Pagbaton ug Hustong Panglantaw sa Kaluoy sa Diyos

ANG doktor maluluton ug mabalak-on kaayo. Segon sa iyang kinamaayohang paghukom, ang iyang pasyente kinahanglan gayong operahan aron maluwas ang iyang kinabuhi. Sa dihang nagduhaduha ang pasyente ug gibangon ang isyu sa pag-abuno ug dugo, siya nahibulong. Sa dihang ang pasyente misaysay nga tungod sa relihiyosong mga katarongan dili siya makatugot nga operahan nga maglakip sa pag-abuno ug dugo, hilabihan ang iyang katingala. Naghunahuna siya pag-ayo ug paagi sa pagtabang kaniya. Sa kataposan, nagtuo siyang nakaplagan na niya ang usa ka paagi. Matud niya: “Abi mo, kon dili ka magpaabuno ug dugo, ikaw mamatay. Dili ka buot mamatay, dili ba?”

“Siyempre dili,” miingon ang iyang pasyente.

“Apan, kon ikaw magpaabuno, morag nakasupak ka sa imong relihiyosong pagtuo, nga hinungdanon usab kanimo. Aw, ania ang akong sugyot. Magpaabuno ka ug dugo ug sa ingon maluwas ang imong kinabuhi. Dayon isugid sa Diyos nga ikaw nakasala, ug paghinulsol. Nianang paagiha, mapasig-uli ka usab sa imong relihiyon.”

Ang maayog-tuyo nga doktor naghunahuna nga iyang nakaplagan ang hingpit nga tubag. Siya nahibalo nga ang iyang pasyente nagtuo sa maluluy-on nga Diyos. Sa pagkatinuod, mao kini ang tukmang panahon sa pagpahimulos sa kaluoy sa Diyos! Apan ang iya bang sugyot makataronganon?

Kita ba Sukad Nangatarongan ug Sama Niini?

Usahay mangatarongan kita sama sa doktor. Tingali nahadlok kita sa wala damha nga pagtungha sa pagsupak sa eskuylahan o sa trabahoan. O tingali anaa kita sa usa ka makauulaw nga kahimtang diin kita ubos sa pagpiit sa pagbuhat sa usa ka butang nga supak sa atong konsensiya. Kay nakalitan, tingali mohilig kita sa pagpili sa labing sayon nga dalan ug mobuhat sa atong nahibaloan nga sayop, nga nagplano sa pagpangayog pasaylo sa ulahi.

O ang mga indibiduwal mahimong matental sa ilang kaugalingong mga hilig. Pananglitan, usa ka batan-ong lalaki tingali anaa sa kahimtang diin siya kusganong gihaylo sa paghimo sa imoralidad. Inay pakigbisogan ang sayop nga tinguha, tingali siya magpadala, nga nagplano sa paghusay sa mga butang uban sa Diyos sa ulahi. Ang uban miabot gani sa punto nga mohimog seryosong sala bisan nasayod nga sila lagmit ipalagpot gikan sa Kristohanong kongregasyon. Lagmit sila nangatarongan, ‘Palabyon lang nako ang mubo nga panahon. Unya ako maghinulsol ug mapasig-uli.’

Kining tanang mga kahimtang adunay duha ka butang nga managsama. Una, ang mga tawo nagpadala imbes makigbisog sa paghimo kon unsay matarong. Ikaduha, ilang gibati nga human sila makabuhat ug sayop, ang Diyos awtomatikong magpasaylo kon sila mangayo niana.

Unsa Man ang Hustong Panglantaw?

Kini ba nagpakitag tukmang pagpabili sa kaluoy sa Diyos? Aw, hunahunaa kanang maong kaluoy sa makadiyot. Si Jesus miingon: “Kay gihigugma gayod sa Diyos ang kalibotan nga tungod niana gipadala niya ang iyang bugtong Anak, aron nga ang tanan nga magbaton ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Ang apostol nga si Juan misaysay kon sa unsang paagi kanang maong kaluoy nagalihok sa dihang siya miingon: “Ako nagasulat kaninyo niining mga butanga aron kamo dili makasala. Ug bisan pa niana, kon may makasala, kita adunay usa ka magtatabang uban sa Amahan, si Jesu-Kristo, usa nga matarong.” (1 Juan 2:1) Busa, kon tungod sa pagkadili-hingpit kita makasala, makaduol kita sa Diyos diha sa pag-ampo ug mangayo sa kapasayloan pinasikad sa halad ni Jesus.

Apan, kini ba nagpasabot nga dili hinungdanon kon kita nakasala o wala, basta mangayo lamang kita ug pasaylo pagkahuman niana? Wala. Hinumdomi ang unang mga pulong nianang maong kinutlo: “Ako nagasulat kaninyo niining mga butanga aron kamo dili makasala.” Ang dugang mga pulong ni Juan nianang bersikuloha nagpakita sa mahigugmaong kahikayan ni Jehova sa pagdumala sa atong pagkadili-hingpit. Bisan pa niana, maningkamot kita kutob sa atong maarangan aron dili makasala. Kay kon dili kita nagpakita ug kabasolan nga pagkadili-matinahuron sa gugma sa Diyos, nga susama niadtong gihisgotan ni Judas nga naggamit sa dili-takos nga kalulot sa Diyos ingong pasangil sa luag nga panggawi.​—Judas 4.

Ang paglantaw sa kaluoy sa Diyos ingong pukot nga makahilwas nga kanunayng mosalo kanato bisan unsay atong buhaton nagpakamenos sa kaluoy sa Diyos ug nakapahimo sa sala nga daw dili ingon niana ka daotan. Kini maoy kabakakan. Ang apostol nga si Pablo nag-ingon kang Tito: “Ang dili-takos nga kalulot sa Diyos nga nagadalag kaluwasan sa tanang matang sa mga tawo gikapadayag, nga nagtudlo kanato sa pagsalikway sa pagkadili-diyosnon ug sa kalibotanong mga pangibog ug sa pagkinabuhi uban ang maayong hunahuna ug pagkamatarong ug diyosnong pagkamahinalaron taliwala niining kahikayan karon sa mga butang.”​—Tito 2:11, 12.

Si Pablo nagpakita sa iyang pagpabili sa kaluoy sa Diyos sa paagi nga siya nakigbisog batok sa iyang kaugalingong pagkadili-hingpit. Siya miingon: “Akong gipanton ang akong lawas ug giulipon kini, aron nga, tapos ako makawali sa uban, ako mismo sa usa ka paagi dili mahimong dili inuyonan.” (1 Corinto 9:27) Si Pablo dili kay sa walay-pagtagad naghunahunang siya lagmit makasala matag karon ug unya. Kita ba?

Ang Panglantaw ni Jesus

Sa usa ka higayon, gipakita ni Jesus kon giunsa niya pag-isip ang pagkompromiso sa kon unsay matarong ug pagpili sa labi pang sayon nga dalan aron makalikay sa pag-antos. Sa dihang gitug-anan niya ang iyang mga tinun-an mahitungod sa iyang nagsingabot nga haladnong kamatayon, si Pedro misulay sa pagtambag kaniya, nga nag-ingon: “Maluoy ka sa imong kaugalingon, Ginoo; dili gayod kini mahitabo kanimo.” Unsa may sanong ni Jesus? “Magpalikod ka kanako, Satanas! Ikaw usa ka kapandolanan alang kanako, tungod kay ikaw naghunahuna, dili sa mga hunahuna sa Diyos, apan sa mga tawo.”​—Mateo 16:22, 23.

Ang kusganong pagbadlong ni Jesus kang Pedro makahuloganong nagpakita nga si Jesus midumili sa pagpili sa labi pang sayon nga dalan nga nalangkit sa pagsupak sa kabubut-on sa Diyos. Ang talaan nagpakita nga siya lig-ong nagsubay sa matarong nga dalan, nga nag-antos sa kanunayng paglutos ni Satanas. Sa kataposan siya gibiaybiay, sa kagrabe gilatos, ug nakaagom sa masakit nga kamatayon. Bisan pa niana, wala siya mokompromiso, ug tungod niini siya nakatanyag sa iyang kinabuhi ingong lukat alang kanato. Sa pagkatinuod wala siya mag-antos niining tanan aron kita ‘magmaluluton sa atong kaugalingon’ sa dihang motungha ang mga kalisdanan o mga pagsulay!

Bahin kang Jesus kini gikaingon: “Ikaw nahigugma sa pagkamatarong, ug ikaw nagdumot sa kalapasan.” (Hebreohanon 1:9) Ang pagpili sa labi pang sayon nga dalan sagad naglangkit sa kalapasan. Busa, kon tinuod natong gidumtan kini​—sama sa gibuhat ni Jesus—​kita kanunay gayod nga modumili sa pagkompromiso. Sa basahon sa Proverbio, si Jehova nag-ingon: “Magmaalamon, anak ko, ug lipaya ang akong kasingkasing, aron ako makatubag kaniya nga nagatamay kanako.” (Proverbio 27:11) Ang balanse apan dili-matarog nga pagkamatarong ni Jesus nagdala ug dakong kalipay sa kasingkasing ni Jehova. Makahatag kita kang Jehova ug susamang kalipay kon atong sundon ang dalan sa pagkamatinumanon ni Jesus.​—1 Pedro 2:23.

Gibansay Pinaagi sa Paglahutay

Ang apostol nga si Pedro misulat: “Tungod niini dako ang inyong kalipay, bisan kon sa makadiyot karong panahona, kon gikinahanglan, kamo mag-antos sa lainlaing mga pagsulay, aron nga ang sinulayang matang sa inyong pagtuo, nga labi pang bililhon sa bulawan nga madugta bisan tuod gisulayan kini sa kalayo, mahimong hinungdan sa pagdayeg ug paghimaya ug pagpasidungog inigpadayag ni Jesu-Kristo.” (1 Pedro 1:6, 7) Tungod kay kita dili hingpit ug nagkinabuhi taliwala sa kalibotan ni Satanas, kita kanunayng mag-atubang ug mga pagsulay ug mga pagtental. Ingon sa gipakita ni Pedro, kini adunay kaayohan. Kini sila magsulay sa atong pagtuo, magpakita kon kini huyang o lig-on.

Kini usab sila magbansay kanato. Si Jesus “nakakat-on sa pagkamasinugtanon gikan sa mga butang nga iyang giantos.” (Hebreohanon 5:8) Kita usab makakat-on sa pagkamasinugtanon, maingon man sa pagsalig kang Jehova, kon kita makalahutay ilalom sa pagsulay. Ug kining proseso sa pagkat-on magpadayon hangtod mabug-os, sumala sa giingon ni Pedro: “Ang Diyos . . . mismo magatapos sa imong pagbansay, siya magalig-on kanimo, siya magapabaskog kanimo.”​—1 Pedro 5:10.

Apan, kon kita mokompromiso ilalom sa pagsulay, atong gipakita nga kita talawan o huyang, nakulangan sa kusganong gugma kang Jehova ug sa pagkamatarong o nakulangan sa pagpugong-sa-kaugalingon. Ang bisan hain nianang kahuyangana seryosong magpameligro sa atong relasyon sa Diyos. Sa pagkatinuod, ang pasidaan ni Pablo mahimong tinuod sa atong kaso: “Kon kita magapadayon sa tinuyo nga pagpakasala tapos nato madawat ang tukmang kahibalo sa kamatuoran, wala nay nahibilin nga halad alang sa mga sala.” (Hebreohanon 10:26) Pagkalabi pang maayo ang dili pagpakasala sa unang bahin kay sa magpadala sa kahuyangan ug mameligrong mawad-an sa tanang paglaom sa kinabuhi!

Dili-Kondisyonal nga Integridad

Sa mga adlaw ni propetang Daniel, tulo ka Hebreohanon ang gihulga sa kalayonhong kamatayon kon dili sila mosimba sa usa ka idolo. Ang ilang tubag? “Kon mao kana, ang among Diyos nga among ginaalagaran makahimo sa pagluwas kanamo. Gikan sa nagdilaab nga kalayo sa hudno ug gikan sa imong kamot, Oh hari, siya magaluwas kanamo. Apan kon dili, angay mong masayran, Oh hari, nga ang imong mga diyos dili mao ang among pagaalagaran, ug ang larawan nga bulawan nga imong gipatindog dili namo pagasimbahon.”​—Daniel 3:17, 18.

Ilang gipili kanang maong baroganan tungod kay gusto silang mobuhat kon unsay matarong. Kon kana motultol sa ilang kamatayon, andam silang mamatay. Ang ilang pagsalig diha sa pagkabanhaw. Apan, kon ugaling, ang Diyos magaluwas kanila, labi pa kanang maayo. Apan dili-kondisyonal ang ilang lig-ong baroganan. Busa angayng ingon usab niana kanunay ang mga alagad sa Diyos.

Sa atong adlaw ang pipila nga midumili sa pagkompromiso gibilanggo, gipaantos, gipatay pa gani. Ang uban naghimo ug mga pagsakripisyo sa materyal, nga mipalabi nga magpabiling kabos inay kay madato nga gisakripisyo ang matarong nga mga prinsipyo. Unsay nahitabo sa Kristohanong babaye nga nahisgotan sa sinugdanan niining maong artikulo? Giapresyar niya ang maluluton apan sayop nga motibo sa doktor, apan wala niya ikompromiso ang iyang pagtuo. Hinuon, ang iyang pagtahod sa balaod ni Jehova mitultol kaniya sa pagdumili sa operasyon. Makapalipay, siya naulian ra ug nagpadayon sa aktibong pag-alagad kang Jehova. Apan, sa dihang lig-ong gipahayag niya ang iyang baroganan, wala siya masayod kon unsay sangpotanan, apan siya andam sa pagtugyan sa maong butang sa mga kamot ni Jehova.

Unsay nakatabang kaniya sa pagpabiling lig-on kaayo ilalom sa pagpit-os? Wala siya mosulay sa pagsalig sa iyang kaugalingong kusog, ni ang bisan kinsang alagad sa Diyos. Hinumdomi, “ang Diyos alang kanato maoy usa ka dalangpanan ug kusog, usa ka panabang nga daling hikaplagan panahon sa mga kagul-anan.” (Salmo 46:1) Pagkalabi pang maayo nga moliso sa Diyos alang sa tabang samtang nailalom sa pagsulay imbes magpakasala ug unya moliso kaniya alang sa kaluoy!

Oo, dili nato pakamenoson ang dakong kaluoy sa Diyos. Hinunoa, ugmaron nato ang lig-on nga tinguha sa pagbuhat kon unsay matarong, bisan atubangan sa mga kalisdanan. Kini mopalalom sa atong relasyon kang Jehova, maghatag kanato ug pagbansay nga atong gikinahanglan alang sa kinabuhing walay kataposan, ug magpasundayag ug tukmang pagtahod sa kaluoy sa Diyos. Ang maong maalamong kagawian magdala ug kalipay sa kasingkasing sa atong langitnong Amahan.

[Hulagway sa panid 24]

Ang bug-os nga pagsalig sa pagkabanhaw nakatabang sa tulo ka Hebreohanon nga mahuptan ang integridad