako, kamong mga magbubuhat sa pagkadaotan.” (Mateo 7:22, 23) Nan, unsay hinungdan sa ilang mopatim-awng kalamposan sa pagbuhat sa “mga milagro” kon dili ang espiritu sa Diyos?

Sa pila ka kaso, nalangkit ang laktud nga panglimbong. Pananglitan, ang The Herald, usa ka mantalaan sa Zimbabwe, mitaho bahin sa tulo ka tawo nga gipahibalo sa usa ka bantog nga mananambal pinasukad sa pagtuo ingong naayo. Giyagyag kadto sa mantalaan ingong usa ka limbong: “Ang usa ka bata dili gihapon makadungog o makasulti; ang usa ka bata dili gayod bungol o amang sa nangagi; ug ang usa ka babaye, nga bungol lamang sa nangagi, dili gihapon makadungog.”

Usahay, ang pagpanambal pinasukad sa pagtuo daw may epektong placebo diha sa masakiton. Sa ubang kaso​—ilabina kon moagi ang hataas nga yugto una madayag ang pagkaayo​—mopatim-awng nalangkit ang kinaiyanhong paagi sa pagkaayo sa lawas. Sa librong Science and the Paranormal, si Dr. William Nolen miangkon nga “duolag 80 porsiento sa mga pasyente nga moanha [sa usa ka naandang doktor] dunay limitado-sa-kaugalingong mga sakit​—nga mao, mga sakit nga niana sila maayo nga kinaiyanhon.” Busa, sa paglabay sa panahon ang mananambal pinasukad sa pagtuo sayong makaangkon sa dungog sa pagkaayo.

Sa kataposan, ang Bibliya nagapasidaan nga “si Satanas nagapadayon sa paghimo sa iyang kaugalingon nga usa ka manulonda sa kahayag” sa paninguha sa paglimbong. (2 Corinto 11:14) Sa 2 Tesalonica 2:9, 10, si Pablo dugang nagsaysay: “Ang pagkaania sa usang malapason maoy sumala sa paglihok ni Satanas pinaagi sa matag gamhanang buhat [“tanang matang sa mga milagro,” The Jerusalem Bible] ug binakak nga mga ilhanan ug mga tilimad-on ug tanang daotang panglimbong niadtong nagakalaglag.” Busa pagbantay! Kadaghanan nalangkit ang demonyohanong mga gahom sa pagpanambal pinasukad sa pagtuo! “Dili ko buot nga kamo mahimong mga umalambit sa mga demonyo,” mipasidaan si Pablo. “Kamo dili mahimong magainom gikan sa kopa ni Jehova ug sa kopa sa mga demonyo.”​—1 Corinto 10:20, 21.

Dihang Magsakit ang Usa ka Kristohanon

Tinuod, kon ang usa magsakit, ang milagrosong pagkaayo tingali daw makadaning posibilidad. Apan, matikding ang kaubang magbubuhat ni apostol Pablo si Epaprodito nagsakit nga hapit mamatay. (Filipos 2:25-27) Ang suod nga kauban ni Pablo si Timoteo samang nag-antos “sa kanunay nga pagkasakit.” (1 Timoteo 5:23) Bisan pa niana, wala ayoha ni Pablo si bisan kinsa kanila sa milagrosong paagi. Ug dihang si Pablo mismo nagkinahanglag medikal nga pagtagad, mahimong iyang gipahimuslan ang mga serbisyo ni Lucas, “ang hinigugmang mananambal,” nga kauban niya sa panaw.​—Colosas 4:14.

Sa susama karong adlawa, ang usa ka Kristohanong masakiton makatinguha sa tabang sa usa ka kuwalipikadong doktor o terapista, nga sa ingon makalikay sa pag-apil sa inspirado-sa-demonyong mga pagpang-ayo o sa pulopanambal nga kasagaran kaayo sa daghang nasod karong adlawa. Siya makaampo usab, dili alang sa milagrosong pagkaayo, kondili alang sa kaalam sa pagsagubang sa sakit. (Santiago 1:5) Siya makahangyo usab nga si Jehova “magalig-on kaniya sa ibabaw sa higdaanan sa sakit.”​—Salmo 41:3.

Itugot nato, labing makapaluya kon ang medikal nga siyensiya dili makatambal sa usa ka linaing sakit. Bisan pa niana, bisan kon magsakit ang Kristohanon angay maningkamot “sa pagtino sa labawng hinungdanong mga butang,” nga dili itugot nga ang pagkabalaka sa panglawas bug-os maglandong sa espirituwal nga mga atimanon. (Filipos 1:10) Siya makalig-on sa iyang kaugalingon sa paglaom nga makapuyo ilalom sa Gingharian sa Diyos sa dihang “walay molupyo ang magaingon: ‘Ako masakiton.’”​—Isaias 33:24; 65:17-19.

Sa tinuoray, kining paglaom sa usa ka matarong bag-ong kalibotan labi pang bililhon kay sa kawang nga mga saad sa mga mananambal pinasukad sa pagtuo. Palandonga si Pedro, usa ka lalaking buta nga nagpuyo sa Akumadan, Ghana. Iyang gigugol ang katibuk-ang 26 ka tuig sa nagkalainlang iglesyang nagapanambal sa paglaom nga maayo ang iyang pagkabuta. Apan walay mananambal sa pagtuo ang nakabuka sa iyang mga mata. Unya, samtang nagtambong pa sa usa ka iglesyang nanambal, siya nakahibalag sa mga Saksi ni Jehova.

Gipatin-aw sa mga Saksi gikan sa Bibliya nga ilalom sa Gingharian sa Diyos mahitabo ang bug-os nga pagkaayo sa tanang sakit. Kadto nagbuka sa mga mata sa salabotan ni Pedro. Siya, kay napunog pagpabili sa kahibulongang mga kamatuoran sa Bibliya, nahimong bug-os-panahong magmamantala sa Gingharian sa Diyos ug nakaalagad sa kapin sa tulo ka tuig! Siya nagapanan-aw sa panahon dihang, sa literal nga paagi, “ang mga mata sa mga buta mangabuka, ug ang mga igdulongog mismo sa mga bungol makadungog.”​—Isaias 35:5, 6.

Sa tabang sa Pulong sa Diyos, ang linibo susamang nakagawas sa sayop nga pagsalig sa mga mananambal pinasukad sa pagtuo.

[Hulagway sa panid 5]

Ang mga mananambal pinasukad sa pagtuo talagsa rang makaayo sa mga tawong may mga suliran sa lawas

[Mga Letrato sa panid 7]

Ang Kristohanon nga magsakit nagaampo alang sa kusog sa pag-antos.

Siya nagapanan-aw usab sa bag-ong kalibotan, diin “walay molupyo ang magaingon: ‘Ako masakiton’”