“Asa Gikan ang Salapi?”

NAHINGANGHA ang mga tumatan-aw sa video sa Watch Tower Society nga “Jehovah’s Witnesses​—The Organization Behind the Name.” Nakita nila ang maayog-panagway nga mga lalaki ug babaye gikan sa nagkalainlaing mga rasa ug mga kagikan, nga mapahiyomon ug duyog nga nagtrabaho nga may kaharmoniya. Dili lang kay nadani ang ilang pagtagad sa linibong malipayong mga trabahante kondili usab sa dagko nga pundok sa mga tinukod sa hedkuwarter sa Sosyedad sa Brooklyn ug sa ilang umahan sa Wallkill, New York. Ang video nagpakita nga sa sulod niining maong mga tinukod makaplagan ang nunot-sa-panahong teknolohiya​—tulin kaayong kagamitan sa pag-imprinta ug paghapin sa libro nga naggama ug milyonmilyong publikasyon matag bulan, nagkadaiyang mga kompiyuter nga kagamitan, ug daghang departamento nga nagsuportar sa pagpatik ug literatura.

Kini nagpakitag dakong gahin nga salapi. Busa ang pipila mangutana, “Asa gikan ang salapi?”

Ang mga bisita sa tibuok-kalibotang hedkuwarter sa Sosyedad susamang mahingangha. Sila mopatuyhakaw sa ilang mga liog sa pagtan-aw sa bag-ong 30-andanas nga puy-anang tinukod, usa sa daghang tinukod nga gigamit sa pagpapuyo sa kapin sa 3,000 ka boluntaryong mga ministro nga nagtrabaho didto. Ang pagduaw sa bag-ong Edukasyonal nga Sentro sa Watchtower mga 110 kilometros sa amihanan sa Brooklyn makapahingangha usab sa daghan. Ginatukod pa, kini makapapuyo ug mga 1,200 ka trabahante. Duha ka klase sa mga misyonaryo ang pagabansayon didto matag tuig ug ipadala sa laing nasod ngadto sa ilang mga asaynment. Maoy gikan usab niining dapita nga ang pagtultol ginahatag ngadto sa kapin sa 10,000 ka kongregasyon sa mga Saksi ni Jehova sa Tinipong Bansa. Daghang sangang buhatan sa tibuok kalibotan ang nagpadako usab di pa dugay sa ilang mga pasilidad o nagahimo pa niana. Ang pagbuhat niining tanang kalihokan nagkinahanglan ug dakong salapi. Ang mga tawo mangutana, “Asa gikan ang salapi?”

Ang tubag mao nga kini naggikan sa ordinaryong mga indibiduwal sama kang bisan kinsa kanato. Sila maoy mga tawo, sa tibuok kalibotan, kinsa nagtinguha sa paghimo sa tanan nga ilang maarangan sa pagpadayon sa hinungdanong Kristohanong buluhaton sa pagsangyaw ug pagpanudlo. Ang maong kinabubut-ong espiritu dili kay walay nag-una.

Ang Panig-ingnan nga Gipakita sa Karaang Israel

Kapin sa 3,500 ka tuig kanhi, ang panginahanglan sa dagayang kontribusyon mitungha. Gisugo ni Jehova si Moises nga magtukod ug usa ka tabernakulo, o “tolda nga tigomanan,” nga gamiton sa Iyang pagsimba. Ang hinatag-Diyos nga desinyo nanginahanglan ug nagkadaiyang mahalong mga butang. Si Jehova nagsugo: “Magkuha kamo gikan sa inyong taliwala ug kontribusyon alang kang Jehova. Padad-a niini ang matag usa nga may kinabubut-ong kasingkasing ingong kontribusyon alang kang Jehova.” (Exodo 35:4-9) Unsay sanong sa katawhan? Ang asoy nagsugilon kanato nga “sila nangabot, ang tagsatagsa kansang kasingkasing nag-agda kaniya, ug sila nanagdala, ang tagsatagsa kansang espiritu nag-awhag kaniya, ug kontribusyon ni Jehova alang sa buluhaton sa tolda nga tigomanan ug alang sa tanang mga serbisyo niini ug alang sa balaang mga sapot.” Kining “boluntaryong halad” inanay nga midaghan pag-ayo nga ‘milabaw pa kini sa gikinahanglan alang sa buluhaton nga gisugo ni Jehova nga buhaton.’ (Exodo 35:21-29; 36:3-5) Usa gayod ka walay-paghunahuna-sa-kaugalingon, manggihatagong espiritu ang gipakita sa katawhan!

Duolan sa 500 ka tuig sa ulahi, may awhag na usab alang sa dakong kontribusyon gikan sa mga Israelinhon. Ang tinguha ni Haring David nga magtukod ug permanenteng balay alang kang Jehova sa Jerusalem pagatumanon na pinaagi sa iyang anak lalaki nga si Solomon. Si David mismo nagtigom ug nag-amot ug dakong bahin sa pagakinahanglanon. Ang uban miduyog sa dihang miawhag si David sa pagdala ug “gasa alang kang Jehova.” Ang resulta? “Ang katawhan nanagmaya gumikan sa ilang paghimo ug boluntaryong mga halad, kay uban sa bug-os nga kasingkasing nga ilang gihimo ang boluntaryong mga halad kang Jehova; ug bisan si David ang hari mismo nagmaya uban ang dakong kalipay.” (1 Cronicas 22:14; 29:3-9) Ang salapi ug bulawan lamang mobili ug $50 bilyon sa kantidad karon!​—2 Cronicas 5:1.

Makita nato gikan niining maong mga pananglitan nga walay usa nga gipugos sa paghatag. Kadto maoy “boluntaryo” gayod ug gihatag “uban ang bug-os nga kasingkasing.” Si Jehova dili unta mahimuot kon dili pa ingon niadto. Sa susama, sa dihang ang kahigayonan mitungha sa pag-amot ug salapi sa pag-abag sa kabos nga mga Kristohanon, si apostol Pablo misulat nga dili kadto “usa ka butang nga kinilkil.” Siya midugang: “Ipabuhat sa matag usa ang sumala sa iyang gikahukom diha sa iyang kasingkasing, dili nga kontragusto o pinugos, kay gihigugma sa Diyos ang usa ka masayahong maghahatag.”​—2 Corinto 9:5, 7.

Ang Panginahanglan Karong Adlawa

May panginahanglan ba sa mga kontribusyon karong adlawa? Sa pagkatinuod aduna, ug may dugang pang panginahanglan sa paglabay sa panahon. Ngano?

Ang mga Kristohanon gihatagan ug tinong mga instruksiyon alang niining panahon sa kataposan. Si Jesus nagsugo sa iyang mga tinun-an: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo.”​—Mateo 28:19, 20.

Sa pagpalampos niining dakong pagpanudlo ug pagsangyawng buluhaton samtang kita nagakahiduol sa kataposan sa “katiklopan sa sistema sa mga butang” nagkinahanglag dakong panahon ug salapi. Ngano? Tungod sa tanang nalangkit sa pagtuman sa mensahe sa Gingharian sa Diyos “ngadto sa kinalay-ang bahin sa yuta.” (Buhat 1:8) Kadaghanan sa katawhan dili batid sa mga Kasulatan ingon sa unang-siglong mga Hudiyo. Sa pagkatinuod, ubay-ubay sa mga molupyo sa yuta wala gani masinati sa Bibliya ug wala mag-isip niana nga Pulong sa Diyos. Ang mga magsasangyaw kinahanglang bansayon ug ipadala sa lagyong mga nasod. (Roma 10:13-15) Ug hunahunaa ang gidaghanon sa mga pinulongan nga nalangkit! Kadtong gisangyawan nagkinahanglan ug mga Bibliya ug binase-sa-Bibliyang mga publikasyon aron basahon ug tun-an sa ilang kaugalingong pinulongan. Aron maabot ang tanan sa sistematikong paagi ug progresibo silang agakon ngadto sa espirituwal nga pagkahamtong aron sila makatabang pa sa uban nagkinahanglag dakong pag-organisar nga buluhaton.​—2 Timoteo 2:2.

Si Jesus miingon nga ang “maayong balita sa gingharian” kinahanglan una nga “igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Busa karon na ang panahon sa paggugol sa tanan kutob sa atong maarangan aron matapos ang maong hinungdanong buluhaton. Ang atong salapi magamit sa kinamaayohang paagi una mawad-ig praktikal nga bili ang materyal nga bahandi.​—Ezekiel 7:19; Lucas 16:9.

Unsay Gastohan sa Salapi?

Ang Watch Tower Society nagpatik ug literatura sa Bibliya sa kapin sa 230 ka pinulongan, maingon man sa Braille alang sa mga buta ug mga video sa senyas nga pinulongan alang sa mga amang. Nagkinahanglan kana ug pundok sa mga maghuhubad ug mga proofreader sa matag pinulongan. Ang paghunahuna lamang sa pagbuhat niining tanang buluhaton, ilabina alang sa magasing Bantayanang Torre, nga gipatik matag bulan sa 121 ka pinulongan ug dungan sa 101 ka pinulongan niini, maoy makapatingala. Bisan pa gikinahanglan kana aron ang katawhan sa tibuok yuta makabaton ug makabasa sa samang impormasyon. Matag tuig adunay mga pag-uswag sa bili sa papel ug sa ubang materyales nga gigamit sa paghimo sa mensahe sa Gingharian sa pinatik nga dagway o audio o video nga mga rekording. Ang maong mga galastohan kinahanglang bayran pinaagi sa paggamit sa mga donasyon gikan sa mga igsoon.

Ang pagsangyaw ug pagpanudlo nga buluhaton ginahimo sa mga teritoryo nga gikobrehan sa kapin sa 75,000 ka kongregasyon sa mga Saksi ni Jehova sa tibuok kalibotan. Sa paghiusa ug pagdasig kanila, ang nabansay nga nagapanawng mga magtatan-aw magaduaw sa matag kongregasyon mga kaduha sa matag tuig. Ang mga asembliya aduna usab ing hinungdanong bahin sa paghatag ug mga instruksiyon. Ang dagkong mga pasilidad kinahanglang abangan alang sa mga kombensiyon, nga makapalig-on kaayo sa pagtuo. Ang inyong mga kontribusyon gigamit usab alang niining katuyoana.

Bisan tuod ang mga asembliya kasagarang himoon katulo lamang sa usa ka tuig, ang lokal nga mga kongregasyon magtigom alang sa lima ka senemanang mga panagkatigom. (Itandi ang Exodo 34:23, 24.) Ang pagsulod sa mga bag-ohang misanong sa maayong balita nagkahulogan sa pagdugang ug linibong bag-ong mga kongregasyon matag tuig. Uban sa tabang sa minilyong dolyar nga mga loan nga giapod-apod pinaagi sa Sosyedad, ginatos ka bag-ong mga Kingdom Hall ang gitukod matag tuig, ug daghang uban pa ang ginabag-o ug gipadako. Bisan tuod kini maoy usa ka turnoturnong paggamit sa pondong salapi nga gibalikbalik paggamit, padayong nagauswag ang panginahanglan.

Usa ka dapit diin adunay dili-hitupngang pag-uswag maoy sa mga nasod sa Sidlakang Uropa nga sakop sa kanhing Unyong Sobyet. Pagkamakapalipay ang progresibong balita nga ang buluhaton nabuksan na niining mga dapita! Sa pagkakaron ang mga misyonaryo gipadala sa daghan niining mga nasora. Ang bag-ong mga sangang buhatan ginatukod sa pipila ka yuta, nga nagpauswag sa boluntaryong mga ministro nga naglangkob sa tibuok-kalibotang pamilyang Bethel ngadto sa kapin sa 15,000. Siyempre, ang mga tinukod nga papuy-an nila kinahanglang paliton o tukoron. Ang inyong mga kontribusyon makatabang sa pagtagana sa panginahanglan.

Kining tanang buluhaton namatikdan ni Satanas ug sa iyang mga demonyo. Gibuhat nila ang tanan sa pagpugong sa mga paningkamot sa matinumanong mga alagad ni Jehova o magpatunghag mga suliran alang kanila. (Pinadayag 12:17) Nagkahulogan kini ug pag-uswag sa gidaghanon sa mga kaso sa pagpanalipod sa mga katungod sa katawhan sa Diyos sa pagsangyaw ug pagpuyo nga kaharmoniya sa iyang matarong nga mga balaod. Dugang pa, ang mga epekto sa gubat sa sistema sa mga butang ni Satanas, maingon man ang kinaiyanhong mga katalagman, nagkahulogan nga ang mga suplay sa hinabang subsob nga gikinahanglan alang sa atong naapektahang mga igsoong lalaki ug babaye ug uban pa nga kauban nila. Ang inyong mga kontribusyon makatabang sa pagtagana niining hinungdanong tabang.

Si Jehova Magaganti Kaninyo

Ang madagayaong paggamit sa atong panahon ug salapi sa pagpalambo sa buluhaton sa Ginoo magdalag dagkong mga panalangin. Sa unsang paagi? Tungod kay ang Diyos, nga maoy tag-iya sa tanang butang, magaganti kanato. Ang Proverbio 11:25 nag-ingon: “Ang kalag nga mahinatagon pagapatambokon, ug ang usa nga nagabisibis sa uban pagabisibisan usab sa iyang kaugalingon.” Sa pagkatinuod si Jehova mahimuot sa dihang buhaton nato ang atong bahin sa pagpalambo sa iyang pagsimba. (Hebreohanon 13:15, 16) Gisaaran niya ang karaang mga Israelinhon kinsa nagdalag mga kontribusyon nga gikinahanglan ilalom sa pakigtugon sa Balaod: “‘Sulayi ninyo ako, palihog, niining bahina,’ si Jehova sa mga panon nag-ingon, ‘kondili ba buksan ko kaninyo ang mga tamboanan sa mga langit ug sa pagkatinuod buboan ko kamo sa panalangin hangtod nga wala nay panginahanglan.’” (Malakias 3:10) Ang espirituwal nga kauswagan nga napahimuslan karong adlawa sa mga alagad ni Jehova maoy pamatuod nga ang Diyos nagtuman sa iyang saad.

Kining dakong buluhaton sa pagpahayag ngadto sa tanan sa adlaw sa kaluwasan ug pagtabang sa matinud-anog-kasingkasing nga mga tawo diha sa dalan sa kinabuhi dili magpadayon hangtod sa hangtod. (Mateo 7:14; 2 Corinto 6:2) Apan kadtong tanan sa “ubang mga karnero” sa Ginoo kinahanglang tigomon. (Juan 10:16) Pagkakinahanglanon gayod nga atubangon ang hagit karong adlawa! Ug pagkamalipayon sa matag usa kanato, nga maghandom diha nianang bag-ong kalibotan sa pagkamatarong, nga moingon, ‘Bug-os akong nakig-ambit nianang kataposang pagpanigom nga buluhaton’!​—2 Pedro 3:13.

[Kahon sa panid 30, 31]

Kon sa Unsang Paagi ang Pipila Moamot sa Buluhatong Pagwali sa Gingharian

MGA KONTRIBUSYON ALANG SA TIBUOK-KALIBOTANG BULUHATON: Daghan ang mogahin o mobadyet ug kantidad nga ilang ikahulog sa mga kahon sa amot nga gitiman-an: “Mga Amot Alang sa Tibuok-Kalibotang Buluhaton sa Sosyedad​—Mateo 24:14.” Sa matag bulan ang mga kongregasyon magpadala niining kantidara sa Watch Tower Bible and Tract Society of the Philippines, o kaha sa lokal nga sangang buhatan.

MGA GASA: Ang boluntaryong mga donasyon nga salapi ikapadalang direkta sa Watch Tower Bible and Tract Society of the Philippines, P.O. Box 2044, 1099 Manila, o ngadto sa sangang-buhatan sa Sosyedad nga nagaalagad sa inyong nasod. Ang alahas o ubang mahalong mga butang ikadonar usab. Ang mubong sulat nga magapahayag nga kana maoy laktod nga donasyon angay magauban sa maong mga amot.

KONDISYONAL-DONASYONG KAHIKAYAN: Ang kuwarta ikahatag ngadto sa Watch Tower Society nga huptang sinalig hangtod sa kamatayon sa nagdonar, uban ang probisyon nga enkaso sa personal nga panginahanglan, kini iuli ngadto sa nagdonar.

SEGURO: Ang Watch Tower Society kanganlan nga manununod sa usa ka polisa sa seguro o life-insurance o sa plano sa pagretiro/pensiyon. Ang Sosyedad angayng pahibaloon sa maong kahikayan.

MGA KUWARTA SA BANGKO: Mga kuwarta sa bangko, mga sertipiko sa deposito, o kuwarta sa usa alang sa pagretiro mahimong ikabutang nga in trust for o gihimong payable on death to sa Watch Tower Society, nga nahasubay sa lokal nga mga latid sa bangko. Ang Sosyedad angayng pahibaloon sa maong mga kahikayan.

MGA STOCK UG BOND: Ang mga stock ug bond mahimong ikadonar sa Watch Tower Society pinaagi sa dihadiha nga gasa o ubos sa usa ka kahikayan nga ang kitaon padayon nga madawat sa nagdonar.

BALAY UG YUTA: Ang arang ikabaligya nga balay ug yuta mahimong ikadonar sa Watch Tower Society pinaagi sa dihadiha nga gasa o magbilin ug luna alang sa nagdonar samtang buhi, nga siya makapadayon sa pagpuyo dinha sulod sa iyang pagkinabuhi. Ang usa angay nga mokontak una sa Sosyedad una pa dokumentahan ang bisan unsang balay ug yuta ngadto sa Sosyedad.

MGA WILL UG TRUST: Ang mga kabtangan o salapi mahimong ikabilin sa Watch Tower Society pinaagi sa usa ka legal pagkahimo nga testamento, o ang Sosyedad mahimong kanganlan ingong manununod sa usa ka kasabotan sa trust. Ang usa ka trust nga usa ka relihiyosong organisasyon ang makabenepisyo mahimong may tinong bentaha bahin sa buluhisan. Ang usa ka kopya sa testamento o kasabotan sa trust kinahanglang ipadala sa Sosyedad.

GIPLANONG PAGHATAG: Ang Sosyedad nag-andam ug usa ka Ingles-ug-pinulongang brosyur nga nag-ulohang “Planned Giving.” Kadtong anaa sa Tinipong Bansa nga nagplanong mohimog linaing gasa ngadto sa Sosyedad karon o magbilin ug panulondon inigkamatay makakaplag tingali nga makatabang kining impormasyona. Kana ilabinang tinuod kon buot nilang kab-oton ang usa ka tumong sa pamilya o tumong nga himoong kabilin ang balay ug yuta samtang nagagamit sa legal nga mga probisyon sa pagpakunhod sa mga buhis nga gibaod.

Alang sa dugang impormasyon mahitungod sa bisan unsang mga butang sa ibabaw, pagsulat sa Watch Tower, P.O. Box 2044, 1099 Manila, o sa sangang buhatan sa Sosyedad nga nag-alagad sa inyong nasod.