Lakaw nga Maisogon sa mga Dalan ni Jehova

“Malipayon ang tagsatagsa nga nagakahadlok kang Jehova, nga nagalakaw sa iyang mga dalan.”​—SALMO 128:1.

1, 2. Unsay ikatabang sa Biblikanhong talaan sa mga pulong ug mga binuhatan sa unang mga saksi ni Jehova?

ANG Sagradong Pulong ni Jehova napunog mga asoy mahitungod sa mga pagsulay ug mga kalipay sa iyang maunongong mga alagad. Ang mga kasinatian ni Noe, Abraham, Sara, Josue, Debora, Barak, David, ug uban pa maoy ilado ug tataw diha sa mga panid niini. Silang tanan maoy tinuod nga mga tawo nga samang nagbaton sa usa ka espesyal nga butang. Sila nagbaton ug pagtuo sa Diyos ug naglakaw nga maisogon sa iyang mga dalan.

² Ang mga pulong ug mga binuhatan sa unang mga saksi ni Jehova makapadasig kanato samtang kita nanlimbasog sa paglakaw sa mga dalan sa Diyos. Dugang pa, kita magmalipayon kon atong ipasundayag ang pagtahod alang sa Diyos ug ang tukmang kahadlok sa pagpasuko kaniya. Kini matuod bisan pag kita nag-atubang ug mga pagsulay sa kinabuhi, kay ang dinasig nga salmista miawit: “Malipayon ang tagsatagsa nga nagakahadlok kang Jehova, nga nagalakaw sa iyang mga dalan.”​—Salmo 128:1.

Kon Unsay Kaisog

3. Unsay kaisog?

³ Aron makalakaw sa mga dalan ni Jehova, kinahanglan nga kita may kaisog. Sa pagkamatuod, ang Kasulatan nagsugo nga ang katawhan sa Diyos magpasundayag niining hiyasa. Pananglitan, ang salmistang David miawit: “Magmaisogon kamo, ug magmalig-on unta ang inyong kasingkasing, kamong tanan nga nagahulat kang Jehova.” (Salmo 31:24) Ang kaisog maoy “mental ug moral nga kalig-on sa pagpamasin, paglahutay, ug pagsagubang sa kapeligrohan, kahadlok, o kalisdanan.” (Webster’s Ninth New Collegiate Dictionary) Ang tawong maisogon maoy kusgan, way-kahadlok, maisog. Nga si Jehova naghatag ug kaisog sa iyang mga alagad maoy tin-aw gikan niining mga pulong ni apostol Pablo ngadto sa iyang kaubang-magbubuhat nga si Timoteo: “Ang Diyos wala maghatag kanato sa espiritu sa katalaw, apan sa espiritu sa gahom ug sa gugma ug maayong hunahuna.”​—2 Timoteo 1:7.

4. Unsa ang usa ka paagi sa pagbatog kaisog?

⁴ Ang usa ka paagi nga mabatonan ang hinatag-sa-Diyos nga kaisog mao ang paghatag ug mainampoong pagtagad sa Pulong ni Jehova, ang Bibliya. Daghang asoy nga makita sa Kasulatan ang makatabang kanato nga mas magmaisogon. Busa, atong tan-awon una kon unsay atong makat-onan gikan sa talaan sa Hebreohanong Kasulatan bahin sa pipila nga maisogong naglakaw sa mga dalan ni Jehova.

Kaisog sa Pagmantala sa Mensahe sa Diyos

5. Sa unsang paagi ang kaisog ni Enoch makahatag kaayohan sa mga alagad karon ni Jehova?

⁵ Ang kaisog ni Enoch makatabang sa mga alagad ni Jehova karong adlawa sa pagpahayag nga maisogon sa mensahe sa Diyos. Sa wala pa matawo si Enoch, “nagsugod na ang pagtawag sa ngalan ni Jehova.” Ang pila ka eskolar nag-ingon nga ang mga tawo “nagsugod sa mapasipalahong paagi” sa pagtawag sa ngalan ni Jehova. (Genesis 4:25, 26; 5:3, 6) Ang balaang ngalan tingalig gipadapat sa mga tawo ug bisan sa mga diyosdiyos. Busa, ang bakak nga relihiyon naglambo sa dihang si Enoch natawo sa 3404 W.K.P. Ngani, maorag siya lamang ‘ang naglakaw uban sa Diyos,’ nga nagsubay sa matarong nga dalan nga nahiuyon sa gipadayag nga kamatuoran ni Jehova.​—Genesis 5:18, 24.

6. (a) Unsang masakit nga mensahe ang gipahayag ni Enoch? (b) Unsang pagsalig ang atong mabatonan?

⁶ Si Enoch maisogong nagpahayag sa mensahe sa Diyos, lagmit pinaagi sa pagwali. (Hebreohanon 11:5; itandi ang 2 Pedro 2:5.) “Tan-awa!” mipahayag kining nagbinugtong nga saksi, “si Jehova miabot kauban sa iyang kaliboan nga balaan, aron sa pagpatuman sa paghukom batok sa tanan, ug sa paghukom sa tanang dili-diyosnon mahitungod sa tanan nilang dili-diyosnong mga binuhatan nga ilang gibuhat sa dili-diyosnong paagi, ug mahitungod sa tanang makalilisang nga butang nga gipamulong sa dili-diyosnong mga makasasala batok kaniya.” (Judas 14, 15) Si Enoch may kaisog sa paggamit sa ngalang Jehova sa dihang nagpahayag sa maong mensahe nga naghukom sa mga dili-diyosnon. Ug kay ang Diyos mihatag kang Enoch ug kaisog sa pagpahayag niadtong masakit nga mensahe, sa ingon nga paagi si Jehova naghatag ug gahom sa Iyang mga Saksi karong adlawa sa pagpahayag sa Iyang pulong sa maisogong paagi diha sa ministeryo, sa eskuylahan, ug sa ubang dapit.​—Itandi sa Buhat 4:29-31.

Kaisog Ilalom sa Pagsulay

7. Si Noe naghatag ug unsang panig-ingnan sa kaisog?

⁷ Ang panig-ingnan ni Noe makatabang kanato nga magmaisogon sa paghimog matarong nga mga buhat sa dihang kita nailalom sa pagsulay. Uban sa kaisog ug pagtuo, siya milihok sumala sa balaang pasidaan bahin sa tibuok-yutang lunop ug “nagtukod ug usa ka arka alang sa kaluwasan sa iyang panimalay.” Pinaagi sa masinugtanon ug matarong nga mga buhat, si Noe nagsaway sa dili-matinuohong kalibotan tungod sa iyang daotang mga binuhatan ug nagpamatuod nga kadto takos sa kalaglagan. (Hebreohanon 11:7; Genesis 6:13-22; 7:16) Ang pagpalandong sa dalan ni Noe motabang sa modernong-adlawng mga alagad sa Diyos sa pagpakigbahin nga maisogon sa matarong nga mga buhat sama sa Kristohanong ministeryo.

8. (a) Unsay giatubang ni Noe ingong maisogong “magwawali sa pagkamatarong”? (b) Unsay pagabuhaton ni Jehova alang kanato kon kita maisogong mga magwawali sa pagkamatarong?

⁸ Kon kita nagasubay sa matarong nga dalan apan walay alamag kon unsaon pagsagubang sa usa ka pagsulay, mag-ampo kita alang sa kaalam sa pagsagubang niini. (Santiago 1:5-8) Ang pagkamaunongon ni Noe sa Diyos ilalom sa pagsulay nagpakitang posible ang pagsagubang sa mga pagsulay uban sa kaisog ug pagkamatinuohon. Gisagubang niya ang pagpit-os gikan sa daotang kalibotan ug gikan sa nagmateryalisar nga mga manulonda ug sa ilang mestisong mga kaliwat. Oo, si Noe maoy usa ka maisogong “magwawali sa pagkamatarong” ngadto sa “usa ka karaang kalibotan” nga nagpadulong sa kalaglagan. (2 Pedro 2:4, 5; Genesis 6:1-9) Bisan pag siya maisogong nagpahayag ingong usa ka magwawali nga nagwali sa pasidaan sa Diyos ngadto sa mga tawo sa wala pay lunop, “sila wala magtagad hangtod sa pag-abot sa lunop ug gianod silang tanan.” (Mateo 24:36-39) Apan atong hinumdoman nga bisan pa sa paglutos ug pagsalikway sa kadaghanang tawo karon sa atong gibase-sa-Bibliyang mensahe, si Jehova magtuboy kanato samang gituboy niya si Noe kon atong ipasundayag ang susamang pagtuo ug kaisog ingong mga magwawali sa pagkamatarong.

Kaisog sa Pagsugot sa Diyos

9, 10. Sa unsang mga bahin si Abraham, Sara, ug Isaac nagpakitag maisogong pagkamasinugtanon?

⁹ “Ang higala ni Jehova” nga si Abraham maoy usa ka maayong panig-ingnan sa maisogong pagkamasinugtanon sa Diyos. (Santiago 2:23) Si Abraham nagkinahanglan sa pagtuo ug kaisog sa pagsugot kang Jehova ug sa pagbiya sa Ur sa mga Caldeanhon, usa ka siyudad nga punog materyal nga mga bentaha. Siya nagtuo sa saad sa Diyos nga “ang tanang banay sa yuta” magapanalangin sa ilang kaugalingon pinaagi kaniya ug nga hatagan ug usa ka yuta ang iyang binhi. (Genesis 12:1-9; 15:18-21) Tungod sa pagtuo si Abraham “nagpuyo ingong usa ka dumuloong sa yuta sa saad” ug nagpaabot sa “siyudad nga may tinuod nga mga patukoranan”​—ang langitnong Gingharian sa Diyos, nga ubos niana siya pagabanhawon alang sa kinabuhi sa yuta.​—Hebreohanon 11:8-16.

¹⁰ Ang asawa ni Abraham, si Sara, nagbaton sa pagtuo ug kaisog nga gikinahanglan sa pagbiya sa Ur, pagkuyog sa iyang bana ngadto sa usa ka langyawng yuta, ug pag-antos sa mga kalisdanan nga ilang nasagubang didto. Ug dako gayod ang iyang ganti tungod sa iyang maisogong pagkamasinugtanon sa Diyos! Bisan pag apuli hangtod sa mga 90 anyos ug “lapas na sa edad nga manganak,” si Sara gihatagag kagahom nga ‘manamkon, sanglit siya nagtamod sa Diyos ingon nga matinumanong misaad.’ Sa ngadtongadto, siya nanganak kang Isaac. (Hebreohanon 11:11, 12; Genesis 17:15-17; 18:11; 21:1-7) Katuigan sa ulahi, si Abraham maisogong misugot sa Diyos ug “sama ra nga mihalad kang Isaac.” Kay gipugngan sa usa ka manulonda, ang patriarka nagdawat sa iyang maisogon ug masinugtanong anak gikan sa kamatayon “sa masambingayong paagi.” Sa ingon siya ug si Isaac matagnaong naghulagway nga si Jehova nga Diyos magtagana sa iyang Anak, si Jesu-Kristo, ingong usa ka lukat aron kadtong magbutang ug pagtuo kaniya makabaton ug kinabuhing dayon. (Hebreohanon 11:17-19; Genesis 22:1-19; Juan 3:16) Sa tinuoray, ang maisogong pagkamasinugtanon ni Abraham, Sara, ug Isaac angay magdasig kanato sa pagsugot kang Jehova ug pagbuhat sa iyang kabubut-on sa tanang panahon.

Kaisog sa Pagbarog Uban sa Katawhan sa Diyos

11, 12. (a) Giunsa pagpakita ni Moises ang kaisog kon bahin sa katawhan ni Jehova? (b) Tungod sa kaisog ni Moises, unsang pangutana ang ikasukna?

¹¹ Si Moises maisogong mibarog uban sa gidaogdaog nga katawhan sa Diyos. Sa ika-16 nga siglo W.K.P., ang mga ginikanan ni Moises mismo nagpakitag kaisog. Kay wala mahadlok sa sugo sa hari nga ipapatay ang bag-ong-natawong mga batang lalaking Hebreohanon, gitagoan nila si Moises ug dayon gibutang siya sa usa ka kahon taliwala sa katangboan sa daplin sa subang Nilo. Nakaplagan sa anak nga babaye ni Paraon, siya gimatuto nga samag iya mismong anak, apan siya nakadawat una ug espirituwal nga pagbansay sa balay sa iyang mga ginikanan. Isip bahin sa panimalay ni Paraon, si Moises “gitudloan sa tanang kaalam sa mga Ehiptohanon” ug nahimong “gamhanan sa iyang mga pulong ug sa mga binuhatan,” nga gamhanan sa mga katakos sa panghunahuna ug sa panglawas.​—Buhat 7:20-22; Exodo 2:1-10; 6:20.

¹² Bisan pa sa materyal nga mga bentaha sa harianong panimalay, si Moises maisogong mipalabi sa pagbarog uban sa mga magsisimba ni Jehova, nga niadto giulipon sa mga Ehiptohanon. Sa pagpanalipod sa usa ka Israelinhon, gipatay niya ang usa ka Ehiptohanon ug dayon milayas ngadto sa Midian. (Exodo 2:11-15) Mga 40 ka tuig sa ulahi, siya gigamit sa Diyos sa pagpanguna sa mga Israelinhon aron makagawas sa kaulipnan. Unya si Moises “mibiya sa Ehipto, apan nga wala mahadlok sa kasuko sa hari,” kinsa mihulga sa pagpatay kaniya tungod sa paghawas kang Jehova alang sa Israel. Si Moises milakaw nga samag iyang nakita ‘ang Usang dili makita,’ si Jehova nga Diyos. (Hebreohanon 11:23-29; Exodo 10:28) Ikaw ba nagbaton sa samang pagtuo ug kaisog nga mosunod ka kang Jehova ug sa iyang katawhan bisan pa sa kalisdanan ug paglutos?

Kaisog sa ‘Pagsunod Kang Jehova sa Bug-os Gayod’

13. Sa unsang paagi si Josue ug Caleb nagtaganag mga panig-ingnan sa kaisog?

¹³ Ang maisogong si Josue ug Caleb mitaganag ebidensiya nga kita makalakaw sa mga dalan sa Diyos. Sila “mingsunod kang Jehova sa bug-os gayod.” (Numeros 32:12) Si Josue ug Caleb maoy lakip sa 12 ka tawo nga gipaespiya sa Yutang Saad. Kay nahadlok sa mga molupyo niini, ang napulo ka espiya misulay sa pagbugnaw sa Israel sa pagsulod sa Canaan. Ugaling, si Josue ug Caleb maisogong miingon: “Kon si Jehova nahimuot kanato, nan kita iya gayong dad-on ngadto niining yutaa ug iya kining igahatag kanato, usa ka yuta nga nagaagay sa gatas ug dugos. Batok lamang kang Jehova ayaw kamo pag-alsa; ug kamo, ayaw kamo kahadlok sa katawhan sa yuta, kay sila maoy tinapay alang kanato. Ang ilang silonganan mitalikod gikan sa ibabaw nila, ug si Jehova nagauban kanato. Ayaw kamo kahadlok kanila.” (Numeros 14:8, 9) Kay kulang sa pagtuo ug kaisog, kadtong kaliwatan sa mga Israelinhon wala gayod makaabot sa yutang saad. Apan si Josue ug Caleb, kauban sa usa ka bag-ong kaliwatan, nakasulod niana.

14, 15. (a) Sa dihang gipadapat ni Josue ang mga pulong sa Josue 1:7, 8, unsay nasinati niya ug sa mga Israelinhon? (b) Unsang panig-ingnan nga naglangkit sa kaisog ang atong makat-onan gikan kang Josue ug Caleb?

¹⁴ Ang Diyos nagsulti kang Josue: “Magmaisogon ug magmalig-on kaayo sa pagbantay sa pagbuhat sa tanang kasugoan nga gisugo kaninyo ni Moises nga akong alagad. Ayaw kamo pagtipas gikan niana ngadto sa tuo o ngadto sa wala, aron kamo makalihok nga maalamon bisan asa kamo moadto. Kining basahon sa kasugoan kinahanglang dili ibulag gikan sa inyong baba, ug kinahanglang basahon ninyo kini sa ubos nga tingog sa adlaw ug sa gabii, aron kamo magmabinantayon sa pagbuhat sumala sa tanan nga nahisulat niini; kay unya inyong himoon nga malamposon ang inyong dalan ug unya kamo molihok nga maalamon.”​—Josue 1:7, 8.

¹⁵ Samtang gipadapat ni Josue kanang mga pulonga, ang Jerico ug ang ubang siyudad napukan sa mga Israelinhon. Gipahunong pa gani sa Diyos ang adlaw aron magpabilin kanang masanag hangtod magmadaogon ang Israel sa Gabaon. (Josue 10:6-14) Sa dihang nameligro sa nagkahiusang kontrang mga puwersa nga “ingon ka daghan sa balas sa baybayon,” si Josue milihok nga maisogon, ug unya gipadaog na usab sa Diyos ang Israel. (Josue 11:1-9) Bisan pag kita mga tawong dili hingpit, sama kang Josue ug Caleb, kita makasunod kang Jehova sa bug-os gayod, ug ang Diyos makahatag kanatog gahom sa paglakaw nga maisogon sa iyang mga dalan.

Kaisog sa Pagsalig sa Diyos

16. Sa unsang mga paagi si Debora, Barak, ug Jael nagpakitag kaisog?

¹⁶ Ang maisogong pagsalig sa Diyos gantihan, sumala sa gipakita sa mga panghitabo sa mga adlaw sa dihang ang mga maghuhukom nagpatuman sa hustisya sa Israel. (Ruth 1:1) Pananglitan, si Maghuhukom Barak ug ang propetisang si Debora maisogong nagsalig sa Diyos. Ang Canaanhong haring si Jabin nagdaogdaog sa Israel sa 20 ka tuig sa dihang gipahinabo ni Jehova nga dasigon ni Debora si Barak aron sa pagtigom ug 10,000 ka lalaki sa Bukid Tabor. Ang pangulo sa kasundalohan ni Jabin, si Sisera, midali pag-adto sa walog sa Kishon, nga naneguro nga sa maong patag nga yuta ang mga tawo sa Israel walay bawot sa iyang kasundalohan ug sa 900 ka karrong iggugubat nga may puthawng mga galab sa ilang mga ligid. Sa dihang ang mga Israelinhon mipadulong sa patag sa walog, ang Diyos milihok alang kanila, ug ang kusog nga baha nagbalhin sa natad-panggubatan nga kalapokan nga nakapaungot sa mga karro ni Sisera. Ang mga tawo ni Barak nagmadaogon, mao nga “ang tibuok nga kampo ni Sisera nahulog sa sulab sa pinuti.” Si Sisera mikalagiw ngadto sa tolda ni Jael, apan samtang siya natulog, siya nagmaisogon sa pagpatay kaniya pinaagi sa pagbugsok sa lagdok agi sa iyang dungandungan. Ingong katumanan sa matagnaong pahayag ni Debora ngadto kang Barak, sa ingon “ang makapatahom nga butang” niining kadaogana miadto sa usa ka babaye. Kay si Debora, Barak, ug Jael maisogong misalig sa Diyos, ang Israel “wala nay kasamok sulod sa kap-atan ka tuig.”​—Maghuhukom 4:1-22; 5:31.

17. Unsang panig-ingnan sa maisogong pagsalig kang Jehova ang gitagana ni Maghuhukom Gideon?

¹⁷ Si Maghuhukom Gideon maisogong misalig kang Jehova nga Diyos sa dihang ang mga Midian ug ang uban misulong sa Israel. Bisan pag hilupigan sa gidaghanon sa mga 135,000 ka manunulong, ang 32,000 ka manggugubat sa Israel sa gihapon nakiling sa pagpasidungog sa hinatag-sa-Diyos nga kadaogan sa ilang kaugalingong kaisog. Sa sugo ni Jehova, si Gideon sa ingon nagkunhod sa iyang mga kasundalohan ngadto sa tulo ka grupo nga tag-100 ka tawo. (Maghuhukom 7:1-7, 16; 8:10) Samtang ang 300 miliyok sa kampong Midianhon sa gabii, ang matag usa may usa ka budyong ug usa ka banga nga may sulo sa sulod. Sa usa ka signal, gihuyop nila ang mga budyong, gibuak ang mga banga, gipataas ang mga sulo nga nagdilaab, ug misinggit: “Espada ni Jehova ug ni Gideon!” (Maghuhukom 7:20) Ang nangalisang nga mga Midianhon misugod pagpangalagiw ug nabuntog. Ang maong mga panghitabo angay magkombinsir kanato nga ang maisogong pagsalig sa Diyos pagabalosan usab karong adlawa.

Kaisog sa Pagpasidungog Kang Jehova ug Pagpasiugda sa Putling Pagsimba

18. Sa dihang iyang gipatay si Goliat, unsay maisogong gibuhat ni David?

¹⁸ Ang pila ka panig-ingnan sa Bibliya mohatag kaisog sa pagpasidungog kang Jehova ug pagpasiugda sa putling pagsimba. Ang batan-ong si David, kinsa maisogong nagluwas sa mga karnero sa iyang amahan, napamatud-ang maisogon atubangan sa Pilistehanong higante nga si Goliat. “Ikaw mianhi kanako uban sa usa ka pinuti ug usa ka bangkaw ug usa ka salapang,” matud ni David, “apan ako mianhi kanimo uban sa ngalan ni Jehova sa mga panon, ang Diyos sa mga linya sa panggubatan sa Israel, kinsa imong gitamay. Karong adlawa si Jehova magatugyan kanimo sa akong kamot, ug ako magapukan kanimo ug magalunggo sa imong ulo; . . . ug ang katawhan sa tibuok yuta mahibalo nga nagalungtad ang usa ka Diyos nga iya sa Israel. Ug kining tibuok nga katilingban mahibalo nga dili pinaagi sa pinuti ni sa bangkaw nga si Jehova magaluwas, kay ang gubat iya ni Jehova.” (1 Samuel 17:32-37, 45-47) Uban sa balaanong tabang, si David maisogong nagpasidungog kang Jehova, nagpatay kang Goliat, ug sa ingon midulag usa ka bililhong bahin sa pagwagtang sa Pilistehanong hulga sa putling pagsimba.

19. Alang sa unsang proyekto nga si Solomon nagkinahanglag kaisog, ug sa unsang paagi ang iyang paagi ikapadapat sa atong adlaw?

¹⁹ Sa dihang ang anak ni Haring David nga si Solomon hapit nang magtukod sa templo sa Diyos, ang iyang tigulang nga amahan miawhag kaniya: “Magmaisogon ug magmalig-on ug lihok. Ayaw kahadlok ni malisang, kay si Jehova nga Diyos, ang akong Diyos, nagauban kanimo. Dili ka niya biyaan o pasagdan hangtod nga mahuman ang tanang buluhaton sa balay ni Jehova.” (1 Cronicas 28:20) Sa paglihok nga maisogon, si Solomon malamposong nakahuman sa templo. Sa dihang ang usa ka teokratikanhong programa sa pagtukod mahimong usa ka hagit karong adlawa, hinumdoman nato ang mga pulong ni David: “Magmaisogon ug magmalig-on ug lihok.” Pagkamaayong paagi sa pagpasidungog kang Jehova ug pagpasiugda sa putling pagsimba!

20. Sa unsang bahin si Haring Asa nagkinahanglag kaisog?

²⁰ Tungod sa tinguha ni Haring Asa nga pasidunggan ang Diyos ug ipasiugda ang putling pagsimba, gipapha niya ang mga diyosdiyos ug ang mga lalaking bigaon sa templo sa Juda. Gikuha usab niya ang iyang apostatang apohang babaye gikan sa iyang taas nga katungdanan ug gisunog ang iyang “makalilisang nga diyosdiyos.” (1 Hari 15:11-13) Oo, si Asa “nagmaisogon ug nagwagtang sa dulumtanang mga butang gikan sa tibuok yuta sa Juda ug sa Benjamin ug gikan sa mga siyudad nga iyang nabihag gikan sa dapit sa kabukiran sa Epraim, ug nagbag-o sa halaran nga diha sa atubangan sa pantaw ni Jehova.” (2 Cronicas 15:8) Ikaw ba maisogon usab nga nagsalikway sa apostasiya ug nagpasiugda sa putling pagsimba? Gigamit ba nimo ang imong materyal nga katigayonan sa pagpauswag sa intereses sa Gingharian? Ug nagtinguha ka ba sa pagpasidungog kang Jehova pinaagi sa pagpakigbahin nga regular sa pagmantala sa maayong balita ingong usa sa iyang mga Saksi?

21. (a) Sa unsang paagi ang mga asoy sa una-Kristohanong mga tighupot sa integridad makatabang kanato? (b) Unsay pagahisgotan sa sunod nga artikulo?

²¹ Mapasalamaton kaayo kita nga ang Diyos nagpreserbar sa Kasulatanhong mga asoy mahitungod sa maisogong una-Kristohanong mga tighupot sa integridad! Sa pagkamatuod, ang ilang maayong mga panig-ingnan makatabang kanato sa paghatag ug balaang pag-alagad kang Jehova uban ang kaisog, diyosnong kahadlok, ug kataha. (Hebreohanon 12:28) Apan ang Kristohanon Gregong Kasulatan naundan usab ug mga panig-ingnan sa diyosnong kaisog nga gipalihok. Sa unsang paagi ang pipila niining mga asoya makatabang kanato sa paglakaw nga maisogon sa mga dalan ni Jehova?

Unsaon Nimo Pagtubag?

◻ Unsay kaisog?

◻ Sa unsang paagi si Enoch ug Noe nagpakitag kaisog?

◻ Sa unsang mga bahin si Abraham, Sara, ug Isaac minglihok nga maisogon?

◻ Unsang maisogong mga panig-ingnan ang gihatag ni Moises, Josue, ug Caleb?

◻ Sa unsang paagi gipakita sa uban nga sila may kaisog sa pagsalig sa Diyos?

[Hulagway sa panid 15]

Si Gideon ug ang iyang gamayng pundok maisogong mingsalig kang Jehova