Si Jehova—Imong Kaila o Imong Higala?
“JUAN, ipailaila ko nimo ang akong higala? Kini si—tabi, unsa gani toy imong ngalan?”
Nakadungog ka na bag sayop sa kabildohay sama niini? Kini naghatag ug pananglitan kon sa unsang paagi ang pila ka tawo sa dili husto naggamit sa pulong “higala.” Sa pagkatinuod sila nagpasabot lamang ug “kaila” o usahay dili ngani ingon niana. Ang pagkaila kang Ginoong Santos sa tabok sa kalye maoy usa ka butang; ang pagkahigala niya maoy lahi kaayo.
Usa ka diksyonaryo naghubit sa “kaila” ingong “usa ka tawo nga ang usa may pila ka sosyal nga kontak apan nga walay kusganong personal nga kalabotan.” Kana nagpasabot sa “kakulang sa pagsinati, kasuod, pakig-uban, ug maayong-kabubut-on kaysa HIGALA.”
Kining kakulang sa kusganon personal nga kalabotan motabang sa pagsaysay nganong kita sa subsob nagtagad ug diyutay sa nagkahitabo sa mga kaila, samtang kita mahigalaong malangkit sa mga kinabuhi sa atong mga higala. Nakig-ambit kita sa ilang mga kalipay ug mga kasub-anan, motugot kanila sa pagtandog ug halalom kanato. Siempre, kinahanglan mag-amping kita nga dili tugotan ang emosyonal nga pagkalangkit nga sa sayop motultol kanato sa pag-apil-apil sa ilang pribadong mga butang.—1 Pedro 4:15.
Ang pagbaton ug kusganon personal nga kalabotan sa atong mga higala usab nagasaysay nganong sa kinaiyanhon mosulay kita sa pagpahimuot kanila. Kon ang kaila makakaplag nga ang atong paggawi dili maayo o dili tukma, ang pagkadili niya nahimuot lagmit dili kaayo makapalihok kanato sa pag-usab. Apan ang usa ka higala makapahinabo sa pagkamatuod ug kusganong impluwensiya, mahimong kana bahin sa pamiste, pamatasan, o tinamdan.
Mahitungod sa pagsalig, pagbati, pagtahod, ug pagkamaunongon, ang panaghigala nagapangayog hataas nga ang-ang sa responsabilidad kaysa panagkaila. Siya nga nagpangita ug panaghigalaay, sa ingon niana, walay nalangkit nga responsabilidad, sa tinuoray gusto lamang ug panagkaila, dili higala. Ang suod nga mga higala malipayon sa pagtuman sa mga responsabilidad nga dala sa usa ka kusganon personal nga kalabotan, nakaamgo nga kini mohatag kanila ug kahigayonan sa pagpamatuod sa ilang panaghigalaay.
Panaghigalaay Uban sa Diyos
Ingong Maglalalang, si Jehova ang langitnong Amahan sa katawhan ug takos nga higugmaon, sugton, ug tahoron. Apan gusto niya nga ang katawhan mohimo niini tungod sa kusganon personal nga kalabotan, dili lamang tungod kay gibating tulumanon. (Mateo 22:37) Gusto usab niyang higugmaon nila ingong usa ka Higala. (Salmo 18:1) Sanglit “siya unang naghigugma kanato,” siya mismo nagpahiluna sa hingpit nga patukoranan alang sa maong panaghigalaay.—1 Juan 4:19.
Ang atong unang mga ginikanan, si Adan ug Eva, nakaila kang Jehova. Ang pangutana mao: Ila bang dawaton ang iyang tanyag sa panaghigalaay? Ikasubo sa pagsulti, wala nila dawata. Ang ilang mahakogong pag-agpas alang sa pagkaindependente gikan sa Diyos nagpasabot sa kawalay pagbati sa kusganong kalabotan. Andam sa pagdawat sa mga panalangin sa panaghigalaay nga iyang gitanyag, sila dili andam sa pagtuman sa mga responsabilidad niana. Maomao ra nga sila gustong motagamtam sa kahayahay ug seguridad sa ilang hamugaway Paraisong puy-anan nga dili buot mobayad ug abang.
Tanan kita, ang pila sa dakong sukod kaysa uban, nakapanunod niining dili mabination ug independenteng espiritu. (Genesis 8:21) Ang pila ka batan-ong tawo, pananglitan, nagtugot sa ilang kinaiyanhong panganti sa pagkaindependente aron sila mahimong dili mabination sa ilang mga ginikanan. Kini misangpot sa pagkabungkag sa labing bililhong panaghigalaay nga unta molungtad tali kanila ug sa ilang ginikanan sa tibuok kinabuhi. Hinuon, ikasubo sama niini mao, ang pagkabungkag sa atong panaghigalaay uban sa atong langitnong Amahan mas labaw nga seryoso. Sa pagkatinuod, kana makamatay!
Mga Kinahanglanon Alang sa Panaghigalaay
Kon walay pagsalig, walay relasyon, uban man sa tawo o uban sa Diyos, ang molungtad ug dugay. Ang patriarkang si Abraham nakasabot niini, ug mao nay rason nganong sa sublisubli iyang gipadayag ang bug-os nga pagsalig sa Diyos. Basaha ang Genesis 12:1-5 ug 22:1-18, ug tan-awa ang duha ka tagsaong pananglitan sa iyang pagsalig kang Jehova. Oo, “si Abraham mituo kang Jehova, ug kini giisip kaniya nga maoy pagkamatarong.” Mao nga “siya gitawag nga ‘higala ni Jehova.’”—Santiago 2:23.
Ang dugang kinahanglanon alang sa panaghigalaay uban sa Diyos mao ang pagtuman sa mga kaakohan nga dala nianang panaghigalaay. Tungod sa atong ubos kaayong kahimtang kon itandi kang Jehova, kining mga kaakohana makataronganong mas labaw kaysa iyaha sa tawhanong panaghigalaay. Sila mosaylo pa sa atong pagkagusto sa pagpahimuot kaniya sa pila ka mga butang—ingon sa buhaton nato sa tawhanong higala. Sila naglakip sa atong pagkagusto sa pagpahimuot kaniya sa tanang butang. Si Jesus, ang Anak sa Diyos ug kinasuorang higala, nagpakita niini sa dihang siya miingon bahin kang Jehova: “Sa kanunay akong gibuhat ang makapahimuot kaniya.”—Juan 8:29.
Mao nga, ang pagpakighigala kang Jehova, o uban sa iyang Anak, dili mabatonan sa walay-kalabotan nga pasikaranan; kana nagasandig sa atong pagkinabuhi uyon sa mga unang-kinahanglanon alang sa panaghigalaay nga ilang gihan-ay. (Tan-awa ang Salmo 15:1-5.) Si Jesus nagpakita niini sa tin-aw diha sa pakigkabildo uban sa iyang mga tinun-an. “Kamo mga higala nako,” giingnan niya sila, “kon magatuman kamo sa akong isugo kaninyo.”—Juan 15:14.
Laing kinahanglanon alang sa panaghigalaay maoy bukas ug prangka sa komunikasyon. Sa adlaw sa iyang kamatayon, si Jesus nagsulti sa iyang matinumanong mga apostoles: “Dili ko na kamo nganlan nga mga ulipon, kay ang ulipon wala masayod sa ginabuhat sa iyang agalon. Apan ginganlan ko kamo nga mga higala, kay ang tanan nga nadungog ko gikan sa akong Amahan kini gipahibalo ko man kaninyo.” (Juan 15:15) Sa pagpakig-ambit sa iyang mga hunahuna nganha sa iyang mga higala, si Jesus nagsunod sa panig-ingnan sa iyang langitnong Amahan, nga mahitungod kaniya ang Amos 3:7 nagaingon: “Ang Soberanong Ginoong Jehova dili magbuhat sa bisan unsa gawas kong ang iyang tinago ipadayag niya sa iyang mga alagad ang mga manalagna.”
Dili ba kini kinaiyanhon tali sa mga maghigala? Lagmit dili kita mobati ug kasibot sa pagpaambit sa atong mga kasinatian kang Ginoong Santos sa tabok sa kalye. Ug labing seguro dili nato gustong tug-anan siya sa atong halalom nga mga hunahuna ug mga pagbati. Total, usa lamang siya ka kaila. Apan sa atong mga higala, ay, sa subsob dili kita makahulat sa pagtug-an nila sa maong mga butang!
Mao usab sa atong panaghigala kang Jehova. Dili kita makahulat sa pagduol kaniya diha sa pag-ampo, nga magbutyag kaniya sa atong mga panginahanglan, atong mga tinguha, ug atong kinasulorang mga pagbati. Tinuod, kon ang komunikasyon maoy sa usa-ka-kiliran, ang panaghigalaay taodtaod mamatay. Busa kita angay usab nga andam sa pagtugot sa Diyos nga mosulti kanato. Kini atong ginabuhat pinaagi sa maampingong pagpatalinghog sa iyang nasulat nga Pulong, pagpamalandong sa iyang pahamangno, ug unya sa pagpadapat niana sa labing maayo nga atong maarangan.
Unsa ka Hinungdanon Kanimo ang Panaghigala Kang Jehova?
Sa pagtabang nimo sa pagtubag ning pangutanaha, tagda ang usa ka linaing matang sa tawhanong panaghigalaay. Kon ikaw usa ka batan-ong tawo, lagmit ikaw interesado sa panaghigalaay nga mahimong motultol sa kaminyoon. Tinuod, imong nasabtan nga ang pagkaila lamang sa gidahom nga kapikas dili haom nga pasikaranan alang sa kaminyoon. Ang panagkaila kinahanglan una nga modangat ngadto sa panaghigalaay. Kining panaghigalaay unya molipang ug mahulma ngadto sa mas suod nga relasyon nga sa kataposan mahimong tukmang pasikaranan alang sa malipayong kaminyoon.
Karon, tagda. Unsang paningkamot ang gihimo sa kadaghanang mga tawo sa pag-ugmad niining matanga sa panaghigalaay? Unsa kataas nga panahon ug unsang kantidara sa salapi ang ilang gigugol sa pagtukod ug unya sa pagmentinar niana? Unsang gitas-a sa panahon ang ilang gigugol sa paghunahuna labot niana? Sa unsang kinutoban nga sila nagplano—o nagpakitag pagkaandam sa pag-usab ug mga plano—sa katuyoan sa pagpauswag o pagmentinar nianang relasyon?
Unya suknaa ang imong kaugalingon: ‘Sa unsang paagi kini ikatandi sa akong mga paningkamot sa pag-ugmad ug panaghigalaay uban sa Maglalalang o sa pagpauswag ug pagpalig-on niana? Unsa kataas sa panahon ang akong igugol sa pagbuhat niana? Hangtod sa unsang kinutoban kining panaghigalaay kang Jehova nag-okupar sa akong mga hunahuna? Sa unsang kinutoban nga ako nagplano—o nagpakita ug kaandam sa pag-usab ug mga plano—sa katuyoan sa pagpauswag ug unya sa pagmentinar niining relasyona?’
Ang batan-ong mga Kristohanon kinahanglan nga nasayod sa bug-os nga ang tanang tawhanong panaghigalaay, lakip na ang usa nga ngadtongadto motultol sa kaminyoon, ikaduha sa kahinungdanon sa panaghigalaay nga kinahanglan nilang mabatonan uban sa ilang Maglalalang. Mao nga sila ginaaghat sa Ecclesiastes 12:1: “Hinumdomi, karon, ang imong Dakong Maglalalang sa mga adlaw sa imong pagkabatan-on.” Daghan ang nagbuhat niini pinaagi sa publikong pag-alagad ingong mga ministro sa Diyos, ang nagkausbaw nga gidaghanon nila ingong bug-os panahon nga mga magwawali, o mga payunir.
Bisan pa sa nagatubong kamayubiton ug pagbale-wala sa relihiyon libot nila, sila maisogong nagpanalipod kang Jehova sa dihang sila makadungog ug sayop nga pagtamay ug mga sumbong batok kaniya. Dili ba kini ang makataronganong dahomon ni Jehova sa iyang mga higala? Dili ba usab modahom kita niana sa atong mga higala? Ug dili ba makapalipay sa atong mga kasingkasing sa dihang atong madiskobrehan nga ang atong mga higala masibotong naghimo niana ug uban sa pagtuo?—Itandi ang Proverbio 27:11.
Oo, ang pakighigala uban sa Diyos—sama sa uban sa mga tawo—nagdala ug mga responsabilidad nga kinahanglan tumanon aron ang panaghigalaay molungtad. Ang tawo nga dili andam sa pagdawat niining mga responsabilidad, o dili andam sa paghimo ug pagpahinungod sa Diyos ug unya sa pagtuman niana, sa tinuod tingali nakaila kang Jehova. Hinuon, siya wala pa makasinati, sa kalipay sa pagbaton Kaniya ingong usa ka Higala.
[Hulagway sa panid 25]
Si Abraham nagsalig sa Diyos ug busa ginganlang higala ni Jehova