Ikaw ba Pagabayawon sa Langit?
DAGHANG tawo ang nagtuo nga sila moadto sa langit kon sila mamatay. Apan ang uban naghunahuna nga sila pagasakgawon sa langit nianang gitawag nga rapture o pagbayaw sa himaya. Kana ba ang imong gidahom?
Ang pagbayaw sa himaya mao “ang kalit nga pagkawala sa milyonmilyong mga tawo nga walay bisan unsang timaan kon diin sila miadto!” Miingon ang usa ka Protestanteng ebanghelisador. Sumala sa Evangelical Dictionary of Theology, ang terminong “rapture” nagpunting “sa iglesya nga mahiusa uban ni Kristo sa iyang ikaduhang pagbalik.”
Ang uban natugaw sa paghunahuna sa pagbiya sa mga higala ug sa mga membro sa pamilya aron mosugat kang Jesu-Kristo. Bisan pa, daghan ang nagtuo nga ang pagbayaw sa himaya kinahanglang mahitabo. Mahitabo kaha kini? Kon mao, kanus-a?
Lainlaing mga Hunahuna Bahin sa Pagbayaw sa Himaya
Gipakita sa Bibliya nga sa dili pa magsugod ang gisaad nga Usa ka Libo ka Tuig nga Pagmando ni Kristo, aduna unyay usa ka yugto nga gitawag “dakong kasakitan.” Matud ni Jesus: “Aduna unyay dakong kasakitan nga ang ingon wala pa mahitabo sukad sa sinugdan sa kalibotan hangtod karon, dili, dili na gayod kini mahitabo pag-usab.” (Mateo 24:21; Pinadayag 20:6) Ang uban nagtuo nga ang pagbayaw sa himaya unang mahitabo kay sa dakong kasakitan. Ang uban nagapaabot nga kana mahitabo nianang panahona. Aduna pay uban nga naghunahuna nga ang pagbayaw sa himaya moabot human nianang dihitupngang kasakitan.
Ang hunahuna nga mahitabo ang pagbayaw sa himaya human sa dakong kasakitan nangibabaw hangtod sa sayong ika-19ng siglo. Unya, didto sa Inglaterra natukod ang usa ka kalihokan nga gipangunahan sa usa ka klero niadto sa Iglesya sa Irlandiya, si John Nelson Darby. Siya ug ang may samag-hunahuna nga mga Anglikano sa ulahi nailhang Brethren. Gikan sa Plymouth nga didto natukod ang iglesya, si Darby mibiyahe sa pagsangyaw sa Switzerland ug sa ubang dapit sa Uropa. Siya miangkon nga ang pagbalik ni Kristo mahitabo sa duha ka hugna. Kini pagasugdan ug sekretong pagbayaw sa himaya, diin ang “mga santo” pagasakgawon sa panganod sa dili pa malaglag ang yuta sa pito-ka-tuig nga panahon sa kasakitan. Unya si Kristo mopakita sa mga tawo, nga duyogan niini nga “mga santo,” ug sila magmando sa yuta sulod sa usa ka libo ka tuig.
Gipasiugda ni Darby nga kinahanglang dili sila bahin sa kalibotan, ug kadtong may sama kaniyag hunahuna sa ulahi nailhan ingong Exclusive Brethren. Si B. W. Newton nanguna sa laing grupo nga nagtuo sa pagbayaw sa himaya apan dili sa pagtuo nga mahitabo sa dili pa ang kasakitan. Si Alexander Reese nga midapig sa pagbayaw sa himaya nga mahitabo human sa kasakitan miingon nga “ang mga teoriya sa Sekretong-Pagbayaw sa himaya maoy pagdaot sa paglaom sa Pag-anhi ni Kristo.”
Ang mga tawong nagpaluyo sa pagbayaw sa himaya sa dili pa ang kasakitan nagtuo nga apektado kaayo niining lahi nga hunahuna “ang kinaiyahan sa [ilang] paglaom labot sa pag-anhi ni Kristo.” Ang uban may hugot nga pagtuo sa “teoriya sa dili-bug-os nga pagbayaw sa himaya,” nagtuo nga kadtong labing maunongon kang Kristo mao ang unang pagabayawon ug ang mas kalibotanon kuhaon sa ulahi.
Daghang grupong ebanghelikal nagamantala nga haduol na ang pagbayaw sa himaya sa matinumanong mga Kristohanon. Tungod sa nagkalahi nga mga hunahuna, usa ka pulyetong gipatik sa Elim Pentecostal Church sa Britanya miingon: “Samtang nagtuo kami sa usa ka halapad nga laraw sa mga hitabo labot sa pagbalik ni Ginoong Jesus . . . , may kagawasan ang tagsatagsa sa paghubad sa tagna sumala sa iyang pagtuo. Daghan ang midawat ug dili-dogmatikong baroganan, mapailobong naghulat sa mga hitabo mismo nga maoy mobutyag sumala sa matagnaong programa.”
Ang dinasig nga Pulong sa Diyos, ang Bibliya, maoy sukdanan nga niana atong masukod ang pagkatinuod sa tanang pagtulon-an. (2 Timoteo 1:13; 3:16, 17) Busa, unsay ikasulti niini bahin sa pagbayaw sa himaya?