Tambong sa “Putling Pinulongan” Distritong Kombensiyon
1 Nag-ingon ang matagnaong pulong ni Jehova sa Sofonias 3:9: “Unya ulian ko ang mga katawhan sa ulay nga pinulongan, aron silang tanan magtawag sa ngalan ni Jehova, sa pag-alagad kaniya nga may pag-uyonay.” Ang kombensiyon niining tuiga dili lang magpaila kon unsa ang “putling pinulongan” kondili usab motabang kanato sa pagpabili kon nganong ang pagkat-on ug pagsulti niana nga larino hinungdanon kaayo ug kon sa unsang paagi ang atong katakos sa pagsulti niana magpalig-on sa panaghiusa sa tibuok-kalibotang panag-igsoonay.
2 MOABOT NGA SAYO: Ang kapunongan ni Jehova nagadapit kanato sa pagkaon diha sa iyang espirituwal nga lamesa. Maoy timailhan sa pagtahod sa pag-abot sa hustong panahon. Kini nagakahulogan nga kita gayod sayo nga moabot sa matag adlaw ug makalingkod na antes mosugod ang programa. Kini nagakinahanglag supisyenteng panahong igahin para sa pagparking sa atong sakyanan ug sa pagpangitag lingkoranan.—1 Cor. 14:40.
3 Ang mga delegado ngadto sa mga kombensiyon sa Poland sa miaging tuig nasumeter sa diyosnong debosyon, gugma, ug panaghiusa sa ilang mga igsoon. Dayag ang dulot nga pagpabili sa espirituwal nga mga tagana. Sa kada buntag, sayo ang mga igsoon nga nakaabot sa mga dapit kombensiyonan, nga nakalingkod ug andam na sa unang awit ug pag-ampo. Sila nagpabilin hangtod sa paniklop nga awit ug pag-ampo, ug sila wala dayon mouli human sa programa aron sa pagpakigsandurot uban sa ilang kaigsoonan.
4 Ang kahapsay sa mga igsoon maoy sumbanan. Mitambong sila aron sa pagpaminaw ug pagkakat-on. Bisan ang pag-ulan sa walay atop nga mga estadyum sa Poznan ug Chorzow wala makapasimang sa ilang atensiyon gikan sa programa. Ang mga batan-on, apil ang gagmayng kabataan, disiplinado kaayo, hilom, ug mapatalinghogon sa programa. Tupad nga nanglingkod ang mga pamilya. Sa unsang paagi kita makabenepisyo gikan sa ilang panig-ingnan?
5 Maoy Kasulatanhon ang pagsundog sa maayong ehemplo sa uban. (2 Tes. 3:7) Samtang ang atong personal nga mga kahimtang mahimong lahi, kita usab gusto nga makapahimulos gayod sa atong mga kombensiyon. Aron malikayan ang kabalaka ug panghupaw tungod sa ulahing paggikan ngadto sa dapit asembliyahanan, ang ubang mga pamilya naglagda ug makataronganong panahon sa pagkatulog. Busa sila may maayong katulog sa gabii ug andam sa sayong paggikan sa sunod nga adlaw. Kini magpalikay sa pag-abot nga ang programa nagapadayon na, nga magpabalda kanilang nanglingkod na. Ang atong pagkamahunahunaon niining bahina maoy ilhanan sa atong pagkamasugtanon ug pagtahod kang Jehova ug sa gugma ug konsiderasyon sa atong mga igsoon.
6 UPAT-ADLAW NGA KOMBENSIYON: Ang “Putling Pinulongan” Distritong Kombensiyon molungtad sa upat ka adlaw. Magsugod kini sa Huwebes sa 1:30 s.h. ug matapos sa mga 5:10 s.h. sa Huwebes, Biyernes, ug Sabado, ug 4:00 s.h. sa Domingo. Sa Biyernes hangtod sa Domingo ang programa magsugod sa 8:30 s.b. Ang kada adlaw maoy puno sa hinungdanong impormasyon nga maylabot sa pagsulti sa putling pinulongan. Adunay mga pakigpulong, mga pasundayag, mga eksperiyensiya, mga simposiyum, ug duha ka drama sa Bibliya. Matikdi: Ang programa pareho ra sa tanang kombensiyon, apil nianang himoon sa Metro Manila. Ang kalainan lamang didto sa Manila mao ang presensiya sa langyawng mga delegado kinsa gidapit sa pagtambong.
7 Himoang imong lig-ong tinguha nga walay sayloan bisan usa ka sesyon. Hayan kini nagakinahanglan ug personal nga mga sakripisyo ug mga kausaban sa imong eskedyol. Basin gikinahanglan sa pipila sa paghimog espesyal nga mga kahikayan uban sa ilang amo. Daghan gani ang misalindot sa pinansiyal nga mga bentaha aron sa pagtambong sa tanang sesyon. Apan, hunahunaa kon unsa ang gisakripisyo ug giantos sa daghang mga igsoon sa miaging tuig sa pagtambong sa mga kombensiyon sa Poland. Dili ba kana magpadasig kanimo sa pagtambong sa imong kombensiyon sa matag sesyon? Si Jehova magapanalangin gayod niadtong maghimo niining butanga ang usa ka ulohan sa tim-os nga pag-ampo ug sa kinasingkasing manlimbasog sa pagtambong.—Heb. 10:24, 25.
8 PAMINAW UG MAAYO: Sa Salmo 50:7 si Jehova miingon: “Paminaw gayod, O akong katawhan, ug ako mosulti.” Busa, sa panahon sa programa sa kombensiyon, ayawg pabalda sa mga makita ug mga kasaba nga walay labot sa materyal nga gipasiugda gikan sa plataporma. Ang atong tinguha sa pagsulti sa putling pinulongan nga larino kinahanglang magpalihok kanato sa bug-os nga pagtuman sa hangyo ni Jehova sa Isaias 55:2: “Paminaw ug maayo kanako.”
9 Ang tanang materyal nga ipresentar niining kombensiyona maoy sa atong espirituwal nga kaayohan ug magsilbe sa pagpalig-on sa atong hugot nga tinguha sa pagpabiling malig-on sa atong pag-alagad kang Jehova ug sa panaghiusa sa atong mga igsoon. Ang kombensiyon mopasignunot kanato uban sa karong mga panginahanglan ug moabag kanato sa pagduyog sa organisasyon ni Jehova. Ang di-pagpaminaw mosangpot sa atong pagkanabiyaan. Kinahanglang padayong matugob ang atong kaugalingon sa programa aron bug-os nga makabenepisyo gikan niana ug human niana makapadapat sa atong nakat-onan.—Sant. 1:25.
10 Aduna bay sarang mahimo ta aron makapaminaw pa ug mas pa ug makahinumdom sa impormasyon nga gipresentar? Oo, aduna. Daghang delegado ang nakaugmad sa batasan sa pagkuhag mga nota sa panahon sa programa. Ilakip ang usa ka ‘notebook’ uban sa imong Bibliya ug ‘songbook’ sa dihang motambong ug kombensiyon. Kon giisip mo ang pagkuhag-nota nga may pagduhaduha, nganong di sulayan kini sa panahon sa “Putling Pinulongan” nga Kombensiyon? Hayan makaplagan mo kini nga usa ka maayong paagi sa pagrematse sa imong pagtagad kon unsa ang ginahisgotan ug kini magpanalipod kanimo nga dili maglatagaw ang imong hunahuna.
11 Ang mga nota dili kinahanglang maghinobra. Sagad ang usa ka prase o duha igo na para sa usa ka yawing punto. Makaplagan sa mga ansiyano nga makabulig ang pagbaton ug mahinlong mga nota para sa pagdumalag makahuloganong repaso sa programa sa kombensiyon sa Tigom sa Pag-alagad. Usab, basin buot nilang gamiton ang daghang puntos nga gipresentar sa ilang buluhatong pagpanudlo ug pagpasibsib.
12 AWIT UG PAG-AMPO: Gipasidunggan ta si Jehova pinaagig pag-awit sa iyang mga pagdayeg. Bahin kini sa atong pagsimba. Mahimuot usab si Jehova sa dihang ang iyang katawhan moduol kaniya diha sa maikagong pag-ampo. (Prov. 15:8b) Ang distritong kombensiyon mohatag kanatog talagsaong higayon nga mahiusa sa mga linibo sa atong mga igsoon sa pagdayeg kang Jehova diha sa awit ug pag-ampo. Apan, ang uban nagpakitag kakulang sa pagtahod alang niining importanteng mga bahin sa atong pagsimba. Sa unsang paagi? Pinaagig wala-kinahanglanang pag-abot sa kombensiyon atol sa o human na sa unang awit ug pag-ampo. O sa konklusiyon sa programa, ang uban mobiya na sa ilang lingkoranan atol sa pag-awit ug sa dili pa ang pag-ampo. Ngano? Sa pipila ka okasyon basin adunay maayong rason sa pagbuhat niini. Apan, ang hustong pagtahod ba ginapakita alang sa lamesa ni Jehova sa dihang ang uban mosalikway sa pribilehiyo sa pag-awit ug pagduyog sa pag-ampo aron lamang sila sayo nga makagikan sa pag-uli o aron makakaon?—Mat. 6:33.
13 Ang pagbantay kinahanglang batonan diha sa pangagpas sa personal nga kasayon, nga dili ta tugotan ang kalibotanong ako-una nga tinamdan sa pagpugong sa atong espirituwal nga pag-uswag. Hinaot nga ipakita ta ang samang espiritu sa pagpabili alang sa sagradong mga butang ingon sa atong kaigsoonan nga mitambong sa mga kombensiyon sa Poland sa miaging tuig, ug hinaot nga kita magalakaw nga may pag-uyonay uban kanila pinaagig pagpakitag pagtahod sa pag-ampo ug sa pag-awit ug mga pagdayeg ngadto kang Jehova.—Sal. 69:30.
14 ATONG KRISTOHANONG PAMATASAN: Ang atong Kristohanong pamatasan ug panagway didto sa mga kombensiyon nakahatag kanatog maayong dungog ingong mga Saksi ni Jehova. Kini tungod kay kita seryoso sa atong pagsimba kang Jehova ug wala ta isipa ang pagtambong ug kombensiyon ingong sosyal nga pagsuroy lamang. Sa dihang nagatambong sa maong espesyal nga mga okasyon, kita gayod magmentinar sa Kristohanong dignidad ug espirituwal nga panghunahuna, nga nagagawi sa atong kaugalingon ingong mga ministro sa tanang panahon.—1 Cor. 10:31-33.
15 Bisan pa niana, makapadisturbong tan-awon nga ang pipila nga nagatambong ug mga kombensiyon nahimong kasuwal kaayo sa ilang pananina, sinultihan, ug pamatasan. Unsa may mahimo kon kini mapanid-an diha sa lokal nga kongregasyon o sa mga kombensiyon? Kadtong aduna ing espirituwal nga mga kalipikasyon kinahanglang mohatag ug mahigugmaong tambag uban sa tumong sa pagpasig-uli. (Gal. 6:1; Efe. 4:11, 12) Ang pagsulti sa putling pinulongan kinahanglang magpadasig kanato sa pagbayaw sa atong maayong kadungganan ug hataas nga mga sukdanan sa pamatasan.
16 Usa ka bisita sa usa ka kombensiyon mihulog sa kahon sa alamotan niining mosunod nga nota: “Ako giganahan pag-ayo sa inyong programa. Ako karon motuon na sa Bibliya uban sa usa sa mga igsoon. Kini mao ang akong unang pagduaw ngadto sa inyong mga asembliya. Nagplano ko nga motambong lang sa Sabado, kay ang Domingo mao ang akong adlaw alang sa simbahan. Apan ako nasumeter kaayo mao nga ako mianhi karon ug gidala ang akong interong pamilya. Pero ako napalaw tungod sa mga hamtong nga kusog nga nag-estorya samtang nagpahayag ang mamumulong.”
17 Napanid-an usab nga sa pipila ka kombensiyon ang pipila ka tin-edyer molingkod sa likoran ug maghunghungay, ug sa kasagaran dili maminaw sa programa. Kini nagapakita nga sila nagakinahanglan pa ug ginikananong pagdumala ug kinahanglang tupad nga molingkod sa pamilya. Ang responsableng mga ginikanan motagad niining mga butanga ug motaganag giyang gikinahanglan sa ilang mga anak. (Efe. 6:4) Ang tanan, batan-on ug tigulang, kinahanglang moila nga sa mosugod na ang programa, panahon na kana sa pagpaminaw, dili sa pagsulti.—Deut. 31:12.
18 Bisan tuod ang kadaghanan gayod sa mga igsoon nagapasidungog sa ngalan ni Jehova, kinahanglang admitihon ta nga ang pipila sa mga pamilyang nagtambong sa mga kombensiyon maoy nakaingon sa reklamo. Pananglitan, human moabang ug lawak nga ang makasulod dili molabaw sa upat o lima ka tawo, ang uban nagpasulod ug ngadto sa napulo ka tawo, ug kana maoy pagkadimatinud-anon. Aron sila maarang o mapaigo, ang mga kutson gikuha sa katre ug gibutang sa salog. Unya ang ekstrang mga hapin sa kutson gihangyo gikan sa tigdumala. Ang ubang mga motel karon dili na gustong magpaabang sa ilang mga kuwarto ngadto sa mga Saksi ni Jehova tungod kay ang pipila milapas sa mga regulasyon nga nagadili sa paglutog pagkaon. Ang laing reklamo mao nga ang mga igsoon mibiya sa ilang motel nga mga kuwarto nga hugaw ang kahimtang. Ang kahinlo ug konsiderasyon kinahanglan usab nga ipakita dili lang sa atong senina ug panggawi kondili usab sa paagi sa atong pagtagad sa kabtangan sa uban, ilabina kon kita nagapuyo diha sa mga lawak sa eskuwelahan o sa mga tinukod nga iya sa gobyerno nga sa kalulot gitanyag kanako sa tigdumala sa mga estadyum. Aduna bay bisan unsang rason nga ang usa ka lawak dili biyaan nga hapsay ug hinlo? Ang pamatasan nga di-matinagdanon makadaot sa atong maayong ngalan. Sa panahon sa umaabot distritong mga kombensiyon, kitang tanan manlimbasog man sa paggawi sa atong kaugalingon aron sa “pagdayandayan sa pagtulon-an sa atong Manluluwas, ang Diyos, diha sa tanang butang.”—Tito 2:10.
19 Sa pipila ka kombensiyon, namatikdan sa miaging tuig nga daghang hugaw ang gibiyaan diha sa ‘assembly hall.’ Daghang papel, mga putos sa dulse, mga botelya, ug ubang mga sudlanan, ang gibiyaan nga nakatag diha sa mga lingkoranan. Kini gayod wala magpakitag pagtahod sa ngalan ni Jehova ni konsiderasyon niadtong natudlo sa paghinlo human kita mobiya. Paneguroang puniton ang bisan unsa nga atong makita nga nakatag ug ibutang kana diha sa hustong mga sudlanan sa basura, o kon kulang ang mga sudlanan, dad-on kini nato sa balay ug paigoon didto.
20 Didto sa kombensiyon ang atong mga hunahuna kinahanglang mapunting sa espirituwal nga mga butang, kay kini bahin man sa atong balaang pag-alagad. Busa maoy pagkadimatinahoron sa lamesa ni Jehova kon atong gamiton ang okasyon sa pagnegosyo o sa mga paaging makakuwarta, nga nagapahimulos sa dakong panon sa mga igsoon nga nagatambong. Makausa pa buot namong pahinumdoman ang tanan nga walay baligya sa personal nga mga butang ang tugotan sa sulod sa dapit kombensiyonan, ug ang mga butang lang sa Sosyedad ang tugotan diha sa ‘bookroom’ o sa ubang mga departamento sa kombensiyon.
21 Uyon sa itaas, ang mga departamento sa ‘refreshment’ pagasirhan sa panahon sa tanang sesyon sa kombensiyon, busa kinahanglan nga makuha ninyo ang inyong gikinahanglan tali sa mga sesyon. Niining paagiha ang tanan makapaminaw sa ginahisgotan gikan sa plataporma, apil silang nagatrabaho diha sa mga departamento sa ‘refreshment.’
22 PARA SA MGA GINIKANAN: Ang kabataan ug mga tin-edyer kinahanglan usab nga mosulti sa putling pinulongan sa larinong paagi. Pagkaanindot tan-awon ang mga batan-on nga nakakat-on sa pagpaminaw gayod sa tanang Kristohanong mga tigom ug kinsa interesado kaayo diha sa programa sa kombensiyon! (Sal. 148:12, 13) Pero ang dakong bahin nagadepende sa panig-ingnan ug pagdumala sa mga ginikanan. Daghang batan-on nabansay-maayo sa pagkuhag mga nota. Kon ingong usa ka ginikanan wala pa nimo matudloi ang imong mga anak sa pagkuhag mga nota, nganong dili gamiton ang nahibiling panahon sa di pa ang inyong kombensiyon sa pagbuhat niini? Bisan ang batan-on pa kaayo mapalig-on man sa pagsulat sa mga sitasyon sa Kasulatan ug maylabot nga yawing mga pulong nga ilang mapaminawan gikan sa mga mamumulong. Ang ubang ginikanan nagahikay sa pagrepaso sa lintunganayng mga puntos gikan sa programa sa maong adlaw human sila mamauli o samtang nagabiyahe pauli.
23 Siyempre, kadaghanan sa mga ginikanan moila nga ang kinaiyang hilig sa mga bata mao ang pagdula. Kulang silag kasinatian sa kinabuhi, ug sila dili mga hamtong. Busa, kinahanglan silang tudloan kon kanus-a maminaw ug kon sa unsang paagi sila magagawi sa ilang kaugalingon didto sa mga tigom. Ang ubang ginikanan nagapasagad niining bahina. May mga panahon, bisan tuod ang mga ginikanan nagapakitag hustong pagtahod ngadto kang Jehova sa panahon sa pag-ampo, ang ilang mga anak nagadula ug nagabalda sa uban. Kinahanglang mahibalo ang mga ginikanan sa ginabuhat sa ilang mga anak sa panahon sa mga pag-ampo. Usab, unsa man ang ilang ginabuhat sa dihang mobiya sila sa ilang lingkoranan sa panahon sa programa?—Prov. 29:15.
24 GIAPRESYAR ANG INYONG BUG-OS NGA KOOPERASYON: Ang dakong pagplano gihimo sa pagtino nga ang igong lingkoranan, literatura, pagkaon, ug ubang mga tagana mabatonan sa tanan nga nagatambong ug kombensiyon. Aron sa pagseguro sa pagkaepektibo niining mga kahikayana, ang kada kongregasyon gitudlo ngadto sa tinong kombensiyon. Ang inyong bug-os nga kooperasyon maoy hinungdanon aron malikayan ang pagsugwak. Ilabinang ginapabilhan kon kadtong nagapuyo sa Metro Manila mosunod gayod sa mga asaynment ngadto sa usa sa tulo ka kombensiyon sa Enero 3-6, 1991. Kini dili magpasugwak sa tumatambong sa usa lang ka estadyum. Kadtong gikan sa mga probinsiya giabiabi man sa pagtambong sa mga kombensiyon sa Manila ug kami nanlimbasog sa pagseguro nga ang igong hawanan mabatonan. Apan, ingon sa gihisgotan sa itaas, ang programa maoy pareho ra sa Manila ingon niadtong motambong sa mga probinsiya.
25 Ang inyong bug-os nga kooperasyon gihangyo maylabot sa pagreserbag lingkoranan. Palihog hinumdomi nga ang LINGKORANAN MAHIMONG IRESERBA LAMANG ALANG SA IMONG SUOD NGA MGA MEMBRO SA PAMILYA UG NIADTONG KANG BISAN KINSA NGA NAGABIYAHE UBAN KANIMO DIHA SA IMONG KAUGALINGONG SAKYANAN. Palihog ayaw pagreserba ug lingkoranan alang sa uban. May mga panahon, ang ekstrang lingkoranan gireserba alang sa tawo nga dili tino. Uyon sa tambag sa Bibliya, kita gayod maninguha sa pagpakitag inigsoong pagbati ug bug-os nga mokooperar uban sa aprobadong kahikayan sa pagreserbag lingkoranan.—2 Ped. 1:5-8.
26 Ang paggamit sa ‘video cameras’ ug ‘audio recording’ nga mga himan kinahanglang dili makadisturbo o makabalda sa uban. Ang maong mga himan dili ipahimutang sa mga agianan o mga gulaanan. Dili gayod ikonektar ang maong mga himan ngadto sa ‘public address system.’ Ang ‘floodlights’ dili tugotan. Kadtong magpadisturbo kinahanglan dayon nga mag-usab sa dihang sultihan sila niini. Kinahanglang alisto ang ‘attendants’ sa pagtul-id sa bisan unsang paglapas niini nga mga giya, ug sila gayod makadawat ug bug-os nga kooperasyon gikan kanilang nagagamit sa maong mga himan.
27 Maoy tino, ang katawhan ni Jehova nagapabili sa panagkatigom diha sa maayong mga pasilidad sa kada tuig aron makabenepisyo gikan sa espirituwal nga programa nga giandam. Kita usab nagapabili sa daghang serbisyo ug mga kaayohan nga gitagana sa maong mga panagkatigom. Sa dakong gasto sa Sosyedad, ang mga kahikayan gihimo alang sa mga estadyum o mga hawanan, ‘sound systems,’ ug daghan uban pang mga serbisyo nga magpahimo sa atong mga kombensiyon nga malipayon ug sa espirituwal nga paagi makapahayahay.
28 Kining maong mga galastohan ginakobrehan pinaagig inyong boluntaryong mga amot sa pagsuportar sa tibuok-kalibotang buluhaton sa Sosyedad. Alang sa imong kasayon, ang tin-aw nga pagkamarkang ‘contribution boxes’ nahimutang diha sa dapit kombensiyonan. Ang tanang amot gipabilhan gayod, ug ang Sosyedad buot nga magpasalamat kanimong abante sa imong mahinatagon ug hiniusang suportar sa intereses sa Gingharian niining paagiha. Kita masaligon nga ang tanan mapalihok sa pagkaamgo sa ilang indibiduwal nga kaakohan niining bahina ug sa bug-os mokooperar pinaagig pagpakig-ambit sa gidak-on nga gitugot sumala sa ilang mga kahimtang.—Luc. 6:38.
29 TAMBONG SA “PUTLING PINULONGAN” DISTRITONG KOMBENSIYON: Pinaagig pagtambong sa “Putling Pinulongan” Distritong Kombensiyon ug pagpatalinghog pag-ayo sa programa, imong maapresyar nga mas pa gani gayod kon nganong si Jehova mihatag kanato sa putling pinulongan ug ngano nga kita kinahanglan kanunay nga magbantay batok sa bisan unsang hinakog nga mga hilig nga magpabalda sa atong panaghiusa uban sa atong mga igsoon. Himoa ang imong mga plano karon nga makaduyog sa unang awit ug sa pagtambong sa tanang sesyon hangtod sa paniklop nga pag-ampo sa Domingo sa hapon.
[Kahon sa panid 4]
Distrito Kombensiyong mga Pahinumdom
SAK-ANAN: Kami magpadalag suplay sa mga pormang Room Request ngadto sa kada kongregasyon. Kadtong nagakinahanglan ug mga sak-anan sa mga kombensiyon sa probinsiya kinahanglang mosulat sa usa niining mga pormaha ug ihatag kini ngadto sa kombensiyon koordinetor sa inyong kongregasyon. Siya mosusi ug mopirma niini, dayon ipadala kini ngadto sa Watch Tower Convention sa usa sa mga adres sa ubos. Matikdi: Walay mga kahikayan sa sak-anan para sa mga kombensiyon sa Manila. Busa silang gikan sa kaprobinsiyahan nga motambong sa Manila nagakinahanglan nga maghikay sa ilang kaugalingong mga sak-anan.
Disyembre 13-16, 1990
Masbate, Masbate: c/o Yolando Alburo, 56-K Tara Street, Masbate, 5400 Masbate.
Disyembre 20-23, 1990
Ilagan, Isabela: c/o Zosimo G. Linda, Baculod, Ilagan, 3300 Isabela.
Laoag City: c/o Leon Agbayani, PLDT Radio Station, Gen. A. Luna Street, 2900 Laoag City.
Binalonan, Pangasinan: c/o Santiago Partido, Assembly Hall of Jehovah’s Witnesses, Binalonan, 2436 Pangasinan.
Alaminos, Pangasinan: c/o Bonifacio Rancudo, 20 Don Carlos Garcia Street, Alaminos, 2404 Pangasinan.
Mangaldan, Pangasinan: c/o Benjamin Caberto, Sr., 97 Salay, Mangaldan, 2432 Pangasinan.
Lucena City: Kingdom Hall, 1 Granja Street, 4301 Lucena City.
Iriga City: c/o Leonardo de Villa, 38 Waling-waling Street, San Miguel, 4431 Iriga City.
Tagbilaran City: c/o Hermenegildo Sang-an, 11 Tamblot Street, 6300 Tagbilaran City.
Roxas City: Kingdom Hall, Dayao, 5800 Roxas City.
Dumaguete City: c/o Alexander Echon, 110-A Springville, Tubod, 6200 Dumaguete City.
Tacloban City: 185 M. H. del Pilar Street, 6500 Tacloban City.
Davao City: Kingdom Hall, Corner Lopez Jaena and F. Torres Streets, 8000 Davao City.
Digos, Davao del Sur: Kingdom Hall, Lim Street Extension, Digos, 8002 Davao del Sur.
Cagayan de Oro City: Kingdom Hall, F. Abellanosa Street, 9000 Cagayan de Oro City.
Zamboanga City: Kingdom Hall, 541 San Jose Road, Baliwasan, 7000 Zamboanga City.
Disyembre 27-30, 1990
Tuguegarao, Cagayan: c/o Santiago Panaga, 60 Public Market, Tuguegarao, 3500 Cagayan.
Bayombong, Nueva Vizcaya: c/o Trinidad V. Bunuan, Market Site, Diversion Road, Bayombong, 3700 Nueva Vizcaya.
Baguio City: c/o Osmundo Delis, 46 General Luna Road, 2600 Baguio City.
Tarlac, Tarlac: c/o Gregorio Ibarra, Aguso, Tarlac, 2300 Tarlac.
San Fernando, Pampanga: Kingdom Hall, 850 Juliana Subdivision, San Fernando, 2000 Pampanga.
Puerto Princesa City: Kingdom Hall, Malvar Street, 5300 Puerto Princesa City.
Cebu City: c/o Parcon’s Machine Shop, Bagumbayan Street, 6000 Cebu City.
Maasin, Southern Leyte: c/o Conrado Balaga, Rosario Village, Asuncion, Maasin, 6600 Southern Leyte.
Bacolod City: c/o Serafin Sabordo, 68 Mabini Street, 6100 Bacolod City.
Koronadal, South Cotabato: c/o Candido Alima, 756 Posadas Street, Koronadal, 9506 South Cotabato.
Tagum, Davao del Norte: Kingdom Hall, 1036 Rizal Street, Tagum, 8100 Davao del Norte.
Surigao City: c/o Alfredo Alutaya, 735 Navarro Street, 8400 Surigao City.
Dipolog City: c/o Jose Machutes, Jr., 097-E Magsaysay Street, 7100 Dipolog City.
Kabacan, North Cotabato: c/o Felipe Mapanao, Poblacion, Kabacan, 9407 North Cotabato.
Enero 3-6, 1991
Manila: P.O. Box 2044, 1099 Manila.
Marikina: P.O. Box 2044, 1099 Manila.
Quezon City: P.O. Box 2044, 1099 Manila.
BAWTISMO: Ang mga kandidato sa bawtismo manlimbasog gayod nga anaa na sa ilang lingkoranan sa gigahin nga seksiyon sa dili pa magsugod ang programa sa buntag sa Sabado. Ang kasarangang humdonon ug tuwalya pagadad-on sa matag usa nga nagaplano sa pagpabawtismo. Human sa pakigpulong sa bawtismo ug sa pag-ampo sa mamumulong, ang tsirman sa sesyon mohatag sa mubong mga instruksiyon ngadto sa mga kandidato sa bawtismo ug dayon magpaawit. Sugod sa kataposang han-ay, ang ‘attendants’ moderiher sa mga kandidato sa bawtismo ngadto sa dapit sa pagtuslob o ngadto sa mga sakyanan nga modala kanila didto, samtang ang nahibilin sa mamiminaw motapos sa pag-awit sa maong awit. Sanglit ang bawtismo nga usa ka simbolo sa dedikasyon sa usa mao may suod ug personal nga butang tali sa indibiduwal ug kang Jehova, wala ing tagana sa gikaingong magkauban nga mga bawtismo diin ang duha o mas pang mga kandidato sa bawtismo maggakos o magkaptanay samtang ginabawtismohan.
ESPESYAL NGA MGA MITING: Ang usa ka miting himoon uban sa tanang regular ug espesyal nga mga payunir ug nagabiyaheng mga magtatan-aw sa 11:15 s.b. sa Biyernes, samtang ang usa ka miting uban sa tanang ansiyano himoon sa 11:15 s.b. sa Sabado. Ang mga dapit alang niining mga mitinga igapahibalo gikan sa plataporma.
PIONEER IDENTIFICATION: Ang tanang regular ug mga espesyal payunir, maingon man ang nagabiyaheng mga magtatan-aw, kinahanglang magdala sa ilang Identification and Assignment card (S-202) ngadto sa kombensiyon. Ang mga payunir nga anaa sa listahan sukad sa Hulyo 1, 1990 o una pa nianang petsaha makadawat ug ₱80.00 nga kantidad sa mga tiket sa kombensiyon sa dihang ipakita ang ilang “ID card” didto sa usa ka kombensiyon lamang. Tagda ang kard pag-ayo ingong salapi. Dili kana pulihan didto sa kombensiyon.
PAGBOLUNTARYO: Ang boluntaryong tabang gikinahanglan alang sa hanoy nga palakaw sa distritong kombensiyon. Bisan kon makaarang ka sa pagtrabaho nga usa ka bahin lang sa kombensiyon, ang imong mga serbisyo ginapabilhan. Kon ikaw makabulig, palihog moreport ka ngadto sa ‘Volunteer Service Department’ sa dihang mahiabot ka sa kombensiyon. Ang mga bata nga ubos sa 16 anyos makaamot man sa kalamposan sa kombensiyon, pero sila gikinahanglang motrabaho kauban sa ginikanan o ubang kasaligang hamtong.
LAPEL CARDS: Palihog itaod ang espesyal nga pagkadesinyong ‘lapel card’ didto sa kombensiyon ug samtang nagabiyahe pangadto-ngari sa kombensiyonanan. Kini sagad magpaposible alang kanato sa paghatag ug maayong pamatuod samtang nagabiyahe. Ang ‘lapel cards’ kinahanglang kuhaon gikan sa kongregasyon, kay kini dili man mabatonan didto sa mga kombensiyon. (Nota ngadto sa sekretaryo: Ang ‘lapel cards’ giorder na unta diha sa ‘Special Order Blank for Forms.’ Kon kini wala mahimo, magpadala niana diha sa regular nga S-14 nga order karon alang niini.)
PAHIMANGNO: Bisan kon hain ka motambong, bantaye ang imong mga kabtangan sa tanang panahon. Kon aduna ka ing sakyanan, paneguroang yawihan kana ug ayawg pagbilin ug mga alahas sulod sa giparking nga kotse. Pagbantay usab sa mga kawatan ug mga mangunguot kinsa modugok sa dagkong mga panagkatigom. Kini nagalakip sa dili pagbilin sa bisan unsang mahalong butang nga walay nagabantay sa mga lingkoranan sa kombensiyon. Palihog magbantay.