Ang Maghahatag sa “Tanang Maayong Gasa”
“Usa ka higayon giduaw ako sa usa ka ministro sa simbahang Reformed. Buot siyang masayod kon giunsa nako pagdumala ang akong simbahan. Ako siyang giingnan: . . . ‘Wala kami manuweldo; walay butang nga magpaaway sa mga tawo. Wala gayod kami mangolekta.’ ‘Sa unsang paagi kamo makabatog kuwarta?’ siya nangutana. Ako mitubag, ‘Aw, Dr.——, kon sultihan ko ikaw kon unsay tinuod seguro dili ka makatuo. Kon ang mga tawo mainteres niining relihiyona, wala silay makitang sibot nga ipasa. Apan makita nilang may mga galastohan. Sila moingon sa ilang kaugalingon, “Kining maong tigomanan may galastohan. . . . Sa unsang paagi ako makaamot ug diyutayng salapi niining kawsaha?”’ Mitan-aw siya kanako nga daw naghunahuna siyang, ‘Unsay hunahuna nimo nako—ignorante?’ Ako miingon, ‘Buweno, Dr.——, yanong kamatuoran ang gisulti ko nimo. . . . Kon ang usa makadawat ug panalangin ug may kahinguhaan, buot niya kanang gamiton alang sa Ginoo. Kon wala siyay kahinguhaan, nganong awhagon man namo siya nga mobuhat niana?’”
—Charles T. Russell, unang presidente sa Watch Tower Society, “The Watch Tower,” Hulyo 15, 1915.
KITA mohatag tungod kay si Jehova nga Diyos maoy unang mihatag. Ang iyang pagpanghatag nagsugod kapanahonan kanhi sa paglalang—ang iyang unang linalang, ang iyang “bugtong Anak.” (Juan 3:16) Tungod sa gugma, gihatag niya ang gasa sa kinabuhi ngadto sa uban.
Ang Anak sa Diyos, si Jesu-Kristo, mao ang labing dakong gasa ni Jehova kanato. Apan ang Anak sa Diyos, sa iyang kaugalingon, dili mao ang kataposan sa pagpanghatag sa Diyos. “Ang labawng dili-takos nga kalulot sa Diyos” maoy gitawag ni Pablo nga “dili-maasoy sa pulong nga gasa” ni Jehova. (2 Corinto 9:14, 15) Kining gasaha tin-awng naglakip sa tanang kaayo ug mahigugmaong-kalulot nga gipaabot sa Diyos sa iyang katawhan pinaagi kang Jesus. Ang maong dili-takos nga kalulot kahibulongan kaayo nga misaylo pa kana sa tawhanong gahom sa pagbatbat o pagpahayag. Apan, may uban pang mga bahin sa pagpanghatag sa Diyos.
Dugay na kanhi, ang usa ka hari maalamon ug mapainubsanong miila nga ang bisan unsang maayong mga butang nga iyang gihatag ingong gasa sa pagkatinuod iya ni Jehova. Siya miingon: “Kay ang tanan sa kalangitan ug sa yuta imoha man. Imo ang gingharian, Oh Jehova, ang Usa nga nagbayaw sa imong kaugalingon ingong pangulo sa tanan. . . . Apan, kinsa ba ako ug kinsa ba ang akong katawhan, nga pagahawiran namo ang gahom sa paghatag ug kinabubut-ong mga halad nga sama niini? Kay ang tanang butang maoy gikan kanimo, ug gikan sa imong kamot mismo among gihatag kanimo.”—1 Cronicas 29:11-14.
Ang Panig-ingnan sa Diyos
Si Santiago, usa ka disipulo ni Jesu-Kristo, nasayod nga si Jehova nga Diyos maoy tuboran sa bisan unsa nga sa kinatibuk-an maayo sa tanang bahin. Ang hingpit lamang nga mga gasa ang naggikan kaniya. Si Santiago misulat: “Ang tagsa ka maayong gasa ug ang tagsa ka hingpit nga hatag nagagikan sa itaas, kay kana gipadala gikan sa Amahan sa langitnong kahayag, ug kaniya walay pagkausab sa pagliso sa landong.”—Santiago 1:17.
Bisan maylabot sa paghatag ug gasa, nakita ni Santiago kon unsa ka lahi ang Diyos gikan sa mga tawo. Ang mga tawo makahatag ug maayong mga gasa apan dili kanunayng mobuhat niana. Kining mga gasaha mahimong maggikan sa hakog nga mga motibo, o mahimong gamiton kini sila sa pagtintal sa usa ka tawo sa pagbuhat ug daotan. Kang Jehova walay pagkausab: dili siya mabalhin. Busa, ang kinaiya sa iyang mga gasa dili mausab. Kini sila kanunayng putli. Kini sila kanunayng magpasiugda sa kaayohan ug kalipay sa katawhan. Kini sila kanunayng maluluton ug matinabangon, dili gayod madinaoton.
Mga Motibo sa Paghatag ug Gasa
Sa mga adlaw ni Santiago, ang ilado nga relihiyosong mga lider nagbatasan sa paghatag ug mga gasa aron makita lamang sa mga tawo. Sila nanghatag nga may daotang motibo. Kay buot sa pagdayeg sa mga tawo, ilang gikompromiso ang ilang matarong nga mga sukdanan. Hinunoa, ang mga Kristohanon kinahanglang lahi. Si Jesus nagtambag kanila: “Sa dihang manghatag kamog mga gasa sa kaluoy, ayaw pagpatingog ug trompeta sa atubangan ninyo, ingon sa gihimo sa mga maot sa sulod sa mga sinagoga ug diha sa kadalanan, aron sila pagahimayaon sa mga tawo. Sa pagkatinuod magaingon ako kaninyo, Sila nakadawat na sa ilang balos. Apan kamo, sa dihang magahatag kamo ug mga gasa sa kaluoy, ayaw pahibaloa ang inyong walang kamot sa gibuhat sa imong tuong kamot, aron matago ang inyong mga gasa sa kaluoy; unya ang inyong Amahan nga nagatan-aw sa tago magabayad kaninyo.—Mateo 6:2-4.
Ang katarongan sa usa ka Kristohanon sa paghatag ug gasa mao ang pagtabang sa uban nga matagan-an ang panginahanglan o ang paglipay kanila o ang pagpalambo sa matuod nga pagsimba. Dili kana alang sa paghimaya-sa-kaugalingon. Sa pagkatinuod, ang mga mata ni Jehova makalagbas bisan ngadto sa kinailadmang bahin sa atong kasingkasing. Makita niya ang kinailadmang motibo nga nagpaluyo sa atong mga gasa sa kaluoy.
Ang mga Saksi ni Jehova naningkamot sa pagsunod sa panig-ingnan ni Jehova ug sa iyang Anak sa pagpanghatag ug gasa. Ilang gihatag kon unsay ilang nabatonan. Nabatonan nila ang maayong balita sa Gingharian, ug gihatag nila kini alang sa kabulahanan sa uban. Sila nasayod nga ang Proverbio 3:9 nag-ingon: “Pasidunggi si Jehova pinaagi sa inyong bililhong mga butang ug sa mga inunahang bunga sa tanan ninyong abot.” Tungod kay ang matag sangang buhatan, kongregasyon, ug indibiduwal malugotong naningkamot nga makaamot sa kaayohan sa tanan, ang tibuok panag-igsoonay napalig-on sa espirituwal ug nagmauswagon. Ang materyal nga kauswagan dili motultol sa espirituwal nga kauswagan, apan ang espirituwal nga kauswagan magdala ug materyal nga kauswagan nga igo alang sa gikinahanglan sa buluhaton ni Jehova.
Mga Paagi sa Pagpakig-ambit
Adunay daghang paagi diin ang tanan makaamot sa personal aron pagsuportar sa maayong balita. Ang usa ka paagi may kalabotan sa mga Kingdom Hall. Ang tanang membro sa kongregasyon nagagamit sa Kingdom Hall. Adunay nagataganag salapi alang sa pagtukod o pag-abang niini, sa suga, sa pagkontrolar sa temperatura, ug pagmentenar. Sanglit gikinahanglan ang pagsuportar sa tanan diha sa kongregasyon, ang mga kahon sa amot gibutang diha sa Kingdom Hall, ug ang boluntaryong mga donasyon nga nadawat gamiton sa pagbayad sa mga galastohan sa kongregasyon. Gikan sa sobra, mahimong moamot ngadto sa lokal nga sanga sa Watch Tower, sumala sa desisyon sa kongregasyon.
Mahimong moamot ngadto mismo sa sanga sa Sosyedad alang sa pagbansay ug pagsuportar sa mga misyonaryo ug espesyal nga mga payunir sa mga bahin sa kalibotan diin ang maayong balita wala makaabot sa kadaghanan sa molupyo. Ang ubang mga galastohan sa pagpakaylap sa maayong balita maoy may kalabotan sa buluhaton sa nagapanawng mga magtatan-aw. Si apostol Pablo, kinsa nagpakita ug panig-ingnan sa nagapanawng buluhaton sa unang siglo, midayeg sa kongregasyon sa Filipos: “Kamo may gipadala kanako kas-a ug sa ikaduhang higayon alang sa akong panginahanglan.” (Filipos 4:14-16) Gawas pa sa galastohan niining mga matanga sa bug-os-panahong pag-alagad, nga nabatonan sa tanang sanga, anaa ang pagmentenar sa matag puloy-anang Bethel ug niadtong nagpuyo ug nagtrabaho didto. Ang pagsulat ug pag-imprintag literatura nga naundan sa matahom nga mensahe sa maayong balita mao gayoy mga pribilehiyo nga gihatag sa Diyos, apan ang pagpang-apod-apod sa literatura kinahanglanon usab, ug kana naglangkit ug mga galastohan. Unya anaa ang galastohan sa mga asembliya ug mga kombensiyon, lakip na ang mga kaso nga gisang-at sa korte aron ‘paglaban ug pagpamatuod sa legalidad sa maayong balita.’—Filipos 1:7.
Ang panahong gigugol sa pagsangyaw sa maayong balita sa matag alagad ni Jehova maoy boluntaryo, ug mao man usab ang iyang paghatag ug materyal nga mga amot. Ang regular nga paggahin ug salapi nga gamiton aron pagsuportar sa pagpalapad sa matuod nga pagsimba gitambag ni apostol Pablo: “Karon mahitungod sa amot alang sa mga balaan, . . . matag unang adlaw sa semana ang matag usa kaninyo sa iyang panimalay magagahin sumala sa iya tingaling pag-uswag.”—1 Corinto 16:1, 2.
Sa dihang ang usa ka tawo moamot, dili siya kanunayng mahibalo kon unsaon gayod kana paggamit, apan iyang makita ang mga resulta sa pagpalapad sa pagsangyaw sa Gingharian. Ang mga taho sa 1993 Yearbook of Jehovah’s Witnesses nagpakita nga ang maayong balita sa Gingharian ginasangyaw na sa kapin sa 200 ka nasod ug kaislahan sa kapin sa 4,500,000 ka Kristohanong ministro. Kining maong mga taho makapadasig. Nan, ang bisan unsang gasa, bisan unsay gidak-on, nakatabang sa pagpakaylap sa maayong balita sa tibuok kalibotan.
Kining buluhatona gisuportahan sa gitingob nga paghatag sa tanan. Ang pipila makaarang sa paghatag ug labaw pa, nga nakatabang sa pagsangyawng buluhaton sa mas dako pang sukod. Ang uban mohatag ug menos. Apan kadtong mohatag ug diyutayng donasyon dili angayng maulaw o mobati nga ang ilang bahin dili bililhon. Tinong si Jehova dili mobati nianang paagiha. Gitin-aw kini pag-ayo ni Jesus sa dihang gipakita niya kon giunsa pagpabili ni Jehova ang diyutayng amot sa babayeng balo. “Unya iyang nakita ang usa ka kabos nga babayeng balo nga naghulog ug duha ka kuwartang diyot didto, ug siya miingon: ‘Sa pagkatinuod ako magaingon kaninyo, Kining babayeng balo, bisan pag kabos, naghulog ug labaw pa kay sa tanan nga naghulog. Kay silang tanan naghulog ug mga gasa gikan sa ilang sobra, apan kining bayhana bisan sa iyang kawalad-on naghulog sa tanan niyang kabuhian.’”—Lucas 21:2-4.
Bisan unsa man ugaling ang atong kahimtang sa panalapi, makahatag kita sa mga paagi nga makapahimuot kang Jehova. Ang salmista maayong nagsumarya kon unsaon nato paghimaya ang atong Hari ug Maghuhukom. Siya nag-ingon: “Ipasidungog kang Jehova ang himaya nga iya sa iyang ngalan; pagdalag usa ka gasa ug sulod sa iyang mga sawang.” (Salmo 96:8) Busa, hinaot sundogon nato ang mahigugmaong panig-ingnan sa atong langitnong Amahan pinaagi sa atong malipayong paghatag ug gasa tungod kay siya maoy unang naghatag kanato.
[Kahon sa panid 30]
KON SA UNSANG PAAGI ANG PIPILA MOAMOT SA BULUHATONG PAGWALI-SA-GINGHARIAN
◻ MGA KONTRIBUSYON ALANG SA TIBUOK-KALIBOTANG BULUHATON: Daghan ang mogahin o mobadyet ug kantidad nga ilang ikahulog sa mga kahon sa amot nga gitiman-an: “Mga Amot Alang sa Tibuok-Kalibotang Buluhaton sa Sosyedad—Mateo 24:14.” Sa matag bulan ang mga kongregasyon magpadala niining kantidara sa Watch Tower Bible and Tract Society of the Philippines, o kaha sa kinadul-an nga sangang buhatan.
◻ MGA GASA: Ang boluntaryong mga donasyon nga salapi ikapadalang direkta sa Watch Tower Bible and Tract Society of the Philippines, P.O. Box 2044, 1099 Manila, o ngadto sa lokal nga sangang buhatan sa Sosyedad. Ang alahas o ubang mahalong butang ikadonar usab. Ang mubong sulat nga magapahayag nga kana maoy laktod nga donasyon angay magauban sa maong mga amot.
◻ KONDISYONAL-DONASYONG KAHIKAYAN: Ang kuwarta ikahatag ngadto sa Watch Tower Society nga huptang sinalig hangtod sa kamatayon sa nagdonar, uban ang probisyon nga enkaso sa personal nga panginahanglan, kini iuli sa nagdonar.
◻ SEGURO: Ang Watch Tower Society kanganlan nga manununod sa usa ka polisa sa seguro o life-insurance o sa plano sa pagretiro/pensiyon. Ang Sosyedad angay pahibaloon sa maong kahikayan.
◻ MGA KUWENTA SA BANGKO: Mga kuwenta sa bangko, mga sertipiko sa deposito, o kuwenta sa usa alang sa pagretiro mahimong ikabutang in trust for o gihimong payable on death to Watch Tower Society, nahasubay sa lokal nga latid sa bangko. Ang Sosyedad angayng pahibaloon sa maong mga kahikayan.
◻ STOCKS AND BONDS: Ang mga stock ug bond mahimong ikadonar sa Watch Tower Society pinaagi sa dihadiha nga gasa o ubos sa usa ka kahikayan nga ang kitaon padayon nga madawat sa nagdonar.
◻ BALAY UG YUTA: Ang arang ikabaligya nga balay ug yuta mahimong ikadonar sa Watch Tower Society pinaagi sa dihadiha nga gasa o magbilin ug luna alang sa nagdonar samtang buhi, nga siya makapadayon sa pagpuyo dinha sulod sa iyang pagkinabuhi. Ang usa angay nga mokontak usa sa Sosyedad una pa dokumentohan ang bisan unsang balay ug yuta ngadto sa Sosyedad.
◻ WILLS AND TRUSTS: Ang mga kabtangan o salapi mahimong ikabilin sa Watch Tower Bible and Tract Society of the Philippines pinaagi sa usa ka legal pagkahimo nga testamento, o ang Sosyedad mahimong kanganlan ingong manununod sa usa ka kasabotan sa trust. Ang usa ka trust nga usa ka relihiyosong organisasyon ang makabenepisyo mahimong may tinong bentaha bahin sa buluhisan. Ang usa ka kopya sa testamento o kasabotan sa trust kinahanglang ipadala sa Sosyedad.
Alang sa dugang impormasyon mahitungod niining mga butanga, pagsulat sa Watch Tower Bible and Tract Society of the Philippines, P.O. Box 2044, 1099 Manila, o sa lokal nga sangang-buhatan sa Sosyedad.
[Mga hulagway sa panid 31]
Sa unsang paagi gigamit ang inyong mga donasyon:
1. Mga boluntaryo sa Bethel
2. Pagtukod ug sangang buhatan
3. Hinabang panahon sa katalagman
4. Mga Kingdom Hall
5. Mga misyonaryo