Sa Unsang Paagi Makabaton Kag Kaayohan sa Ebanghelyo?

ANG Bibliya gitamod ug maayo tungod sa literaryong bili niini​—bisan sa ubang mga ateyista. Apan, pipila lamang ang nagabasa aron ipadapat ang ginapamulong niini. Dugang pa, sanglit ang unod niining maayong balita may petsa nga halos duha ka libo na ang miagi, daghang tawo ang daw nagtuo nga kini angay bag-ohon, ipasibo sa panahon. Kini ba nga Ebanghelyo karaan o daan na? Dili gayod.

Minilyong mga lalaki ug babaye, batan-on ug tigulang, nahibalo nga ang Bibliya maoy usa ka hamili nga tinubdan sa tabang. Kini sama sa mabasa diha sa introduksiyon sa Today’s English Version: “Ang Bibliya dili lamang maayong literatura nga angay dayegon ug tamdon; Maayong Balita kini alang sa tanang tawo bisan diin​—usa ka mensahe nga pagasabton ug ipadapat diha sa adlaw-adlaw nga kinabuhi.”

Unsay kahulogan sa Ebanghelyo alang kanimo? Gigamit mo ba kini ingong giya sa imong adlaw-adlaw nga kinabuhi? Palandonga kon sa unsang paagi ang maayong balita nakahatag ug kaayohan sa uban nga namati niini sa unang siglo ug kon sa unsang paagi makahatag kinig kaayohan sa uban sa atong panahon.

Mga Tawong Natabangan sa Ebanghelyo

Sa mga adlaw ni Jesus ang mga indibiduwal sama sa kugihang mga mangingisda ug mga ginang sa panimalay nadani sa maayong balita ug nakakat-on sa kamatuoran mahitungod sa katuyoan sa Diyos alang sa tawo. Ang maayong balita bug-os nga nakausab sa ilang mga kinabuhi ug kasagaran naghatag kanila ug bug-os nga kahupayan. Pananglitan, si Maria Magdalena naayo gikan sa pagkanahisudlan sa demonyo. Si Zaqueo, nga niadto mao ang punoan sa mga maniningil ug buhis, mibiya sa iyang mahakogon nga paagi sa kinabuhi. (Lucas 8:2; 19:1-10) Ang mga buta ug mga sanlahon natabangan sa dihang sila miduol kang Jesus, ang usa nga nagwali sa maayong balita. (Lucas 17:11-19; Juan 9:1-7) Si Jesus tukmang nakaingon: “Ang mga buta makakita na, ug ang mga bakol makalakaw na, ug ang mga sanlahon nangahinlo ug ang mga bungol makabati na, ug ang mga patay gipamanhaw, ug ang mga kabos gikawalihan na sa maayong balita.”​—Mateo 11:5.

Ang labing hinungdanon kay sa ilang pagkaayo, hinunoa, mao ang paagi sa pag-usab sa maayong balita sa daghan niadtong alaot nga mga indibiduwal ingong mga tawo. Ang mga tim-os ug kasingkasing napuno sa paglaom alang sa umaabot. Sila mibutang sa ilang pagsalig diha sa Gingharian sa Diyos​—usa ka butang nga mas maayo kay sa bisan unsang sosyal nga ebanghelyo. (Mateo 4:23) Ang ilang paglaom wala mapakyas tungod sa kamatayon ni Jesus. Naghubit sa mga kahimtang bisan human niana nga hitabo, ang Buhat 5:42 miingon bahin sa iyang mga tinun-an: “Sa adlaw-adlaw diha sa templo ug gikan sa balay ug balay sila nagpadayon nga walay hunong sa pagpanudlo ug sa pagmantala sa maayong balita mahitungod kang Kristo, Jesus.” Sa unang siglo, ang mga tawo sa daghang kayutaan nakadawat ug espirituwal nga tabang tungod kay sila namati sa maong pagsangyaw.

Ang Gingharian mao ang labing maayong balita balik niadto. Maayong balita pa ba gihapon ang mensahe sa Gingharian?

Unsay Kahulogan sa Maayong Balita Karon?

Kon ikaw nangandoy ug malinawon, luwas nga kalibotan, nan maayo sa pagkatinuod ang balita sa Gingharian. Gani, diha sa kalibotan nga may gatosan ka milyong kulag-kaon ug gikuraw sa gutom nga katawhan, nga may makahahadlok nga mga sakit nga nagahulga sa tanan, uban ang makuyaw nga pagsulbong sa krimen, ug sa pagkaylap sa kawalay kalig-on sa politika, kini mao lamang ang tinuod ug malungtarong maayong balita. Kini naghawas sa bugtong paglaom sa tinuod nga kauswagan.

Maoy hinungdan nga si Jesus mitagna mahitungod sa atong adlaw: “Kining maayong balita sa gingharian igamantala sa tanang ginapuy-ang yuta aron sa pagpamatuod sa tanang kanasoran; ug unya moabot ang kataposan.” (Mateo 24:14) Kining mga pulonga nagakatuman diha sa talagsaong paagi samtang ginasangyaw sa mga Saksi ni Jehova ang maayong balita diha sa kapin sa 200 ka kayutaan. Gidayeg sa Katolikong publikasyon, Nova Evangelização 2000, ang mga Saksi tungod niini, nga nagaingon: “Asa ba nato makita ang mga Saksi ni Jehova? Diha sa mga pultahan sa mga balay. Ug aron mahimong Saksi ni Jehova, gawas nga iya ni Jehova, ang usa kinahanglang mahimong usa ka saksi. Busa, makita nato sila nga nagabuhat, nagapahibalo, nagatanyag, sa ilang nasinatian.”

Ugaling, walay usa ang awtomatiko nga makabaton ug kaayohan gikan sa maayong balita. Kini motabang lamang niadtong mamati ug mosunod. Aron ikapasundayag kining puntoha, si Jesus mihatag ug sambingay bahin sa usa ka tawo nga migawas aron sa pagpugas ug binhi. Ang nagkalainlaing matang sa yuta nga napugsan sa binhi naghulagway sa nagkalainlaing matang sa kahimtang sa kasingkasing nga gipakita sa mga tigpatalinghog sa maayong balita. Si Jesus miingon: “Sa dihang ang usa ka tawo makabati sa pulong mahitungod sa gingharian ug dili makasabot niini, ang daotan moabot ug mosakmit sa binhi nga gipugas diha sa iyang kasingkasing . . . Ug bahin sa usa nga napugas diha sa maayong yuta, kini mao ang nakadungog sa pulong ug nakasabot niini, nga sa pagkatinuod nagapamunga ug nagapaani, sa usa ka higayon sa usa ka gatos ka pilo, sa uban kan-oman, sa uban katloan.”​—Mateo 13:18-23.

Sama sa unang siglo, ang kadaghanan sa mga tawo karon walay gihimo bisag diyutayng paningkamot aron makasabot sa maayong balita. Sila wala makasabot niini, ug busa sila napakyas sa pagdawat sa mga kaayohan. Ang uban nagpabili sa maayong balita ug nakakat-on kon sa unsang paagi ipahiuyon ang ilang mga kinabuhi sa kabubut-on sa Diyos. Niining paagiha sila gipanalanginan. Hain ka niining grupoha?

Ang Gahom sa Ebanghelyo Karon

Ang mga kasinatian nagpamatuod nga ang pagkasabot sa maayong balita motabang sa mga “walay paglaom ug walay Diyos.” (Efeso 2:12; 4:22-24) Si Roberto nga gikan sa Rio de Janeiro nagkinahanglag tabang. Sukad sa iyang pagkabata, siya nagkinabuhi sa makauulaw nga paagi sa kinabuhi, nga nalangkit sa mga droga, imoralidad, ug pagpangawat. Sa kadugayan siya nabilanggo. Samtang didto sa bilanggoan si Roberto nagtuon sa Bibliya uban sa usa ka miduaw nga Saksi. Siya miuswag pag-ayo sa espirituwal nga gipamub-an ang iyang sentensiya sa pagkapriso.

Human gipagawas, nahimamat ni Roberto ang usa ka dalagita nga iyang giatake ug gitionan sa posil kaniadto. Siya usab nagtuon sa Bibliya uban sa mga Saksi ni Jehova. Unsay nahitabo? Ang mosunod maoy bahin sa sulat nga nag-asoy sa hitabo: “Sila nagkita diha sa Kingdom Hall sa unang higayon human sa pag-atake. Ang panagkita makapatandog. Ang duha mihilak dala sa emosyon ug nagginaksanay ingong igsoong lalaki ug babaye. Karon ang kawatan niadto ug iyang biktima nanagdayeg kang Jehova.”

Ang laing indibiduwal, nga si Isabel, usab nagkinahanglag tabang, kay siya ilado tungod sa iyang kamasuk-anon. Siya dulot nga nalangkit sa espiritismo ug pangungo ug gipaantos sa mga demonyo. Samtang siya nagtuon sa Bibliya uban sa mga Saksi ni Jehova, iyang nakaplagan nga ang maayong balita sa pagkatinuod nakatabang. Sa ulahi, siya nakalingkawas sa pagkontrolar sa mga demonyo ug nag-usab sa iyang personalidad​—sa kataposan nakakat-on sa pagpugong sa iyang kasuko. Karon usa na siya ka matinumanong Kristohanon, nailhan ingong tawo nga maluloton sa pagpakiglabot sa uban.

Oo, ang maayong balita dili teoriya lamang. Kini may tinuod nga gahom sa pag-usab sa mga kinabuhi. (1 Corinto 6:9-11) Labaw pa gani ang mahimo niini. Kini nagapunting usab sa umaabot nga mga panalangin.

Mga Panalangin nga Anaa sa Unahan

Sumala sa Pulong sa Diyos, ang umaabot adunay kahibulongang mga palaaboton. Atong makita ang katumanan sa pag-ampo ni Jesus sa pag-abot sa Gingharian sa Diyos ug ang Iyang kabubut-on nga matuman dinhi sa yuta maingon man sa langit. (Mateo 6:10) Sa dili madugay, ang sistema sa mga butang karon uban sa makapasubong korapsiyon ug kapintasan pagakuhaon, ug ang langitnong kagamhanan sa Diyos, ang iyang Gingharian, magamando ibabaw sa matarong ug kasingkasing nga mga indibiduwal nga andam mamati ug magmasinugtanon sa maayong balita.​—Daniel 2:44.

Mosunod ang bug-os nga kauswagan samtang tudloan ang matinumanong mga tawo sa paghimo sa yuta nga usa ka paraiso nga niini ang mga maaghop mabuhi sa walay kataposan. (Salmo 37:11, 29) Sa pagkatinuod, maayong balita gayod nga ang krimen, sakit, gutom, polusyon, ug mga gubat mawagtang sa walay kataposan! Gihanduraw mo ba ang imong kaugalingon ug ang imong pamilya nga nagakinabuhi nianang bag-ong kalibotan sa kalinaw ug hingpit nga panglawas nga walay kahadlok sa sakit o kamatayon?​—Pinadayag 21:4.

Matuod, giisip sa kadaghanan ang maong maayong balita nga ordinaryo o handurawan lamang. Apan sayop sila. Ang maayong balita gipasukad diha sa labing malig-ong ebidensiya, ug kini nakapausab na sa minilyong mga kinabuhi. Busa, ayaw padala sa kahadlok kon ang uban dili motuo.

Palandonga ang usa ka maalamong indibiduwal nga namalit ug yuta diha sa ugmaronong dapit, naglaom nga makaganansiya sa iyang kapital. Mabasol ba siya sa pagnegosyo sa iyang salapi niining paagiha? Dili. Ang mga tawo mahimong moingon pa nga siya milihok nga maalamon. Nan, nganong dili maglantawng daan labot sa Gingharian ug mamuhonan, sa ato pa, sa maayong balita? Sanglit ang pagdawat sa maayong balita nagkahulogan sa kaluwasan, walay laing kapital ang makahatag ug mas dakong ganansiya.​—Roma 1:16.

Sa unsang paagi mahimo nimong kapital ang maayong balita? Una, magmaandam nga magpatudlo sa Diyos. Unya lihok sumala sa imong nakat-onan. Sunda ang pangunang mga kinahanglanon, ingon sa gitala sa karaang Hebreohanong manalagna: “Unsay ginapangayo ni Jehova kanimo kondili ang pagpakitag hustisya ug ang paghigugma sa kalulot ug ang paglakaw nga makasaranganon uban sa imong Diyos?” (Miqueas 6:8) Ang pagtuon sa paglakaw uban sa Diyos nagkinahanglag panahon ug paningkamot. Apan, ang mga Saksi ni Jehova, nga mitabang kang Roberto ug Isabel, malipay sa pagtabang kanimo niining bahina​—sama sa ilang pagtabang sa minilyon pang uban sulod sa nangaging katuigan.

Samtang nagapaabot sa katumanan sa mga saad sa Diyos, pauswaga ang imong kapital pinaagi sa pagkinabuhi sumala sa maayong balita, tagamtamon ang kalinaw sa hunahuna ug pagtukod ug suod nga relasyon sa Diyos. Ang imong kapital luwas​—walay kalisod sa ekonomiya o kagubot sa politika ang magbutang kanimo sa peligro. Ug sa kataposan, kini mohatag kanimo ug makalilipay nga ganansiya. Unsa kana nga ganansiya? Si apostol Juan misulat: “Ang kalibotan lumalabay ug ang mga pangibog niini, apan siya nga nagabuhat sa kabubut-on sa Diyos magpabilin sa walay kataposan.”​—1 Juan 2:17.

[Hulagway sa panid 7]

Ang mga binhi sa maayong balita mahulog diha sa nagkalainlaing matang sa yuta

[Credit Line]

Garo Nalbandian