Gidapit Ka Ngadto sa 1989 “Diyosnong Debosyon” Distritong Kombensiyon!
1 Ang ekspresyong “diyosnong debosyon” nagapasabot ug pagtahod, pagsimba, ug pag-alagad sa Diyos, uban ang pagkamaunongon sa iyang unibersohanong pagkamagmamando. Ang unang ehemplo sa diyosnong debosyon mao si Jesu-Kristo. Siya ang bugtong tawo nga nagpasundayag ug hingpit diyosnong debosyon ubos sa grabe kaayong mga kahimtang ngadto sa iyang kamatayon. (1 Tim. 3:16; Heb. 7:26) Ingong mga sumusunod ni Kristo, kita gayod magbansay nga mahagoon kon kita ugaling magpasundayag ug diyosnong debosyon. Nagakinahanglan kining antoson ang pagsupak ingon sa gibuhat ni Jesus. (2 Tim. 3:12) Ang pagbansay uban ang diyosnong debosyon ingong atong tumong “nagahatag ug saad sa kinabuhi karon,” nga mao ang espirituwal nga kahimsog, katagbawan, kalipay, ug usa ka katuyoan sa kinabuhi. Nagahatag usab kana kanato ug saad sa kinabuhi nga “umaabot.” (1 Tim. 4:7, 8) Busa, ang maong pagbansay dili alang sa atong materyalistikanhong kaayohan. Hinunoa, ingong resulta niana, kita magmatagbaw na uban sa pasukaranang mga tagana samtang kita nagaalagad kang Jehova.—1 Tim. 6:6-8.
2 Pinaagig mauswagong pagbansay ug disiplina, si Jehova naghimo kanato nga talagsaong katawhan, nga nahiusa diha sa talagsaong organisasyon samtang anaa sa taliwala niining tampalasan nga kaliwatan. Ang atong diyosnong debosyon maoy dalisay ug walay pagkasalingkapaw nga gihubit ni Pablo sa miingon siya nga sa kataposang mga adlaw, ang mga tawo aduna ing porma sa diyosnong debosyon apan nagakawang sa gahom niana. (2 Tim. 3:1, 5) Hinaot ang atong mauyonong espiritu sa tanang panahon magsumbaliksilaw sa diyosnong debosyon, ug hinaot nga sa kanunay pamatud-an tang tinuod ang gahom niana.—1 Cor. 14:40.
3 Buot ba nimong makakat-on sa mga paagi sa pagpalig-on sa imong diyosnong debosyon aron makapabiling maunongon kang Jehova sa malisod nga mga adlaw sa unahan? Ang daghan mapuslanong tambag ug pagpalig-on maylabot niini ang igabutyag didto sa “Diyosnong Debosyon” Distritong mga Kombensiyon nga giplano sa hinapos niining tuiga. Adunay total nga 34 ka kombensiyon alang sa Pilipinas, ang kinadaghanan sukad masukad. Pagplano karon sa pagtambong ug sa pagpakig-ambit sa maayo kaayong espirituwal nga kaayohan nga igapresentar.
4 MOABOT NGA SAYO: Ilado kaayo ang mga Saksi ni Jehova sa ilang pagkakasaligan ug pakauntop-sa-panahon. (Luc. 16:10) Kini importante kon motambong ug kombensiyon. Manlimbasog gayod kita sa kada adlaw nga masayo ug makalingkod na sa dili pa mosugod ang programa. Kini nagakinahanglan nga hatagan ug igong panahon ang pagpahimutang sa atong sakyanan, pagpangitag angayng lingkoranan alang sa atong pamilya, ug sa pagkuhag mga tiket sa kombensiyon sa pagkaon.
5 Ang panahon sa kombensiyon nagatagana ug maayo kaayong higayon sa pagsandurotay sa makalipayng panag-ubanay. Apan ang pagduaw sa mga higala nga hangtod sa gabii na kaayo makabalda man sa atong mga paningkamot nga mahiabot sa hustong panahon sa sunod nga adlaw. Dakong kabalisa ang mosangpot gumikan sa ulahing paggikan ug busa magdalidali sa pagkabuntag. Aron malikayan kini, ang ubang pamilya nakakaplag nga maayong mohimog makataronganong panahon sa pagkatulog. Pinaagig pagsunod gayod sa eskedyol, sila lagmit nga makakatulog ug maayo sa gabii ug maandam alang sa sayo nga pagbangon sa sunod adlaw. Malikayan niini ang pag-abot samtang ang programa nagapadayon na, nga makadisturbo ug makabalda niadtong nanglingkod na. Ang atong pagkamahunahunaon niining bahina mahimong pagbanaag sa atong pagpabili ug pagtahod kang Jehova, ug nagapamatuod sa atong matuod diyosnong debosyon.
6 TULO-ADLAWNG KOMBENSIYON: Molungtad ug tulo ka adlaw ang “Diyosnong Debosyon” Distritong Kombensiyon. Ang pinili gayod nga impormasyon nga hinungdanon sa atong espirituwal nga kahimsog igapresentar sa matag sesyon. Ang lainlaing mga ulohan nga maylabot sa diyosnong debosyon tagikon diha sa mga pakigpulong, mga pasundayag, ug usa ka moderno-adlaw nga drama.
7 Himoang imong tinguha nga dili sayloan bisan ang usa ka sesyon. Kini tingali nagakinahanglan ug personal nga mga sakripisyo ug mga pagpasibo sa imong eskedyol. Nagakinahanglan ang pipila nga maghimog espesyal nga mga kahikayan uban sa ilang amo. Daghan gani ang mopalabay sa pinansiyal nga mga bentaha aron makatambong sa tanang sesyon. Si Jehova magapanalangin gayod niadtong nagahimo niining butanga nga ulohan sa tim-os nga pag-ampo ug sa kinasingkasing manlimbasog nga makatambong didto.—Luc. 13:24.
8 PAMINAW PAG-AYO: Sa panahon sa programa sa kombensiyon, ayaw pabalda sa mga butang sa imong palibot, apan ipunting “pag-ayo” sa materyal nga ginahisgotan gikan sa plataporma. Ang atong diyosnong debosyon magpalihok gayod kanato sa pagsunod sa hangyo ni Jehova sa Isaias 55:2: “Paminaw pag-ayo kanako.”
9 Samtang tinuod nga ang publikong pakigpulong sa Domingo sa palis ginapahibalo alang sa kasagarang katilingban, ang kadaghanan sa materyal nga gibutyag sa kombensiyon giandam kana ilabina alang kanila nga mga nanagsimba na kang Jehova. Ang kombensiyon modala kanato nga nunot-panahon uban sa karong mga panginahanglan ug motabang kanato sa pagpasignunot sa mauswagong kapunongan ni Jehova. Ang di-pagpatalinghog mosangpot sa atong pagkanabiyaan. Kinahanglang ang atong kaugalingon kanunayng matuhop sa programa aron makakuhag bug-os nga kaayohan gikan sa dagaya espirituwal nga kalan-on.—1 Ped. 2:2.
10 Sa miaging mga katuigan, daghang mga delegado sa kombensiyon ang miugmad sa mapuslanong batasan sa paghimog mga nota sa panahon sa programa. Hayan giisip sa pipila nga ang pagkuhag nota kaduhaduhaan, nga nagabati nga wala ing tinuod nga benepisyo niana. Kon nakiling ka gayod niana, nganong dili sulayang maghimog mga nota sa panahon sa “Diyosnong Debosyon” nga Kombensiyon? Ingon nga matuod kana alang sa daghang uban pa, mahimong makita mo nga kana maoy maayong paagi nga mapunting kanunay ang imong pagtagad kon unsa ang gipahayag ug kana magpanalipod kanimo gikan sa paghulohanduraw o pagtugot sa imong hunahuna sa paglatagaw.
11 Ang mga nota dili kinahanglang masangkaron. Sagad ang usa ka prase o duha igo na alang sa usa ka yawing punto. Makaplagan sa mga ansiyano nga makaayo ang pagbaton ug hapsay-pagkahikay nga mga nota sa pagdumala sa makahuloganong repaso sa programa sa kombensiyon sa panahon sa Tigom sa Pag-alagad. Mahimo usab nga ilang ikalambigit ang daghan sa mga puntos diha sa ilang buluhatong pagpanudlo ug pagpasibsib human sa kombensiyon.
12 Ang tanan kanato kinahanglang motagad sa paagi sa atong pagpaminaw, kay kini nagakahulogan sa atong kalipay ug atong kinabuhi mismo. Samtang nagatambong sa “Diyosnong Debosyon” Distritong Kombensiyon, kinahanglang hinumdoman ta ang talambagan ni Jehova sa Proverbio 8:33-35: “Pamatia ang pahamatngon ug mahimong manggialamon, ug ayaw ipakita ang bisan unsang pagsalikway. Malipayon ang tawo nga mamati kanako pinaagig pagtukaw sa akong mga ganghaan sa matag adlaw, sa pagbantay sa mga haligi sa akong mga pultahan. Kay ang makakaplag kanako makakaplag gayod ug kinabuhi, ug makabaton ug maayong kabubut-on gikan kang Jehova.”
13 PAG-AMPO UG AWIT: Ang usa sa labing matahom nga dayandayan sa atong diyosnong debosyon mao ang pag-awit ug mga pagdayeg ngadto kang Jehova nga Diyos. Ang pag-awit sa mga awit daw regular nga bahin sa matuod nga Kristiyanidad sa unang siglo. (1 Cor. 14:15) Si Jehova mahimuot usab sa dihang ang iyang katawhan moduol kaniya diha sa maikagong pag-ampo. Ang distritong mga kombensiyon nagahatag kanato ug talagsaong higayon nga mahiusa usab sa mga linibo sa atong mga igsoon sa pagdayeg kang Jehova diha sa awit ug pag-ampo. Apan, ang pipila nagapakitag kakulang sa pagtahod alang niining importanteng mga bahin sa atong pagsimba. Sa unsang paagi? Pinaagig wala kinahanglanang pag-abot sa kombensiyon sa panahon na o human sa unang awit ug pag-ampo. Sa pagtiklop sa programa, ang uban mobiya na sa ilang lingkoranan sa panahon sa awit ug antes sa pag-ampo. Ngano? Sa hilang nga mga okasyon hayan aduna ing maayong mga rason niini. Apan, ang pipila mohimo niini aron lang sayo nga makapaandar sa ilang mga kotse. Ang uban sayo nga mobiya sa ilang lingkoranan aron mauna diha sa linya alang sa giluwatan nga literatura o sa pagkaon. Ang pagkamabinantayon ugmaron gayod diha sa pangagpas sa personal nga kasayon, dili ta tugotan ang ako-una nga tinamdan o di-diyosnong mga taras sama sa kadalo ug kahakog sa pagbalda sa atong espirituwal nga tingusbawan. Ingong katawhan sa diyosnong debosyon, kita nagapanlimbasog sa pagpakitag pagtahod sa maong hinungdanong mga bahin sa atong pagsimba, nga mao, ang atong pag-ampo ug pag-awit ngadto kang Jehova.
14 ATONG KRISTOHANONG PAMATASAN: Sa miaging katuigan, ang atong Kristohanong pamatasan ug panagway mihatag kanato ug maayong dungog ingong mga Saksi ni Jehova. Kini tungod kay husto ang atong pagtamod sa atong mga kombensiyon ingong espirituwal nga mga piyesta, dili sosyal nga mga suroysuroy. Uyon niana, kita maninguha sa pagpasundayag sa espirituwal nga kahimtang sa panghunahuna ug sa paggawi sa atong kaugalingon ingong mga ministro.
15 Matikdi kining maayong eksperiyensiya nga gipahimuslan sa Saksing pamilya samtang nangaon sa usa ka restawran sa siyudad kombensiyonan sa miaging tuig. Ang igsoong lalaki misulat: “Usa ka lalaki ug iyang asawa diha sa sunod nga lamesa kanamo. Sa human sa ilang pagkaon, ang lalaki miduol ug midayeg kanamo tungod sa among hapsay kaayo ug mahinlong panagway. Gisultihan sa akong asawa ang maong lalaki nga kami nagtambong sa ‘Watchtower Convention’ niining hinapos-semana. Siya miingon nga napaneguro niyang kami nanambong. Nakita niya ang daghan sa atong mga igsoong lalaki ug babaye palibot sa motel samtang siya ug ang iyang asawa nagpuyo didto, ug ang tanan nagpakitag sumbanang pamatasan ug senina. Siya miingon nga sa simbahan nga iyang gitambongan, ang mga batan-on wala magsenina o magagawi sama sa atong mga batan-on. Kini nagpaapresyar kanako kon unsa ka importante ang pagmatuto sa atong mga anak sa sayo pang edad aron mahimong maayong Kristohanong panig-ingnan sa tanang panahon. Ang dungog ihatag gayod ngadto sa kusganong tambag ug pagtultol gikan sa organisasyon ni Jehova sa paghatag ug maayo kaayong ehemplo.”
16 Ikasubo, ang pipila nga nagtambong sa mga kombensiyon nahimong dili matinagdanon sa ilang tinamdan, senina, sinultihan, ug pamatasan. Kon kana mahimong dayag diha man sa lokal nga kongregasyon o sa panahon sa kombensiyon, sila nga adunay espirituwal nga mga katakos kinahanglang mohimog mahigugmaong tambag uban sa tuyo sa pagpasig-uli. (Gal. 6:1; Efe. 4:11, 12) Ang atong diyosnong debosyon magpalihok gayod kanato nga mahimong kugihan sa pagbayaw sa atong maayong kadungganan ug sa paghupot kanunay sa hataas nga mga sukdanan sa pamatasan sa tanang panahon.
17 Didto sa kombensiyon, ibutang sa hunahuna nga ang atong motibo maoy diyosnong debosyon. Busa, ang atong mga hunahuna kinahanglang bug-os nga libre gikan sa materyalistikanhong mga pangagpas sulod sa tulo ka adlaw. Ipunting ta ang atong hunahuna sa espirituwal nga mga butang, dili sa negosyo o sa mga paaging makakuwarta. Makausa pa buot namong pahinumdoman ang tanan nga walay pagbaligya sa personal nga mga butang ang tugotan sa sulod sa dapit kombensiyonan, ug ang iya lamang sa Sosyedad nga mga butang ang tugotan diha sa ‘bookroom’ o ubang mga departamento sa kombensiyon.
18 Alang sa samang rason, ang mga departamento sa refreshment maoy serado sa panahon sa tanang sesyon sa kombensiyon, busa gikinahanglan nga mokuha kamo sa inyong gikinahanglan sa panahong walay sesyon. Niining paagiha, ang tanan makaarang sa pagpunting sa espirituwal nga mga tagana gikan sa plataporma, apil kadtong nagatrabaho sa mga departamento sa refreshment.
19 Sa pipila ka kombensiyon, human ang tigpaminaw mibiya, daghang sagbot ang gibiyaan sa lainlaing luna. Daghang papel, mga putos sa dulse, mga botelya ug ubang mga panudlanan, nga gibiyaan diha sa mga lingkoranan. Kini ba nagabanaag ug diyosnong debosyon? Nagapakita ba kinig konsiderasyon niadtong natudlo sa paghinlo sunod kanato? Sanglit kay dili man nato pasagdan ang basura diha sa atong mga Kingdom Hall, tinoon ta gayod nga puniton ang bisan unsa nga makitang gibiyaan ug ibutang kana sa hustong mga butanganan, o bisan gani dad-on kana sa balay aron didto ilabog kon gikinahanglan.
20 PARA SA MGA GINIKANAN: Ang gagmayng kabataan ug mga tin-edyer ilabinang gidapit sa pagtambong sa “Diyosnong Debosyon” Distritong Kombensiyon. Ang daghan sa impormasyon nga ibutyag ilabinang makapalig-on alang kanila. Pagkamaayo kaayong tan-awon sa diyosnong dabosyon sa mga batan-on nga nakakat-on sa suod nga pagtagad diha sa tanan Kristohanong mga tigom ug kinsa interesado kaayo diha sa programa sa kombensiyon! (Sal. 148:12, 13) Pero magadepende ug dako diha sa panig-ingnan ug pagdumala sa mga ginikanan. Daghang batan-on ang nabansay ug maayo sa pagkuhag mga nota. Kon ingong usa ka ginikanan wala pa nimo matudloi ang imong mga anak kon unsaon sa paghimog mga nota, nganong dili gamiton ang panahong nahibilin sa dili pa ang kombensiyon sa pagbuhat niana? Bisan ang mga batan-on pa kaayo mapalig-on man sa pagsulat ug mga sitasyon sa Kasulatan ug may-kalabotang yawing mga pulong nga ilang madunggan sa mga mamumulong. Ang ubang ginikanan mohikay sa pagsubli sa lintunganayng mga puntos gikan sa programa sa maong adlaw human makauli sa ilang mga abotanan o samtang nagapamauli.
21 Siyempre, ang kinaiyang hilig sa mga bata maoy madulaon. Kulang silag kasinatian sa kinabuhi ug mahuyang. Busa, kinahanglan silang tudloan sa panahong magpatalinghog ug sa paagi sa ilang paggawi sa ilang kaugalingon sa mga tigom. Kini nagakinahanglan ug maayong pagdumala sa mga ginikanan. Ang pipila sa mga ginikanan nagapasagad niining bahina. May mga panahon, bisan tuod ang mga ginikanan magpakitag hustong pagtahod ngadto kang Jehova sa panahon sa pag-ampo, ang ilang mga anak nagadula ug nagapabalda sa uban. Kinahanglang mahibalo ang mga ginikanan kon unsa ang ginabuhat sa ilang mga anak sa panahon sa mga pag-ampo. Unsa may ilang ginabuhat sa panahong mobiya sila sa ilang lingkoranan sa panahon sa programa? Ang mga anak ba pasagdan lang sa panahon o human sa programa sa kombensiyon?
22 Sa pagkamatuod, ang diyosnong debosyon magpalihok sa mga ginikanan sa paghimog suod nga pagdumala sa ilang mga anak sa tanang panahon samtang ilang gimatuto sila “diha sa disiplina ug pagdumala-hunahuna ni Jehova.”—Efe. 6:4.
23 IMONG BUG-OS NGA KOOPERASYON GIPABILHAN: Ang dakong pagplano ug trabaho gihimo aron tinoon ang supisyenteng lingkoranan, literatura, pagkaon ug ubang tagana nga mabatonan sa tanan nga motambong sa kombensiyon. Sa pagseguro sa pagkaepektibo niining mga kahikayana, ang kada kongregasyon sa tino gitudlo ngadto sa tinong kombensiyon. Ang imong bug-os nga kooperasyon hinungdanon aron malikayan ang pagsugwak. Siyempre, mahimong adunay mga kahimtang nga magpatambong kanimo sa kombensiyon sa laing lugar. Apan, ang kadaghanan makaarang man sa pagtambong sa kombensiyon sa lugar nga sila natudlo.—1 Cor. 13:5; Filip. 2:4.
24 Ang imong bug-os nga kooperasyon gihangyo maylabot sa pagreserba ug lingkoranan. Palihog hinumdomi nga ang LINGKORANAN MAHIMONG IRESERBA LAMANG ALANG SA SUOD NGA MGA MEMBRO SA PAMILYA UG BISAN KINSA NGA NAGABIYAHE UBAN KANIMO DIHA SA IMONG KAUGALINGONG SAKYANAN. Palihog ayaw pagreserba ug lingkoranan alang sa uban. May mga panahon, ang ekstra nga lingkoranan gireserba alang sa usa nga wala matino. Kini dili mahigugmaon ug magpalibog sa ‘attendants’ ug sa uban nga nangitag kalingkoran. Uyon sa tambag sa Bibliya, kinahanglang duyogan ang diyosnong debosyon uban sa inigsoong gugma ug bug-os nga mokooperar sa naaprobahang kahikayan sa pagreserba ug lingkoranan.—2 Ped. 1:5-8.
25 Gisugyot nga gamiton ang maayong panghukom sa pagdalag personal nga mga butang ngadto sa dapit kombensiyonan. Ang pipila nagdalag dagkong ‘coolers’ o ubang dagkong butang nga dili ikabutang ilalom sa ilang lingkoranan. Kini gibutang sa agianan o ibabaw sa lingkoranan. Kini misangpot nga ang uban walay kalingkoran. Gikinahanglan tang ipakita ang konsiderasyon sa maong mga butang.
26 Ang paggamit sa ‘video cameras’ ug ‘audio recording’ gitugotan man sa dapit kombensiyonan. Apan, kadtong nagagamit sa maong mga himan kinahanglang magbantay nga dili makadisturbo o makabalda sa uban. Ang maong mga himan dili ipahimutang diha sa mga agianan o mga gulaanan. Dili gayod ikonektar ang maong mga himan sa ‘public address system’ o sa elektrikal nga kuhaanan. Ang ‘floodlights’ dili tugotan. Kadtong nagapadisturbo o walay pagtagad sa mga giya nga gihisgotan sa itaaas sa walay langan mosunod sa maong butang sa dihang ipaalinggat kini kanila. Ang ‘attendants’ ug uban pa nga nagadumala magmaalisto sa pagtul-id sa bisan unsang paglapas niining mga giyaha, ug silang naggamit sa maong mga himan kinahanglang bug-os nga mokooperar sa mga nagadumala.
27 ATONG DIYOSNONG DEBOSYON makasugamak pa ug grabe kaayong pagsulay sa dili madugay. “Sa pagkamatuod, ang tanan nga nagatinguha sa pagkinabuhi sa diyosnong pagkamahinalaron uban ni Kristo Jesus pagalutoson usab.” (2 Tim. 3:12) Pagkamapasalamaton ta kang Jehova sa espirituwal nga mga tagana sama sa “Diyosnong Debosyon” Distritong mga Kombensiyon, diin siya magabansay kanato ug “magatudlo kanato sa pagbiya sa pagkadi-diyosnon ug kalibotanong mga pangibog ug sa pagkinabuhi uban ang pagkahapsay sa hunahuna ug pagkamatarong ug diyosnong debosyon taliwala niining presenteng sistema sa mga butang.”—Tito 2:12.
[Kahon sa panid 6]
Distritong Kombensiyong mga Pahinumdom
ABOTANAN: Magpadala kamig supaly sa mga pormang ‘Room Request’ ngadto sa matag kongregasyon. Kadtong nagakinahanglan ug mga sak-anan kinahanglang mosulat sa usa niining mga pormaha ug ihatag kana ngadto sa kombensiyon koordinetor sa inyong kongregasyon. Iya kining susihon ug pirmahan, dayon ipadala ngadto sa Watch Tower Convention sa usa sa mga adres nga anaa sa ubos.
December 22-24, 1989
Ilagan, Isabela: c/o Isidro Balmaceda, Baculod, Ilagan, 3300 Isabela.
Vigan, Ilocos Sur: c/o Gerardo Alegre, 110 Bonifacio Street, Vigan, 2700 Ilocos Sur.
Binalonan, Pangasinan: c/o Santiago Partido, Assembly Hall of Jehovah’s Witnesses, Binalonan, 2436 Pangasinan.
Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.
Quezon City (1): P.O. Box 2044, 1099 Manila.
Mabalacat, Pampanga: c/o Generoso D. Canlas, 142 MacArthur Highway, Dau, Mabalacat, 2010 Pampanga.
Lucena City: c/o Emilio Pascua, Employees Subdivision, Gate 1, 4301 Lucena City.
Iriga City: c/o Leonardo de Villa, 38 Waling-waling Street, San Miguel, 4431 Iriga City.
Iloilo City: 65 Escarilla Subdivision, Mandurriao, 5000 Iloilo City.
Cebu City: c/o Parcon’s Machine Shop, Bagumbayan Street, 6000 Cebu City.
Tacloban City: 185 M. H. del Pilar Street, 6500 Tacloban City.
Dumaguete City: c/o Alexander Echon, 110-A Springville, Tubod, 6200 Dumaguete City.
Butuan City: Kingdom Hall, Capitol Avenue, 8600 Butuan City.
Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.
Tandag, Surigao del Sur: Kingdom Hall, Dawis, Tandag, 8300 Surigao del Sur.
Oroquieta City: c/o Eustaquio Lumasag, Capitol Site, 7207 Oroquieta City.
Tantangan, South Cotabato: c/o Libertad Supnet, New Cuyapo, Tantangan, 9510 South Cotabato.
December 29-31, 1989
Tuguegarao, Cagayan: c/o Nolia’s Beauty Parlor, 77 Gonzaga Street, Tugegarao, 3500 Cagayan.
Bayombong, Nueva Vizcaya: c/o Trinidad V. Bunuan, Market Site, Diversion Road, Bayombong, 3700 Nueva Vizcaya.
Agoo, La Union: c/o Noel Rivera, Bubblebee Burgerland, Agoo, 2504 La Union.
Alaminos, Pangasinan: c/o Bonifacio Rancudo, 20 Don Carlos Garcia Street, Alaminos, 2404 Pangasinan.
Tarlac, Tarlac: c/o Gregorio Ibarra, Aguso, Tarlac, 2300 Tarlac.
Quezon City (1): P.O. Box 2044, 1099 Manila.
Marikina, Metro Manila: Kingdom Hall, 273 Molave Street, Concepcion, 1800 Marikina, Metro Manila.
Balanga, Bataan: c/o Cecilio Fabunan, Lot 3, Cupang, Balanga, 2100 Bataan.
Puerto Princesa City: Kingdom Hall, Malvar Street, 5300 Puerto Princesa City.
Bacolod City: c/o Serafin Sabordo, 68 Mabini Street, 6100 Bacolod City.
Tagbilaran City: c/o Felix Acma, 44 R. Palma Street, 6300 Tagbilaran City.
Maasin, Southern Leyte: c/o Conrado Balaga, Rosario Village, Asuncion, Maasin, 6600 Southern Leyte.
General Santos City: Kingdom Hall, 8 Siniguelas Street, General Santos City.
Davao City: Kingdom Hall, Corner Lopez Jaena and F. Torres Streets, 8000 Davao City.
Cagayan de Oro City: c/o Nicolas Reymundo, Jr., 52 Vamenta Blvd., Carmen, 9000 Cagayan de Oro City.
Zamboanga City: Kingdom Hall, 541 San Jose Road, Baliwasan, 7000 Zamboanga City.
ENERO 5-7, 1990
Masbate, Masbate:a c/o Yolando Alburo, 56-K Tara Street, Masbate, 5400 Masbate.
BAWTISMO: Ang mga kandidato sa bawtismo kinahanglang manlimbasog nga anaa na sa ilang lingkoranan diha sa gitudlong seksiyon sa dili pa magsugod ang programa sa Sabado sa buntag. Ang kasarangang humdonon ug tuwalya pagadad-on sa matag kandidato nga nagaplano sa pagpabawtismo. Human sa pakigpulong sa bawtismo ug pag-ampo, ang tsirman sa sesyon mohatag ug mubong mga instruksiyon ngadto sa mga kandidato sa bawtismmo ug unya magpaawit ug usa ka awit. Sa pagsugod sa kataposang linya, ang ‘attendants’ motultol sa mga kandidato sa bawtismo ngadto sa dapit bawtismohanan o ngadto sa mga sakyanan nga magdala nila didto, samtang ang nahibiling tigpaminaw mohuman sa pag-awit sa maong awit. Sanglit kay ang bawtismo nga simbolo sa pahinungod sa usa maoy suod ug personal nga butang tali sa maong indibiduwal ug kang Jehova, walay tagana sa gikaingong magpartner nga mga bawtismo nga duha o mas pang mga kandidato sa bawtismo maggakos o magkaptanay sa kamot samtang gibawtismohan.
ESPESYAL NGA MGA MITING: Usa ka miting himoon uban sa tanang regular ug espesyal payunir ug nagabiyaheng mga magtatan-aw sa 11:15 s.b. sa Biyernes, samtang ang usa ka miting himoon uban sa tanang ansiyano sa 11:15 s.b. sa Sabado. Ang mga dapit alang niining mga mitinga igapahibalo gikan sa plataporma.
PIONEER IDENTIFICATION: Ang tanang regular ug espesyal payunir, maingon man ang mga nagabiyaheng magtatan-aw, kinahanglang magdala sa ilang ‘Identification and Assignment card’ (S-202) ngadto sa kombensiyon. Ang mga payunir nga anaa sa listahan sukad sa Hulyo 1, 1989 o una pa nianang petsaha makadawat ug ₱50.00 nga kantidad sa ‘convention tickets’ sa dihang ipakita ang ilang ID card sa maong usa ka kombensiyon lamang. Isipa gayod ang maong kard ingong kuwarta. Dili kana kapulihan didto sa kombensiyon. Ang bisan unsang mga gasang luwatan o ubang literatura sa ‘pioneer rates’ mabatonan man sa mga payunir didto sa ‘bookroom’ sa dihang ipakita ang ilang ID card.
PAGBOLUNTARYO: Ang boluntaryong tabang gikinahanglan para sa hanoy nga palakaw sa distritong kombensiyon. Bisan kon makaarang ka lang sa pagtrabaho ug kabahin sa kombensiyon, ang imong mga serbisyo gipabilhan man. Kon ikaw makabulig, palihog moreport ka ngadto sa ‘Volunteer Service Department’ sa dihang moabot ka sa kombensiyon. Ang mga bata nga ubos sa 16 anyos ang edad makaamot usab sa kalamposan sa kombensiyon, pero sila kinahanglang magtrabaho uban sa usa ka ginikanan o laing kasaligang hamtong.
LAPEL CARDS: Palihog itahod ang espesyal nga gidesinyong ‘lapel card’ didto sa kombensiyon ug samtang nagabiyahe ngadto-ngari sa dapit kombensiyonan. Kini sagad magpaposible kanato sa paghimog maayong pamatuod samtang nagabiyahe. Ang ‘lapel cards’ pagakuhaon pinaagig kongregasyon, samtang kini dili man mabatonan sa mga kombensiyon. Ang ‘lapel cards’ tag 15¢ and usa ug ang ‘celluloid holders’ tag ₱1.00 ang usa. (Nota ngadto sa sekretaryo: Naorder na unta ang ‘lapel cards’ diha sa Special Order Blank for Forms. Kon kini wala pa mahimo, mag-order karon niana diha sa regular S-14.)
PAHIMANGNO: Diin ka man motambong, bantaye ang imong mga butang sa tanang panahon. Kon may sakyanan ka, paneguroang yawihan kana ug ayaw pagbilin ug mahalong mga butang sa sulod sa giparking nga kotse. Usab, pagbantay batok sa mga kawatan ug mga mangunguot kinsa manugok sa dagkong panagkatigom. Nagalakip kini nga dili magbilin ug bisan unsang mahalong butang nga walay nagabantay diha sa mga lingkoranan sa kombensiyon. Palihog magbantay.
[Footnote]
a Kini kausaban gikan sa unang pahibalo diha sa Septiyembreng Atong Ministeryo sa Gingharian.