Paghikay Karon sa Pagtambong sa 1991 “Mahigugmaon sa Kagawasan” Distritong Kombensiyon
1 Tungod sa mga kahimtang sa kalibotan karon, dili ikatingala nga sa daghang kayutaan ang mga tawo nagapangandoy sa dugang kagawasan. Apan hain man makaplagan ang tinuod nga kagawasan? Si Jesus miingon: ”Kon kamo magpabilin sa akong pulong, kamo maoy akong tinuod nga mga tinun-an, ug kamo makaila sa kamatuoran, ug ang kamatuoran magaluwas kaninyo.” (Juan 8:31, 32) Kining kagawasana dili limitado nga matang nga gilaoman sa mga tawo sa dihang isalikway nila ang usa ka porma sa gobyerno aron mopabor sa lain. Hinunoa, kini nagatagad gayod sa hinungdan sa tawhanong mga gumonhap. Ang gihisgotan ni Jesus mao ang kagawasan gikan sa pagkaulipon sa sala. (Tan-awang Juan 8:24, 34-36.) Busa, sa dihang ang usa ka tawo mahimong tinuod nga tinun-an ni Jesu-Kristo, moresulta kini sa dayag nga kausaban sa iyang kinabuhi, usa ka kagawasan.
2 TULO-ADLAW NGA KOMBENSIYON: Ang serye sa 1991 nga “Mahigugmaon sa Kagawasan” Distritong mga Kombensiyon magsugod sa Pilipinas sa Disyembre 13-15, 1991. Magsugod ang sesyon sa alas 8:50 s.b. sa Biyernes, ug ang kombensiyon matapos sa mga alas 4 s.h. sa Domingo. Ang maayong pagkapili nga impormasyon nga hinungdanon sa atong espirituwal nga kahimsog igapresentar sa matag sesyon. Ang pagkadaiya sa mga ulohan nga mopasiugda sa kagawasan nga gipunting sa Roma 8:21 atong matagamtam. Ang makapadasig nga impormasyon pagatagikon ug igatanyag diha sa mga pakigpulong, mga pasundayag, mga interbiyu, ug usa ka drama.
3 Himoang tinguha mo nga dili sayloan bisan ang usa ka sesyon. Kini mahimong magkinahanglag personal nga mga sakripisyo ug mga kausaban sa imong eskedyol. Hayan gikinahanglan sa paghimog espesyal nga mga kahikayan uban sa imong amo. Daghan gani ang wala mopahimulos sa pinansiyal nga mga bentaha aron makatambong sa tanang sesyon. Tino nga si Jehova magapanalangin niadtong nagahimo niining butanga nga ulohan sa tim-os nga pag-ampo ug nagapanikaysikay nga makatambong didto.—Luc. 13:24.
4 MOABOT NGA SAYO: Ang mga Saksi ni Jehova ilado sa ilang mga panlimbasog nga mahimong kasaligan ug untop-sa-panahon. (Luc. 16:10) Kini usab importante kon motambong sa distritong kombensiyon. Moabot nga sayo sa kada adlaw, ug molingkod sa di pa mosugod ang programa. Kini nagakinahanglang lugaran ang igong panahon aron makaatiman sa mga butang nga tagdononon, sama sa pagparking sa imong sakyanan ug pagpangitag kalingkoran sa imong pamilya.
5 Ang pagtambong ug distritong kombensiyon mohatag kanatog maayo kaayong higayon sa pagpahimulos sa makapalipayng panag-uban. Apan ang pagpamisita sa mga higala nga gabii na kaayo makabalda man sa atong mga paninguha nga makaabot sa hustong panahon sa sunod adlaw. Dakong kabalaka ug panghupaw ang mosangpot tungod sa pagkaulahi ug sa pagdalidali sa maong buntag. Aron kini malikayan, makaayong makatulog gayod sa gabii ug maandam alang sa sayo nga paggikan sa sunod adlaw. Malikayan niini ang pag-abot nga nagasugod na ang programa, nga makabalda ug magpatugaw niadtong nanglingkod na. Ang sayo nga pag-abot magpatugot kanimo sa pakigsandurot sa imong mga igsoon. Ang Kristohanong gugma ug konsiderasyon, uban ang pagtahod kang Jehova ug sa espirituwal nga mga butang nga iyang gitagana, kinahanglang magpalihok kanato sa pag-abot sa hustong panahon sa matag adlaw.
6 PAMINAW PAG-AYO: Ang pagpaminaw nagakahulogan nga magmatinagdanon gayod uban sa atong hunahuna ug kasingkasing. Gikinahanglan tang maminaw ug ”magpatalinghog sa pulong ni Jehova.” (Jer. 2:4) Sa Isaias 55:2 si Jehova misugo sa Israel: ”Paminaw pag-ayo kanako.” Ang pulong ”pag-ayo” gihubit ingong ”pagpunting uban ang hugot o maikagong pagtagad.” Kon kita mapatalinghogon, kita maikagong ”maminaw ug modawat sa dugang instruksiyon.” Ang pagpaminaw ug pagkat-on didto sa distritong kombensiyon sagad nagakinahanglag mas nga panlimbasog kay sa Kingdom Hall. Ngano? Kita nagalingkod nga mas dugay, ug aduna ing dugang mga kabaldahan tungod sa daghang tawo nga manambong. Kon kita dili mapatalinghogon, atong masayloan ang dagaya espirituwal nga pagkaon nga gitagana. (1 Ped. 2:2) Unsa may mahimo? Makalipay kaayong matikdan nga daghang delegado sa kombensiyon ang nagakuhag mga nota sa panahon sa programa. Samtang ang pipila sa mga pahayag sa distritong kombensiyon mapatik man diha sa mga publikasyon, ang uban dili. Ang tanan gidasig sa paghimog mubong mga nota sa panahon sa distritong kombensiyon tungod kay kana maayong paagi nga dili masimang ang imong pagtagad sa ginapahayag.
7 Ang mga nota dili kinahanglang taas o subra. Sagad ang usa ka prase o duha igo na alang sa kinadak-ang punto. Bisan ang gagmayng kabataan makabaton man ug dugang ug mabuligan sa pagpatalinghog kon sila hatagan ug usa ka notbok ug pluma o lapis aron ilang ikasulat ang yawing mga puntos sa mga mamumulong ug yawing mga teksto o bag-ong mga puntos nga igapresentar. Makakaplag ang mga ansiyano nga makaayo ang maayong pagkahikay nga mga nota alang sa pagdumalag makapainteres nga pagsubli sa programa sa kombensiyon diha sa Tigom sa Pag-alagad human sa distritong kombensiyon. Usab, basin gusto nilang ilambigit ang kadaghanan sa mga puntos nga gipresentar sa kombensiyon diha sa ilang pagpanudlo ug buluhatong pagpasibsib.
8 MAGMAUSAHON SA AWIT UG PAG-AMPO: Ang bahin sa atong pagsimba nagalangkit sa pagpasidungog kang Jehova pinaagig pag-awit sa iyang kadayegan, sama gayod sa gibuhat ni Jesus ug sa iyang mga apostol. (Mar. 14:26) Ang pulong ni Pablo sa 1 Corinto 14:15 daw nagabutyag nga ang pag-awit maoy regular nga bahin sa Kristohanong pagsimba. (Tan-awa usab ang Atong Ministeryo sa Gingharian sa Abril, 1991, panid 7.) Ang distritong mga kombensiyon nagatagana kanatog talagsaong higayon nga mahiusa uban sa mga linibo sa atong mga igsoon nga nagadayeg kang Jehova diha sa awit ug pag-ampo. Apan, ang uban nagpakitag kakulang sa pagtahod alang niining importanteng mga bahin sa atong pagsimba. Sa unsang paagi? Pinaagig wala-kinahanglanang pag-abot sa kombensiyon sa panahon o human sa unang awit ug pag-ampo. Sa talagsaong mga okasyon basin adunay maayong rason sa paghimo niini. Apan, ang husto bang pagtahod ginapakita dapig kang Jehova kon ang uban mosalindot sa higayon sa pag-awit ug pag-ampo nga mausahon aron lamang sila sayo nga makaabot ngadto sa ilang mga kotse o sayo nga makakaon?—Mat. 6:33.
9 Ang pagbantay gikinahanglan gayod nga sa pangagpas sa personal nga kasayon, dili ta tugotan ang kalibotanong ‘me-first’ o ako-una nga tinamdan o panggawi sama sa kadalo ug kahakog sa pagbalda sa atong espirituwal nga tingusbawan. Sa di pa dugayng katuigan, daghan sa atong mga igsoon sa Silangang Uropa nakahimo ra gayod sa pagpahimulos sa kagawasan sa pag-awit ug pag-ampo. Maingon nga sila nalipay nga naarangan ang pag-awit ug pag-ampo sa dakong gidaghanon, kita man makapakita sa samang espiritu sa pagpabili alang sa sagradong mga butang karon ug dili gayod isipon nga magaan ang atong mga kahigayonan sa duyog nga pag-awit ug pag-ampo.
10 ATONG KRISTOHANONG PAMATASAN: Ang atong Kristohanong pamatasan ug panagway sa distritong mga kombensiyon padayong nagahatag kanatog maayong dungog ingong mga Saksi ni Jehova. Kini tungod kay kita seryoso sa atong pagsimba kang Jehova ug wala ta isipa ang pagtambong ug kombensiyon ingong sosyal nga panaw lamang. Sa dihang magakatigom alang sa maong espesyal nga mga okasyon, kinahanglang atong mentinahon ang atong Kristohanong dignidad ug usa ka espirituwal nga panghunahuna pinaagig paggawi sa atong kaugalingon ingong mga ministro sa tanang panahon.—1 Cor. l0:3l-33.
11 Kon mapakyas kita sa pagbuhat niini, atong maapektohan ang kalipay sa uban, nga magpapandol gani sa mga bag-ohan. Ginatagad ta ba bisan ang diyutay nga mga kalulot nga gipakita kanato? Kita gayod magmatikod sa uban nga anaa sa atong palibot ug ipakitang pagtahod ug konsiderasyon. Ang tanan moila nga sa dihang magsugod na ang programa, kana panahon na sa pagpaminaw, dili maglakawlakaw o magsultihanay.—Deut. 31:12.
12 Ang laing luna nga ang atong Kristohanong pamatasan makabayaw kang Jehova nga Diyos mao ang atong mga pakiglabot uban niadtong nagatagana kanatog mga sak-anan. Kon kita mopuyo sa mga motel, kita mopakita gayod ug apresasyon ug magmatinagdanon sa mga kawani sa motel, nga matinahoron ug dili hilabihang mapugsanon. (Gal. 6:10) Ang ubang mga Saksi mipahawa na sa mga motel ug mibiya sa ilang mga kuwarto nga di-maayong tan-awon. Ang kahinlo ug konsiderasyon kinahanglang ipakita dili lang sa atong senina ug panggawi kondili usab sa paagi sa atong pagtagad sa propyedad sa uban. Kon ang mga nagdumala sa estadyum malulotong motugot kanato sa paggamit sa bahin sa ilang propyedad ingong mga sak-anan, nan ang luna nga atong gigamit kinahanglang kanunay nga malinis ug mahapsay, ug ato gayong hinloan ang mga lawak ug biyaan kana sa maayong kahimtang human sa kombensiyon. Oo, didto sa umaabot nga distritong mga kombensiyon, ang tanan kanato angayng magtinguha sa paggawi sa atong kaugalingon aron “makadayandayan sa pagtulon-an sa atong Manluluwas, ang Diyos, diha sa tanang butang.”—Tito 2:10.
13 Sa pipila ka kombensiyon sa miaging tuig namatikdan nga dihay daghang sagbot ang gibiyaan sa ‘assembly hall.’ Daghang papel, mga putos sa dulse, mga botelya, ug ubang mga sudlanan, ang gipasagdan lamang palibot sa mga lingkoranan. Kini dayag nga wala magpakitag pagtahod alang sa ngalan ni Jehova ni konsiderasyon niadtong natudlo sa paghinlo human kita mamiya. Paneguroa nga puniton ang bisan unsa nga gipasagdan ug ibutang kana sa hustong mga panudlanan sa basura, o kon kulang ang mga panudlanan, dad-on kini pauli aron ilabog didto.
14 Didto sa mga kombensiyon ang atong mga hunahuna kinahanglang mapunting sa espirituwal nga mga butang. Maoy pagkadimatinahoron sa lamesa ni Jehova kon gamiton ta ang okasyon sa pagnegosyo o pagpanapi, nga nagapahimulos sa dakong panon sa mga igsoon nga nagatambong. Makausa pa buot namong pahinumdoman ang tanan nga dili tugotan ang pagbaligya sa personal nga mga butang didto sa sulod sa kombensiyonanan, ug ang mga butang lamang nga iya sa Sosyedad ang tugotan didto sa ‘bookroom’ ug ubang mga departamento sa kombensiyon.
15 Uyon sa itaas, ang mga departamento sa ‘refreshment’ pagasirhan sa panahon sa mga sesyon sa kombensiyon, busa gikinahanglan nga makakuha na kamo sa inyong panginahanglan tali sa mga sesyon. Niining paagiha ang tanan makapaminaw kon unsay gipahayag gikan sa plataporma, apil kadtong nagatrabaho diha sa mga departamento sa ‘refreshment.’
16 PARA SA MGA GINIKANAN: Ang gagmayng kabataan ug mga tin-edyer giabiabi ug gidahom sa pagtambong sa “Mahigugmaon sa Kagawasan” Distritong Kombensiyon. Ang kagawasan nga ginatanyag sa kalibotan mosangpot man sa ilang espirituwal nga kamatayon, sama gayod kang Adan nga nawad-an sa kagawasan nga gihatag ngadto sa katawhan sa sinugdanan. Ang mahigugmaong kapunongan ni Jehova nagtagana kanatong tanan uban sa hustong pangatarongan niining butanga. Kita napalig-on sa pagtan-aw sa mga batan-on kinsa nakakat-on sa pagpaminaw gayod sa tanang Kristohanong mga tigom ug kinsa tumang interesado sa programa sa kombensiyon. (Sal. 148:12, 13) Apan nagadepende ug dako ang panig-ingnan ug pagdumala sa mga ginikanan. Daghang kabatan-onan ang nabansay pag-ayo sa pagkuhag mga nota. Kon ugaling wala pa ninyo matudloi ang inyong mga anak sa pagkuhag mga nota, nganong di gamiton ang nahibiling panahon sa di pa ang kombensiyon nga buhaton kana? Bisan ang bata pa kaayo mapalig-on man sa pagtala sa mga gisitar nga teksto ug nalangkit yawing mga pulong nga ilang madungog nga gipatugbaw sa mga mamumulong. Ang ubang ginikanan nagahikay sa pagrepaso sa lintunganayng mga puntos gikan sa programa sa maong adlaw human mamauli ngadto sa ilang mga sak-anan o samtang nagabiyahe pauli.
17 Siyempre, kadaghanan sa mga ginikanan nakasabot nga ang kinaiyahang hilig sa mga bata maoy madulaon. Kulang silag kasinatian sa kinabuhi, ug sila di-hamtong. Busa, sila kinahanglang tudloan kon kanus-a kinahanglang maminaw ug kon sa unsang paagi sila magagawi diha sa mga tigom. Kini nagakinahanglag maayong pagdumala sa ilang mga ginikanan. Ang ubang ginikanan mapasinagdanon niining bahina. May mga panahon, bisan tuod ang mga ginikanan nagapakitag hustong pagtahod kang Jehova sa panahon sa pag-ampo, ang ilang mga anak nanagdula ug nakabalda sa uban. Ang mga ginikanan kinahanglang masayod kon unsa ang ginabuhat sa ilang mga anak bisan sa panahon sa mga pag-ampo. Usab, unsa man ang ilang ginabuhat sa dihang mobiya sila sa ilang lingkoranan sa panahon sa programa? Ang mga bata ba walay nagadumala sa panahon o human sa programa sa kombensiyon?—Prov. 29:15.
18 Sa pipila ka hitabo ang mga bata ginapasagdan sa mga panahon sa kagabhion, sa dihang nga mga ginikanan nanglakaw sa pagpangaon o nalangkit sa ubang kalihokan. Kini dili husto. Ang ubang kabataan naggawi nga walay batasan ug wala gani ing pagtahod sa mga tigulang nga mga igsoon kinsa mibadlong kanila sa malulotong paagi. Ang maong pagkamasupilon maoy sagad nga resulta sa pagkamatugoton ug kulang sa pagdisiplina diha sa panimalay. Kini gayod tino nga pagatul-iron. Ang tanang Kristohanong mga ginikanan kinahanglang maghimog suod nga pagdumala sa ilang mga anak sa tanang panahon samtang ilang “matutuon sila sa disiplina ug nagadumala-hunahuna nga iya ni Jehova.”—Efe. 6:4.
19 IMONG BUG-OS KOOPERASYON GIPABILHAN: Gihimo ang dakong pagplano aron pagtino nga adunay igong lingkoranan, literatura, pagkaon, ug ubang mga tagana nga mabatonan sa tanang manambong sa kombensiyon. Aron mapaneguro ang pagkaepektibo niining mga kahikayana, ang kada kongregasyon gitudlo ngadto sa tinong kombensiyon. Ang inyong bug-os nga kooperasyon hinungdanon aron malikayan ang pagsugwak. Siyempre, mahimong adunay mga kahimtang nga mopatambong sa pipila ngadto sa usa ka kombensiyon sa laing lugar. Apan, ang kadaghanan angayng motambong sa kombensiyon didto sa ilang gitudlong lokasyon.—1 Cor. 13:5; Filip. 2:4.
20 Ang inyong bug-os nga kooperasyon gihangyo maylabot sa pagreserbag mga lingkoranan. Palihog hinumdomi nga ang LINGKORANAN MAHIMONG IRESERBA LAMANG ALANG SA IMONG SUOD NGA MGA MEMBRO SA PAMILYA UG KANG BISAN KINSA NGA NAGABIYAHE UBAN KANIMO DIHA SA IMONG KAUGALINGONG SAKYANAN. Palihog ayaw pagreserbag lingkoranan para sa uban. May mga panahon, ang ekstrang mga lingkoranan basta gireserba lamang. Kini dili mahigugmaon ug magpalibog sa mga atendant ug sa uban nga nagapangitag malingkoran. Uyon sa tambag sa Bibliya, kita gayod manlimbasog sa pagpakitag inigsoong pagbati ug bug-os nga mokooperar sa giuyonang kahikayan maylabot sa pagreserbag mga lingkoranan. Walay si bisan kinsa ang mokuhag mga lingkoranan kay sa gikinahanglan alang sa iyang suod nga banay o sa sakyanang grupo.—2 Ped. 1:7.
21 Dili tugotan ang pagreserbag lingkoranan sa gabii pa. Kadtong sayo nga moabot sa buntag kinahanglang suod nga mosunod sa mga giya maylabot sa pagreserbag lingkoranan. Ang mga atendant kinahanglang anaa na sa ilang gitudlong mga luna sayo sa kada buntag aron pagpaigo sa gihimong kahikayan, aron malikayan ang pag-abusar sa mga giya nga iya sa Sosyedad maylabot sa pagreserbag lingkoranan. Palihog bug-os nga mokooperar sa mga atendant samtang sila nagatuman sa ilang mga asaynment alang sa kaayohan sa tanan nga manambong.
22 Ginasugyot nga ang maayong panghukom himoon bahin sa pagdalag personal nga mga butang ngadto sa dapit kombensiyonan. Ang uban nagdalag dagkong mga butang nga dili ikatungtong sa mga lingkoranan ug busa gibutang sa agianan o sa duol nga mga lingkoranan. Kini nagpahikaw sa uban sa usa ka lingkoranan, ug usahay makaali sa mga agianan. Gikinahanglan ta ang konsiderasyon sa maong mga butang.
23 Maoy dayag, ang katawhan ni Jehova nagapabili sa panagkatigom didto sa maayong mga pasilidad aron makakuhag kaayohan gikan sa espirituwal nga programa nga gitagana. Atong gipabilhan usab ang daghang serbisyo ug sayon-nga-mga-gamit nga gitagana sa maong mga panagkatigom. Uban sa dakong pag-atiman ug dakodakong gasto ngadto sa Sosyedad, ang mga kahikayan gihimo para sa igong kalingkoran, pagtaod sa mahalong mga gamit sa ‘sound,’ pagpalakaw sa ‘Food Service Department,’ ug pagdumala sa ubang mga kahikayan ug mga serbisyo nga magpalipay sa pagtambong sa kombensiyon ug sa espirituwal nga paagi makapahayahay.
24 Kining mga galastohana ginakobrehan pinaagig boluntaryong mga amot sa pagsuportar sa tibuok-kalibotang buluhaton sa Sosyedad. Para masayon kanimo, ang tin-aw nga pagkamarka nga mga kahon sa donasyon igapahimutang palibot sa dapit kombensiyonan. Ang tanang amot giapresyar pag-ayo, ug ang Sosyedad buot magpasalamat kanimo nga abante sa imong mahinatagon ug mausahong suportar sa intereses sa Gingharian niining paagiha. Kita masaligon nga ang tanan mapalihok sa pagsabot sa ilang indibiduwal nga responsabilidad maylabot niini nga mga galastohan ug bug-os nga mokooperar pinaagig pag-ambit sa gidak-on sumala sa itugot sa ilang mga kahimtang.—Luc. 6:38.
25 TAMBONG SA “MAHIGUGMAON SA KAGAWASAN” DISTRITONG KOMBENSIYON! Pinaagig pagtambong sa “Mahigugmaon sa Kagawasan” Distritong Kombensiyon ug pagpatalinghog gayod sa programa, atong mapalambo ang atong apresasyon alang sa kagawasan nga nagasumikad kang Kristo ug sa hustong paggamit sa Kristohanong kagawasan. Paghimo na karon sa imong mga plano nga makatambong alang sa unang awit ug sa tanang sesyon hangtod matapos ang pag-ampo sa Domingo sa palis.
[Kahon sa panid 6]
Distritong Kombensiyong mga Pahinumdom
SAK-ANAN: Kami magpadalag suplay sa mga pormang Room Request ngadto sa kada kongregasyon. Kadtong nagakinahanglag mga sak-anan mosulat gayod sa usa niining mga pormaha ug ihatag kini ngadto sa sekretaryo sa kongregasyon sa inyong kongregasyon. Iya kining tinoon ug pirmahan, dayon ipadala ngadto sa Watch Tower Convention sa usa sa mga adres nga anaa sa ubos.
Disyembre 13-15, 1991
Maasin, Southern Leyte: c/o Conrado Balaga, Rosario Village, Asuncion, Maasin, 6600 Southern Leyte.
Disyembre 20-22, 1991
Ilagan, Isabela: c/o Zosimo G. Linda, Baculod, Ilagan, 3300 Isabela.
Vigan, Ilocos Sur: c/o Pablo Nolasco, 54 Quirino Boulevard, Vigan, 2700 Ilocos Sur.
Tarlac, Tarlac: c/o Gregorio Ibarra, Aguso, Tarlac, 2300 Tarlac.
Lucena City: Kingdom Hall, 1 Granja Street, 4301 Lucena City.
Quezon City: P. O. Box 2044, 1099 Manila.
San Fernando, Pampanga: Kingdom Hall, 850 Juliana Subdivision, San Fernando, 2000 Pampanga.
Dumaguete City: c/o Alexander Echon, 110-A Springville, Tubod, 6200 Dumaguete City.
Tacloban City: 186 M. H. del Pilar Street, 6500 Tacloban City.
Tagbilaran City: c/o Hermenegildo Sang-an, 11 Tamblot Street, 6300 Tagbilaran City.
Bacolod City: c/o Serafin Sabordo, 68 Mabini Street, 6100 Bacolod City.
Surigao City: c/o Alfredo Alutaya, 735 Navarro Street, 8400 Surigao City.
General Santos City: c/o Clarustino Labrador, P. O. Box 122, 9500 General Santos City.
Mati, Davao Oriental: P. O. Box 6, Mati, 8200 Davao Oriental.
Davao City: c/o Cesar’s Portrait, City Hall Drive, San Pedro Street, 8000 Davao City.
Pagadian City: Kingdom Hall, V. Sagun Street, 7016 Pagadian City.
Tantangan, South Cotabato: c/o Liberato Supnet, New Cuyapo, Tantangan, 9510 South Cotabato.
Disyembre 27-29, 1991
Tuguegarao, Cagayan: c/o Santiago Panaga, 60 Public Market, Tuguegarao, 3500 Cagayan.
Bayombong, Nueva Vizcaya: c/o Trinidad V. Bunuan, Market Site, Diversion Road, Bayombong, 3700 Nueva Vizcaya.
Baguio City: c/o Anastacio Cruz, 47 Bayan Park Extension, Aurora Hill, 2600 Baguio City.
Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.
Iriga City: c/o Leonardo de Villa, 38 Waling-waling Street, San Miguel, 4431 Iriga City.
Puerto Princesa City: Kingdom Hall, Malvar Street, 5300 Puerto Princesa City.
Marikina, Metro Manila: P. O. Box 2044, 1099 Manila.
Cavite City: Kingdom Hall, 497 Padre Pio Street, Caridad, 4100 Cavite City.
Cebu City: c/o Parcon’s Machine Shop, Bagumbayan Street, 6000 Cebu City.
Iloilo City: 65 Escarilla Subdivision, Mandurriao, 5000 Iloilo City.
Kidapawan, North Cotabato: c/o Ponciano Dongog, P. O. Box 34, Kidapawan, 9400 North Cotabato.
Surallah, South Cotabato: c/o Eugenio Ordanza, Poblacion, Surallah, 9512 South Cotabato.
Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.
Cagayan de Oro City: Kingdom Hall, F. Abellanosa Street, 9000 Cagayan de Oro City.
Zamboanga City: Kingdom Hall, 541 San Jose Road, Baliwasan, 7000 Zamboanga City.
Enero 3-5, 1992
Urdaneta, Pangasinan: c/o Manantan Technical School, Urdaneta, 2428 Pangasinan.
Masbate, Masbate: c/o Yolando Alburo, 56-K Tara Street, Masbate, 5400 Masbate.
BAWTISMO: Ang mga kandidato sa bawtismo kinahanglang manlimbasog nga makalingkod na sa lugar nga gipili sa dili pa ang programa magsugod sa buntag sa Sabado. Ang kasarangang humdonon ug usa ka tuwalya kinahanglang dad-on sa matag usa nga nagaplano sa pagpabawtismo. Human sa pakigpulong sa bawtismo ug pag-ampo sa mamumulong, ang tsirman sa sesyon mohatag ug mubong mga instruksiyon ngadto sa mga kandidato sa bawtismo ug unya mopaawit ug usa ka awit. Sugod sa kataposang laray, ang mga atendant motultol sa mga kandidato sa bawtismo ngadto sa dapit bawtismohanan o ngadto sa mga sakyanan nga magdala nila didto, samtang ang nahibilin sa tigpaminaw motapos sa pagkanta sa maong awit. Sanglit kay ang bawtismo diha sa simbolo sa dedikasyon sa usa mao may suod ug personal nga butang tali sa indibiduwal ug kang Jehova, wala ing tagana alang sa gikaingong magpartner nga mga bawtismo, nga ang duha o mas pang mga kandidato sa bawtismo maggakos o magkaptanay samtang ginabawtismohan.
ESPESYAL NGA MGA METING: Ang usa ka meting pagahimoon uban sa tanang regular ug espesyal payunir ug nagabiyaheng mga magtatan-aw sa 11:15 s.b. sa Biyernes, samtang ang usa ka meting uban sa tanang ansiyano ug ministeryal nga mga alagad pagahimoon sa 11:15 s.b. sa Sabado. Ang mga lugar alang niining mga metinga igapahibalo gikan sa plataporma.
PIONEER IDENTIFICATION: Ang tanang regular ug espesyal payunir, maingon man ang nagabiyaheng mga magtatan-aw, magdala gayod sa ilang Pioneer and Assignment card (S-202) ngadto sa kombensiyon. Ang mga payunir nga anaa sa listahan sukad sa Hulyo 1, 1991 o antes nianang petsaha mahimong makadawat ug ₱80.00 nga kantidad sa mga tiket sa kombensiyon sa dihang ipakita ang ilang ID card didto sa usa ka kombensiyon lamang. Isipa ang kard ingong kuwarta. Dili kana kapulihan didto sa kombensiyon.
PAGBOLUNTARYO: Ang boluntaryong tabang gikinahanglan para sa hanoy nga pagpalakaw sa distritong kombensiyon. Bisan kon bahin lamang sa kombensiyon ang maarangan mo sa pagtrabaho, ang imong mga serbisyo ginapabilhan. Kon ikaw makatabang, palihog moreport ka ngadto sa ‘Volunteer Service Department’ sa dihang moabot ka sa kombensiyon. Ang mga bata nga ubos sa 16 anyos and edad makaamot man sa kalamposan sa kombensiyon, apan gikinahanglan nga sila motrabaho uban sa usa ka ginikanan o laing kasaligang hamtong.
LAPEL CARDS: Palihog itaod ang espesyal nga pagkadesinyo nga ‘lapel card’ didto sa kombensiyon ug samtang nagabiyahe pangadto-ngari sa dapit kombensiyonan. Sagad kini magpaposible kanato sa paghatag ug maayong pamatuod samtang nagabiyahe. Ang ‘lapel cards’ kinahanglang pagakuhaon pinaagig kongregasyon, kay kini dili man mabatonan didto sa mga kombensiyon. (Nota ngadto sa sekretaryo: Ang ‘lapel cards’ giorder na unta diha sa ‘Special Order Blank for Forms.’ Kon kini wala mahimo, magpadalag regular nga S-14 nga order alang niini.)
PAHIMANGNO: Bisan kon hain ka motambong, bantaye ang imong mga butang sa tanang panahon. Kon aduna ka ing sakyanan, paneguroa nga yawihan kana ug ayaw pagbilin ug mahalong mga butang sa sulod sa giparkeng nga kotse. Usab pagbantay batok sa mga kawatan ug mga mangunguot, kinsa modugok sa dagkong mga panagkatigom. Kini nagalakip sa dili pagbilin sa bisan unsang mahalon nga walay nagabantay diha sa mga lingkoranan sa kombensiyon. Palihog mag-amping.