Sa Unsang Paagi Imong Ikapasundayag ang Tinuod nga Pagkamapaubsanon?

ANG tinuod nga pagkamapaubsanon dunay dakong bili sa mga mata sa Diyos. Si Santiago misulat: “Ginasupak sa Diyos ang mga mapahitas-on, apan siya nagahatag ug dili-takos nga kalulot sa mga mapainubsanon.” (Santiago 4:6) Mahimong gitumong ni Santiago dinhi ang ubay-ubayng ideya nga gipahayag diha sa Hebreohanong Kasulatan. “Si Jehova hataas, ug bisan pa niana ang mapaubsanon iyang makita; apan ang mapahitas-on iya lamang mailhan sa halayo.” “Ang mapahitas-ong mga mata sa tawo kinahanglang mahimong ubos, ug ang pagkamapahitas-on sa mga tawo kinahanglang moyukbo; ug si Jehova lamang ang kinahanglang ibutang sa itaas.” “Kon bahin sa mga mayubiton, siya [Diyos] mismo magayubit; apan sa mga maaghop siya magapakitag pag-uyon.”​—Salmo 138:6; Isaias 2:11; Proverbio 3:34.

Gidasig usab ni apostol Pedro ang pagkamapaubsanon. Siya misulat: “Baksi ninyong tanan ang inyong kaugalingon sa pagkamapaubsanon sa hunahuna ngadto sa usag usa, tungod kay ang Diyos nagasupak sa mga mapahitas-on, apan siya nagahatag ug dili-takos nga kalulot sa mga mapainubsanon.”​—1 Pedro 5:5.

Ang Panig-ingnan ni Kristo sa Pagkamapaubsanon

Tingali mangutana ka, Unsay kaayohan o kapuslanan sa pagkamapaubsanon? Alang sa tawong naningkamot nga mahimong matuod nga Kristohanon ang tubag maoy paninugdan​—ang pagkamapaubsanon mao ang pagkasama kang Kristo. Gipakita ni Jesus ang iyang pagkamapaubsanon pinaagi sa pagdawat sa talagsaong asaynment nga moanhi sa yuta gikan sa langitnong dapit ug mahimong ubos nga tawo, ubos pa sa mga manulonda. (Hebreohanon 2:7) Bisan pag siya Anak sa Diyos, iyang giagwanta ang mga kaulawan nga gihan-ok kaniya sa iyang relihiyosong mga kaaway. Gihuptan niya ang iyang pagkakalma panahon sa iyang mga pagsulay, bisan tuod makaarang sa pagpangayog tabang sa mga lehiyon ka manulonda.​—Mateo 26:53.

Sa kataposan, si Jesus nagbitay sa kaulawan diha sa sakitanang estaka, apan nagpabiling matinumanon sa iyang Amahan. Busa, si Pablo makasulat bahin kaniya: “Hupti kini nga tinamdan sa pangisip diha kaninyo nga diha usab kang Kristo Jesus, kinsa, bisan tuod siya naglungtad diha sa dagway sa Diyos, wala mag-isip ug pagpangilog, nga mao, nga siya mahimong tupong sa Diyos. Wala, apan iyang gihaw-asan ang iyang kaugalingon ug mihupot sa dagway sa usa ka ulipon ug nahisama sa mga tawo. Labaw pa niana, sa dihang iyang nakaplagan ang iyang kaugalingon nga diha sa dagway sa usa ka tawo, siya mipaubos sa iyang kaugalingon ug nagmasinugtanon hangtod sa kamatayon, oo, kamatayon diha sa sakitanang estaka.”​—Filipos 2:5-8.

Busa sa unsang paagi atong ikapasundayag ang matuod nga pagkamapaubsanon? Diha sa praktikal nga mga kahimtang, sa unsang paagi kita makasanong sa mapainubsanon inay kay sa magarbohong paagi?

Kon sa Unsang Paagi Mosanong ang Mapaubsanong Tawo

Atong hatagag pagtagad ang pagkamapaubsanon diha sa kahimtang nga may buluhaton, sa trabahoan man o diha sa Kristohanong pag-alagad. Aron magmalamposon ang buluhaton, ang mga magtatan-aw, mga manedyer, ug mga superbisor tingali gikinahanglan. Dunay usa nga kinahanglang mohimo sa mga desisyon. Sa unsang paagi ka mosanong? Mangatarongan ka bang, “Kinsa man kana siya nga mosulti nako kon unsay akong himoon? Mas dugay na kong nagtrabaho dinhi kay kaniya.” Oo, kon magarbohon ka, mapikal ka kon magpasakop. Sa laing bahin, ang mapaubsanong tawo maningkamot nga “dili magabuhat ug unsa man tungod sa pagkamatigion o tungod sa pagpakaimportante sa kaugalingon, hinuon uban sa pagpaubos sa hunahuna magaisip nga ang uban labaw.”​—Filipos 2:3.

Unsay imong sanong sa dihang ang sugyot maggikan sa mas batan-on nga tawo o sa usa ka babaye? Kon mapaubsanon ka, labing menos imo kining tagdon. Kon magarbohon ka, masuko ka niini o dihadiha nimo kining isalikway. Ipalabi ba nimo ang pagdayeg ug pag-ulog-ulog nga motultol sa imong pagkadaot o positibong tambag aron ka mouswag?​—Proverbio 27:9; 29:5.

Imo bang maatubang ang hagit sa kalisdanan? Ang pagkamapaubsanon makatabang kanimo sa pag-atubang sa malisod nga mga kahimtang ug sa paglahutay, sama sa nahimo ni Job. Kon magarbohon ka, mokiling ka nga mahigawad ug tingali morebelde sa makapaguol nga mga kahimtang ug gituohang pagpasilo.​—Job 1:22; 2:10; 27:2-5.

Ang Pagkamapaubsanon Maoy Paghigugma ug Pagpasaylo

Ang pipila ka tawo nalisdan nga moingon, “Pasayloa ko. Nakahimo akog sayop. Husto ka.” Ngano? Sobrang garbo! Hinunoa, sagad kaayo nga ang usa ka tiunay nga pagpangayog pasaylo dali rang makasanta sa panaglalis sa magtiayon.

Andam ka bang mopasaylo sa dihang dunay tawo nga makapasuko kanimo? O, tungod sa imong garbo, mohambin ka bag kalagot, tingali sulod sa mga adlaw ug mga bulan, nga nagdumili sa pagpakigsulti sa gituohang tagsala? Malangkit ka ba bisan sa pagdumtanay sa paningkamot nga makapanimalos? Ang mga tawo gipamatay diha sa pipila ka pagdumtanay. Sa uban, ang pagdaot sa dungog sa usa ka tawo mao ang pamaagi. Sa kasukwahi, ang mapaubsanong tawo mahigugmaon ug mapasayloon. Ngano? Tungod kay ang gugma dili maghambin ug talaan sa kadaot. Si Jehova andam nga magpasaylo sa mga Israelinhon kon ilang tunlon ang ilang garbo. Ang mapaubsanong sumusunod ni Jesus andam sa pagpasaylo, bisan pag sa subsob nga paagi!​—Joel 2:12-14; Mateo 18:21, 22; 1 Corinto 13:5.

Ang mapaubsanong tawo ‘manguna sa pagpakitag pasidungog sa laing tawo.’ (Roma 12:10) Ang New International Version mabasa: “Pasidunggi ang usag usa labaw sa inyong kaugalingon.” Modayeg ka ba sa uban ug magpabili sa ilang mga katakos ug mga kinaadman? O kanunay ka bang mangitag sayop aron madaot ang ilang reputasyon? Oo, makaarang ka ba nga tiunayng makadayeg sa ubang tawo? Kon nalisdan ka niining bahina, tingali kawalay-pagsalig sa kaugalingon ug garbo maoy imong mga suliran.

Ang magarbohong tawo walay pailob. Ang mapaubsanong tawo mainantoson ug hataas-ug-pailob. Komosta ka? Maguol ka ba sa bisan unsang gisabot nga dili maayong pagtratar? Ang ingon nianang reaksiyon maoy sukwahi sa pagkataas-ug-pailob. Kon mapaubsanon ka, dili ka maghunahuna sa imong kaugalingon nga labaw kaayo. Hinumdomi kon unsay nahitabo sa dihang ang mga tinun-an ni Jesus naghunahuna sa ilang kaugalingon nga labaw kaayo​—diha silay init nga panaglalis kon kinsay labing importante. Sila nalimot nga silang tanan maoy “mga walay-silbi nga ulipon”!​—Lucas 17:10; 22:24; Marcos 10:35-37, 41.

Ang Pranses nga magsusulat nga si Voltaire naghubit sa pagkamapaubsanon ingong “ang kaligdong sa kalag . . . ang alibyo sa garbo.” Oo, ang pagkamapaubsanon maoy pagpaubos sa hunahuna. Ang mapaubsanong tawo maligdong sa espiritu, dili magarbohon. Siya matinahuron ug matimbayaon kaayo.

Busa nganong maningkamot nga magmapaubsanon? Tungod kay ang pagkamapaubsanon may pag-uyon sa Diyos ug motabang kanato sa pagbatog diyosnong paggiya. Sa usa ka bahin tungod sa pagkamapaubsanon ni Daniel, giisip ni Jehova ang maong propeta ingong usa ka tawo nga “tilinguhaon kaayo” ug nagpadala kaniyag manulonda uban ang usa ka panan-awon! (Daniel 9:23; 10:11, 19) Ang pagkamapaubsanon magdalag daghang ganti. Magdala kinig matuod nga mga higalang naghigugma kanimo. Labing hinungdanon, kini magdalag mga kabulahanan gikan ni Jehova. “Ang resulta sa pagkamapaubsanon ug kahadlok kang Jehova maoy mga bahandi ug himaya ug kinabuhi.”​—Proverbio 22:4.

[Hulagway sa panid 7]

Ang mapaubsanong pagpangayog pasaylo makapahapsay sa kinabuhi