Mga Magmamantala sa Gingharian Nagtaho

Sila Nag-usob sa Ilang Pagkinabuhi

SA WALAY duhaduha imo silang nakit-an nga nakigsulti sa uban diha sa kadalanan, nagduaw sa balay-balay, o nagtambong ug Kristohanong mga tigom diha sa ilang mga Kingdom Hall. Gihisgotan namo ang maayog-pamostura nga mga batan-on sa mga Saksi ni Jehova. Tingalig nakahinapos ka nga sila mga Saksi kay gitudloan sila sa ilang mga ginikanan nga maingon niana, ug matuod kana sa kadaghanan nila. Sa laing bahin, may pipila sa maong mga batan-on nga lahi kaayog kagikan ug kansang pagkinabuhi kanhi maoy bug-os lahi sa ilang pagkinabuhi karon. Ngani, silang gipakita sa sunod panid nakig-uban kaniadto sa mga pundok diin ang krimen ug pag-abusar sa droga maoy matag-adlaw nga mga panghitabo. Unsay nakapausob nga bug-os kaayo sa ilang mga kinabuhi? Duawon nato ang usa ka lungsod sa Norway ug himamaton ang pipila sa mga batan-on nga nakahimo sa maong mga kausaban.

Ang Pasukaranan sa Kausaban

Sa dihang nahibalag sa duha ka Saksi si Annette sa balay-balay nga buluhaton, siya 19 anyos. “Ako kadaghan nang giingnan nga dili gayod makigsulti sa mga Saksi ni Jehova, apan ako naikag ug sila akong gipadayon,” nahinumdom siya. Siya tiggamit ug droga sukad nga siya 11 anyos ug nalangkit sa daghang panglungkab ug pangawat ug kotse.

Ang maayong balita sa Gingharian nakapadani kaniya. Siya nadasig ilabina sa paglaom sa pagkabanhaw, kay namatyan sa iyang inahan sa singko anyos pa siya. Busa gidawat niya ang libreng pagtuon sa Bibliya ug misugod sa pagtambong sa mga tigom sa Kingdom Hall. Gisultihan niya ang iyang trato ug uban pa sa iyang nakat-onan. Ang reaksiyon? Dili nila gustong makiglabot niana ug miakusar pa nga si Annette na-brainwash. Bisan pa niana, pipila kanila nga labing supak sa ulahi misugod sa pagtuon ug Bibliya.

Ingong usa ka pananglitan, tagda si Espen, usa ka ulitawo nga 20 anyos. Nadunggan niya ang bahin sa maayong balita sa Gingharian gikan sa trato ni Annette ug dihadiha buot ug pagtuon sa Bibliya. Ugaling, siya nagpaabot nga mosilbi sa sentensiya sa prisohan nga upat ka bulan, kay nalangkit siya sa pagyuhot ug mga droga ug, sama kang Annette, sa daghang panglungkab. Siya tiggamit usab sa tabako, marijuana, ug ubang droga. Karon, kinsang tawhana nga nalangkit nianang mga butanga ang gustong mosugod sa pagtuon ug Bibliya? Nakaamgo si Espen sa kahaw-ang ug kawalay katuyoan sa iyang pagkinabuhi. Miasoy siya: “Nadani ako sa mga saad sa Bibliya sa umaabot nga naghatag kanakog katuyoan sa kinabuhi. Busa misugod ako sa pagtuon aron sa pagsusi kon ako gisultihan ba sa tinuod.”

Ang Uban Buot Magtuon ug Bibliya

Sa maomaong panahon, usa ka batan-ong lalaki gikan sa samang pundok sa mga batan-on nakadungog sa maayong balita, ug siya usab misugod sa pagtuon ug pagtambong sa mga tigom. Sunod, ang usa ka pagtuon nasugdan uban sa lain pa sa maong mga batan-on, ug siya misugod sa pagtambong sa mga tigom. Wala madugay human niana, ang lain pang batan-ong lalaki miduyog sa iyang mga higala sa pagtuon sa Bibliya ug paghimog espirituwal nga pag-uswag. Unya lain pang batan-on sa samang pundok nahingangha sa positibong kausaban nga gihimo sa iyang mga higala, ug sa wala madugay, siya buot magtuon sa Bibliya.

Si Gilbert, usa ka batan-ong musikero gikan sa samang pundok, misugod na karon sa pagtuon ug Bibliya. Ang duha niya ka ginikanan namatay sa kanser, mao nga siya nahupayan sa paglaom sa pagkabanhaw diha sa Bibliya. (Juan 5:28, 29) Siya usab naggamit ug marijuana ug nagkinabuhing mapatuyangon, ug siya may ambisyon nga mahimong inila sa musikang rock. Ugaling, sa paglabay sa panahon, siya nakahimog maayong pag-uswag sa espirituwal ug sa wala madugay mihukom nga mahimong usa ka Saksi ni Jehova. Sa kataposan, ang manghod nga lalaki ni Espen misugod sa pagsusi sa Bibliya ug pagpakig-uban sa mga Saksi.

Kamatuoran sa Bibliya Nagausob sa mga Kinabuhi

Ang dakong kausaban nahitabo niining mga batan-ona nga sa nangagi dili hindik sa pamiste, dili manudlay sa buhok, ug nalangkit sa mga droga, pangawat, ug ubang krimen. Si Annette usa ka maayong magmamantala sa Gingharian ug nag-alagad nga payunir sa mga usa ka tuig. Si Espen ug Gilbert nakaalagad ingong mga oksilyare payunir, ug sila ministeryal nga mga alagad usab. Silang duha nangaminyo sulod sa Kristohanong kongregasyon. Upat pa sa pundok kaniadto maoy masibotong mga magmamantala sa Gingharian usab!

Komosta ang upat-ka-bulang sentensiya nga silbihan unta ni Espen? Tungod sa kausaban nga gihimo niya sa iyang kinabuhi, ang iyang sentensiya gialid-an ug 80 ka oras nga trabahong komunidadnon. Nga giuyonan sa kapolisan ug sa uban, gigugol niya kining mga orasa sa pagtrabaho sa lokal nga Kingdom Hall sa mga Saksi ni Jehova. Ang mga polis nahimuot kaayo sa maong kahikayan.

Oo, daghan pang batan-on sa tibuok kalibotan adunay kriminal nga kaagi. Apan ang kamatuoran sa Pulong sa Diyos naghatag kanilag mga tubag sa hinungdanong mga pangutana ug lig-ong paglaom alang sa umaabot. Busa, sila dili na mga kriminal o mga tiggamit ug droga, ug sila dili na maglakawlakaw nga dili hindik ug pamiste. Kay nag-usob na sa ilang pagkinabuhi, sila sama na gayod sa mga tawong gihisgotan sa itaas​—mga batan-on, maayog-pamostura, ug aktibong mga Saksi ni Jehova. Buot nilang ipahibalo sa uban ang malungtarong mga kasulbaran sa Bibliya sa mga suliran nga nabatonan sa tuman ka daghang batan-on karong adlawa.​—Tan-awa ang 1 Corinto 6:9-11.

[Hulagway sa panid 8]

Si Espen, Annette, ug Gilbert