Dag-on ba Gayod sa Maayo ang Daotan?

DUOLAG duha ka libo ka tuig kanhi, si Jesu-Kristo, usa ka tawong walay sala, gihusay alang sa iyang kinabuhi. Ang mga tawong daotan nagsabotsabot sa pagpatay kaniya kay siya nagsulti sa kamatuoran. Nga binakak gisumbong siya sa pagkamaalsahon, ug giawhag sa panon sa mga tawo nga ipapatay siya. Usa ka Romanong gobernador, kinsa labawng nagpabili sa iyang kaugalingong politikanhong dungog kay sa kinabuhi sa usa ka ubos nga panday, mipahamtang kang Jesus sa silot sa mapintas nga kamatayon. Sumala sa mga ilhanan, ang daotan maorag nagmadaogon.

Bisan pa niana, sa gabii sa wala pa siya mamatay, si Jesus misulti ngadto sa iyang mga tinun-an: “Gidaog ko na ang kalibotan.” (Juan 16:33) Unsa ang iyang gipasabot? Sa bahin, nga ang kadaotan sa kalibotan wala makapahinabo nga siya mahimong mayugtanon o mapanimalosnon sa samang paagi. Ang kalibotan wala makapiga kaniya pasulod sa daotang hulmahan. (Itandi ang Roma 12:2, Phillips.) Bisan sa hapit nang mamatay, siya miampo pa alang sa mga mopatay kaniya: “Amahan, pasayloa sila, tungod kay sila wala mahibalo sa ilang ginabuhat.”​—Lucas 23:34.

Gipasundayag ni Jesus​—hangtod sa iyang kamatayon—​nga mabuntog ang daotan. Giawhag niya ang iyang mga sumusunod sa pagpakigbugno sa ilang kaugalingong bugno batok sa daotan. Sa unsang paagi sila makabuhat niana? Pinaagi sa pagsunod sa Kasulatanhong tambag nga “dili mobalos ug daotan sa daotan kang bisan kinsa” ug “magpadayon sa pagdaog sa daotan pinaagi sa maayo,” sama sa gibuhat ni Jesus. (Roma 12:17, 21) Apan kanang paagiha ba tinuod nga molampos?

Pagbugno sa Daotan sa Dachau

Si Else usa ka babayeng Aleman nga napriso sa Dachau nga mihatag ug bililhong gasa ngadto sa usa ka 14-anyos nga Rusong babaye, ang gasa nga mao ang pagtuo ug paglaom.

Ang Dachau maoy daot-ug-dungog nga kampo konsentrasyon diin linibo ang gipamatay pinaagi sa makahilong gas ug ginatos, apil kadtong batan-ong babayeng Ruso, gipaagom sa mangilngig medikal nga mga eksperimento. Ang Dachau maorag kinapungkayan sa kadaotan. Bisan pa niana, nianang morag yutang umaw, ang maayo migitib ug ngani misanay.

Si Else naluoy sa labihan sa maong dalagita si kinsa gipugos usab sa pagpatan-aw samtang mananapong gilugos sa SS nga mga guwardiya ang iyang inahan. Si Else, nga gipameligro ang iyang kaugalingong kinabuhi, nangitag kahigayonan sa pagpakigsulti sa dalagita mahitungod sa maayo ug daotan ug mahitungod sa Kasulatanhong paglaom sa pagkabanhaw. Iyang gitudloan ang iyang batan-ong higala sa paghigugma inay sa pagdumot. Ug ang Rusong dalagita nakalabang sa mga kangilngig sa Dachau, sa tabang ni Else.

Gibuhat kadto ni Else kay buot niyang sundon ang dili-mahakogong panig-ingnan ni Kristo. Ingong usa sa mga Saksi ni Jehova, siya nakakat-on sa dili pagbalos ug daotan sa daotan, ug ang iyang pagtuo nagdasig kaniya sa pagtabang sa uban sa pagbuhat sa ingon. Bisan pag nag-antos siya sa Dachau, naangkon niya ang moral nga kadaogan batok sa usa ka daotang pagmando. Ug siya wala mag-inusara.

Si Paul Johnson, diha sa iyang librong A History of Christianity, nag-ingon nga “[Ang mga Saksi ni Jehova] wala makigtambayayong sa gobyernong Nazi nga ilang gisaway ingon nga bug-os daotan. . . . Nuybentaisiyete porsiento ang nag-antos sa paglutos sa usa o sa laing dagway.” Kadto ba usa ka pakigbisog nga walay paglaom? Diha sa librong Values and Violence in Auschwitz, ang Polakong sosyologo nga si Anna Pawelczynska nag-ingon bahin sa mga Saksi: “Kining gamayng pundok sa mga binilanggo maoy usa ka malig-ong puwersa kon bahin sa ideolohiya ug gidaog nila ang ilang pakigbugno batok sa Nazismo.”

Hinuon, alang sa kadaghanan kanato ang pangunang pakigbugno ginabugno batok sa daotan sa sulod inay sa daotan sa gawas. Kini usa ka pakigbugno sulod sa atong kaugalingon.

Pagdaog sa Daotan sa Atong Kaugalingon

Gibatbat ni apostol Pablo kining bugnoa sa mosunod nga paagi: “Ang maayo nga buot kong buhaton dili mao ang akong ginabuhat; ang daotan nga dili ko buot buhaton mao ang kanunay kong ginabuhat.” (Roma 7:19, The New Testament, ni William Barclay) Sumala sa nahibaloan pag-ayo ni Pablo, ang pagbuhat ug maayo dili kinaiyanhong mahitabo.

Si Eugenioa usa ka batan-ong Espanyol nga lalaki si kinsa, sulod sa duha ka dugayng mga tuig, nakigbugno sa bugno batok sa iyang daotang mga hilig. “Kinahanglang mag-inistrikto ako sa akong kaugalingon,” misaysay siya. “Sukad sa pagkabatan-on, ako may hilig nga mahimong mahilayon. Sa tin-edyer pa, kinabubut-on kong gibuhat ang mapatuyangong mga buhat nga homoseksuwal, ug sa prangkang pagkasulti, gikahimut-an ko kanang matanga sa pagkinabuhi.” Unsay nagpahinabo nga siya nag-usab sa kadugayan?

“Buot kong pahimut-an ang Diyos, ug nakat-onan ko gikan sa Bibliya nga dili siya mouyon sa akong paagi sa pagkinabuhi,” matud ni Eugenio. “Busa mihukom ako nga mahimong laing matang sa tawo, nga magasunod sa mga latid sa Diyos. Kada adlaw, kinahanglang makigbugno ako batok sa negatibo, mahugawng mga hunahuna nga mosalanap pa sa akong kaisipan. Determinado ako sa pagdaog sa maong pakigbugno, ug walay hunong akong nag-ampo alang sa panabang sa Diyos. Pagkatapos sa duha ka tuig natapos na ang kinagrabehan, bisan pag estrikto gihapon ako sa akong kaugalingon. Apan nagmapuslanon ang pakigbisog. Ako karon adunay pagtahod-sa-kaugalingon, maayong kaminyoon, ug, labaw sa tanan, usa ka maayong relasyon uban sa Diyos. Akong nahibaloan gikan sa kaugalingong kasinatian nga mapalagpot ang daotang mga hunahuna sa dili pa kana mamunga​—kon maningkamot ka pag-ayo.”

Dag-on sa maayo ang daotan sa matag panahon nga isalikway ang daotang hunahuna, sa matag panahon nga kita modumili sa pagbalos ug daotan sa daotan. Ugaling, ang maong mga kadaogan, bisan tuod hinungdanon, dili magpapas sa duha ka dagkong tinubdan sa daotan. Bisan pag unsaon nato pagpaningkamot, dili kita makabuntog nga bug-os sa atong pinanunod nga mga kahuyangan, ug si Satanas nagbaton gihapon ug daotang impluwensiya ibabaw sa katawhan. Busa mausab ba gayod kining kahimtanga?

Paglaglag sa Yawa

Ang kamatinumanon ni Jesus hangtod sa kamatayon maoy usa ka dakong kaparotan ni Satanas. Napakyas ang Yawa sa iyang paninguha sa pagbungkag sa integridad ni Jesus, ug ang maong kapakyasan nagtimaan sa sinugdanan sa kalaglagan ni Satanas. Sumala sa gipatin-aw sa Bibliya, natilawan ni Jesus ang kamatayon aron nga “pinaagi sa iyang kamatayon siya mahimong maglaglag . . . sa Yawa.” (Hebreohanon 2:14) Human sa iyang pagkabanhaw giingnan ni Jesus ang iyang mga tinun-an: “Ang tanang pagbulot-an gikahatag kanako sa langit ug sa yuta.” (Mateo 28:18) Ug kining pagbulot-ana magamit sa pagbungkag sa mga binuhatan ni Satanas.

Ang basahong Pinadayag nagabatbat sa adlaw sa pagpalagpot ni Jesus kang Satanas gikan sa mga langit. Kining Pangulong-mamumuhat-ug-daotan, kauban sa iyang mga demonyo, gikutohan nga diha na lang sa silinganan sa yuta. Ingong sangpotanan, nagapasidaan ang Bibliya, mosamot ang kadaotan: “Alaot ang yuta ug ang dagat, tungod kay ang Yawa nanaog nganha kaninyo, nga may dakong kapungot, kay nahibalo nga hamubo na lamang ang iyang panahon.”​—Pinadayag 12:7-9, 12.

Ang tagna sa Bibliya nagpaila nga kining makasaysayanhong hitabo nahitabo na​—sa mga panahon sa Unang Gubat sa Kalibotan.b Kanay hinungdan sa dayag nga pagsamot sa kadaotan nga atong nasaksihan sa atong panahon. Apan sa dili madugay si Satanas bug-os nga piotan aron dili na siya makaimpluwensiya kang bisan kinsa.​—Tan-awa ang Pinadayag 20:1-3.

Unsay kahulogan unya niining tanan alang sa katawhan?

“Dili na Unya Sila Mobuhat ug Daotan”

Ingong Hari sa Gingharian sa Diyos, duol nang gamiton ni Jesus ang iyang ‘pagbulot-an sa yuta’ sa pag-organisar ug usa ka programa sa espirituwal nga pag-edukar pag-usab. “Ang pagkamatarong mao gayod ang makat-onan sa mga lumolupyo sa mabungahong yuta.” (Isaias 26:9) Madayag unya sa tanan ang mga kaayohan. Ang Bibliya nagapasalig kanato: “Sila dili na mobuhat ug bisan unsang kadaotan [“sila dili na unya mobuhat ug daotan,” Interlinear Hebrew/Greek English Bible ni Green] o mopahinabog kalaglagan . . . tungod kay ang yuta mapuno na gayod sa kahibalo kang Jehova ingon nga ang katubigan nagatabon sa dagat mismo.”​—Isaias 11:9.

Bisan karon, daghan sa atong daotang mga hilig mahimong mabuntog. Sa dihang wala na ang demonyohanong impluwensiya, tino nga labi, labi pang sayon unya nga “magpahilayo sa daotan ug magbuhat sa maayo.”​—1 Pedro 3:11.

Kita may bug-os katarongan sa pagkamasaligon nga dag-on sa maayo ang daotan tungod kay ang Diyos maayo, ug pinaagi sa iyang panabang kadtong si kinsa buot mobuhat ug maayo makabuntog sa daotan, sama sa gipamatud-an ni Jesus pinaagi sa iyang panigingnan. (Salmo 119:68) Kadtong buot karon nga mobugno sa daotan makapanglantaw sa unahan sa pagkinabuhi sa usa ka nahinloang yuta nga mandoan sa Gingharian sa Diyos, usa ka kagamhanan nga nanaad sa pagpapas sa daotan sa tanang panahon. Ang salmista nagbatbat sa sangpotanan: “Mahitungod sa mahigugmaong-kalulot ug kamatuoran, sila nagkatagbo; ang pagkamatarong ug pakigdait​—sila naghinalokay sa usag usa. Ang kamatuoran mogitib sa yuta mismo, ug ang pagkamatarong mosud-ong gikan mismo sa kalangitan.”​—Salmo 85:10, 11.

[Mga footnote]