Diyosnong Pagtulon-an Batok sa mga Pagtulon-an sa mga Demonyo
“Ang pipila mahulog gikan sa pagtuo, nga managtagad sa nagapahisalaag nga inspiradong mga pamulong ug mga pagtulon-an sa mga demonyo.”—1 TIMOTEO 4:1.
1. Unsang bugno nga ang mga Kristohanon anaa sa taliwala?
HANDURAWA nga nagapuyo ka sa tibuok nimong kinabuhi sa usa ka dapit nga may gubat. Sama kaha sa unsa ang paghigda aron matulog samtang makabati sa rakrak sa pusil ug mahigmata tungod sa butobuto sa kanyon? Ikasubo, sa pila ka bahin sa kalibotan, kana gayod ang kinabuhi sa mga tawo. Hinuon, sa espirituwal nga diwa ang tanang Kristohanon nagkinabuhi sa ingon. Sila anaa sa taliwala sa usa ka dakong bugno nga nagsilaob na sulod sa mga 6,000 ka tuig ug migrabe sa atong mga adlaw. Unsa ba kining tibuok-kinabuhing bugno? Ang bugno sa kamatuoran batok sa kabakakan, sa diyosnong pagtulon-an batok sa mga pagtulon-an sa mga demonyo. Dili paghingapin nga tawgon kini—labing menos sa bahin sa usa sa mga kaatbang—nga labing way-kaluoy ug labing makapatay nga panag-away sa kasaysayan sa tawo.
2. (a) Sumala kang Pablo, unsang duha ka kiliran ang nag-atbangay sa usag usa? (b) Unsay gipasabot ni Pablo sa “ang pagtuo”?
2 Si apostol Pablo naghisgot sa duha ka kiliran niining panag-awaya sa misulat siya kang Timoteo: “Ang inspiradong pamulong nagaingon sa tino nga sa ulahing mga yugto sa panahon adunay pipila nga mahulog gikan sa pagtuo, nga managtagad sa nagapahisalaag nga inspiradong mga pamulong ug mga pagtulon-an sa mga demonyo.” (1 Timoteo 4:1) Matikdi nga ang mga pagtulon-an sa mga demonyo makaimpluwensiya ilabina sa “ulahing mga yugto sa panahon.” Kon isipon gikan sa adlaw ni Pablo, kita nagapuyo sa ingon nga panahon. Matikdi, usab, kon unsay nagsupak sa mga pagtulon-an sa mga demonyo, nga mao “ang pagtuo.” Dinhi, “ang pagtuo” naghawas sa diyosnong pagtulon-an, nga gibase sa balaang inspiradong mga pamulong sa Diyos nga anaa sa Bibliya. Ang maong pagtuo nagahatag ug kinabuhi. Kini nagtudlo sa usa ka Kristohanon sa pagbuhat sa kabubut-on sa Diyos. Kini mao ang kamatuoran nga motultol sa kinabuhing dayon.—Juan 3:16; 6:40.
3. (a) Unsay mahitabo sa mga biktima sa bugno tali sa kamatuoran ug sa kabakakan? (b) Kinsa ang nagpaluyo sa mga pagtulon-an sa mga demonyo?
3 Si bisan kinsa nga mahulog gikan sa pagtuo dili makaangkon sa walay-kataposang kinabuhi. Sila mao ang mga biktima sa gubat. Pagkamakapasubo nga sangpotanan tungod sa pagtugot sa kaugalingon nga mapahisalaag sa mga pagtulon-an sa mga demonyo! (Mateo 24:24) Sa unsang paagi kita ingong mga indibiduwal makalikay nga mahimong mga biktima? Pinaagi sa bug-os nga pagsalikway niining bakak nga mga pagtulon-an, nga nagasilbi lang sa katuyoan sa “magmamando sa mga demonyo,” si Satanas nga Yawa. (Mateo 12:24) Matagna gayod, ang mga pagtulon-an ni Satanas maoy mga bakak, sanglit si Satanas mao “ang amahan sa bakak.” (Juan 8:44) Tagda kon giunsa niya paggamit nga mahanason ang mga bakak aron sa pagpahisalaag sa atong unang mga ginikanan.
Mga Pagtulon-an sa mga Demonyo Gipadayag
4, 5. Unsang bakak ang gisulti ni Satanas kang Eva, ug nganong kadto tuman ka daotan?
4 Ang mga hitabo gitala diha sa Bibliya sa Genesis 3:1-5. Pinaagi sa paggamit ug usa ka bitin, giduol ni Satanas ang babayeng si Eva ug gisukna siya: “Matuod ba gayod nga ang Diyos miingon nga dili kamo magakaon gikan sa matag kahoy sa tanaman?” Ang pangutana maorag dili makadaot, apan tan-awa kana pag-usab. “Matuod ba gayod?” Si Satanas morag natingala, nga daw miingon, ‘Nganong mosulti man ang Diyos ug ingon niana?’
5 Tungod sa iyang pagkainosente, gipaila ni Eva nga kadto tinuod. Nasayran niya ang diyosnong pagtulon-an bahin niadto, nga giingnan sa Diyos si Adan nga sila mamatay kon sila mokaon gikan sa kahoy sa kahibalo sa maayo ug daotan. (Genesis 2:16, 17) Ang pangutana ni Satanas lagmit mipukaw sa iyang interes, mao nga siya namati samtang siya nakaabot sa dakong punto sa iyang pangatarongan: “Niini ang bitin miingon ngadto sa babaye: ‘Dili gayod kamo mamatay.’” Pagkadaotan nga butang isulti! Si Satanas nag-akusar kang Jehova, ang Diyos sa kamatuoran, ang Diyos sa gugma, ang Maglalalang, nga nagbakak ngadto sa Iyang tawhanong mga anak!—Salmo 31:5; 1 Juan 4:16; Pinadayag 4:11.
6. Giunsa paghagit ni Satanas ang pagkamaayo ug pagkasoberano ni Jehova?
6 Apan labaw pa ang gisulti ni Satanas. Siya mipadayon sa pagsulti: “Kay ang Diyos nahibalo nga sa adlaw mismo sa inyong pagkaon gikan niini ang inyong mga mata mangabuka ug kamo mahisama sa Diyos, nga nahibalo sa maayo ug daotan.” Sumala ni Satanas, si Jehova nga Diyos—nga nakataganag dagaya kaayo alang sa atong unang mga ginikanan—buot maghikaw kanila sa butang nga kahibulongan. Buot niyang mapugngan sila sa pagkahimong sama sa mga diyos. Sa ingon, si Satanas mihagit sa pagkamaayo sa Diyos. Siya nagpasiugda usab sa pagtagbaw-sa-kaugalingon ug sa tinuyong dili pagtagad sa mga balaod sa Diyos, nga nag-ingon nga ang paglihok sa maong paagi makaayo. Sa pagkamatuod, si Satanas mihagit sa pagkasoberano sa Diyos ibabaw sa Iyang kalalangan mismo, nga nagpatuo nga ang Diyos walay katungod sa pagbutang ug mga limitasyon sa pagabuhaton sa tawo.
7. Kanus-a unang nadunggan ang mga pagtudlo sa mga demonyo, ug sa unsang paagi kini sila susama karong adlawa?
7 Pinaagi nianang mga pulonga ni Satanas, ang mga pagtudlo sa mga demonyo nasugdan sa pagkadungog. Kining daotang mga pagtudlo sa gihapon nagpasiugda sa susamang dili-diyosnong mga prinsipyo. Sama sa iyang gibuhat sa tanaman sa Eden, si Satanas, nga niadtong tungora gikuyogan na sa ubang rebelyosong mga espiritu, naghagit gihapon sa katungod sa Diyos sa pagbutang ug mga sukdanan sa paglihok. Siya naglalis gihapon sa pagkasoberano ni Jehova ug nagsulay pag-impluwensiya sa mga tawo aron mosupak sa ilang langitnong Amahan.—1 Juan 3:8, 10.
8. Unsay giwala ni Adan ug Eva sa Eden, apan sa unsang paagi si Jehova nakitang matinud-anon?
8 Niadtong unang pagharongay sa bugno tali sa diyosnong pagtudlo ug sa mga pagtudlo sa mga demonyo, si Adan ug si Eva mihimog usa ka sayop nga desisyon ug nawad-an sa ilang paglaom sa walay-kataposang kinabuhi. (Genesis 3:19) Sa miaginod ang katuigan ug ang ilang mga lawas misugod pagkadaot, napamatud-an nga igo alang kanila kon kinsay namakak ug kon kinsay nagsulti sa tinuod didto sa Eden. Bisan pa, ginatos ka tuig una sila mamatay sa lawasnong diwa, sila nahimong unang mga biktima sa bugno tali sa kamatuoran ug kabakakan sa dihang gihukman silang dili-takos sa kinabuhi sa ilang Maglalalang, ang Tinubdan sa kinabuhi. Kadto maoy sa panahong sila namatay sa espirituwal nga diwa.—Salmo 36:9; itandi ang Efeso 2:1.
Ang mga Pagtudlo sa mga Demonyo Karong Adlawa
9. Unsa ka epektibo ang mga pagtudlo sa mga demonyo latas sa kasiglohan?
9 Sumala sa nahitala diha sa basahong Pinadayag, si apostol Juan gidala pinaagig pagkadinasig hangtod sa “ang adlaw sa Ginoo,” nga nagsugod sa 1914. (Pinadayag 1:10) Niadtong panahona si Satanas ug ang iyang mga demonyo gitambog gikan sa langit nganhi sa silinganan sa yuta—usa ka dakong kapakyasan alang niining maong magsusupak sa atong Dakong Maglalalang. Ang iyang tingog dili na madungog sa langit nga kanunayng nagahimog mga sumbong batok sa mga alagad ni Jehova. (Pinadayag 12:10) Apan, unsang pag-uswag ang nahimo sa mga pagtudlo sa mga demonyo sa yuta sukad sa Eden? Ang talaan nag-ingon: “Busa gitambog ang dakong dragon, ang orihinal nga halas, ang usa nga gitawag Yawa ug Satanas, kinsa nagapahisalaag sa tibuok gipuy-ang yuta.” (Pinadayag 12:9) Ang tibuok nga kalibotan nagpadaog sa mga bakak ni Satanas! Dili katingad-ang si Satanas gitawag “ang magmamando niining kalibotana”!—Juan 12:31; 16:11.
10, 11. Sa unsang mga paagi si Satanas ug ang iyang mga demonyo aktibo karong adlawa?
10 Giangkon ba ni Satanas ang kapildihan human sa pagpalagpot kaniya gikan sa langit? Wala gayod! Siya determinado sa pagpadayon sa pagpakigbugno batok sa diyosnong pagtulon-an ug niadtong mohawid niana. Human sa pagpalagpot kaniya gikan sa langit, si Satanas mipadayon sa iyang pakiggubat: “Ang dragon [Satanas] napungot sa babaye, ug miadto aron makiggubat sa mga nahibilin sa iyang binhi, nga nagasunod sa sugo sa Diyos ug may buluhaton sa pagpanaksi bahin kang Jesus.”—Pinadayag 12:17.
11 Dugang pa sa pagpakiggubat sa mga alagad sa Diyos, gipalunopan ni Satanas ang kalibotan sa iyang propaganda, nga naningkamot sa pagpadayon sa iyang paghawid sa katawhan. Sa usa sa iyang mga panan-awon sa Pinadayag bahin sa adlaw sa Ginoo, nakita ni apostol Juan ang tulo ka ihalas nga mananap nga simbolikong naghawas kang Satanas, sa iyang yutan-ong politikanhong organisasyon, ug sa dominanteng gahom sa kalibotan sa atong panahon. Gikan sa mga baba niining tulo, ang mga baki migula. Unsay gisimbolohan niini? Si Juan misulat: “Sila, sa pagkatinuod, mga pahayag nga inspirado sa mga demonyo ug nagahimog mga ilhanan, ug sila nangadto sa mga hari sa tibuok gipuy-ang yuta, aron sa pagtigom kanila ngadto sa gubat sa dakong adlaw sa Diyos nga Labing-Gamhanan.” (Pinadayag 16:14) Tin-aw, ang mga pagtudlo sa mga demonyo aktibo kaayo sa yuta. Si Satanas ug ang iyang mga demonyo nagapakiggubat gihapon batok sa diyosnong pagtudlo, ug mopadayon sila sa pagbuhat niana hangtod nga sila pinaagi sa pakusog pahunongon ni Jesu-Kristo, ang Mesiyasnong Hari.—Pinadayag 20:2.
Pag-ila sa mga Pagtulon-an sa mga Demonyo
12. (a) Nganong posible ang pagsukol sa mga pagtudlo sa mga demonyo? (b) Giunsa ni Satanas pagtinguha sa pagkab-ot sa iyang mga katuyoan kon bahin sa mga alagad sa Diyos?
12 Ang mga tawong mahadlokon sa Diyos makasukol ba sa mga pagtulon-an sa mga demonyo? Makasukol gayod sila, tungod sa duha ka katarongan. Nahauna, tungod kay ang diyosnong pagtulon-an mas kusganon; ug ikaduha, tungod kay si Jehova nagyagyag sa mga estratehiya ni Satanas aron kita makasukol niana nila. Sumala sa giingon ni apostol Pablo, “dili man kita walay alamag sa iyang mga laraw.” (2 Corinto 2:11) Kita nahibalo nga si Satanas mogamit sa paglutos ingong usa ka paagi sa pagkab-ot sa iyang katuyoan. (2 Timoteo 3:12) Ugaling, labi pang malalangon, siya magtinguha sa pag-impluwensiya sa mga hunahuna ug mga kasingkasing niadtong nag-alagad sa Diyos. Siya nagpahisalaag kang Eva ug nagbutang sa daotang mga tinguha diha sa iyang kasingkasing. Siya mosulay sa samang butang karong adlawa. Si Pablo misulat ngadto sa mga taga-Corinto: “Ako nahadlok nga sa unsa mang paagi, ingon nga ang halas nagdaldal kang Eva pinaagi sa lipatlipat niini, basin unyag ang inyong mga kaisipan madaot gikan sa katim-os ug kaputli nga angay sa Kristo.” (2 Corinto 11:3) Tagda kon giunsa niya pagdaot ang panghunahuna sa katawhan sa kinatibuk-an.
13. Unsang kabakakan ang gisulti ni Satanas sa katawhan sukad sa Eden?
13 Ngadto kang Eva, si Satanas nag-akusar nga si Jehova namakak ug miingon nga ang mga tawo mahisama sa mga diyos kon mosupak sila sa ilang Maglalalang. Ang makasasalang kahimtang sa katawhan karong adlawa nagpamatuod nga si Satanas, dili si Jehova, ang bakakon. Ang mga tawo karong adlawa dili man mga diyos! Bisan pa, gipasundan ni Satanas ug ubang mga bakak kadtong unang bakak. Siya nagpailaila sa ideya nga ang tawhanong kalag maoy imortal, dili mamatay. Sa ingon iyang gitental ang katawhan sa posibilidad nga mahimong sama sa mga diyos sa laing paagi. Unya, pinasukad nianang bakak nga doktrina, gipasiugda niya ang mga pagtulon-an sa impiyernong-kalayo, purgatoryo, espiritismo, ug pagsimba sa katigulangan. Kining mga bakaka nag-ulipon gihapon sa ginatos ka milyon.—Deuteronomio 18:9-13.
14, 15. Unsa ang kamatuoran mahitungod sa kamatayon ug sa paglaom sa tawo sa umaabot?
14 Siyempre, ang gisulti ni Jehova kang Adan mao ang kamatuoran. Si Adan namatay gayod sa dihang siya nakasala batok sa Diyos. (Genesis 5:5) Sa dihang si Adan ug ang iyang mga kaliwat namatay, sila nahimong patay nga mga kalag, nga walay panimuot ug dili makalihok. (Genesis 2:7; Ecclesiastes 9:5, 10; Ezekiel 18:4) Kay nakapanunod sa sala gikan kang Adan, ang tanang tawhanong kalag mamatay. (Roma 5:12) Ugaling, balik sa Eden si Jehova misaad nga moabot ang usa ka binhi nga maoy mobuntog sa mga buhat sa Yawa. (Genesis 3:15) Ang maong Binhi mao si Jesu-Kristo, ang bugtong Anak sa Diyos. Si Jesus namatay nga walay sala, ug ang iyang gihalad nga kinabuhi nahimong usa ka lukat aron sa pagtubos sa katawhan gikan sa ilang himalatyong kahimtang. Kadtong sa kamasinugtanon magpakitag pagtuo kang Jesus adunay higayon nga makadawat ug walay-kataposang kinabuhi nga giwala ni Adan.—Juan 3:36; Roma 6:23; 1 Timoteo 2:5, 6.
15 Ang lukat, dili ang lubog nga ideya nga ang usa ka kalag magpadayong buhi sa pagkamatay, mao ang tinuod nga paglaom alang sa katawhan. Kini mao ang diyosnong pagtulon-an. Kini mao ang kamatuoran. Kini usab maoy usa ka kahibulongang pasundayag sa gugma ug kaalam ni Jehova. (Juan 3:16) Angay gayod nga kita magpasalamat nga nakakat-on sa maong kamatuoran ug naluwas gikan sa mga pagtulon-an sa mga demonyo niining mga butanga!—Juan 8:32.
16. Unsa ang layog-tagal nga sangpotanan sa dihang sundon sa mga tawo ang ilang kaugalingong kaalam?
16 Pinaagi sa iyang mga bakak sa tanaman sa Eden, si Satanas nagdasig kang Adan ug Eva sa pagpangandoy nga mahimong independente gikan sa Diyos ug sa pagsalig sa ilang kaalam mismo. Karong adlawa, atong makita ang layog-tagal nga sangpotanan niana diha sa krimen, kalisdanan sa pangabuhi, mga gubat, ug hingaping kawalay-panag-angay nga naglungtad sa kalibotan karong adlawa. Dili katingad-ang ang Bibliya nag-ingon: “Ang kaalam niining kalibotana maoy kabuangan sa Diyos”! (1 Corinto 3:19) Bisan pa niana, sa kabinuang kadaghanang tawo mopalabi sa pag-antos inay kay mamati sa mga pagtudlo ni Jehova. (Salmo 14:1-3; 107:17) Ang mga Kristohanon, kinsa nagdawat sa diyosnong pagtulon-an, makalikay nga malit-agan niana.
17. Unsang “bakak nga gitawag kahibalo” ang gipasiugda ni Satanas, ug unsa ang mga bunga niini?
17 Si Pablo misulat kang Timoteo: “O Timoteo, bantayi kon unsay gikapiyal kanimo, nga magpahilayo gikan sa mga sulting walay-pulos nga nagapasipala sa kon unsay balaan ug gikan sa mga pagsumpakiay nianang sa bakak gitawag nga ‘kahibalo.’ Tungod sa pagpagawal nianang maong kahibalo ang pipila nahitipas gikan sa pagtuo.” (1 Timoteo 6:20, 21) Ang maong “kahibalo” naghawas usab sa mga pagtulon-an sa mga demonyo. Sa adlaw ni Pablo, kini lagmit nagtumong sa apostatang mga ideya nga gipasiugda sa pipila diha sa mga kongregasyon. (2 Timoteo 2:16-18) Sa ulahi, ang bakak nga gitawag kahibalo, sama sa Gnostisismo ug Gregong pilosopiya, nagdaot sa kongregasyon. Sa kalibotan karong adlawa, ang ateyismo, agnostisismo, mga teoriya sa ebolusyon, ug mga pagsaway sa Bibliya maoy mga pananglitan sa bakak nga gitawag kahibalo, mao usab ang dili-kasulatanhong mga ideya nga gipasiugda sa modernong mga apostata. Ang mga bunga niining tanang bakak nga gitawag kahibalo makita diha sa pagkadaot sa moral, sa kanat nga kawalay-tahod sa awtoridad, sa pagkalimbongan, ug sa kahakog nga maoy timaan sa sistema sa mga butang ni Satanas.
Paghawid sa Diyosnong Pagtulon-an
18. Kinsa karong adlawa ang nagtinguhag diyosnong pagtudlo?
18 Bisan pag gipalunopan ni Satanas ang yuta sa mga pagtulon-an sa mga demonyo sukad sa panahon sa Eden, sa kanunay adunay pipila nga nangita sa diyosnong pagtulon-an. Sila mokabat na sa milyonmilyon karong adlawa. Naglakip sila sa nahibiling dinihogang mga Kristohanon nga nakabaton sa seguradong paglaom nga maghari uban ni Jesus sa iyang langitnong Gingharian ug sa nagdaghan nga dakong panon sa “ubang mga karnero” kansang paglaom mao ang pagpanunod sa yutan-ong dominyo sa maong Gingharian. (Mateo 25:34; Juan 10:16; Pinadayag 7:3, 9) Karong adlawa, kini sila natigom na nganha sa usa ka tibuok-kalibotang organisasyon nga niana mapadapat ang mga pulong ni Isaias: “Ang tanan nimong mga anak maoy mga tawong tinudloan ni Jehova, ug ang kalinaw sa imong mga anak magmadagayaon.”—Isaias 54:13.
19. Unsay naapil sa pagkatinudloan ni Jehova?
19 Ang pagkatinudloan ni Jehova nagkahulogan ug labaw pa kay sa pagkahibalo sa matuod nga doktrina—bisan pag kini hinungdanon. Si Jehova nagtudlo kanato kon unsaon pagkinabuhi, kon unsaon pagpadapat sa diyosnong pagtulon-an diha sa atong personal nga mga kinabuhi. Pananglitan, gisuklan nato ang kahakog, imoralidad, ug espiritu sa independensiya nga kaylap kaayo sa kalibotan alirong nato. Giila nato ang mapintasong pagpangagpas sa bahandi niining kalibotana kon unsa gayod kini—mohatod sa kamatayon. (Santiago 5:1-3) Dili gayod nato hikalimtan ang diyosnong pagtulon-an nga gipahayag diha sa mga pulong ni apostol Juan: “Ayaw ninyo higugmaa ang kalibotan o ang mga butang nga anaa sa kalibotan. Kon ang usa nagahigugma sa kalibotan, ang gugma sa Amahan wala diha kaniya.”—1 Juan 2:15.
20, 21. (a) Unsay gigamit ni Satanas sa iyang paningkamot sa pagbuta sa mga tawo? (b) Unsang mga panalangin ang moabot niadtong mohawid sa diyosnong pagtudlo?
20 Ang epekto sa mga pagtulon-an sa mga demonyo diha sa mga biktima niini makita diha sa mga pulong ni Pablo ngadto sa mga taga-Corinto: “[Si Satanas] nagbuta sa mga hunahuna sa mga dili-magtutuo, aron nga ang banwag sa mahimayaong maayong balita bahin sa Kristo, kinsa mao ang larawan sa Diyos, dili makalapos paglamdag.” (2 Corinto 4:4) Buot ni Satanas nga butaan ang matuod nga mga Kristohanon niining paagiha usab. Balik sa Eden, iyang gigamit ang usa ka serpente sa pagpasalaag sa usa sa mga alagad sa Diyos. Karong adlawa, iyang gigamit ang mapintason o imoral nga mga pelikula ug mga programa sa telebisyon. Gipahimuslan niya ang radyo, mga basahon, ug musika. Usa ka gamhanang hinagiban nga iyang gigamit mao ang daotang panagkauban. (Proverbio 4:14; 28:7; 29:3) Ilha sa kanunay kanang mga butanga kon unsa gayod kana sila—mga kasangkapan ug mga pagtulon-an sa mga demonyo.
21 Hinumdomi, ang mga pulong ni Satanas sa Eden maoy mga bakak; ang mga pulong ni Jehova mao ang tinuod. Sukad niadtong unang mga adlaw, ang maong kahimtang nagpadayon gihapon. Si Satanas sa kanunay napamatud-ang usa ka bakakon, ug ang diyosnong pagtulon-an sa walay pakyas maoy tinuod. (Roma 3:4) Kon kita mohawid sa Pulong sa Diyos, kita sa kanunay maanaa sa madaogong kiliran sa bugno tali sa kamatuoran ug sa kabakakan. (2 Corinto 10:4, 5) Nan, hugot natong ihukom nga isalikway ang tanang pagtulon-an sa mga demonyo. Nianang paagiha kita molahutay hangtod sa panahon nga matapos na ang bugno tali sa kamatuoran ug sa kabakakan. Ang kamatuoran mao unya ang modaog. Si Satanas mawala na, ug ang diyosnong pagtulon-an na lamang ang madungog sa yuta.—Isaias 11:9.
Makasaysay Ka Ba?
◻ Kanus-a unang nadunggan ang demonyohanong mga pagtudlo?
◻ Unsa ang pipila ka bakak nga gipasiugda ni Satanas ug sa iyang mga demonyo?
◻ Sa unsang mga paagi si Satanas labihan ka aktibo karong adlawa?
◻ Unsay gigamit ni Satanas sa pagpasiugda sa mga pagtulon-an sa mga demonyo?
◻ Unsang mga panalangin ang moabot niadtong mohawid sa diyosnong pagtudlo?
[Hulagway sa panid 9]
Ang demonyohanong pagtudlo unang nadunggan sa tanaman sa Eden
[Hulagway sa panid 10]
Ang diyosnong pagtulon-an mahitungod sa lukat ug sa Gingharian nagtagana ug bugtong paglaom alang sa katawhan