Ang Pagpangita sa Tawo ug Espirituwal nga Katagbawan
SA IYANG bantog nga Wali sa Bukid, si Jesus miingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Mouyon ka tingali niana. Daghang tawo ang nagtuo nga ang pagtagbaw sa ilang espirituwal nga panginahanglan maghatag kanilag kalipay. Apan, unsa may kahulogan sa pulong “espirituwalidad”?
Ang pulong espirituwalidad gihubit ingong pag-ila sa espirituwal nga panginahanglan o pagsubay sa relihiyosong mga prinsipyo. Kini nagkahulogan usab ug paghatag ug debosyon sa espirituwal nga mga butang. Sa ato pa, ang usa nga nagpabili pag-ayo sa espirituwal nga mga butang o sa mga butang maylabot sa relihiyon maoy tawong espirituwal.
Nan, sa unsang paagi matagbaw ang espirituwal nga panginahanglan? Halos tanang relihiyon nangangkon nga nahibalo sila kon unsaon kana pagtagbaw, apan ang matag usa kanila adunay kaugalingong pamaagi. Pananglitan, ang usa ka Protestante nagtuo nga siya maluwas pinaagi sa pagtambong sa ilang relihiyosong mga serbisyo. Ang usa ka Katoliko nagtinguha nga masuod sa Diyos pinaagi sa pagpangalawat. Ang usa ka Budhista nangitag kalamdagan pinaagi sa lawom nga pagpamalandong. Ang usa ka Hindu gustong makalingkawas sa pagbalhinbalhin sa iya konong kalag ngadto sa lainlaing matang sa kinabuhi pinaagi sa paghikaw sa kaugalingon. Kini bang tanan makahatag ug tinuod nga espirituwal nga katagbawan?
Daghan ang nagtuo nga dili kana ang makahatag ug tinuod nga katagbawan. Sila nag-ingon nga basta nagtuo ka lang sa Diyos, kana igo na bisag wala kay gianibang relihiyon. Apan para sa uban, ang makahatag kanila ug espirituwal nga katagbawan mao ang kalinaw sa hunahuna ug katuyoan sa kinabuhi, dili ang pag-anib sa usa ka relihiyon. Busa, para nila ang gikinahanglan lang mao ang pagsusi sa ilang kaugalingong pagbati. Susama niana ang giingon sa usa ka magsusulat: “Kita ra ang makahatag sa atong kaugalingon ug tinuod nga espirituwal nga katagbawan. Mahimo nato kini pinaagi sa pagpakitag gugma ug pagbaton ug maayong relasyon uban sa mga tawo, dili sa pagpasakop sa usa ka relihiyon o sa pagsunod sa mga pagtulon-an niana.”
Dayag nga ang mga tawo lainlaig paagi sa pagtagbaw sa ilang espirituwal nga panginahanglan. Libolibong basahon ang naghatag ug mga giya kon sa unsang paagi matagbaw ang maong panginahanglan, apan ang nakabasa nianang mga basahona mibati gihapog kahaw-ang ug kalibog. Hinunoa, adunay usa ka basahon nga naghatag ug kasaligang giya bahin sa espirituwal nga mga butang. Adunay pamatuod nga kining basahona gikan sa Diyos. (2 Timoteo 3:16) Susihon nato kon unsay gisulti nianang basahona, ang Bibliya, bahin sa pagkab-ot ug tinuod nga espirituwal nga katagbawan ug kon nganong hinungdanon kana.
[Picture Credit Line sa panid 2]
COVER: Background: © Mark Hamblin/age fotostock