Nagapangita sa Kasaligang mga Tagna

“ANG tawo nga makakita sa mga kalihokan nga tulo ka adlawng abante madato sulod sa kaliboan ka tuig.” Matud pa sa sanglitanang Insik.

Ang mga tawo gusto gayod nga masayod bahin sa umaabot, ug daghan ang malipay sa pagbayad ug dakong kantidad alang sa kasaligang impormasyon nga sama niana. Sila mangitag kasaligang mga panagna. Sumala sa makita sa pagkakaylap sa mga panagna labot sa klima ug sa panalapi, kita may kaikag sa mga hitabo nga anaa sa unahan. Dugang pa, ang kasaligang kahibalo sa umaabot makahimo kanato sa pagplano ug sa paghikay sa atong mga kinabuhi.

Ang tinguha nga mahibalo kon unsay mahitabo sa umaabot nag-aghat sa uban sa pagkonsulta sa mga manghihimalad, guru, astrologo, ug mga tambalan. Ang mga tindaghag libro ug mga butanganag mga magasin puno sa karaan ug modernong mga sinulat labot sa mga tawong nangangkong makatag-an sa umaabot. Apan gilibotan kining maong mga panagna ug pagduhaduha. Ang Romanong estadistika nga si Cato gitaho nga nag-ingon: ‘Ako nahibulong nga dili mokatawa ang mananagna inigkakita niyag laing mananagna.’

Siyempre, adunay daghang matang sa mga tagna. Sa 1972 usa ka internasyonal nga grupo sa mga propesor ug mga negosyante nga nailhang Club of Rome mipatik ug usa ka pagtuon nga nanagna nga ang kalibotan sa dili madugay mahutdan sa dili-kapulihang mga kahinguhaan. Wala na unyay bulawan sa pagka 1981, merkuryo sa 1985, zink sa 1990, petrolyo sa 1992, ug uban pa. Atong makita karon nga kining mga tagnaa wala matuman.

Daghang tagna gipasukad sa relihiyosong mga hunahuna. Sa pag-ilustrar: Ang obispong Saxon nga si Wulfstan nagtuo nga ang pagsulong sa taga-Denmark sa Inglaterra sa sayo sa ika-11ng siglo maoy ilhanan nga duol na ang kataposan sa kalibotan. Sa 1525, si Thomas Münzer nangulo sa pag-alsa sa mga magbabaol nga Aleman tungod kay diha sa panan-awon siya nakakita ug mga manulonda nga nagbaid sa ilang mga sanggot nga iyang gituohang mahimong usa ka dakong ani. Dayag, kining mga tagnaa dili-tukma.

Sumala sa nahibaloan na nimo, ang Bibliya nasudlan ug mga tagna. Dugang pa, ang mga magsusulat sa Bibliya nag-angkong dinasig sa Diyos. Ang Kristohanong apostol Pedro miingon: “Walay panagna sa Kasulatan nga nagagikan sa kaugalingong interpretasyon. Tungod kay wala may propesiya nga miabot pinaagi sa kabubut-on sa tawo, kondili ang mga tawo nagsulti gikan sa Diyos sanglit sila minandoan sa balaang espiritu.”​—2 Pedro 1:20, 21.

Lakip sa ubang mga butang, ang Bibliya nagtagna ug nagkalainlaing mga hitabo nga nagapaila sa kaliwatan nga makaeksperyensiya sa presensiya ni Jesu-Kristo diha sa gahom sa langitnong Gingharian. Ang wala pa sukad igdungog nga panaggubat, kagutom, mga linog, ug pagkahugno sa moral nga kalig-on mahimong timaan nianang gibatbat sa Bibliya ingong “kataposang mga adlaw.” (2 Timoteo 3:1-5; Mateo 24:3-14, 34) Sumala sa Bibliya, ang pagwagtang sa presenteng sistema sa mga butang mobukas sa dalan alang sa kalipay sa katawhan diha sa usa ka bag-ong kalibotan sa walay kataposang mga panalangin.​—2 Pedro 3:13; Pinadayag 21:1-4.

Unsay imong hunahuna sa maong mga tagna sa Bibliya? Sama sa daghan pang ubang mga panagna, kini ba mga pamanabana lamang? Atong masulayan ang pagkakasaligan sa mga tagna sa Bibliya nga wala pa matuman pinaagi sa pagtino kon ang mga tagna ba sa Bibliya mahitungod sa nangaging mga hitabo kasaligan. Diha sa sunod nga artikulo, atong hisgotan ang pipila niini.

[Picture Credit Line sa panid 3]

Sa kortesiya sa National Weather Service