‘Magmaisogon ug Magmalig-on Gayod’
‘Magmaisogon ug magmalig-on gayod. Si Jehova nga imong Diyos magauban kanimo.’—JOS. 1:7-9.
UNSAON NIMO PAGTUBAG?
Sa unsang paagi si Enoc ug Noe nagpakitag kaisog?
Sa unsang paagi ang pipila ka babaye sa karaang panahon nagpakitag talagsaong pagtuo ug kaisog??
Unsang mga ehemplo sa kaisog nga gipakita sa mga batan-on ang nakadasig kanimo?
1, 2. (a) Unsay gikinahanglan usahay aron padayon natong mahimo kon unsay matarong? (b) Unsay atong tun-an karon?
ANG kaisog maoy kaatbang sa kahadlok, kaulaw, ug katalaw. Tingali para nato ang isog nga tawo maoy determinado ug dili mahadlok bisan unsay mahitabo. Apan usahay gikinahanglan ang kaisog sa pagbuhat kon unsay matarong sa matag adlawng pagkinabuhi.
2 Ang pipila diha sa Bibliya wala mahadlok bisan sa lisod kaayong mga kahimtang. Ang uban nagpakitag kaisog sa mga situwasyon nga komon sa mga alagad ni Jehova. Unsay atong makat-onan sa mga ehemplo bahin sa kaisog diha sa Bibliya? Sa unsang paagi kita magmaisogon?
MAISOGONG MGA SAKSI DIHA SA DILI-DIYOSNONG KALIBOTAN
3. Unsay gitagna ni Enoc bahin sa mga dili-diyosnon?
3 Gikinahanglan ang kaisog aron mahimong saksi ni Jehova taliwala sa daotang mga tawo una pa ang Lunop sa adlaw ni Noe. Apan si Enoc, “ang ikapito sa laray gikan kang Adan,” maisogong nagpahayag niini nga tagna: “Tan-awa! Si Jehova miabot uban sa iyang balaang mga tinagpulo ka libo, aron ipahamtang ang paghukom batok sa tanan, ug aron hukmang sad-an ang tanang dili-diyosnon labot sa tanan nilang dili-diyosnong binuhatan nga ilang gibuhat sa dili-diyosnong paagi, ug labot sa tanang makalilisang nga mga butang nga gisulti sa dili-diyosnong mga makasasala batok kaniya.” (Jud. 14, 15) Si Enoc namulong nga samag kini nahitabo na kay ang maong tagna seguradong matuman. Ug ang dili-diyosnong mga tawo nangalaglag gayod sa Lunop!
4. Bisan pa sa unsang mga kahimtang nga si Noe ‘naglakaw uban sa Diyos’?
4 Ang Lunop nahitabo sa 2370 W.K.P., kapig 650 ka tuig human mamatay si Enoc. Kasamtangan, si Noe natawo, nakabatog pamilya, ug nagtukod sa arka uban sa iyang mga anak. Ang daotang mga manulonda nagsul-ob ug unodnong lawas, nagminyog maanyag nga mga babaye, ug nanganak ug mga Nepilim. Dugang pa, misamot ang pagkadaotan sa tawo, ug ang yuta napuno sa kapintasan. (Gen. 6:1-5, 9, 11) Bisan pa sa maong mga kahimtang, “si Noe naglakaw uban sa matuod nga Diyos” ug maisogong nagpamatuod ingong “magwawali sa pagkamatarong.” (Basaha ang 2 Pedro 2:4, 5.) Niining kataposang mga adlaw, gikinahanglan nato ang samang kaisog.
SILA NAGPAKITAG PAGTUO UG KAISOG
5. Sa unsang paagi si Moises nagpakitag pagtuo ug kaisog?
5 Si Moises may talagsaong pagtuo ug kaisog. (Heb. 11:24-27) Gikan sa 1513-1473 W.K.P., gigamit siya sa Diyos sa pagpagawas sa mga Israelinhon gikan sa Ehipto ug sa pagpanguna kanila sa kamingawan. Siya mibating dili kuwalipikado sa maong asaynment, apan gidawat niya kini. (Ex. 6:12) Si Moises ug ang iyang igsoong si Aaron balikbalik nga miatubang sa malupigong Paraon ug maisogong mipahayag sa Napulo ka Hampak diin gipakaulawan ni Jehova ang mga diyos sa Ehipto ug giluwas ang Iyang katawhan. (Ex., kap. 7-12) Si Moises nagpakitag pagtuo ug kaisog kay ang Diyos kanunayng nagpaluyo kaniya, ingon man usab kanato karon.—Deut. 33:27.
6. Kon sukitsukiton sa mga awtoridad, sa unsang paagi kita makapamatuod uban ang kaisog?
6 Gikinahanglan nato ang kaisog nga sama nianang kang Moises, kay si Jesus miingon: “Kamo pagataralon atubangan sa mga gobernador ug sa mga hari tungod kanako, ingong usa ka pagpamatuod kanila ug sa mga nasod. Bisan pa niana, sa dihang sila magtugyan kaninyo, ayaw kabalaka bahin sa kon unsaon o kon unsay inyong igasulti; kay ang inyong igasulti igahatag kaninyo nianang taknaa; kay dili lamang kamo ang magasulti, kondili ang espiritu sa inyong Amahan mao ang magasulti pinaagi kaninyo.” (Mat. 10:18-20) Kon kita sukitsukiton sa mga awtoridad, ang espiritu ni Jehova motabang nato nga matinahorong magpamatuod uban ang pagtuo ug kaisog.—Basaha ang Lucas 12:11, 12.
7. Nganong nagmaisogon ug nagmalamposon si Josue?
7 Pinaagi sa regular nga pagtuon sa Balaod sa Diyos, nakabatog pagtuo ug kaisog ang manununod ni Moises nga si Josue. Sa 1473 W.K.P., ang Israel andam na sa pagsulod sa Yutang Saad. ‘Magmaisogon ug magmalig-on gayod,’ ang Diyos nagsugo. Kon sundon ang Balaod, si Josue magmaalamon ug magmalamposon. Siya giingnan: “Ayaw kakurat o kalisang, kay si Jehova nga imong Diyos magauban kanimo bisan diin ka moadto.” (Jos. 1:7-9) Tino nga kadto nakapalig-on gayod kang Josue! Ug ang Diyos nag-uban gayod kaniya, sanglit nasakop nila ang dakong bahin sa Yutang Saad sulod lang sa unom ka tuig—sa 1467 W.K.P.
MGA BABAYENG NAGPAKITAG KAISOG
8. Unsang panig-ingnan sa pagtuo ug kaisog ang atong makat-onan kang Rahab?
8 Latas sa kasiglohan, daghang babaye ang nagpakitag kaisog ingong magsisimba ni Jehova. Pananglitan, ang pampam nga si Rahab sa Jerico nagpakitag pagtuo sa Diyos, maisogong nagtago sa duha ka espiya nga gipadala ni Josue, ug dayon naghatag ug sayop nga direksiyon sa mga tawo nga nangita sa mga espiya. Siya ug ang iyang panimalay naluwas dihang gilaglag sa mga Israelinhon ang Jerico. Si Rahab mihunong sa iyang makasasalang pagkinabuhi, matinumanong nagsimba kang Jehova, ug nahimong katigulangan sa Mesiyas. (Jos. 2:1-6; 6:22, 23; Mat. 1:1, 5) Gipanalanginan gayod ang iyang pagtuo ug kaisog!
9. Sa unsang paagi si Debora, Barak, ug Jael nagpakitag kaisog?
9 Human mamatay si Josue sa mga 1450 W.K.P., ang Diyos nagtudlog mga maghuhukom sa Israel. Dihang gidaogdaog sa Canaanhon nga si Haring Jabin ang mga Israelinhon sulod sa 20 ka tuig, gisugo sa Diyos ang propetisa nga si Debora sa pagdasig kang Maghuhukom Barak sa paglihok. Si Barak nagtigom ug 10,000 ka lalaki sa Bukid sa Tabor ug nangandam sa pagpakiggubat sa pangulo sa kasundalohan ni Jabin nga si Sisera, kinsa atua na sa walog sa Kison uban sa iyang kasundalohan ug 900 ka karong iggugubat. Sa pagpaingon sa mga Israelinhon sa maong walog, ang Diyos nagpahinabog kusog nga baha mao nga ang dapit sa panggubatan nahimong kalapokan ug nalubong ang mga karo sa mga Canaanhon. Midaog ang kasundalohan ni Barak, ug “ang tibuok panon ni Sisera napukan pinaagi sa sulab sa espada.” Si Sisera mikalagiw ngadto sa tolda ni Jael, apan gipatay siya ni Jael samtang natulog. Sumala sa gitagna ni Debora, ang kadayeganan sa maong kadaogan mahiadto sa usa ka babaye, kang Jael. Sanglit si Debora, Barak, ug Jael milihok nga maisogon, ang Israel “wala nay kasamok sulod sa kap-atan ka tuig.” (Maghu. 4:1-9, 14-22; 5:20, 21, 31) Daghang lalaki ug babaye ang nagpakitag susamang pagtuo ug kaisog.
ANG ATONG MGA PULONG MAKADASIG SA UBAN NGA MAGMAISOGON
10. Nganong ikaingon nga ang atong mga pulong makadasig sa uban nga magmaisogon?
10 Ang atong mga pulong makadasig sa atong mga igsoon nga magmaisogon. Sa ika-11 nga siglo W.K.P., gisultihan ni Haring David ang iyang anak nga si Solomon: ‘Magmaisogon ug magmalig-on ug lihok. Ayaw kahadlok ni malisang, kay si Jehova nga Diyos, ang akong Diyos, nag-uban kanimo. Siya dili motalikod kanimo ni mobiya kanimo hangtod nga mahuman ang tanang buluhaton sa pag-alagad sa balay ni Jehova.’ (1 Cron. 28:20) Si Solomon nagmaisogon ug nagtukod sa matahom nga templo ni Jehova sa Jerusalem.
11. Unsay epekto sa mga pulong sa maisogong dalagita nga Israelinhon kang Naaman?
11 Sa ika-10 nga siglo W.K.P., ang mga pulong sa maisogong dalagita nga Israelinhon nakatabang sa usa ka sanlahon. Ang dalagita nabihag sa mga Siryanhon ug nahimong ulipon sa pangulo sa kasundalohan nga si Naaman, kinsa usa ka sanlahon. Kay nahibalo sa mga milagro nga gihimo ni Jehova pinaagi kang Eliseo, giingnan sa dalagita ang asawa ni Naaman nga kon ang iyang bana moadto sa Israel, ang propeta sa Diyos mag-ayo kaniya. Si Naaman miadto sa Israel, milagrosong naayo, ug nahimong magsisimba ni Jehova. (2 Hari 5:1-3, 10-17) Kon ikaw usa ka batan-on nga nahigugma sa Diyos sama niadtong dalagita, si Jehova makahatag kanimog kaisog sa pagsangyaw sa mga magtutudlo, eskolmet, ug sa uban.
12. Unsay epekto sa mga pulong ni Haring Ezequias diha sa iyang mga sakop?
12 Ang maayong mga pulong makahatag ug kaisog panahon sa kapeligrohan. Dihang ang mga Asiryanhon misulong sa Jerusalem sa ikawalong siglo W.K.P., giingnan ni Haring Ezequias ang iyang mga sakop: ‘Magmaisogon ug magmalig-on kamo. Ayaw kahadlok ni malisang tungod sa hari sa Asirya ug gumikan sa tibuok panon sa katawhan nga uban kaniya; kay adunay mas daghan nga uban kanato kay nianang uban kaniya. Uban kaniya anaa ang usa ka bukton nga unod, apan uban kanato anaa si Jehova nga atong Diyos aron sa pagtabang kanato ug sa pagpakig-away sa atong mga gubat.’ Unsay epekto niini sa katawhan? Kini nakahatag ug dugang kaisog kanila. Ang Bibliya nag-ingon: “Ang katawhan misalig sa mga pulong ni Ezequias.” (2 Cron. 32:7, 8) Ang samang mga pulong makatabang kanato ug sa ubang Kristohanon nga mas magmaisogon dihang lutoson.
13. Unsay atong makat-onan sa kaisog nga gipakita ni Abdias?
13 Usahay ang kaisog makita dili lang sa atong gipamulong. Sa ika-10 nga siglo W.K.P., ang piniyalan ni Haring Ahab nga si Abdias maisogong nagtago sa 100 ka propeta ni Jehova sa “tagkalim-an didto sa usa ka langob” aron dili sila mapatay sa daotang si Rayna Jezebel. (1 Hari 18:4) Sama sa mahinadlokon sa Diyos nga si Abdias, daghang maunongong alagad ni Jehova karon ang maisogong nanalipod sa ilang isigkamagtutuo pinaagi sa dili paghatag ug impormasyon bahin kanila ngadto sa mga maglulutos.
SI ESTER—USA KA MAISOGONG RAYNA
14, 15. Sa unsang paagi si Rayna Ester nagpakitag pagtuo ug kaisog, ug unsay resulta?
14 Si Rayna Ester nagpakitag dakong pagtuo ug kaisog dihang ang daotang si Haman nagplano sa pagpuo sa tanang Hudiyo sa tibuok Imperyo sa Persia sa ikalimang siglo W.K.P. Dili ikatingala nga ang mga Hudiyo nagbangotan, nagpuasa, ug tim-os gayod nga nag-ampo! (Est. 4:1-3) Naguol pag-ayo si Rayna Ester. Ang iyang ig-agaw nga si Mardokeo nagpadala kaniyag kopya sa balaod nga nag-awtorisar sa maong pagpuo ug nagsugo kaniya sa paghangyog pabor sa hari alang sa iyang mga isigka-Hudiyo. Apan si bisan kinsa nga moadto sa hari nga wala ipatawag pagapatyon.—Est. 4:4-11.
15 Bisan pa niana, giingnan ni Mardokeo si Ester: ‘Kon ikaw magpakahilom, ang kaluwasan maggikan sa laing dapit. Apan kinsay nahibalo kon alang ba sa ingon niini nga panahon nga ikaw nakakab-ot sa harianong dignidad?’ Gipatigom ni Ester kang Mardokeo ang mga Hudiyo sa Susan aron magpuasa alang kaniya. “Ako magpuasa usab,” si Ester miingon, “ug niana ako moadto sa hari, nga maoy dili sumala sa balaod; ug kon ugaling ako mamatay, mamatay ako.” (Est. 4:12-17) Si Ester nagmaisogon, ug gipakita sa basahon ni Ester nga giluwas sa Diyos ang Iyang katawhan. Karon, ang mga dinihogan ug ang ilang dedikadong mga kauban nagpakitag samang kaisog ilalom sa pagsulay—ug ang “Tigpatalinghog sa pag-ampo” kanunayng nagpaluyo kanila.—Basaha ang Salmo 65:2; 118:6.
“PAGBATOG KAISOG”
16. Unsay makat-onan sa mga batan-on kang Jesus?
16 Usa ka higayon, ang 12-anyos nga si Jesus nakit-an diha sa templo, “nga naglingkod taliwala sa mga magtutudlo ug nagpatalinghog kanila ug nangutana kanila.” Dugang pa, “kadtong tanan nga nagpatalinghog kaniya nahibulong kanunay sa iyang pagsabot ug sa iyang mga tubag.” (Luc. 2:41-50) Bisag bata pa, si Jesus may pagtuo ug kaisog na sa pagpangutana sa edarang mga magtutudlo sa templo. Ang paghinumdom sa ehemplo ni Jesus makatabang sa mga batan-on sa kongregasyon nga pahimuslan ang tanang kahigayonan ‘sa pagdepensa atubangan sa tanan nga mangayog katarongan sa ilang paglaom.’—1 Ped. 3:15.
17. Nganong giawhag ni Jesus ang iyang mga tinun-an sa “pagbatog kaisog,” ug nganong angay kitang magmaisogon?
17 Gidasig ni Jesus ang uban sa “pagbatog kaisog.” (Mat. 9:2, 22) Siya miingon sa iyang mga tinun-an: “Tan-awa! Ang takna nagsingabot, sa pagkatinuod, kini miabot na, sa dihang mangatibulaag kamo nga ang matag usa ngadto sa iyang kaugalingong balay ug biyaan ninyo ako nga mag-inusara; apan dili ako mag-inusara, tungod kay ang Amahan nag-uban man kanako. Gisulti ko kining mga butanga kaninyo aron nga pinaagi kanako makabaton kamo ug kalinaw. Sa kalibotan kamo adunay kasakitan, apan magmaisogon! Gidaog ko na ang kalibotan.” (Juan 16:32, 33) Sama sa unang mga sumusunod ni Jesus, kita gidumtan sa kalibotan. Bisan pa niana, dili nato buot nga mahimong bahin sa kalibotan. Pinaagi sa pagpamalandong sa kaisog sa Anak sa Diyos, kita makabatog kaisog sa pagpabiling hinlo niining kalibotana. Gidaog niya ang kalibotan, ug mahimo usab nato kana.—Juan 17:16; Sant. 1:27.
“MAGMAISOGON!”
18, 19. Unsang pamatuod sa pagtuo ug kaisog ang gipakita ni apostol Pablo?
18 Naantos ni apostol Pablo ang daghang pagsulay. Dihay higayon nga patyon na unta siya sa mga Hudiyo sa Jerusalem, maayo na lang kay giluwas siya sa Romanong mga sundalo. Pagkasunod gabii, “ang Ginoo mibarog duol kaniya ug miingon: ‘Magmaisogon! Kay ingon nga ikaw naghatag ug bug-os nga pagpamatuod sa mga butang bahin kanako sa Jerusalem, sa ingon usab ikaw kinahanglang magpamatuod sa Roma.’” (Buh. 23:8-11) Nagmaisogon gayod si Pablo.
19 Maisogong gibadlong ni Pablo ang “maayong-laki nga mga apostoles,” kinsa nagtudlog bakak nga mga pagtulon-an sa kongregasyon sa Corinto. (2 Cor. 11:5; 12:11) Dili sama kanila, si Pablo makapamatuod sa iyang pagkaapostol—ang pagkabilanggo, mga pagbunal, peligrosong mga panaw, ubang kapeligrohan, kagutom, kauhaw, kawalay tulog, ug ang iyang dakong kabalaka sa mga isigkamagtutuo. (Basaha ang 2 Corinto 11:23-28.) Pagkatalagsaong rekord sa pagtuo ug kaisog—nga nagpamatuod nga siya gihatagag kusog sa Diyos!
20, 21. (a) Paghatag ug pananglitan nga nagpakitang angay kitang magmaisogon. (b) Unsang mga situwasyon nga kita nagkinahanglag kaisog, ug sa unsa kita makatino?
20 Dili tanang Kristohanon ang makaagom ug grabeng paglutos. Apan kitang tanan kinahanglang magmaisogon aron masagubang ang mga hagit sa kinabuhi. Sa pag-ilustrar: Usa ka batan-on sa Brazil ang membro sa gang. Dihang nakakat-on sa Bibliya, naamgohan niya nga kinahanglan siyang magbag-o, apan sagad kadtong mibiya sa gang gipatay. Siya nag-ampo ug naggamit sa Bibliya sa pagpatin-aw sa lider kon nganong mobiya siya sa gang. Ang batan-on gitugotang mobiya nga wala ra siloti ug nahimong magmamantala sa Gingharian.
21 Gikinahanglan ang kaisog sa pagsangyaw sa maayong balita. Kinahanglang batonan kini sa Kristohanong mga batan-on aron mahuptan nila ang integridad diha sa eskuylahan. Gikinahanglan ang kaisog dihang mananghid nga mobakasyon sa trabaho aron makatambong sa tanang sesyon sa kombensiyon. Daghan pang situwasyon nga nagkinahanglag kaisog. Bisan unsa pay atong gisagubang, si Jehova mamati sa atong mga “pag-ampo sa pagtuo.” (Sant. 5:15) Ug siya tinong makahatag sa iyang balaang espiritu aron kita ‘magmaisogon ug magmalig-on gayod’!
[Hulagway sa panid 11]
Si Enoc maisogong nagwali sa dili-diyosnong kalibotan
[Hulagway sa panid 12]
Si Jael nagpakitag kaisog ug kalig-on