Malipayon ang mga Mapaubsanon
“Ang Diyos magabatok sa mga mapahitas-on, apan sa mga mapaubsanon siya magahatag ug dili-takos nga kalulot.”—1 PEDRO 5:5.
1, 2. Sa unsang paagi gilangkit ni Jesus diha sa iyang Wali sa Bukid ang pagkamalipayon nianang sa pagkamapaubsanon?
MAY kalabotan ba ang pagkamalipayon ug pagkamapaubsanon? Sa iyang labing iladong wali si Jesu-Kristo, ang labing bantogang tawo nga nabuhi sukad, nagbatbat sa siyam ka kalipay, o kabulahanan. (Mateo 5:1-12) Si Jesus ba naglangkit sa pagkamalipayon sa pagkamapaubsanon? Oo, gilangkit niya, kay ang pagkamapaubsanon nalangkit sa pila ka kalipay nga iyang nahisgotan. Pananglitan, ang usa ka tawo kinahanglang magmapaubsanon aron mahimong mahunahunaon sa iyang espirituwal nga panginahanglan. Ang mga mapaubsanon lamang ang gigutom ug giuhaw sa pagkamatarong. Ug ang mapahitas-on dili malumo ug dili maluluy-on, ni sila makigdaiton.
2 Ang mga mapaubsanon malipayon tungod kay matarong ug matinud-anon ang pagpaubos. Dugang pa, ang mga mapaubsanon malipayon tungod kay maalamon ang pagpaubos; kini makaamot sa maayong mga relasyon kang Jehova nga Diyos ug sa isigka-kristohanon. Dugang pa, ang mapaubsanong mga tawo malipayon tungod kay ang pagpaubos maoy kapahayagan sa gugma sa ilang bahin.
3. Nganong ang pagkamatinud-anon nagkinahanglan kanato nga magpaubos?
3 Nganong ang pagkamatinud-anon nagkinahanglan nga kita magpaubos? Ang katarongan mao, kay kitang tanan nakapanunod sa pagkadili-hingpit ug padayong nagahimog kasaypanan. Ang apostol nga si Pablo naghisgot bahin sa iyang kaugalingon: “Ako nasayod nga dinhi kanako, nga mao, sa akong lawas, walay butang maayo; kay ang katakos sa pagtinguha ania kanako, apan ang katakos sa pagbuhat mao ang wala kanako.” (Roma 7:18) Oo, kitang tanan nakasala ug nakabsan sa himaya sa Diyos. (Roma 3:23) Ang pagkamadayganon makapugong kanato sa pagkahimong garboso. Ang pagdawat sa sayop nagkinahanglag pagkamapaubsanon, ug ang pagkamatinud-anon makatabang kanato sa pagdawat sa sala kon kita nasayop. Sanglit kanunay kitang masayop sa atong gipaningkamotang buhaton, kita may maayong katarongan nga magpaubos.
4. Unsang bug-at nga katarongan ang gihatag sa 1 Corinto 4:7 mahitungod sa atong pagkamapaubsanon?
4 Ang apostol nga si Pablo naghatag kanatog laing katarongan nganong ang pagkamatinud-anon makapahimo natong mapaubsanon. Siya miingon: “Kinsay nagpalahi ninyo gikan sa usag usa? Sa pagkatinuod, unsay inyong nabatonan nga wala ninyo madawat? Kon, karon, inyo mang nadawat kana, nganong manghambog man kamo nga daw wala ninyo kana madawat?” (1 Corinto 4:7) Walay duhaduha bahin niana, ang paghimaya nato sa atong kaugalingon, ang pagpagarbo sa atong mga kabtangan, mga katakos, o mga nakab-ot, dili matinud-anon. Ang pagkamatinud-anon makatabang sa atong pagbaton ug maayong konsensiya atubangan sa Diyos, aron nga kita “makagawi nga matinud-anon sa tanang butang.”—Hebreohanon 13:18.
5. Sa unsang paagi ang pagkamatinud-anon motabang usab kanato sa dihang kita masayop?
5 Ang pagkamatinud-anon makatabang kanato sa pagpaubos sa dihang kita masayop. Kana makapahimo kanatong mas andam nga modawat sa sala, inay nga maningkamot sa pagpakamatarong sa atong kaugalingon o mamasangil sa uban. Busa, bisan kon si Adan namasangil kang Eva, si David wala mamasangil kang Batseba, nga nag-ingon, ‘Wala lang unta siya maligo nga bug-os makita. Wala lang hinuon ko makalikay sa pagkatental.’ (Genesis 3:12; 2 Samuel 11:2-4) Sa pagkatinuod, mahimong ikaingon nga sa usa ka bahin, ang pagkamatinud-anon makatabang kanato sa pagpaubos; sa laing bahin, ang pagkamapaubsanon makatabang kanato sa pagkahimong matinud-anon.
Pagtuo Kang Jehova Makatabang Kanato sa Pagpaubos
6, 7. Sa unsang paagi ang pagtuo sa Diyos makaabag kanato nga magmapaubsanon?
6 Ang pagtuo kang Jehova makatabang kanato sa pagpaubos. Ang pagpabili kon unsa gayod ka dako ang Maglalalang, ang Unibersohanong Soberano, makapugong kanato sa pag-isip sa atong kaugalingon nga hinungdanon kaayo. Pagkamaayo ang pagpahinumdom kanato niini ni propetang Isaias! Sa Isaias 40:15, 22, atong mabasa: “Tan-awa! Ang mga nasod ingon sa tulo gikan sa timba; ug ingon sa abog diha sa timbangan sila giisip. . . . Adunay Usa nga nagapuyo ibabaw sa kalingin sa yuta, nga ang mga molupyo niana ingon sa mga dulon.”
7 Ang pagtuo kang Jehova makatabang usab kanato kon gibati nato nga kita nag-antos sa inhustisya. Inay kay maguol sa maong butang, kita sa pagkamapaubsanon maghulat kang Jehova, sama sa gipahinumdom kanato sa salmista sa Salmo 37:1-3, 8, 9. Ang apostol nga si Pablo nagsulti sa samang punto: “Mga hinigugma, ayaw kamo pagpanimalos, apan hatagig luna ang kapungot; kay nahisulat na: ‘Akoa ang panimalos; ako magabayad,’ nag-ingon sa Jehova.”—Roma 12:19.
Pagkamapaubsanon—Ang Maalamong Dalan
8. Nganong ang pagkamapaubsanon magpahinabog maayong relasyon uban kang Jehova?
8 Adunay daghang katarongan kon nganong ang pagkamapaubsanon mao ang maalamong dalan. Usa mao nga, sumala sa gipakita na, kana mosangpot sa maayong relasyon uban sa atong Magbubuhat. Ang Pulong sa Diyos yanong nag-ingon sa Proverbio 16:5: “Ang tanang mapahitas-on ug kasingkasing dulumtanan kang Jehova.” Mabasa usab nato sa Proverbio 16:18: “Ang pagkagarboso magauna sa pagkalaglag, ug ang mapahitas-ong espiritu magauna sa pagkapandol.” Sa madugay o madali ang mga garboso makasinatig kaguol. Ingon gayod niana ang mahitabo tungod kay atong mabasa sa 1 Pedro 5:5: “Kamong tanan sul-obi ninyo ang inyong kaugalingon sa pagkamapaubsanon sa hunahuna ngadto sa usag usa, tungod kay ang Diyos magabatok sa mga mapahitas-on, apan nagahatag siyag dili-takos nga kalulot sa mga mapaubsanon.” Makaplagan nimo ang samang punto sa ilustrasyon nga gihatag ni Jesus bahin sa Pariseo ug sa maniningil ug buhis diin ang matag usa nag-ampo. Ang mapaubsanong maniningil sa buhis ang napamatud-ang labi pang matarong.—Lucas 18:9-14.
9. Sa unsang paagi makatabang ang pagkamapaubsanon sa mga panahon sa kalisdanan?
9 Ang pagkamapaubsanon mao ang dalan sa kaalam tungod kay ang pagkamapaubsanon makapahimo kanato nga mas daling modawat sa tambag nga makaplagan sa Santiago 4:7: “Busa, magpasakop kamo sa Diyos.” Kon kita mapaubsanon, dili kita mosupak kon itugot ni Jehova nga kita mag-antos ug kalisdanan. Ang pagkamapaubsanon makapahimo kanato nga tagbaw sa atong mga kahimtang ug sa paglahutay. Ang tawong garboso dili tagbaw, kanunayng gusto ug dugang pa, ug mosupak panahon sa makapaguol nga mga kahimtang. Sa laing bahin, ang tawong mapaubsanon molahutay sa mga kalisdanan ug mga pagsulay, sama sa gibuhat ni Job. Si Job nag-antos sa pagkahanaw sa tanan niyang kabtangan ug gitakboyan sa masakit nga balatian, ug unya ang iyang asawa mitambag kaniya sa pagsubay sa dalan sa garbo, nga nag-ingon: “Tungloha ang Diyos ug mamatay ka!” Unsay iyang tubag? Ang talaan sa Bibliya nag-ingon kanato: “Si Job miingon kaniya: ‘Sama sa sinultihan sa usa ka babayeng buang, ikaw usab nagsulti. Dawaton ba lamang nato ang maayo gikan sa matuod nga Diyos ug dili usab dawaton ang daotan?’ Niining tanan si Job wala makasala pinaagi sa iyang mga ngabil.” (Job 2:9, 10) Tungod kay si Job mapaubsanon, wala siya mosupak apan maalamong nagpailalom bisan unsay gitugotan ni Jehova nga mahitabo kaniya. Ug sa kataposan iyang nadawat ang dakong balos.—Job 42:10-16; Santiago 5:11.
Ang Pagpaubos Mopatunghag Maayong Relasyon sa Uban
10. Sa unsang paagi ang pagkamapaubsanon magpauswag sa atong mga relasyon uban sa isigka-Kristohanon?
10 Ang pagkamapaubsanon mao ang dalan sa kaalam tungod kay kana magpatungha ug maayong relasyon uban sa atong isigka-Kristohanon. Maayo ang tambag ni apostol Pablo kanato: “Ayaw [pagbuhat] ug bisan unsa sa tuyo sa pagpakig-indig o sa pagpagarbo sa kaugalingon, apan uban sa pagkamapaubsanon sa hunahuna nga isipon ang uban nga labaw kanimo, nga maglantaw, dili lang sa personal nga interes sa imong kaugalingong mga butang, kondili sa personal nga interes usab sa uban.” (Filipos 2:3, 4) Ang pagkamapaubsanon maalamong mopugong kanato sa pagpakig-indig sa uban o mosulay sa pagpalabaw sa uban. Ang maong mga tinamdan sa hunahuna makapahinabog suliran kanato ug sa atong mga isigka-Kristohanon.
11. Nganong ang pagkamapaubsanon makatabang kanato sa paglikay sa paghimog kasaypanan?
11 Sa daghang panahon ang pagkamapaubsanon makatabang kanato sa paglikay sa pagbuhat ug kasaypanan. Sa unsang paagi? Tungod kay ang pagkamapaubsanon mopugong kanato nga mahimong sobrang masaligon. Hinunoa, atong pabilhan ang tambag ni Pablo sa 1 Corinto 10:12: “Pasagdi siya nga naghunahunang nagbarog magbantay nga dili siya mapukan.” Ang tawong garboso sobra ra ka masaligon sa kaugalingon, busa dali siyang makahimog kasaypanan tungod sa mga impluwensiya sa gawas o sa iyang kaugalingong kahuyangan.
12. Ang pagkamapaubsanon motukmod kanato sa pagkab-ot sa unsang Kasulatanhong katungdanan?
12 Ang pagkamapaubsanon motabang kanato sa pagpahiuyon sa kinahanglanon sa pagkamapinasakopon. Sa Efeso 5:21, kita gitambagan: “Pagpasakop sa usag usa nga may kahadlok kang Kristo.” Sa pagkatinuod, dili ba kitang tanan nagkinahanglang magmapinasakopon? Ang kabataan kinahanglang magpasakop sa ilang mga ginikanan, ang mga asawa sa ilang mga bana, ug ang mga bana kang Kristo. (1 Corinto 11:3; Efeso 5:22; 6:1) Unya, diha sa bisan diing Kristohanong kongregasyon, ang tanan, lakip ang ministeryal nga mga alagad, kinahanglang magpakitag pagkamapinasakopon sa mga ansiano. Dili ba usab tinuod nga ang mga ansiano nagpasakop sa matinumanon ug maalamong ulipon nga matang, ilabina ingong girepresentahan sa magtatan-aw sa sirkito? Unya usab, ang magtatan-aw sa sirkito kinahanglang magpasakop sa magtatan-aw sa distrito, ug ang magtatan-aw sa distrito magpasakop sa Komite sa Sanga sa yuta diin siya nag-alagad. Komosta na man ang mga membro sa Komite sa Sanga? Kinahanglang “magpasakop sila sa usag usa” ug usab sa Nagamandong Lawas nga nagahawas sa matinumanon ug maalamong ulipon nga matang, nga, sa baylo, may tulobagon kang Jesus, ang naentronong Hari. (Mateo 24:45-47) Maingon man diha sa bisan diing lawas sa mga ansiano, ang mga membro sa Nagamandong Lawas kinahanglang motahod sa mga panglantaw sa uban. Pananglitan, ang usa maghunahunang siya may maayong ideya. Apan gawas nga ang igoigong gidaghanon sa ubang mga membro mouyon niining sugyota, kinahanglan mohunong siya sa pagkabalaka sa maong butang. Sa pagkatinuod, kitang tanan nagkinahanglan sa pagkamapaubsanon, kay kitang tanan may gipasakopan.
13, 14. (a) Sa unsang linain nga kahimtang nga ang pagkamapaubsanon makatabang kanato? (b) Unsang panig-ingnan ang gipakita ni Pedro maylabot sa pagdawat ug tambag?
13 Ilabinang ang pagkamapaubsanon makita nga dalan sa kaalam kay ang pagkamapaubsanon makapahimong sayon alang kanato sa pagdawat sa tambag ug disiplina. Ang matag usa kanato nagkinahanglan usahay ug disiplina, ug kinahanglang sundon nato ang tambag sa Proverbio 19:20: “Pamati sa tambag ug dawata ang disiplina, aron nga mahimo kang maalamon sa imong umaabot.” Sumala sa maayo nang pagkapahayag, ang pagkamapaubsanon mokuha sa kasakit gikan sa pagbadlong o disiplina. Dugang pa, ang apostol nga si Pablo, sa Hebreohanon 12:4-11, nagtambag kanato mahitungod sa kaalam sa mapaubsanong pagdawat sa disiplina. Niini lamang paagiha nga kita makalaom sa pagtultol sa atong umaabot nga dalan nga maalamon ug sa baylo makabaton sa ganti nga kinabuhing walay kataposan. Pagkamakapalipayng sangpotanan unya kana!
14 Niining bahina mahimong ipunting nato ang panig-ingnan ni apostol Pedro. Nakadawat siyag sakit nga tambag gikan ni apostol Pablo, sama sa atong makat-onan gikan sa asoy sa Galacia 2:14: “Sa dihang nakita nako nga sila wala maglakaw nga matul-id sumala sa kamatuoran sa maayong balita, ako miingon kang Cepas [Pedro] atubangan kanilang tanan: ‘Kon ikaw, nga bisan usa ka Hudiyo, nagkinabuhi sama sa kanasoran, ug dili ingon sa mga Hudiyo, naunsa man nga imong gipugos ang mga tawo sa kanasoran sa pagkinabuhi sumala sa batasan sa Hudiyo?’” Si apostol Pedro ba nasilo? Wala magdugay, kon nasilo man ugaling, ingon sa makita diha sa iyang ulahing paghisgot sa “atong hinigugmang igsoon nga si Pablo” diha sa 2 Pedro 3:15, 16.
15. Unsa ang kalangkitan sa atong pagkamapaubsanon ug sa atong pagkamalipayon?
15 Anaa usab ang butang bahin sa pagpaigo sa kaugalingon, pagkatagbaw. Dili gayod kita malipay gawas kon kita magmatagbaw sa atong nabatonan, sa atong mga pribilehiyo, atong mga panalangin. Ang mapaubsanong Kristohanon nakabaton sa tinamdan: “Kon itugot sa Diyos, ako modawat niana,” nga mao gayoy giingon ni apostol Pablo, sumala sa atong mabasa sa 1 Corinto 10:13: “Walay pagsulay nga nahitabo kaninyo gawas sa kasagaran sa mga tawo. Apan ang Diyos matinumanon, ug dili niya tugotan nga kamo pagasulayon labaw sa inyong maarangan, apan uban sa pagsulay mohimo usab siyag lutsanan aron kamo makaantos niana.” Busa makita na usab nato sa unsang paagi ang pagkamapaubsanon maoy dalan sa kaalam, kay kana nagtabang kanato nga magmalipayon bisan unsa man ang atong kahimtang sa kinabuhi.
Ang Gugma Motabang Kanato sa Pagpaubos
16, 17. (a) Unsang Kasulatanhong panig-ingnan ang nagpasiugda sa kinadak-ang hiyas sa pagtabang kanato nga magpaubos? (b) Unsang sekular nga panig-ingnan ang nag-ilustrar usab niining puntoha?
16 Labaw sa bisan unsang butang, ang dili-mahakogong gugma, a·gaʹpe, motabang kanato sa pagpaubos. Nganong si Jesus nakaantos nga mapaubsanon kaayo sa iyang kasinatian sa kahoy sa pagsakit nga gibatbat ni Pablo ngadto sa mga taga-Filipos? (Filipos 2:5-8) Nganong wala niya isipa nga motupong sa Diyos? Tungod, kay siya mismo nag-ingon: “Ako nahigugma sa Amahan.” (Juan 14:31) Mao kanay hinungdan nga sa tanang panahon siya nagpunting sa himaya ug kadungganan kang Jehova, ang iyang langitnong Amahan. Busa, sa laing higayon siya nagpasiugda nga ang iyang langitnong Amahan lamang ang maayo.—Lucas 18:18, 19.
17 Nag-ilustrar niining puntoha ang nahitabo sa kinabuhi sa usa sa unang mga magbabalak sa Amerika, si John Greenleaf Whittier. Kining tawhana may hinigugma sa iyang pagkabatan-on, ug kas-a sa usa ka indigay sa espeling, naespeling ug husto sa iyang hinigugma ang usa ka pulong, samtang sayop ang iyang pag-espeling niana. Naguol kaayo ang iyang hinigugma bahin niana. Ngano? Sumala sa nahinumdoman sa magbabalak, siya miingon: “Gikasubo ko nga akong naespeling kanang pulonga. Dili ko gustong molabaw nimo . . . tungod kay abi mo, ako nahigugma kanimo.” Oo, kon kita may gihigugma, buot nato nga kanang usa maoy molabaw, dili ubos, kanato tungod kay ang gugma mapaubsanon.
18. Ang pagkamapaubsanon motabang kanato sa pagpamati sa unsang Kasulatanhong tambag?
18 Kini maoy maayong leksiyon alang sa tanang Kristohanon, ilabina sa mga igsoong lalaki. May labot sa linaing pribilehiyo sa pag-alagad, kita ba malipay nga ang atong igsoon maoy nakadawat niana imbes kita, o mobati kita ug diyutayng pangabubho o kasina? Kon tinuod natong gihigugma ang atong igsoon, malipay kita nga iyang nadawat kanang linaing asaynment o pag-ila o pribilehiyo sa pag-alagad. Oo, ang pagkamapaubsanon mopasayon sa pagsanong sa tambag: “Pagpanguna sa pagpakitag pasidungog sa usag usa.” (Roma 12:10) Ang laing hubad nag-ingon: “Magpasidungog sa usag usa labaw sa inyong kaugalingon.” (New International Version) Unya sa makausa pa, kita gitambagan ni apostol Pablo: “Pinaagi sa gugma magpaulipon sa usag usa.” (Galacia 5:13) Oo, kon kita may gugma, malipay kita nga mag-alagad sa atong mga igsoon, magpaulipon kanila, magbutang sa ilang intereses ug kaayohan nga una kay sa atoa, nga nagkinahanglan ug pagkamapaubsanon. Ang pagkamapaubsanon mopugong usab kanato sa pagpanghambog ug sa ingon mopukaw diha sa uban sa espiritu sa pangabubho o kasina. Si apostol Pablo misulat nga ang gugma “dili tigpagawal, dili tigpaburot.” Nganong dili? Tungod kay ang motibo sa pagpagawal ug pagpaburot maoy mahakogon, mahigugmaon sa kaugalingon, samtang ang gugma maoy lintunganay sa pagkadili-mahakogon.—1 Corinto 13:4.
19. Unsang mga panig-ingnan sa Bibliya ang nag-ilustrar nga ang pagkamapaubsanon ug gugma may suod nga kalangkitan, sama sa garbo ug kahakog?
19 Ang relasyon ni David uban kang Haring Saul ug sa iyang anak nga si Jonathan maoy talagsaong panig-ingnan kon sa unsang paagi ang gugma ug pagkamapaubsanon suod nga nalangkit ug sa unsang paagi ang garbo ug kahakog samang suod nga nalangkit. Tungod sa mga kalamposan ni David sa gubat, ang kababayen-an sa Israel miawit: “Si Saul nakapatay sa iyang linibo, ug si David sa iyang mga tinagpulo ka libo.” (1 Samuel 18:7) Kay dili gayod mapaubsanon, hinunoa, nahupong sa garbo, si Saul sukad niadto naghambin ug malaglagong pagdumot kang David. Pagkalahi niini sa espiritu sa iyang anak nga si Jonathan! Mabasa nato nga gihigugma pag-ayo ni Jonathan si David sama sa iyang kaugalingong kalag. (1 Samuel 18:1) Busa sa unsang paagi misanong si Jonathan sa dihang, sa dagan sa mga panghitabo, nadayag nga si Jehova nagpanalangin kang David ug nga siya, dili si Jonathan, ang mopuli kang Saul ingong hari sa Israel? Si Jonathan ba mibati ug pangabubho o kasina? Wala gayod! Tungod sa iyang dakong gugma kang David, siya nakaingon, sumala sa atong mabasa sa 1 Samuel 23:17: “Ayaw kahadlok; kay ang kamot ni Saul nga akong amahan dili makakaplag kanimo, ug ikaw mismo mahimong hari ibabaw sa Israel, ug ako mismo mahimong ikaduha kanimo; ug si Saul nga akong amahan nasayod usab nianang butanga.” Ang dakong gugma ni Jonathan kang David nagpahimo kaniyang mapaubsanong midawat sa iyang nasabtan nga kabubut-on sa Diyos bahin sa kon kinsay mopuli sa iyang amahan ingong hari sa Israel.
20. Giunsa ni Jesus pagpakita ang suod nga kalangkitan sa gugma ug pagkamapaubsanon?
20 Dugang nagpasiugda sa kalangkitan sa gugma ug pagkamapaubsanon ang nahitabo sa kataposang gabii nga si Jesu-Kristo kauban sa iyang mga apostol dayon siya mamatay. Sa Juan 13:1, mabasa nato nga si Jesus, “nga nahigugma sa iyaha nga anaa sa kalibotan, nahigugma kanila hangtod sa kataposan.” Human niadto, atong mabasa nga si Jesus naghugas sa mga tiil sa iyang mga apostol, nga milihok sama sa usa ka ubos nga alagad. Pagkagamhanang leksiyon sa pagkamapaubsanon!—Juan 13:1-11.
21. Ingong sumarya, nganong kinahanglan kitang magpaubos?
21 Sa pagkatinuod, adunay daghang katarongan sa pagpaubos. Maoy matarong, matinud-anong butang ang pagpaubos. Mao kanay dalan sa pagtuo. Kana magpahinabog maayong relasyon uban kang Jehova nga Diyos ug sa atong isigka-magtutuo. Mao kanay dalan sa kaalam. Labaw sa tanan, mao kanay dalan sa gugma ug magdalag tinuod nga kalipay.
Unsaon Nimo Pagtubag?
◻ Sa unsang mga paagi nga ang pagkamatinud-anon usa ka tabang sa pagkamapaubsanon?
◻ Nganong ang pagtuo kang Jehova makatabang kanato sa pagpaubos?
◻ Unsay nagpakita nga ang pagkamapaubsanon maoy dalan sa kaalam?
◻ Nganong ang gugma ilabinang makatabang sa atong pagkamapaubsanon?
[Hulagway sa panid 21]
Si Job mapaubsanong nagpasakop sa iyang kaugalingon kang Jehova. Wala siya “magtunglo sa Diyos ug mamatay”
[Hulagway sa panid 23]
Si Pedro mapaubsanong nagpasakop sa dihang si Pablo nagtambag kaniya sa publiko