Dagayang mga Panalangin Diha sa “Mga Tigdala sa Kahayag” Distritong mga Kombensiyon
MGA 2,700 ka tuig kanhi, ang propeta nga si Isaias misulat: “Tan-awa! ang kangitngit motabon sa yuta, ug ang mabaga nga kangitngit motabon sa mga katawhan.” (Isaias 60:2) Pagkatinuod kadtong mga pulonga! Bisan pa, adunay paglaom, kay si Jehova nagpahinabo sa kahayag nga mosidlak. Sa miaging tuig, ang mga nahigugma sa kahayag sa Diyos mainitong gidapit sa pagtambong sa “Mga Tigdala sa Kahayag” Distritong Kombensiyon.
Ang programa sa kombensiyon unang gihimo sa Hunyo sa Amihanang Amerika. Sa misunod nga mga bulan, kini usab gihimo sa Silangan ug Kasadpang Uropa, Sentral ug Habagatang Amerika, Aprika, Asia, ug sa mga isla sa kadagatan. Ang mitambong miabot sa minilyon. Ug pagkadagaya sa espirituwal nga piyesta ang ilang natagamtam!
“Maayong Pag-abot, Kamong Tanang mga Tigdala sa Kahayag!”
Sa kadaghanang dapit ang kombensiyon gisugdan sa Biyernes ug gitapos sa Dominggo sa hapon. Sa nakapahiluna na ang mga kombensiyonista sa ilang mga lingkoranan sa Biyernes sa buntag, sila nalipay sa pagkadungog sa mubong paghisgot sa paagi sa dugang nga pagdan-ag sa kahayag ni Jehova niining kataposang mga adlaw. Unya mibanos ang tsirman sa kombensiyon diha sa plataporma. Iyang gipasiugda nga ang matuod nga mga Kristohanon kinahanglang mga tigdala sa kahayag ug mainitong miingon: “Maayong pag-abot, kamong tanang mga tigdala sa kahayag!” Ang programa sa kombensiyon motabang sa mga delegado sa pagpadayon sa pagbanaag sa kahayag ni Jehova.
Gipadayag sa paninugdang pakigpulong ang katibuk-ang kinaiyahan sa tibuok kombensiyon. Gipahinumdoman sa mamumulong ang mga kombensiyonista nga ang masanag nga palaaboton sa katawhan napalong balik pa sa tanaman sa Eden. Sukad niadto, gibutaan ni Satanas ang katawhan sa kahayag sa kamatuoran. (2 Corinto 4:4) Bisan pa, si Jesus miabot ingong “kahayag sa kanasoran.” (Isaias 42:1-6) Iyang giyagyag ang relihiyosong kabakakan, gipaila ang daotang mga buhat nga iya sa kangitngit, gibayaw ang pagkasoberano ni Jehova, ug nagawali sa maayong balita sa Gingharian. Gihimo usab kini sa mga sumusunod ni Jesus—ug nagpadayon gihapon sila niini! (Mateo 28:19, 20) Ang mamumulong mapukawong miingon: ‘Kita, sama kang Jesus, mahimong mga tigdala sa kahayag. Wala nay laing buluhaton ang labi pa ka hinungdanon sa atong adlaw. Ug wala nay molabaw pa ka dako niini nga pribilehiyo.’
Sa talitapos na ang unang sesyon sa kombensiyon, dihay usa ka sorprisa. Ang tsirman sa kombensiyon mibalik sa plataporma ug gipahibalo ang pagluwat sa mga serye sa upat ka bag-ong mga tract. Kining okasyona gitubag ug madasigong palakpak, ug usa ka kopya sa matag tract gihatag sa matag usa sa delegadong mitambong.
Sa hapon sa Biyernes, gihisgotan sa programa ang pangunang tambag alang sa nagadalag-kahayag nga mga Kristohanon. Ang unang duha ka pakigpulong mihatag ug maayong tambag kon unsaon sa paglikay nga dili-matakdan sa kangitngit sa kalibotan. Sanglit si Satanas mopadayag nga usa ka manulonda sa kahayag, hinungdanong ampingan ang espirituwal nga panglantaw aron dili kita madala sa mahugaw nga mga butang sa kalibotan. (2 Corinto 11:14) Si Pablo mitambag: “Hunong na sa pagpahiuyon niining sistemaha sa mga butang, apan mag-usab pinaagi sa pagbag-o sa inyong mga hunahuna, aron inyong kapamatud-an ang maayo ug dalawaton ug ang hingpit nga kabubut-on sa Diyos.” (Roma 12:2) Ang mga delegado sa kombensiyon nakadungog nga ang pagbag-o sa usa ka Kristohanon maoy padayon nga buhat. Ang atong mga hunahuna kanunay nga maputli ug maumol samtang magtuon kita sa Pulong sa Diyos ug ipadapat ang atong nakat-onan. Busa, kita mahimong dugang ug dugang mahisama kang Jesus, nga “puno sa dili-takos nga kalulot ug kamatuoran.”—Juan 1:14.
Batan-ong mga Tigdala sa Kahayag
Ang ikaduhang katunga sa Biyernes sa hapon gitumong sa mga batan-on. Gidayeg sa unang pakigpulong (“Mga Batan-on—Unsay Inyong Ginatinguha?”) ang batan-ong mga Kristohanon nga nahimong maayong panig-ingnan sa pagkamatinumanon. Apan gipahinumdoman sila niini nga sila mao ang pangunang target ni Satanas. Bisan ang maayong pagkabansay nga mga magdudula nagkinahanglag tigbansay. Sa samang paagi, gikinahanglan sa mga batan-on ang tabang sa ilang mga ginikanan ug sa kongregasyon aron makapadayon sa paglakaw diha sa kahayag.
Kini gipasiugda sa maanindot nga drama nga Pagbuhat ug Matarong sa mga Mata ni Jehova, nga maoy nagtapos sa programa sa Biyernes. Gipasiugda mao ang panig-ingnan ni Haring Josias. Bisag bata pa, siya determinado sa pag-alagad kang Jehova. Dihay daotang mga impluwensiya sa iyang palibot, apan tungod sa paggiya sa hataas nga saserdorte nga si Hilkias ug tungod sa iyang gugma sa Kasugoan sa Diyos, gibuhat ni Josias ang matarong sa mga mata ni Jehova. Hinaot ang batan-ong mga Kristohanon karon mobuhat sa samang paagi.
Pasidlaka ang Kahayag
Human nakapahulay sa gabii, miabot ang mga delegado sa kombensiyon sa Sabado sa buntag alang sa dugang makapalig-ong tambag sa Kasulatan. Sila wala mahigawad. Human sa panaghisgot sa teksto sa adlaw, ang programa nagpadayon uban sa usa ka simposyom nga naglaraw sa nagkalainlaing paagi nga mapasidlak sa Kristohanon ang iyang kahayag. (Mateo 5:14-16) Ang pagsangyaw maoy usa ka hinungdanong paagi, ug ang maayong paggawi usab nagadulag usa ka hinungdanong bahin. Sama sa giingon sa mamumulong, “ang pagsangyaw mopadayag sa uban sa atong ginatuohan, apan ang pagpakitag gugma nagapasundayag niana.”
Unya usa ka bililhong tabang sa pagsangyaw ang nakadani sa pagtagad sa mga kombensiyonista—mga tract. Uban ang pahibalo sa miaging adlaw nga lunhaw pa sa hunahuna, ang mga delegado nakadungog ug mga eksperyensiya nga nagpamatuod kon unsa ka gamhanan kining gamayng mga instrumento. Ang mga delegado gidasig nga magbaton ug suplay sa mga tract uban kanila sa tanang panahon, andam alang sa tanang okasyon.
Ang sunod nga gihatagan ug pagtagad mao ang mga payunir, ang bug-os panahong mga magmamantala sa Gingharian nga naghago sa pagdala sa kahayag. Pagkadako sa atong apresasyon sa atong kugihang mga payunir! Ug nagkadaghan sila. Bisan diha sa kayutaan nga bag-o pang gihatagan ug kagawasan sa pagsimba, ang mga ranggo sa payunir nagkadaghan. Ang mga payunir gidasig nga pakahamilion ang ilang pribilehiyo. Kadtong wala pa magpayunir giagda sa pagpalandong sa ilang situwasyon. Tingali sila usab makahikay sa ilang mga kalihokan sa pagpasidlak sa ilang kahayag diha sa bug-os panahong pag-alagad.
Ang pagkahimong tigdala sa kahayag sagad naglangkit ug mga pagsakripisyo, ug kini gipasiugda sa misunod nga pakigpulong, “Pag-alagad Kang Jehova Uban ang Masakripisyohon-sa-Kaugalingong Espiritu.” Si Pablo nangamuyo: “Itugyan ang inyong mga lawas ingon nga halad nga buhi, balaan, hinangponon sa Diyos.” (Roma 12:1) Ang espiritu nga masakripisyohon-sa-kaugalingon maoy ginapadayag niadtong nakalahutay sa paglutos. Ang mga payunir nagahimog mga pagsakripisyo adlaw-adlaw aron makapabilin sa bug-os panahong pag-alagad. Sa pagkatinuod, ang tanang matuod nga mga Kristohanon nagahimog mga pagsakripisyo, nagmaokupado sa pag-alagad kang Jehova inay sa mahakogon, materyalistikong mga pangagpas niining kalibotana. Kining dalana mosangpot ug dagayang mga panalangin gikan kang Jehova.
Kadtong pakigpulonga nagsilbing haom nga introduksiyon alang sa mosunod—ang pakigpulong sa bawtismo. Kadtong nabawtismohan diha sa “Mga Tigdala sa Kahayag” Distritong Kombensiyon sa pagkatinuod dili makalimot niining pakigpulonga. Ang ilang bawtismo mahimo kanunayng labing halandomon sa ilang kinabuhi. Sila gipahinumdoman nga sila nagsundog sa panig-ingnan ni Jesu-Kristo, nga gibawtismohan sa 30 anyos ang edad. Dugang pa, ang mga kandidato sa bawtismo malipayon kaayo sa paghinumdom nga ila nang “gisalikway ang mga buhat sa kangitngit” ug nakadesisyon nga “magpaulipon kang Jehova.” (Roma 12:11; 13:12) Sa kamalipayon sila mibarog atubangan sa panon sa kombensiyon ug mihimog madungog nga deklarasyon sa publiko sa wala pa moadto sa bawtismo. (Roma 10:10) Kita mangayo sa panalangin ni Jehova diha sa pag-ampo alang sa tanang nagpasimbolo sa ilang pagpahinungod ngadto kaniya pinaagi sa pagpabawtismo sa tubig sa panahon sa “Mga Tigdala sa Kahayag” Distritong mga Kombensiyon.
Ang hapon sa Sabado maoy panahon alang sa pipila ka prangkang mga pasidaan. Kini miabot diha sa pormang pakigpulong nga nag-ulohang “Likayi ang mga Lit-ag sa Kadalo,” “Aduna bay Nagadaot sa Imong Maayong mga Kinaiya?” ug “Pagbantay sa Tanang Matang sa Idolatriya.” Gipaila niining tulo ka pakigpulong ang pipila ka taktika nga gigamit ni Satanas sa pagpaluya sa Kristohanon. Si Judas Iscariote maoy usa ka apostol, apan iyang gibudhian si Jesus baylo sa salapi. Ang batan-ong si Samuel nagdako nga matarong diha sa nasodnong sentro sa pagsimba kang Jehova, apan siya naladlad sa pipila ka daotan kaayong panagkauban. (1 Samuel 2:12, 18-20) Ang idolatriya naglakip sa mga butang sama sa seksuwal nga imoralidad ug pagkamaibogon. (Efeso 5:5; Colosas 3:5) Oo, ang kadalo, daotang panagkauban, ug idolatriya peligroso ug kinahanglang likayan.
Unya laing tema na usab ang gihisgotan sa programa sa kombensiyon. Ang misunod nga pakigpulong nagbangon ug daghang makaiikag nga mga pangutana sa Bibliya ug gitubag kini. Pananglitan, makapatin-aw ka ba kon pagabanhawon ba ang mga tawong wala modawat sa kamatuoran ug unya namatay una pa sa dakong kasakitan? Unsay himoon sa usa ka Kristohanon kon siya dili makakitag angay nga kapikas sa kaminyoon? Aron molalom pa ang ilang kahibalo sa Bibliya, ang mga delegado gidasig sa bug-os nga paggamit sa Watch Tower Publications Index, ilabina ubos sa ulohang “Mga Pangutana Gikan sa mga Magbabasa.”
Ang Presensiya ug Pagpadayag ni Kristo
Ang panapos nga bahin sa programa sa Sabado miliso sa tagna pinaagi sa simposyom nga nag-ulohang “Pagpadan-ag sa Kahayag Bahin sa Presensiya ug Pagpadayag ni Kristo.” Ang mga bahin sa “ilhanan” nga nagpamatuod sa presensiya ni Jesu-Kristo gisubli. (Mateo 24:3) Sa ikaduhang bahin, ang modernong-adlawng mga kalihokan “sa matinumanon ug maalamong ulipon” gihisgotan. (Mateo 24:45-47) Gipunting nga sukad sa 1919 ang ulipon nga matang matinumanong nagapanguna sa buluhatong pagsangyaw sa maayong balita sa Gingharian. Unya ang dakong panon gitigom gikan sa tanang mga nasod aron makig-ambit uban sa dinihogang mga Kristohanon sa pagbanaag sa kahayag ni Jehova. Ang mamumulong mihinapos: “Pasagding ang tanan masibotong magpadayon sa pagpaluyo sa matinumanon ug maalamong ulipon. Pinaagi lamang sa pagbuhat niini nga sa dili madugay ang tanang mga karnerohon makadungog sa malipayong mga pulong: ‘Umari, kamo nga gipanalanginan sa akong Amahan, panunda ninyo ang gingharian nga giandam alang kaninyo sukad pa sa pagkatukod sa kalibotan.’”—Mateo 25:34.
Gihisgotan sa kataposang mamumulong ang kahulogan ug ang mga gipasabot sa pagpadayag ni Jesu-Kristo. (1 Corinto 1:7) Pagkamaayong kasinatian ang maong pagpadayag unya! Ang Babilonyang Bantogan malaglag. Ang dakong gubat tali sa kalibotan ni Satanas ug ni Jesus ug sa iyang mga manulonda matapos diha sa kalaglagan niining sistemaha. Sa kataposan, si Satanas mismo igatambog sa bung-aw ug dili na makalihok. Apan aduna unyay kahupayan alang sa katawhan sa Diyos, uban sa kasal sa Kordero sa langit ug sa pagpatunghag usa ka bag-ong yuta. Gilipay sa mamumulong ang iyang mamiminaw pinaagi sa pagluwat sa usa ka bag-ong brosyur Tinuod Bang May Pagtagad ang Diyos Kanato? Pagkamaayong tabang kana alang sa mapainubsanong mga indibiduwal nga kinahanglang mahibalo mahitungod sa atong matinagdanong Maglalalang ug sa iyang mga katuyoan alang kanato!
Kristohanong mga Panimalay
Dominggo, ang kataposang adlaw sa kombensiyon, miabot na. Apan, daghan pa ang igapahayag. Human sa paghisgot sa teksto sa adlaw, ang pagtagad gihatag diha sa Kristohanong pamilya uban ang simposyom “Pag-atiman sa Usag Usa Diha sa Kristohanong Panimalay.” Ang unang bahin nagtabang sa mga kombensiyonista sa pagkasayod sa sekreto sa pagbaton ug malamposon nga Kristohanong pamilya: unahon ang espirituwal nga mga butang. Gidasig sa ikaduhang bahin ang mga pamilya sa dungang pagbuhat sa mga butang, pagtambong man kana sa tigom, pag-alagad sa kanataran, pagtuon sa pamilya, o paglingawlingaw. Ug ang ikatulong bahin sa simposyom nagpahinumdom sa mga delegado sa ilang pribilehiyo ug kaakohan sa pag-atiman sa mga tigulang. “Ang atong tigulang nga mga igsoong lalaki ug babaye makahatag ug dakong kaayohan sa kongregasyon,” miingon ang mamumulong. Atong pakahamilion ang ilang kasinatian ug sundogon ang ilang integridad.
Ang kahulogan sa ekspresyong “magmahusay sa hunahuna” ang sunod nga gituki. (1 Pedro 4:7) Ang usa nga mahusay ug hunahuna maoy timbang, mabuot, makataronganon, mapainubsanon, ug masinabtanon. Siya makaila sa husto ug sayop, matuod ug bakak. Dugang pa, siya naningkamot nga maampingan ang maayong espirituwal nga kahimsog.
Ang kataposang pakigpulong sa progama sa Dominggo sa buntag naghisgot sa atong pagpasakop sa Diyos ug kang Kristo. “Ang bili sa maunongong pagpasakop kang Jehova nga Diyos ug sa iyang Anak, si Jesu-Kristo, hinungdanon kaayo,” miingon ang mamumulong. Siya nagpadayon sa pagpakita kon sa unsang paagi kini nagaapektar sa tanang bahin sa atong kinabuhi. Unsay motabang kanato sa pagpabiling mapasinakopon? Upat ka hiyas: gugma, diyosnong kahadlok, pagtuo, ug pagpaubos.
Dominggo sa Hapon
Takulahaw lang, hapon na sa Dominggo ug panahon na alang sa kataposang sesyon sa kombensiyon. Alang sa kadaghanan, maorag mao pay pagsugod sa kombensiyon, ug kini hapit nang matapos.
Ang pakigpulong publiko nag-ulohang “Sunda ang Kahayag sa Kalibotan.” Ang mitambong nakadungog sa makawiwiling paghubit sa papel sa pisikal nga kahayag sa pagmintinar sa kinabuhi. Unya gipakita sa mamumulong ang labaw nga bili sa espirituwal nga kahayag. Ang pisikal nga kahayag maghupot kanatong buhi sa pipila ka dekada, apan ang espirituwal nga kahayag maghupot kanatong buhi hangtod sa kahangtoran. Ang gipasiugda sa pakigpulong mao ang bersikulo-por-bersikulo nga paghisgot sa Juan 1:1-16, diin si Jesus gipaila ingon nga mao ang kahayag sa kalibotan. Karong adlawa, sa kataposang mga tuig niining daotang sistema, labi pang dinalian sukad ang pagsunod kang Jesus niining bahina.
Human sa sumaryo sa Pagtuon sa Bantayanang Torre sa artikulo nga gieskedyol nianang semanahona, panahon na alang sa panapos nga pakigpulong. Makapalipay, gipakita sa mamumulong nga dunay daghang butang ang mahinamong ginapaabot sa mga adlaw sa unahan. Pananglitan, iyang gipahibalo ang usa ka bag-ong audiocassette, ang drama nga Doing God’s Will With Zeal. Ug dili ra kana. Dunay usa ka bag-ong mga serye sa videocassette nga nag-ulohang The Bible—A Book of Fact and Prophecy, ang una sa maong ulohan The Bible—Accurate History, Reliable Prophecy.
Sa kataposan, gipahayag sa mamumulong nga sa 1993 aduna unyay upat ka adlawng distritong mga kombensiyon, lakip ang espesyal nga internasyonal nga mga panagtigom sa Aprika, Asia, Uropa, ug Habagatang Amerika. Bisan tuod nga talitapos na ang “Mga Tigdala sa Kahayag” Distritong Kombensiyon, ang mga delegado makasugod na sa paghimog plano alang sa sunod tuig.
Unya panahon na sa pagpamauli sa mga delegado sa kombensiyon. Sa pagkatinuod, sila mas determinado pa sa pagpadayon sa pagbanaag sa kahayag diha niining mangitngit nga kalibotan. Human sa tulo ka adlaw nga tugob sa espirituwal maayong mga butang, ang mga pulong sa kataposang teksto nga gikutlo diha sa kataposang pakigpulong nahatagan ug dakong kahulogan: “Si Jehova mao ang Usa nga Balaan, ug siya naghatag kanato ug kahayag. . . . Pasalamati ninyo si Jehova, kamong katawhan, kay siya maayo; kay ang iyang mahigugmaong-kalulot nagapadayon sa walay kataposan.”—Salmo 118:27, 29.
[Hulagway sa panid 15]
Programa sa kombensiyon sa Russo nga pinulongan
[Mga hulagway sa panid 16, 17]
Mipakigpulong ang mga membro sa Nagamandong Lawas diha sa daghang kombensiyon
Ang mga delegadong Hapones nakigtigom sa St. Petersburg, Russia
Gipasiugda sa makapukaw nga drama sa Bibliya ang panginahanglan sa pagbuhat ug matarong sa mga mata ni Jehova
Ang bag-ong mga tigdala sa kahayag nagpasimbolo sa ilang pagpahinungod kang Jehova pinaagi sa bawtismo
Mga kombensiyonista nga naminaw pag-ayo sa programa sa St. Petersburg
[Hulagway sa panid 18]
Ang mga delegado nalipay sa pagdawat sa bag-ong brosyur “Tinuod Bang May Pagtagad ang Diyos Kanato?”