Ang Kristohanong Banay Magbutang Pag-una sa Espirituwal nga mga Butang

“Kamong tanan kinahanglang magbaton ug samang hunahuna, nga magpakitag pagbinatiay, magbaton ug inigsoong gugma, magmaluluy-on, magmapaubsanon sa hunahuna.”​—1 PEDRO 3:8.

1. Unsang pagpili ang nabatonan natong tanan, ug sa unsang paagi ang atong pagpili makaapektar sa atong umaabot?

ANG kasulatan sa ibabaw mapadapat gayod sa labing karaang institusyon sa katawhan​—ang banay! Ug pagkahinungdanon gayod nga ang mga ginikanan magpakitag pagpanguna niining bahina! Ang ilang positibo ug negatibong mga hiyas sagad nga motumaw diha sa mga anak. Bisan pa, ang matag sakop sa banay may higayon sa pagpili. Ingong mga Kristohanon, makapili kita nga mahimong espirituhanon o unodnong mga tawo. Makapili kita nga pahimut-an ang Diyos o pasuk-on siya. Kanang pagpilia mahimong mosangpot sa panalangin, nga walay-kataposang kinabuhi ug kalinaw​—o sa tunglo, nga dumalayong kamatayon.​—Genesis 4:1, 2; Roma 8:5-8; Galacia 5:19-23.

2. (a) Giunsa pagpakita ni Pedro ang iyang pagkamahunahunaon sa banay? (b) Unsa ang espirituwalidad? (Tan-awa ang potnot.)

² Ang mga pulong sa apostol sa 1 Pedro kapitulo 3, bersikulo 8, misunod dayon sa maayong tambag nga iyang gihatag ngadto sa mga asawa ug sa mga bana. Interesado gayod si Pedro sa kaayohan sa Kristohanong mga banay. Nasayod siya nga ang malig-ong espirituwalidad mao ang yawi ngadto sa nahiusa, mabinationg panimalay. Busa, gipasabot niya sa bersikulo 7 nga kon ang mga bana dili magtagad sa iyang tambag, ang sangpotanan mao ang espirituwal nga babag tali sa bana ug kang Jehova.a Ang mga pag-ampo sa bana mababagan kon dili niya tagdon ang mga panginahanglan sa iyang asawa o sakiton siya tungod sa pagkamapintason.

Si Kristo​—Hingpit nga Panig-ingnan sa Espirituwalidad

3. Giunsa pagpasiugda ni Pablo ang panig-ingnan ni Kristo alang sa mga bana?

³ Ang espirituwalidad sa usa ka banay nagdepende sa maayong panig-ingnan. Kon ang usa ka bana maoy magtutuman nga Kristohanon, ihatag niya ang panig-ingnan sa pagpadayag sa espirituwal nga mga hiyas. Kon walay matinuohong bana, ang inahan kasagarang maningkamot nga abagahon ang maong responsabilidad. Sa bisan haing kahimtang, gihatag ni Jesu-Kristo ang hingpit nga sumbanan nga pagasundon. Ang iyang panggawi, iyang mga pulong, ug iyang hunahuna kanunayng makapalig-on ug makapahupay. Sa subsob, si apostol Pablo nagpunting sa magbabasa ngadto sa mahigugmaong sumbanan ni Kristo. Pananglitan, siya nag-ingon: “Ang bana mao ang ulo sa iyang asawa maingon nga si Kristo usab mao ang ulo sa kongregasyon, kay siya mao ang manluluwas sa maong lawas. Mga bana, ipadayon ninyo ang paghigugma sa inyong mga asawa, maingon nga si Kristo usab nahigugma sa kongregasyon ug nagtugyan sa iyang kaugalingon alang niini.”​—Efeso 5:23, 25, 29; Mateo 11:28-30; Colosas 3:19.

4. Unsang panig-ingnan sa espirituwalidad ang gihatag ni Jesus?

⁴ Si Jesus mao ang talagsaong panig-ingnan sa espirituwalidad ug pagkaulo nga gipakita uban ang gugma, kalulot, ug kamaluluy-on. Siya nagpakasakit sa kaugalingon, wala magpatuyang sa kaugalingon. Sa kanunay gihimaya niya ang iyang Amahan ug gitahod ang iyang pagkaulo. Gisunod niya ang giya sa Amahan, mao nga siya nakaingon: “Ako walay arang mahimo sa akong kaugalingong pagbuot; sumala sa akong nadungog, ako magahukom; ug ang akong paghukom matarong, tungod kay akong gitinguha, dili ang akong kaugalingong kabubut-on, kondili ang kabubut-on sa nagpadala kanako.” “Wala akoy ginabuhat sa akong kaugalingong pagbuot; apan nagasulti ako niining mga butanga sumala sa gitudlo kanako sa Amahan.”​—Juan 5:30; 8:28; 1 Corinto 11:3.

5. Sa pagtagana sa iyang mga sumusunod, unsang panig-ingnan ang gihatag ni Jesus alang sa mga bana?

⁵ Unsay gipasabot niini alang sa mga bana? Nagpasabot kini nga ang sumbanan nga ilang pagasundon diha sa tanang butang mao si Kristo, si kinsa kanunayng nagpasakop sa iyang Amahan. Pananglitan, maingon nga si Jehova nagtaganag pagkaon alang sa tanang matang sa kinabuhi sa yuta, si Jesus nagtagana usab ug pagkaon alang sa iyang mga sumusunod. Wala siya magpabaya sa ilang pangunang materyal nga mga panginahanglan. Ang iyang mga milagro sa pagpakaon ug 5,000 ug 4,000 ka lalaki maoy pamatuod sa iyang kamatinagdanon ug pagbati sa responsabilidad. (Marcos 6:35-44; 8:1-9) Mao usab karong adlawa, ang kasaligang mga ulo sa banay nagaatiman sa pisikal nga mga panginahanglan sa ilang mga panimalay. Apan diha lang ba kutob ang ilang responsabilidad?​—1 Timoteo 5:8.

6. (a) Unsang hinungdanong mga panginahanglan sa banay ang kinahanglang atimanon? (b) Sa unsang paagi ang mga bana ug mga amahan makapakitag pagsabot?

⁶ Ang mga banay usab adunay uban, mas hinungdanong mga panginahanglan, sumala sa gipunting ni Jesus. Sila may espirituwal ug emosyonal nga mga panginahanglan. (Deuteronomio 8:3; Mateo 4:4) Kita may pakiglabot sa uban, diha sa banay ug sa kongregasyon. Gikinahanglan nato ang maayong giya aron modasig kanato aron mahimong makapalig-on. Niining bahina ang mga bana ug mga amahan may dakong bahin​—ilabina kon sila mga ansiano o ministeryal nga mga alagad. Ang nag-inusarang mga ginikanan nagkinahanglan sa susamang mga hiyas sa dihang magatabang sa ilang mga anak. Kinahanglang hisabtan sa mga ginikanan dili lang ang gisulti sa mga sakop sa banay apan ang wala usab isulti. Nagkinahanglan kanag pagsabot, panahon, ug pailob. Kini usa ka hinungdang si Pedro nakasulti nga ang mga bana kinahanglang magmahunahunaon ug makig-ipon sa ilang mga asawa sumala sa kahibalo.​—1 Timoteo 3:4, 5, 12; 1 Pedro 3:7.

Mga Kapeligrohan nga Pagalikayan

7, 8. (a) Unsay gikinahanglan aron ang banay makalikay sa espirituwal nga pagkadaot? (b) Unsay gikinahanglan gawas pa sa maayong pagsugod diha sa Kristohanong dalan? (Mateo 24:13)

⁷ Nganong hinungdanon kaayo ang pagtagad sa espirituwalidad sa banay? Sa pag-ilustrar, kita makasukna, Nganong hinungdanon nga ang piloto sa barko magbantay pag-ayo sa iyang mga tsart sa dihang magtimon sa usa ka barko latas sa kuyaw nga kadagatan nga adunay kamabwan? Niadtong Agosto 1992 ang barko sa lulinghayaw nga Queen Elizabeth 2 (QE2) naglawig latas sa lugar sa kuyaw nga kamabwan ug kabatoan diin giingong sagad mahitabo ang mga sayop sa paglawig. Usa ka tumindok mipahayag: “Daghang karera ang napildi nianang dapita.” Ang QE2 nabangga sa batong antubong sa ilalom sa tubig. Kadto misangpot nga usa ka gastosong sayop. Ang ikatulong bahin sa kasko sa barko naguba, ug ang barko nabaraderog daghang semana aron ayohon.

⁸ Sa susama, kon ang “piloto” sa banay dili mag-amping sa pagsusi sa tsart, ang Pulong sa Diyos, ang iyang banay daling makaagom ug espirituwal nga kadaot. Alang sa usa ka ansiano o ministeryal nga alagad, ang resulta tingali mao ang pagkawala sa mga pribilehiyo sa kongregasyon ug tingali grabeng kadaot sa ubang sakop sa banay. Busa, ang matag Kristohanon kinahanglang magbantay nga dili hiapsan sa espirituwal nga pagkamatagbawon, pinaagi sa pagsalig na lang sa maayong mga batasan sa pagtuon ug kadasig sa nangagi. Sa atong Kristohanong dalan, ang maayong pagsugod dili kay igo na; kinahanglan nga taposong malamposon ang panaw.​—1 Corinto 9:24-27; 1 Timoteo 1:19.

9. (a) Unsa ka hinungdanon ang personal nga pagtuon? (b) Unsang nahiangayng mga pangutana ang atong ikasukna sa atong kaugalingon?

⁹ Aron makalikay sa espirituwal nga kamabwan, kabatoan, ug natapok nga balas, kinahanglang monunot kita kanunay sa atong “mga tsart” pinaagi sa regular nga pagtuon sa Pulong sa Diyos. Kita dili makasalig lang sa pangunang pagtuon nga nakapasulod kanato sa kamatuoran. Ang atong espirituwal nga kalig-on nagdepende sa regular ug balanseng programa sa pagtuon ug pag-alagad. Pananglitan, samtang kita nagatambong sa Pagtuon sa Bantayanang Torre sa kongregasyon niining isyuha mismo nga gikuptan, kita makasukna sa atong kaugalingon, ‘Ako ba, o kami ba ingong banay, nagtuon gayod niining artikuloha, nga gitan-aw ang mga kasulatan ug gipalandong ang kapadapatan niini? O igo ba lang namong gilinyahan ang mga tubag? Kami ba, kaha, wala gani magtagad sa pagbasa sa artikulo una motambong sa tigom?’ Ang maminatud-ong mga tubag niining mga pangutanaha basin modasig kanato sa paghunahunang ugdang sa atong mga batasan sa pagtuon ug mohaling sa tinguha nga mouswag​—kon kana gikinahanglan.—​Hebreohanon 5:12-14.

10. Nganong hinungdanon ang pagsusi-sa-kaugalingon?

¹⁰ Nganong hinungdanon ang maong pagsusi-sa-kaugalingon? Kay kita nagpuyo sa kalibotan nga gimandoan sa espiritu ni Satanas, usa ka kalibotan nga, sa daghang malalangong paagi, maningkamot sa pagdaot sa atong pagtuo sa Diyos ug sa iyang mga saad. Kini usa ka kalibotang nagtinguha nga mapuliki kita pag-ayo nga wala na kitay panahon aron atimanon ang espirituwal nga mga panginahanglan. Busa kita makasukna sa atong kaugalingon, ‘Ang among banay malig-on ba sa espirituwal? Ako ba ingong ginikanan malig-on sumala sa nahiangay? Ingong usa ka banay kami ba nagaugmad nianang espirituwal nga kusog nga mopalihok sa kaisipan nga motabang kanamo sa paghimog mga desisyon nga pinasukad sa pagkamatarong ug kamaunongon?’​—Efeso 4:23, 24.

11. Nganong ang Kristohanong mga tigom makaayo sa espirituwal? Paghatag ug usa ka pananglitan.

¹¹ Ang atong espirituwalidad kinahanglang mapalig-on sa matag tigom nga atong tambongan. Kanang bililhong mga oras sa Kingdom Hall o sa Pagtuon sa Libro sa Kongregasyon motabang sa pagpapresko kanato human sa dugayng mga oras nga atong gigugol sa paningkamot nga mabuhi sa mabatokong kalibotan ni Satanas. Pananglitan, pagkamakapapresko ang pagtuon sa librong Ang Labing Bantogang Tawo nga Nabuhi Sukad! Kini nakatabang kanato sa pagbaton ug mas maayong pagsabot kang Jesus, sa iyang kinabuhi, ug sa iyang ministeryo. Gibasa natong mainampingon ang mga kasulatang gisitar, gihimo ang personal nga panukiduki, ug busa daghan ang nakat-onan gikan sa panig-ingnan nga gihatag ni Jesus.​—Hebreohanon 12:1-3; 1 Pedro 2:21.

12. Sa unsang paagi ang pagsangyaw sa kanataran mosulay sa atong espirituwalidad?

¹² Usa ka maayong pagsulay sa atong espirituwalidad mao ang Kristohanong ministeryo. Aron molahutay sa atong pormal ug dili-pormal nga pagsangyaw, nga kasagaran sa atubangan sa dili-matinagdanon o masupakong katawhan, gikinahanglan nato ang matarong nga motibo, ang gugma sa Diyos ug ang gugma sa silingan. Hinuon, walay si bisan kinsa ang gustong dumilian, ug mahitabo kana diha sa atong pagsangyaw sa kanataran. Apan kinahanglang hinumdoman nato nga ang maayong balita mao ang gidumilian, dili kitang mga tawo. Si Jesus miingon: “Kon gidumtan kamo sa kalibotan, hibaloi nga kini nagdumot na kanako sa wala pa kini magdumot kaninyo. Kon kamo bahin sa kalibotan, ang kalibotan mahigugma sa mga iya. Karon kay kamo dili man bahin sa kalibotan, apan gipili ko kamo gikan sa kalibotan, tungod niini gidumtan kamo sa kalibotan. . . . Apan ilang pagabuhaton kining tanang butang batok kaninyo tungod sa akong ngalan, tungod kay sila wala makaila kaniya nga nagpadala kanako.”​—Juan 15:18-21.

Mga Buhat Mas Kusog Mosulti kay sa mga Pulong

13. Sa unsang paagi ang usa ka tawo makadaot sa espirituwalidad sa usa ka banay?

¹³ Unsay mahitabo sa usa ka banay kon ang tanan gawas lang sa usa ka sakop ang motahod sa kahapsay ug kahinlo sa balay? Sa usa ka adlaw nga nag-ulan, ang tanan gawas sa malimtanong sakop magbantay nga dili makadalag agi sa lapok inigsulod sa balay. Ang mga agi sa lapok sa bisan diin mohatag ebidensiya sa pagkadanghag sa maong sakop, nga mopahinabog ekstrang trabaho alang sa uban. Ang sama mapadapat sa espirituwalidad. Ang usa lang ka hakog o mapinasagdanong sakop makadaot sa dungog sa banay. Ang tanan sa panimalay, dili lang ang mga ginikanan, kinahanglang maningkamot sa pagpabanaag sa panghunahuna ni Kristo. Pagkamakapapresko sa dihang ang tanan maghiusa pagbuhat nga nagapanglantaw sa walay-kataposang kinabuhi! Ang panghunahuna sa maong pamilya maoy espirituwal (apan dili nagapakamatarong-sa-kaugalingon). Talagsa lang ang timailhan sa espirituwal nga pagpabaya sa maong panimalay.​—Ecclesiastes 7:16; 1 Pedro 4:1, 2.

14. Unsang materyal nga mga tentasyon ang gibutang ni Satanas sa atong dalan?

¹⁴ Kitang tanan adunay pangunang materyal nga mga panginahanglan nga pagatagbawon aron kita mabuhi sa adlaw-adlaw. (Mateo 6:11, 30-32) Apan subsob nga ang atong mga gusto maglabi kay sa atong mga panginahanglan. Pananglitan, gitanyagan kita sa sistema ni Satanas sa tanang matang sa kasangkapan. Kon kanunay natong tinguhaon ang kinabag-ohan sa tanang butang, kita dili gayod matagbaw, sanglit ang kinabag-ohan sa dili madugay mabiya sa uso, ug motungha ang usa ka bag-ong modelo. Ang kalibotan sa komersiyo nakatukod ug tiyobibo nga dili na gayod mohunong. Mohaylo kini kanato nga mangita kanunay ug mas daghang kuwarta aron matagbaw ang kanunay-nag-usbawng mga gusto. Kini mahimong mosangpot sa “daghang binuang ug makadaot nga mga tinguha,” o “sa binuang ug makuyawng mga tingusbawan.” Kini mahimong mosangpot sa dili-timbang nga kinabuhi uban sa menos ug menos nga panahon alang sa espirituwal nga kalihokan.​—1 Timoteo 6:9, 10; The Jerusalem Bible.

15. Sa unsang paagi ang panig-ingnan sa ulo sa banay hinungdanon?

¹⁵ Dinhi na usab, ang panig-ingnan nga ihatag sa ulo sa Kristohanong panimalay hinungdanon kaayo. Ang iyang timbang nga tinamdan bahin sa sekular ug espirituwal nga mga responsabilidad angay makapadasig sa ubang sakop sa banay. Tinong makadaot kon ang amahan mohatag ug ekselenteng binabang pagtudlo apan unya mapakyas sa pagtuman sa iyang mga pulong mismo. Sa ngadtongadto hisabtan sa mga anak ang batasan sa pagsulti kon unsay tukmang buhaton apan wala buhata sa kaugalingon. Sa susama, ang ansiano o ministeryal nga alagad nga modasig sa uban sa balay-balay nga pagsangyaw apan talagsa rang mokuyog sa iyang pamilya sa maong buluhaton ngadtongadto dili na tuohan, sa banay ug sa kongregasyon.​—1 Corinto 15:58; itandi ang Mateo 23:3.

16. Unsang mga pangutana ang atong ikasukna sa atong kaugalingon?

¹⁶ Busa, sa kamapuslanon kita makasusi sa atong mga kinabuhi. Kita ba napuliki sa pagkab-ot sa sekular nga kalamposan ug mao nga wala mouswag sa espirituwal? Kita ba miasenso sa kalibotan apan nabiya sa kongregasyon? Hinumdomi ang tambag ni Pablo: “Ang maong pamulong kasaligan. Kon si bisan kinsang lalaki nagatinguha sa usa ka katungdanan sa pagkamagtatan-aw, siya matinguhaon sa usa ka maayong buhat.” (1 Timoteo 3:1) Ang pagbati sa responsabilidad diha sa kongregasyon maoy mas dakong timaan sa atong espirituwalidad kay sa usa ka umento sa trabaho. Ang maampingong katimbang kinahanglang huptan aron ang atong mga amo dili makagahom kanato nga maorag kita napahinungod kanila ug dili kang Jehova.​—Mateo 6:24.

Makahuloganong Komunikasyon Mopausbaw sa Espirituwalidad

17. Unsay makaamot sa pag-ugmad sa lunsay nga gugma sa usa ka banay?

¹⁷ Milyonmilyong panimalay karong adlawa ang nahimong mga katulganan na lang. Sa unsang paagi? Ang mga sakop sa banay mopauli aron matulog ug mokaon lang, ug dayon sila molakaw dayon. Talagsa ra nga sila molingkod alirong sa usa ka lamesa aron magkauban sa pagpangaon. Ang pagbati sa pagkabanay nawala. Ang sangpotanan? Kulang ang komunikasyon, walay makahuloganong kabildohay. Ug kana mahimong mosangpot sa kakulang sa interes sa ubang mga sakop, tingali sa kakulang sa tinuod nga pagkamahunahunaon. Kon kita nahigugma sa usag usa, mogahin kitag panahon sa pagpakig-estorya ug pagpamati. Modasig kita, ug motabang. Ang maong kinaiya sa espirituwalidad naglangkit sa makahuloganong komunikasyon tali sa mga kapikas ug tali sa mga ginikanan ug mga anak.b Nagkinahanglag panahon ug taktika samtang kita magdasig sa usag usa sa pagpahayag aron ipakig-ambit ang atong mga kalipay, mga kasinatian, ug mga suliran.​—1 Corinto 13:4-8; Santiago 1:19.

18. (a) Kasagaran unsa ang usa ka dakong babag sa komunikasyon? (b) Sa unsa matukod ang makahuloganong mga relasyon?

¹⁸ Ang maayong komunikasyon nagkinahanglag panahon ug paningkamot. Nagkahulogan kini nga gahinag panahon ang pagpakigsulti ug pagpamati sa usag usa. Usa sa kinadagkoang mga babag niini mao kanang makahurot-ug-panahong kasangkapan nga may pinasidunggang dapit sa daghang panimalay​—ang TV. Kini maoy usa ka hagit—​gigamhan ka ba sa TV, o ikaw ang naggahom niini? Ang paggahom sa TV nagkinahanglag lig-on nga hukom​—apil ang hugot nga tinguha sa pagpalong niana. Apan ang pagbuhat niana magbukas sa dalan aron kita makapamati sa usag usa ingong mga sakop sa banay ug ingong espirituwal nga mga managsoon. Ang makahuloganong mga relasyon nagkinahanglan ug maayong komunikasyon, pagsabot sa usag usa, sa atong mga panginahanglan ug mga kalipay, pagtug-an sa usag usa unsa ka dako ang atong pagpabili sa tanang malulutong mga butang nga nahimo alang kanato. Sa laing mga pulong, ang makahuloganong kabildohay magpadayag nga mapasalamaton kita sa uban ug sila atong gipabilhan.​—Proverbio 31:28, 29.

19, 20. Kon kita may paghigugma sa tanan sa banay, unsay atong pagabuhaton?

¹⁹ Busa, kon kita naghigugmaay sa usag usa diha sa banay​—ug naglakip kana sa paghigugma sa mga sakop sa banay nga dili magtutuo​—dako ang atong ginahimo bahin sa paglig-on ug paghupot sa atong espirituwalidad. Diha sa banay, atong masunod ang tambag ni Pedro: “Sa kataposan, kamong tanan kinahanglang magbaton ug samang hunahuna, nga magpakitag pagbinatiay, magbaton ug inigsoong gugma, magmaluluy-on, magmapaubsanon sa hunahuna, nga dili magabalos ug daotan sa daotan o sulting pasipala sa sulting pasipala, apan, sa kaatbang, manghinaot sa kaayohan, tungod kay kamo gitawag alang niining dalana, aron kamo makapanunod sa panalangin.”​—1 Pedro 3:8, 9.

²⁰ Atong maangkon karon ang panalangin ni Jehova kon maningkamot kita sa paghupot sa atong espirituwalidad, ug kini makatabang ngadto sa atong pagpanunod sa iyang panalangin sa umaabot sa dihang dawaton nato ang gasang walay-kataposang kinabuhi sa paraisong yuta. Adunay ubang mga butang nga atong mabuhat ingong usa ka banay sa pagtabang sa usag usa sa espirituwal nga paagi. Ang sunod artikulo maghisgot sa mga kaayohan sa nagkahiusang pagbuhat sa mga butang ingong usa ka banay.​—Lucas 23:43; Pinadayag 21:1-4.

[Mga footnote]

Nahinumdom Ka Ba?

◻ Unsa ang espirituwalidad?

◻ Sa unsang paagi masundog sa ulo sa banay ang panig-ingnan ni Kristo?

◻ Sa unsang paagi malikayan nato ang mga kapeligrohan sa atong espirituwalidad?

◻ Unsay makadaot sa espirituwalidad sa usa ka banay?

◻ Nganong hinungdanon ang makahuloganong komunikasyon?

[Hulagway sa panid 12]

Ang pagtambong sa Pagtuon sa Libro sa Kongregasyon magalig-on sa pamilya sa espirituwal nga paagi