“Kami Morag Dili Magkasultianay!”

SI Michael, usa ka abogado, kinahanglan nga maayong manulti. Gikinahanglan kana sa iyang trabaho. Apan human sa 16 ka tuig nga panagtiayon, si Michael napugos sa pag-amgo nga inigpauli niya sa balay ngadto sa iyang asawa, si Adrian, ang iyang mga kahanas sa komunikasyon morag mawagtang. “Tungod sa pagbagutbot, panaway, pagpasabotsabot,” si Michael nahinumdom, “si Adrian ug ako kanunayng magkalalis, ug ako naghunahuna nga makapaluya kadto kanamo. Nahibulong ako kon ang panagtiayon ingon ba niadto, ang kanunayng pagyawyaw bahin sa kawalay-katagbawan ug paghagithagit. Kon kadto ang among kahimtang sa nahibilin namong kinabuhi nga magkauban, gusto kong molingkawas​—wala ako magkomedya. Dili gayod ako makasagubang ug 20, 30, 40 ka tuig nianang matang sa kanunay nga paghagithagit ug tensiyon.”

Ang mga pagbati nga sama niini dili lang iya ni Michael ug Adrian. Matuod kana sa daghang magtiayon kansang relasyon magbanosbanos tali sa away ug pahulay sa away. Ang kinayanohang mga kabildo mosilaob ngadto sa panaglalis. Ilang “madungog” ang mga butang nga wala isulti. Sila mosultig mga butang nga dili tinuyo. Sila moyawyaw ug mobutangbutang, unya mohilom nga mayugtanon. Dili sila magbulag, apan dili usab sila tinuod nga “usa ka unod.” (Genesis 2:24) Ang relasyon nag-urong. Ang pag-atras magpasabot sa pagbulag; ang pag-abante magpasabot sa pag-atubang sa mga kabingkilan. Aron malikayan ang kagul-anan sa bisan haing pagpili, kining mga magtiayona mopalabi nga dili magbinatiay sa usag usa.

Kanang mga magtiayona nagkinahanglan nga ‘makabaton ug mahanasong pagtultol’ diha sa ilang panagtiayon. (Proverbio 1:5) Ang maong pagtultol anaa sa Pulong sa Diyos, ang Bibliya. Ang ikaduhang sulat ni Pablo kang Timoteo nagpamatuod nga ang Bibliya “mapuslanon alang sa pagtudlo, sa pagbadlong, sa pagtul-id sa mga butang.” (2 Timoteo 3:16) Kana matuod sa pag-ayom sa kadaot sa komunikasyon sa panagtiayon, sumala sa ato unyang makita.