Mga Saksi ni Jehova sa Tibuok Kalibotan—Ang Republika sa Pilipinas

ANG 7,083 ka bukiron tropikanhong mga isla nga nagporma sa Republika sa Pilipinas mao ang ibabawng seksiyon sa usa ka bahin sa nalusbog nga pundok sa kabukiran.a Ug ang 62,000,000 ka molupyo sa Pilipinas mahigugmang makig-estorya sa halos bisan unsang ulohan. Kining mahigalaong espiritu misangpot ug usa ka tabonok nga natad alang sa pagsangyaw sa Gingharian.

Pagsangyaw Diha sa Eskuylahan

Sa isla sa Masbate, usa ka batan-ong estudyante sa hayskul nakasangyaw sa iyang magtutudlo ug sa klase panahon sa eksaminasyon nga matuod-bakak. Siya mitaho:

“Ang mga pulong mao, ‘Kon gihigugma ako sa Diyos, dili niya ako hatagag mga suliran o tugotan akong mag-antos.’ Sa dihang gitsekan sa akong magtutudlo ang among mga papel sa eksaminasyon, iyang nakita nga ang tanan gawas nako mitubag ug matuod. Gitugotan ako sa magtutudlo sa pagpatin-aw ngadto sa klase kon nganong bakak ang akong tubag. Miingon ako nga dili ang Diyos ang naghatag kanato ug mga suliran, bisan tuod nga iyang gitugot ang mga pag-antos ug nagtugot kanato nga masulayan. Migamit sa akong Bibliya, nga kanunay nakong ginadala sa eskuylahan, nangatarongan ako sa klase pinaagi sa mga pulong diha sa 1 Juan 4:8, nga ‘ang Diyos gugma.’ Human sa akong pagpatin-aw, nakombinsir ang akong magtutudlo, gipukpok ang iyang lamesa, ug miingon: ‘Si Marilou husto.’ Ako lamang ang nakakuhag hustong tubag niini nga pangutana ug nakadawat sa labing taas nga grado.”

Ang Mensahe sa Gingharian Anaa sa Tanang Dapit

Samtang nakigbahin sa balay-ug-balay nga pag-alagad sa laing bahin sa Pilipinas, usa ka regular payunir (bug-os panahong magwawali sa maayong balita) nakahimamat ug inahan nga may tulo ka gagmayng anak. Ang babaye nagpakita ug dakong kaikag sa mensahe sa Gingharian, ug nagpasayon kini sa pagsugod ug pagtuon sa Bibliya uban kaniya. Bisag ang iyang bana wala malipay nga siya nagadawat ug mga leksiyon sa Bibliya, ilabina gikan sa mga Saksi ni Jehova, ang pagtuon nagpadayon.

Gibalhin sa lalaki ang iyang pamilya sa laing siyudad, nga nagtuo nga makatapos na kini sa pagpakig-uban sa iyang asawa sa mga Saksi. Hinunoa, wala magdugay nakit-an nila kining babayehana, ug iyang gipadayon ang iyang pagtuon sa Bibliya. Siyempre, ang iyang bana nasuko. Iyang gidala ang iyang kasuko diha sa iyang trabaho, diin iyang gipahungaw ang iyang pagbati sa usa ka kustomer kansang sakyanan iyang giayo. Wala mahibalo ang tawo niana, ang maong kustomer maoy usa sa mga Saksi ni Jehova.

Gipatin-aw sa Saksi nga mohatag ug dakong kaayohan sa tibuok pamilya kon magpadayon ang iyang asawa sa iyang mga leksiyon sa Bibliya. Iyang masugdan dihadiha ang pagpadapat sa mga prinsipyo sa Bibliya sa balay. Gisugyot usab nga ang bana mismo makabatog kaayohan pinaagi sa pagtuon bahin sa Gingharian sa Diyos.

Unsay misangpot niini nga panagsultihay? Ang asawa sa lalaki may dako nang kagawasan sa pagtuon sa Bibliya, ug siya mihukom sa pagbalhin sa iyang pamilya balik sa ilang orihinal nga pinuy-anan. Didto ang babaye miuswag sa espirituwal hangtod sa punto sa pagkahimong usa ka dili-bawtismadong magmamantala sa Gingharian. Ang iyang bana midawat usab ug pagtuon sa Bibliya, ug ang tibuok pamilya nagsugod sa pagtambong sa Kristohanong mga tigom.

[Mga footnote]

[Kahon sa panid 8]

LARAWAN SA NASOD

1993 Tuig sa Pag-alagad

KINATAS-ANG GIDAGHANONG NAGSANGYAW: 116,576

PROPORSIYON: 1 ka Saksi sa 549

TUMATAMBONG SA MEMORYAL: 357,388

ABERIDS NGA PAYUNIR NGA MGA MAGMAMANTALA: 22,705

ABERIDS NGA MGA PAGTUON SA BIBLIYA: 94,370

GIDAGHANON SA NABAWTISMOHAN: 7,559

GIDAGHANON SA MGA KONGREGASYON: 3,332

SANGANG BUHATAN: MANILA

[Hulagway sa panid 9]

Ang pagsangyaw sa tiyanggihan may maayong mga resulta

[Hulagway sa panid 9]

Sangang buhatan sa Watchtower Society sa Manila