1992 “Mga Tigdala sa Kahayag” Distritong Kombensiyon

¹ Si Jesus miingon nga ang iyang mga sumusunod mahimong “ang kahayag sa kalibotan.” (Mat. 5:14) Sa kasukwahi, ang espirituwal ug moral nga kangitngit sa kalibotan mas pang nagakangiob sa paglabay sa matag adlaw. (Isa. 60:2; Roma 1:21) Ang atong kaakohan ingong mga tigdala sa kahayag nakabaton ug nagakadakong kahulogan samtang nagakaduol ta sa kataposan niining sistemaha. Nga nagaila sa mahinungdanong papel nga atong gidula, maoy uban sa mainitong pagpaabot nga atong ginalantaw ang pagtambong sa 1992 “Mga Tigdala sa Kahayag” Distritong Kombensiyon. Ang una niining mga seryeha magsugod sa Biyernes, Disyembre 18.

² Tulo-Adlaw nga Kombensiyon: Niining tuiga giplano ta ang total nga 37 ka kombensiyon sa Pilipinas. Ang programa magsugod sa 8:40 s.b. sa Biyernes ug matapos uban sa awit ug pag-ampo sa mga 4:15 s.h. sa Domingo. Ang tanan nga katawhan ni Jehova buot gayod nga makatambong sa interong programa. Gihimo mo na ba ang personal nga desisyon nga atua didto sa tanang tulo ka adlaw? Paneguroang makaampo alang sa panalangin ni Jehova sa imong pagpanikaysikay.

³ Sugod sa pangbukas nga pakigpulong sa Biyernes sa buntag hangtod sa paniklop nga mga komento sa Domingo sa hapon, kinahanglang may idlot tang pagpatalinghog sa interong programa. Ang makapaukyab nga impormasyon ginahan-ay ug ipresentar diha sa mga pakigpulong, mga pasundayag, mga interbiyu, ug usa ka drama. Planoha nga anaa na sa imong lingkoranan una pa magsugod ang programa sa Biyernes. Sagad, sa unang adlaw dugang panahon ang gikinahanglan sa pagpahiluna sa sakyanan, pagpangitag mga lingkoranan, ug uban pa. Busa gahini ang imong kaugalingon ug daghang panahon. Pinaagig pagkaanaa sa tanang mga sesyon ug pagpabilin alang sa paniklop nga awit ug pag-ampo, mabatonan ta ang bug-os nga kaayohan sa programa ug ikapakita ta ang pagpabili sa atong pribilehiyo sa pag-alagad ingong mga tigdala sa kahayag.

⁴ Tugoting Mapatalinghogon ang Imong Igdulungog: Ang salmista mipahayag: “Sa imong mga pahinumdom ako padayong nagapakitag pagkamapatalinghogon. Gihigugma ko gayod ang imong kasugoan! Kini mao ang akong gipalandong sa tibuok nga adlaw.” (Sal. 119:95b, 97) Sa matag okasyon nga magatigom ta aron pagatudloan ni Jehova, adunay panginahanglan nga magmatinagdanon ug magpatalinghog dili lamang sa atong mga igdulungog apan uban usab sa atong kasingkasing. Bisan pa niana, ang panginahanglan niini maoy hilabihan gayod, sa dihang nagatambong sa dagkong mga panagkatigom sama sa usa ka distritong kombensiyon. Adunay daghan kaayong pagatan-awon sa mga mata ug paminawon sa mga igdulungog. Pagkadakong personal nga kapildihan unya kon migasto tag panahon ug mga salapi aron makatambong sa kombensiyon nga mouli lamang nga diyutay ra ug mahinumdoman sa maayong mga puntos kon unsaon nga makapauswag ta ingong mga tigdala sa kahayag! Kinahanglang buhaton ta ang ato gayong maarangan sa pagbuntog sa bisan unsang mga kababagan kon buot ugaling natong bug-os nga makapulos sa programa. Unsaon ta pagseguro nga ang impormasyon lalom nga masilsil sa atong kasingkasing ug hunahuna sa pagkatapos sa programa sa kombensiyon?

⁵ Ang pagpatalinghog maoy usa ka arte nga kinahanglang ugmaron ug bansayon. Ang pulong “patalinghog” nagakahulogang “pagpaminaw uban ang mahunahunaong pagtagad.” Tagda kining pipila ka sugyot: (1) Paningkamoti gayod nga makaabot sa dapit sa kombensiyon sa kada buntag nga nakapahulay nag maayo. Kini nagakinahanglag pagplano ug kooperasyon sa pamilya. Kon ikaw nahago tungod sa kakulang sa tulog o gigutom kay wala makapamahaw, o ang imong kaugatan gilapoy tungod sa pagdinali, gamay lamang ang imong makuha sa programa. (2) Magmahinamon kon mahitungod sa paagi nga ginaugmad ang tema. Pipila ka semana una pa ang kombensiyon, ingon nga bahin sa inyong pagtuon sa pamilya, nganong dili pakomentohon ang matag membro kon unsay kahulogan alang kaniya ang pagkahimong usa ka tigdala sa kahayag. Sa dihang anaa sa kombensiyon, tan-awang daan ang kada bahin sa maong adlaw una pa magsugod ang programa. (3) Pagbiste nga nahiangay, ug likayi ang pagkaon ug pag-inom sa panahon sa mga sesyon. Ang pipila diha sa estadyom namatikdan nga nagakaon ug nagainom sa panahon sa programa. Kini maoy pagkadimatinahoron, makapalinga sa uban, ug nagapasundayag sa kakulang sa pagpugong-kaugalingon. Tungod niana, ang tanang baligyaanan sa refreshment pagasirhan sa panahon sa mga sesyon sa kombensiyon.

⁶ Buot namong hatagan ug espesyal nga pagtagad ang bahin sa pagkuhag nota. Kon sa tukma himoon, kini makabulig kanimo sa pagsunod sa mga mamumulong nga labing maampingon ug makahinumdom sa imong napatalinghogan. Sanglit kay kita nagahunahuna nga upat ka pilo ang kakusgon kay sa atong pagsulti, ang labing maayong paagi sa pagsanta sa paglatagaw sa hunahuna mao ang pagkuhag mga nota. Ingon sa namatikdan sa usa ka magsusulat, “Ang pagpatalinghog sa usa ka pakigpulong sagad mas lisod kay sa ikaw ang mopakigpulong.” Mahinumdoman mo nga ang unang mga Kristohanon nailhan nga nagdala ug mga tipaka sa buak nga mga kolon ngadto sa mga tigom ug nagnotag mga kasulatan diha niana sa tinta. Sa pagkamapasalamaton, kita makahimo kaayo niana sa atong kasarangang gidak-on nga notbok ug usa ka pluma o lapis. Aron nga mahanas sa pagkuhag nota nagapasabot sa pagsulat lamang ug igo aron makuha ang pangunang ideya apan dili daghan kaayo nga kanunay na lang tang nagasulat. Kini magapakyas sa atong katuyoan ug mosangpot sa pagsaylo sa mahinungdanong mga puntos nga gikobrehan sa mamumulong. Isulat ang yawing mga pulong, ug gamitang mga pinamubo. Ang imong mga nota makasilbe kanimo nga labing epektibo kon imong repasohon kana pagkagabii ug unya usbon kana una pa ang panaghisgot sa kongregasyon sa dagkong mga puntos sa programa diha sa Tigom sa Pag-alagad.

⁷ Kinasingkasing nga Awit ug Pag-ampo: Ang pag-awit ug mga pagdayeg kang Jehova ug matinahorong pagduol kaniya sa pag-ampo maoy kinahanglanong mga bahin sa atong pagsimba. (2 Cron. 30:21, 27) Kini maoy mahinungdanong mga bahin sa kombensiyon nga kitang tanan makapakig-ambit. Sulod sa tulo ka adlaw sa atong “Mga Tigdala sa Kahayag” Distritong Kombensiyon, kita magaawit ug 18 ka awit sa pagdayeg kang Jehova ug mahiusa sa walo ka pag-ampo ngadto sa atong langitnong Amahan. Kini maoy hamili gayod nga mga pribilehiyo. Si Jehova magahatag kanato ug kapin sa 12 ka oras sa espirituwal nga edukasyon ug pagbansay. Sulod sa pipila ka minutos nga gigahin alang sa awit ug pag-ampo, magapasalamat ta kang Jehova tungod sa iyang mahinatagong mga gasa ug magadayeg kaniya. Sanglit kay moduol man kita kang Jehova sa pag-ampo ingon nga usa ka nagakatigom nga panon, buot ba natong lantawon ta niya ingong hakog ug dimapasalamatong mga indibiduwal kay napakyas ta sa pagduyog sa awit ug pag-ampo tungod lamang sa dili maayong pagplano? Busa walay mausa nga angayng mobiya sa dili pa matapos ang sesyon aron makalinya na alang sa pagkaon o makauna sa uban sa pagkuhag mga basahon.​—Mat. 7:12; Roma. 12:10; Filip. 2:1-4.

⁸ Buhata ang Tanang Butang Alang sa Himaya sa Diyos: Kada tuig gihatagan ta ug malulutong mga pahinumdom bahin sa pagkamahinungdanon sa maayong pamatasan ug tukmang panggawi sa kombensiyon. Ang kadaghanan angayng pagadayegon sa matanlagong pagtuman niining mga pahinumdoma. Samtang kining sistemaha nagakaduol sa kataposan, nagakauswag ang pagpuwersa kanato sa panag-uban sa katawhan sa trabahoan ug sa eskuwelahan kansang mga panggawi maoy ingon sa gitagna sa 2 Timoteo 3:1-5. Kining panag-ubana adunay makadaot nga impluwensiya kanato kon dili ta magbantay. Dili ta gayod buot nga makahatag ug hinungdan alang kang bisan kinsa sa ‘pagsulti batok kanato ingong mga mamumuhat ug daotan.’ (1 Ped. 2:12) Kini nanginahanglan nga hatagan ta ug labaw sa kasarangang pagtagad ang atong Kristohanong personalidad. Ang tanan kinahanglang magmabinantayon sa ilang panggawi sa kombensiyon ug bisan asa sa publiko, sama sa mga motel o mga restawran. Ang mga ansiyano interesado sa tanan nilang mga igsoon. (Filip. 2:4) Sila kinahanglang matinabangon ug magadayeg sa uban sa ilang maayong panggawi. Kinahanglang bation usab sa mga ansiyano nga gawasnong mohatag ug mahigugmaong tambag kon kini kinahanglanon, bisan pa ug dili nila sinati sa personal ang maong igsoong lalaki o babaye. Ang bisan unsang seryosong sulirang namatikdan angayng itaho sa Administration Office sa kombensiyon.

⁹ Ang bag-ong pagkatawo nga gihisgotan sa Efeso 4:24 gipakasama sa usa ka biste nga gisul-ob sa usa human nga gihukas ang daang pagkatawo. Kining kausabana sa pagkatawo kinahanglang mobanaag usab sa atong literal nga mga biste. Ang pipila ka igsoong lalaki ug babaye, ilabina ang mga batan-on, napanid-ang kasuwal lang kaayong nagabiste, nga dili gani ligdong usahay. Nagagawi ba ang atong kaugalingon nga sama niana sa Kingdom Hall? Usab, ang pipila ka kandidato sa bawtismo nagasul-ob ug mga kamisen nga may mga kalibotanong pagya ug mga panultihon o napatikan sa mga propaganda sa nagakadaiyang mga produkto. Ang mga ansiyano nga nagarepaso sa mga pangutana uban kanilang nangandam alang sa bawtismo kinahanglang magatino nga kadtong pagabawtismohan nakasabot kon unsa ang isipong tukmang panapot sa maong okasyon.​—Tan-awang Ang Bantayanang Torre sa Disyembre 1, 1985, panid 30 (Hunyo 1, 1985 sa Ingles) ug Abril 15, 1973, mga panid 254-5.

¹⁰ Daghang kalibotanong mga tawo mikomento sa kahinlo sa katawhan ni Jehova sa atong mga kombensiyon. Tino gayod nga buot natong huptan ang hataas nga suntoan, nga dili magalabay sa mga papel, mga putos sa kendi, o ubang mga sudlanan, diha sa salog. Magtambayayongay tang tanan ug puniton ang atong mga basura ug mahimong ibutang kana sa tukmang sudlanan sa basura o isulod kana sa usa ka plastik nga bag aron dad-on pag-uli ug ilabay didto. Maingon nga dili ta molabay ug papel sa salog sa atong Kingdom Hall, mao man nga mopakita tag pagtahod sa atong dapit asembliyahan samtang atua ta didto.

¹¹ Kita motambong sa kombensiyon aron mokuhag espirituwal nga pagkaon. Busa maoy pagkadimatinahoron sa lamesa ni Jehova kon atong gamiton ang okasyon sa personal nga ganansiya sa panalapi sa bisan unsang paagi, nga magapahimulos sa dakong panon nga manambong. Sa makausa na usab buot namong pahinumdoman ang tanan nga walay pagbaligya sa personal nga mga butang ang tugotan sa sulod sa mga nataran sa kombensiyon, ug ang mga butang lamang sa Sosyedad ang tugotan diha sa bookroom o ubang mga departamento sa kombensiyon.

¹² ‘Recording’ nga mga Gamit: Bisan pag gitugotan ang ‘video’ nga mga kamera, awhagon namo silang nagagamit niana nga magmahunahunaon sa uban, nga magmapilion kon unsa ang ilang i-teyp, ug magmatinahoron kanilang dili buot magpaletrato samtang nagakaon, nagapaminaw sa programa, o panahon sa mga pag-ampo. Ang bisan kinsang naga-videoteyp o nagagamit ug mga ‘cassette recorders’ kinahanglang maglikay nga makabalda sa mamiminaw o makahimog disturbo. Wala may pagsupak kon magrekord sa pipila sa programa diha sa inyong lingkoranan. Apan panahon sa mga sesyon, maoy dili tukma sa bisan kinsa nga magsuroysuroy diha sa agianan o sa atubangan sa mamiminaw, nga nagateyp sa programa. Kon gikinahanglan, ang mga ‘attendants’ makigsulti gayod ngadto kang bisan kinsa nga mapakyas sa pagpakitag inigsoong gugma niining bahina. Palihog hinumdomi nga walay mga kamera o ‘recording’ nga mga gamit nga ikonektar sa elektrikal o mga ‘sound systems’ sa kombensiyon, ni ibutang ang bisan unsang kahimanan sa agianan o sa mga dapit trapiko.

¹³ Para sa mga Ginikanan: Buot namong ipasiugda pag-usab ang kahinungdanon sa pagbantay sa mga ginikanan sa ilang mga kabataan sa tanang panahon, bisan sa sulod sa mga nataran sa kombensiyon o sa ilang mga giabotan. (Prov. 29:15b; Luc. 2:48) Samtang nagapadayon ang programa, seguroang ang imong kabataan nagapaminaw ug naganota. Sulod sa ‘intermission’ adunay mga kahigayonan nga makaduaw sa mga higala gikan sa ubang kongregasyon.

¹⁴ Sa pag-ilustrar sa kahinungdanon sa pagkasayod kon asa ang imong kabataan sa tanang panahon, ang usa ka drayber sa taksi sa usa ka siyudad sa kombensiyon mitaho sa usa ka igsoong lalaki nga iyang gipasakay ang duha ka batan-ong batang babaye diha sa sentro sa kombensiyon. Sila lagmit nagplano nga mahilayo sa interong hapon ug miingon sa drayber nga ang ilang inahan dili mangita kanila hangtod sa 5:00 s.h. Kining maong taksi drayber nabalaka sa ilang kaayohan, apan komusta na man ang inahan? Pagkadakong trahedya unta kadto kon adunay nahitabong kadaot kanila, gawas pa sa kaulawan sa ngalan sa Diyos ug katawhan!

¹⁵ Ang Imong Bug-os nga Kooperasyon Ginapabilhan: Unsa man ka importante nga ang matag usa kanato mokooperar sa direksiyon sa Sosyedad mahitungod sa pagtambong sa kombensiyon kon diin nahisakop ang atong kongregasyon? Ang mainampingong pagplano sa Sosyedad ug ang responsableng mga igsoon sa matag siyudad sa kombensiyon nagapangandam alang sa matag kombensiyon. Kini nagalangkit sa pagbaton ug nagakaigong lingkoranan, pagkaon, literatura, ug uban pa. Kon ang igo-igong mga igsoon motambong sa mga kombensiyon nga sila wala maasayn, moresulta ang mga kakulian. Hayan, pipila ra ang adunay mga sirkumstansiya nga kinahanglan nilang motambong sa laing kombensiyon. Ang ubang mga dapit sa kombensiyon hayan mas makadani tungod sa nagkadaiyang mga katarongan, apan kon ang dakong porsiyento sa mga igsoon motambong sa dapit nga ilang pinili, magkalamukat unya ang mga resulta.

¹⁶ Ang inyong kooperasyon gihangyo mahitungod sa pagreserbag mga lingkoranan. Palihog hupti sa hunahuna nga ang MGA LINGKORANAN IKARESERBA LAMANG SA SUOD NGA MGA MEMBRO SA PAMILYA UG SI BISAN KINSA NGA NAGABIYAHE UBAN KANIMO SA IMONG SAKYANAN.

¹⁷ Gisugyot nga kubsan nimo ang bisan unsang personal nga mga butang nga dalhon sa kombensiyon. Kon ang usa ka butang dili maigo sa ubos sa imong lingkoranan, mas maayo tingaling ibilin lang kana sa balay.

¹⁸ Ang katawhan ni Jehova nagapabili nga magkatigom aron makapahimulos sa giandam nga espirituwal nga programa. Ginapabilhan usab nato ang daghang mga serbisyo ug mga kasayon nga gitagana nianang mga panagkatigoma. Uban sa dakong pag-amping ug dakong galastohan sa Sosyedad, ang mga kahikayan ginahimo alang sa nagakaigong lingkoranan, pag-instalar sa mahalong ‘sound systems,’ pagpadagan sa usa ka ‘Food Service Department,’ ug ubay-ubay pang mga serbisyo nga makapahimo sa pagtambong sa kombensiyon nga makalilipay ug makarepresko sa espirituwal. Kining mga galastohana pagakobrehan pinaagig inyong bulontaryong mga amot sa pagsuportar sa tibuok kalibotang buluhaton sa Sosyedad. Ang tanang mga amot ginapabilhan pag-ayo, ug ang Sosyedad buot nga pasiuna kamong pasalamatan sa inyong manggihatagong suportar sa intereses sa Gingharian niining paagiha. Ang mga kahon alamotan makaplagan sa nagkalainlaing mga dapit sa tibuok estadyom sa paghulog sa imong amot.

¹⁹ Tambong sa “Mga Tigdala sa Kahayag” Distritong Kombensiyon: Pinaagig pagtambong sa “Mga Tigdala sa Kahayag” Distritong Kombensiyon, mahinam ta sa pagpatalinghog kon nganong ang pagkahimong mga tigdala sa kahayag maoy usa ka dakong dungog ug pribilehiyo. Kita pahinumdoman nga usa usab kana ka seryosong responsabilidad. Pinaagig paghatag ug labaw sa kasarangang pagtagad sa mga butang nga napatalinghogan sa kombensiyon, mapauswag ta ang atong kahanas ug ang atong pagpabili sa atong papel ingon nga mga tigdala sa kahayag. Pagplano na karon nga maanaa sa tanang sesyon, gikan sa unang awit sa Biyernes ngadto sa paniklop nga pag-ampo sa hapon sa Domingo.

Distritong Kombensiyong mga Pahinumdom

Sak-anan: Gipadala namo ang suplay sa Room Request nga mga porma sa matag kongregasyon. Kadtong nanginahanglag sak-anan angayng mopil-ap sa usa niining mga pormaha ug ihatag kana sa sekretaryo sa inyong kongregasyon. Siya magasusi ug mopirma niana, dayon ipadala kana ngadto sa Watch Tower Convention sa usa sa mga adres sa ubos.

Disyembre 18-20, 1992

Maasin, Southern Leyte: c/o Conrado Balaga, Rosario Village, Asuncion, Maasin, 6600 Southern Leyte.

Disyembre 25-27, 1992

Ilagan, Isabela: c/o Zosimo G. Linda, Baculod, Ilagan, 3300 Isabela.

Vigan, Ilocos Sur: c/o Pablo Nolasco, 54 Quirino Boulevard, Vigan, 2700 Ilocos Sur.

Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.

Binalonan, Pangasinan: c/o Manantan Technical School, Urdaneta, 2428 Pangasinan.

Lucena City: Kingdom Hall, 1 Granja Street, 4301 Lucena City.

Quezon City: (1): P. O. Box 2044, 1099 Manila.

San Fernando, Pampanga: Kingdom Hall, 850 Juliana Subdivision, San Fernando, 2000 Pampanga.

Pili, Camarines Sur: c/o Bautista Marketing, Pili, 4418 Camarines Sur.

Masbate, Masbate: c/o Yolando Alburo, 56K Tara Street, Masbate, 5400 Masbate.

Dumaguete City: c/o Alexander Echon, 110-A Springville, Tubod, 6200 Dumaguete City.

Tagbilaran City: c/o Hermenegildo Sang-an, 11 Tamblot Street, 6300 Tagbilaran City.

Bacolod City: c/o Serafin Sabordo, 68 Mabini Street, 6100 Bacolod City.

Surigao City: c/o Alfredo Alutaya, 735 Navarro Street, 8400 Surigao City.

Surallah, South Cotabato: c/o Eugenio Ordanza, Poblacion, Surallah, 9512 South Cotabato.

Mati, Davao Oriental: c/o Norberto B. Morales, 2851 Ravelo Compound, Matiao, Mati, 8200 Davao Oriental.

Davao City: c/o Cesar’s Portrait, City Hall Drive, San Pedro Street, 8000 Davao City.

Zamboanga City: Kingdom Hall, 541 San Jose Road, Baliwasan, 7000 Zamboanga City.

Kabacan, North Cotabato: c/o Eliseo Mapanao, 1245 USM Avenue, Kabacan, 9407 North Cotabato.

Enero 1-3, 1993

Tuguegarao, Cagayan: c/o Santiago Panaga, 60 Public Market, Tuguegarao, 3500 Cagayan.

Bayombong, Nueva Vizcaya: c/o Trinidad V. Bunuan, Market Site, Diversion Road, Bayombong, 3700 Nueva Vizcaya.

Baguio City: c/o Anastacio Cruz, 47 Bayan Park Extension, Aurora Hill, 2600 Baguio City.

Alaminos, Pangasinan: c/o Roland’s Photo Service, Alaminos, 2404 Pangasinan.

Tarlac, Tarlac: c/o Gregorio Ibarra, Aguso, Tarlac, 2300 Tarlac.

Legaspi City: Kingdom Hall, Camia Street, Imperial Court Subdivision 11, 4500 Legaspi City.

Puerto Princesa City: Kingdom Hall, Malvar Street, 5300 Puerto Princesa City.

Marikina, Metro Manila: P. O. Box 2044, 1099 Manila.

Quezon City (2): P. O. Box 2044, 1099 Manila.

Cavite City: Kingdom Hall, 497 Padre Pio Street, Caridad, 4100 Cavite City.

Cebu City: c/o Parcon’s Machine Shop, Bagumbayan Street, 6000 Cebu City.

Catbalogan, Western Samar: c/o Juana Cinco, 537 San Francisco Street, Catbalogan, 6700 Western Samar.

Iloilo City: 65 Escarilla Subdivision, Mandurriao, 5000 Iloilo City.

General Santos City: c/o Clarustino Labrador, P. O. Box 122, 9500 General Santos City.

Digos, Davao del Sur: c/o Zosimo Tagalog, Post Office, Digos, 8002 Davao del Sur.

Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.

Cagayan de Oro City: Kingdom Hall, F. Abellanosa Street, 9000 Cagayan de Oro City.

Oroquieta City: c/o Luis Tuanggang, 25 Naranjo Street, Lower Lamac, 7207 Oroquieta City.

Bawtismo: Ang mga kandidato sa bawtismo kinahanglang anaa na sa ilang mga lingkoranan diha sa tinudlong dapit una pa magsugod ang programa sa Biyernes sa buntag. Ang kasarangang humdonon ug usa ka tuwalya kinahanglang dalhon sa usa nga nagaplanong magpabawtismo. Human sa pakigpulong sa bawtismo ug pag-ampo sa mamumulong, ang tsirman sa sesyon mohatag ug mubong mga instruksiyon sa mga kandidato sa bawtismo ug unya magpaawit ug usa ka awit. Human sa kataposang laray, ang mga ‘attendants’ motultol sa mga kandidato sa bawtismo ngadto sa dapit bawtismohanan o sa mga sakyanan nga mohatod kanila didto. Sanglit kay ang bawtismo nga simbolo sa pagpahinungod sa usa maoy usa ka suod ug personal nga butang tali sa indibiduwal ug kang Jehova, walay kahikayan alang sa gitawag magkaubang pagbawtismo sa duha o kapin pang mga kandidato sa bawtismo nga magginaksanay o maggunitay sa mga kamot samtang bawtismohan.

Espesyal nga mga Miting: Ang usa ka miting himoon uban sa tanang regular ug espesyal nga mga payunir ug nagapanawng mga magtatan-aw sa 11:15 s.b. sa Biyernes, samtang ang usa ka miting uban sa tanang mga ansiyano ug ministeryal nga mga alagad himoon sa 11:15 s.b. sa Sabado. Ang mga lokasyon niining mga mitinga ipahibalo sa entablado.

Pioneer Identification: Ang tanang regular ug espesyal nga mga payunir ug nagapanawng mga magtatan-aw magdala gayod sa ilang Identification and Assignment nga kard (S-202) ngadto sa kombensiyon. Ang mga payunir nga anaa sa listahan sukad sa Hulyo 1, 1992 o una pa nianang petsaha makadawat ug ₱80.00 nga bili sa mga tiket sa kombensiyon sa dihang ilang ipakita ang ilang ID nga kard nianang usa ka kombensiyon lamang. Isipang maampingon ang kard nga samag kuwarta. Dili kini kapulihan diha sa kombensiyon.

Pagbulontaryo: Gikinahanglan ang bulontaryong tabang alang sa mahapsay nga pagpadagan sa usa ka distritong kombensiyon. Bisan kon ikaw makahimo lamang sa pagtrabaho sa usa ka bahin sa kombensiyon, ang imong mga serbisyo ginapabilhan. Kon ikaw makaabag, palihog sa pagreport ngadto sa Volunteer Service Department sa dihang moabot ka sa kombensiyon. Ang mga kabataan nga ubos sa 16 anyos ang edad makaamot usab sa kalamposan sa kombensiyon, apan gikinahanglan silang motrabaho uban sa usa ka ginikanan o laing responsableng hamtong.

Lapel Cards: Palihog itaod ang espesyal pagkadesinyong lapel card sa kombensiyon ug samtang nagabiyahe ngadto ug gikan sa dapit sa kombensiyon. Kini sagad makapaarang kanato nga makahatag ug maayong pagpamatuod samtang nagabiyahe. Ang ‘lapel cards’ kinahanglang kuhaon pinaagi sa inyong kongregasyon, kay kini dili man mabatonan sa mga kombensiyon. (Nota ngadto sa sekretaryo: Ang mga ‘lapel cards’ kinahanglang naorder na unta diha sa Special Order Blank for Forms. Kon wala pa kini mahimo, ipadala ang regular nga S-14 nga order karon alang niini.)

Pahimangno: Bisan diin kamo motambong, bantayi ang inyong mga butang sa tanang panahon. Kon kamo adunay sakyanan, paneguroang kini nakandadohan ug ayaw ibilin ang bililhong mga butang sulod sa giparking nga sakyanan. Usab, pagbantay batok sa mga kawatan ug mga mangunguot, kinsa modugok sa dagkong mga panagkatigom. Kini nagalakip sa dili pagbiya sa bisan unsang bililhong butang nga dili mabantayan sa mga lingkoranan sa kombensiyon. Palihog magmabinantayon.