Unsa ba Gayod ang Ebanghelyo?
SA PANAHON sa Pasko, ang mga tawo sa daghang kayutaan makadungog, ug personal nga mohisgot pa bahin sa Ebanghelyo. Ang termino komun na kaayo, apan kini ba dunay kahulogan nga labaw pa kay sa gihunahuna sa kadaghanan? Ang Ebanghelyo ba may talagsaong kahulogan alang kanimo ug sa imong mga minahal?
Ang “Ebanghelyo” nagkahulogang “maayong balita,” ug sa pagkatinuod, ang maayong balita gikahinangpan dili lamang sa panahon sa Pasko kondili sa bisan unsang panahon. Apan, ang Ebanghelyo dili kay simpleng maayong balita lamang. Kini maoy usa ka espisipikong maayong balita gikan sa tinong tinubdan mahitungod sa usa ka partikular nga butang. Kini, sa pagkatinuod, usa ka mensahe nga gitudlo sa Diyos nga imantala ngadto sa tanang katawhan.
Si Eugênio Salles, arsobispo sa Rio de Janeiro, Brazil, naghisgot bahin nianang maayong balita sa dihang siya miagda: “Kita kinahanglang molihok nga uyon sa Ebanghelyo ug dili uyon sa mga ideolohiya.” Husto ang arsobispo. Apan, aron makalihok nga uyon sa Ebanghelyo kinahanglan nga kita mahibalo kon unsa gayod ang Ebanghelyo. Sa unsang paagi atong makat-onan kana? Ug sa unsang paagi ang paglihok nga uyon sa Ebanghelyo makatabang kanato?
Unsa ang Ebanghelyo?
Sagad wala masabti kon unsa ang Ebanghelyo. Sa 1918 ang Federal Council of the Churches of Christ sa Amerika nagpasidungog sa karon patay nang Liga sa Kanasoran ingong ang politikal nga ekspresyon sa Gingharian sa Diyos sa yuta ug mideklarar nga kini “gipasukad sa Ebanghelyo.” Ang maong liga sa pagkaalaot napakyas sa tumong niini sa pagtipig sa kalinaw. Sa tin-aw, ang konsilyo nasayop. Ang Liga sa Kanasoran walay kalabotan sa Ebanghelyo.
Sa dili pa dugayng katuigan ang mga tigpasiugda sa teolohiya sa kagawasan kanunayng nagpasiugda sa Ebanghelyo kon maghisgot sila mahitungod sa ilang mga ideya alang sa politikal o sosyal nga repormasyon. Sa pagbuhat niana ilang gisalikway ang tinuod nga Ebanghelyo. Ang magasing Veja sa Brazil mikomento: “Ang Iglesya Katolika misugod sa pagpakitag pabor sa sosyal nga gingharian, nga wala magtagad sa espirituwal nga mga panginahanglan sa iyang mga sumusunod. Kadtong nangita sa pulong sa Diyos diha sa usa ka wali sagad nakakaplag lamang ug mapasiatabong mga argumento batok sa mga inhustisya sa katilingban.”
Ang pag-uswag sa mga kahimtang sa pagkinabuhi o kausaban sa mga sistema sa politika tingali maoy maayong balita alang sa uban. Ugaling, kana dili mao ang maayong balita, ang Ebanghelyo. Miadmiter sa kapakyasan sa iyang iglesya sa pagwali sa tinuod nga Ebanghelyo, usa ka obispo miingon: “Atong gipasagdan ang espirituwal nga pagtudlo sa atong mga sumusunod sukad sa mga tuig sa ’60 tungod sa materyalistiko nga babag sa atong doktrina.”
Ang taho diha sa magasin sa balita nga Time sa T.B. nag-ingon nga ang mga Protestante usab napahilayo gikan sa Ebanghelyo. Ang magasin miingon: “Dili lamang napakyas ang tradisyonal nga mga denominasyon sa pagpatin-aw sa ilang mensahe; sila dugang wala makatino kon unsa kana nga mensahe.” Unsa ang angay nila nga mensahe? Unsa ba ang Ebanghelyo?
Pag-ila sa Ebanghelyo
Ang Webster’s Ninth New Collegiate Dictionary naghubit sa “Ebanghelyo” ingong “ang mensahe mahitungod kang Kristo, sa gingharian sa Diyos, ug sa kaluwasan.” Ang pulong “ebanghelyo” usab gihubit ingong “usa ka interpretasyon sa Kristohanong mensahe (ang sosyal nga ebanghelyo)”; “ang mensahe o mga pagtulon-an sa usa ka relihiyosong magtutudlo.” Kini bang tanang kahulogan mapadapat? Dili, dili kon kita maghisgot bahin sa ang Ebanghelyo. Ang tinuod nga Ebanghelyo gipasukad diha sa Bibliya; gani, ang una lamang sa tulo nga kahulogan mao ang husto. Ang kataposang duha nagpakita lamang sa paagi sa paggamit karong adlawa sa pulong “ebanghelyo.”
Uyon niini nga hunahuna, ang Vine’s Expository Dictionary of New Testament Words nag-ingon nga diha sa Kristohanon Gregong Kasulatan (ang “Bag-ong Testamento”), ang Ebanghelyo “nagpasabot sa maayong balita mahitungod sa Gingharian sa Diyos ug sa kaluwasan pinaagi ni Kristo, nga angay dawaton nga may pagtuo, pinasukad sa Iyang nagalukat nga kamatayon.” Hinungdanong masabtan kini tungod kay ang hustong pagsabot sa matuod maayong balita dakog kalabotan sa atong kaayohan karon ug sa umaabot nga kalipay.
Usa ka Lahi nga Mensahe
Ingon sa gipakita sa gihisgotang reperensiya, ang Ebanghelyo suod nga nalangkit kang Jesu-Kristo—maoy hinungdan nga ang upat ka asoy sa Bibliya sa iyang kinabuhi sa yuta gitawag ang upat ka Ebanghelyo. Sukad pa sa sinugdan sa iyang tawhanong kinabuhi, ang balita mahitungod kang Jesus maoy maayong balita. Sa gimantala ang iyang pagkahimugso, usa ka manulonda miingon: “Tan-awa! Gidad-an ko kamo ug maayong balita [o, ebanghelyo] sa dakong kalipay nga mabatonan sa tanang katawhan, tungod kay alang kaninyo natawo karong adlawa ang Manluluwas, nga mao ang Kristo nga Ginoo.”—Lucas 2:10, 11.
Ang bag-ong natawong si Jesus modako nga mahimong Kristo, ang gisaad nga Mesiyas. Ipadayag niya ang katuyoan sa Diyos alang sa kaluwasan, itugyan ang iyang hingpit tawhanong kinabuhi alang sa katawhan, pagabanhawon, ug unya mahimong ang piniling Hari sa Gingharian sa Diyos. Pagkamaayong balita gayod! Maoy hinungdan nga ang mensahe mahitungod kaniya gitawag ang Ebanghelyo.
Sa panahon sa iyang mubong ministeryo sa yuta, si Jesus masiboton kaayo sa pagsangyaw sa maayong balita. Atong mabasa diha sa Ebanghelyo ni Mateo: “Gisuroy ni Jesus ang tanang mga siyudad ug mga balangay, nanudlo sa ilang mga sinagoga ug nagsangyaw sa maayong balita sa gingharian.” (Mateo 9:35) Ang katuyoan sa iyang pagsangyaw dili aron maayog bation ang mga tawo. Girekord ni Marcos si Jesus nga nag-ingon: “Ang tinudlong panahon natuman na, ug ang gingharian sa Diyos haduol na. Paghinulsol kamo, ug pagbatog pagtuo diha sa maayong balita.” (Marcos 1:15) Oo, kadtong midawat ug nagmasinugtanon sa maayong balita nakakaplag nga kini nagausab sa ilang mga kinabuhi.
Human namatay si Jesus, ang iyang mga sumusunod nagpadayon sa pagsangyaw sa Ebanghelyo. Ilang gipahayag dili lamang ang mahitungod sa Gingharian kondili ilang gidugang ang makalilipayng balita nga si Jesus nabanhaw sa tuong kamot sa Diyos sa mga langit ug naghalad sa bili sa iyang hingpit tawhanong kinabuhi alang sa katawhan. Ingong usa nga gipili sa Diyos nga magamando ibabaw sa tibuok yuta ingong Hari sa Gingharian sa Diyos, siya mahimong Ahente sa Diyos sa paglaglag sa mga kaaway sa Diyos ug sa pagpasig-uli sa yuta nga usa ka paraiso.—Buhat 2:32-36; 2 Tesalonica 1:6-10; Hebreohanon 9:24-28; Pinadayag 22:1-5.
Karong adlawa, ang maayong balita nagalakip ug laing elemento. Sumala sa tanang pamatuod sa katumanan sa tagna, si Jesus nagahari na karon, ug kita nagkinabuhi na sa kataposang mga adlaw niining sistema sa mga butang. (2 Timoteo 3:1-5; Pinadayag 12:7-12) Ang panahon sa dihang ang Gingharian molihok batok sa mga kaaway sa Diyos kusog nga nagsingabot. Unsa pang balitaa ang mas maayo pa kay niini?
Atong tan-awon sa mosunod nga artikulo kon unsa ka gamhanan ang Ebanghelyo. Kini nakatabang sa usa ka babaye nga makakaplag ug kagawasan gikan sa pagkaulipon sa daotang mga espiritu. Kini nakatabang sa usa ka lalaki nga nabilanggo tungod sa pagpangawat sa pagkakaplag ug kalipay. Ug kini usab makahatag kanimo ug dakong kaayohan—kon ikaw mamati ug magmasinugtanon sa maayong balita.