Napakyas ba ang Tawhanong Giya?
KINSAY naglalang sa tanang butang? Kon ang imong tubag mao ang “Diyos,” nan ikaw miuyon sa minilyong nagtuo sa Diyos sa Bibliya, ang Maglalalang.
Apan, daghang nagtuo sa Diyos nalisdan sa pagdawat nga siya aktibong nalangkit sa pagsulbad sa mga suliran sa katawhan. Makataronganon ba ang paghunahuna nga ang Diyos adunay programa nga magdalag kahupayan sa katawhan? Daghan ang wala makakaplag ug makataronganong pamatuod nga tinuod kini.
Sa libolibong katuigan, ang mga tawo nakasulay sa dili-maihap nga mga paagi sa pagtabang sa kaugalingon sa pagpangitag mga sulbad, nga wala ilangkit ang Diyos. Apan ang mga tawo ba nakakaplag sa mga sulbad? O ang mga suliran ba nagakagrabe ug lisod sulbaron? Sa unsang paagi ginadumala sa tawo ang dinaliang mga suliran sa kalibotan karong adlawa?
Gipadayag kana sa usa ka eksperto niining paagiha: “Sukad sa kausaban sa Industriya, sobrang gipahimuslan sa naugmad nga mga nasod ang kinaiyanhong mga bahandi sa kalibotan pinaagi sa dili-matagan-an nga mga sumbanan sa paggama ug paggamit, nga nagpahinabo ug kadaot sa tibuok-yutang kalikopan, sa kadaot sa nagakaugmad nga mga nasod.”
Ang tawo nagpadayon sa paglaglag sa yuta. Ang mantalaan sa Argentina nga Clarín mikomento: “Sa ikaduhang katungang bahin niining sigloha, ang kadalo sa salapi, kakulang sa panagana, ug ang kamapinasagdanon maoy nakaingon sa dagkong mga katalagman nga dili lang nakapahinabog kamatayon sa mga tawo kondili nakadaot usab sa kalikopan, nga sa kasagaran sa dili masukod nga gidak-on.”
Ang labihang kakabos karong adlawa daw usa na ka permanenteng bahin sa modernong katilingban. Bisan ang gitawag nga adunahang mga nasod sa kalibotan naglisod tungod sa hingaping kabug-at sa kakabos. Sumala sa The Globe and Mail sa Toronto, Canada, gibanabana nga “un-tersiya sa tanang taga-Canada ang makasinatig kakabos sa ilang kinabuhi kon sila manarbaho na.” Ang mantalaan midugang nga “ang pagkabungkag sa pamilya maoy usa sa pangunang mga katarongan sa kakabos, ug ang kiling nagakakusog sa mga katuigang dili pa dugay.”
Ang pag-abuso sa droga maoy laing ilhanan sa usa ka nagakadaot nga katilingban. Unsay mahimo sa mga tawo niana? Tataw nga gamay lang kaayo. Minilyon ang padayong nakasinati ug pisikal, mental, ug moral nga kadaot ingong direktang resulta sa ilang pag-abuso sa mga narkotiko. Ug ang suliran nagakaylap samag kalayong dili-mapugngan.
Ang mga siyentipiko daw nagakapildi sa gubat batok sa sakit. Tinuod, ang modernong teknolohiya nakadaog ug daghang bugno. Bisan pa, ang pipila ka siyentipikanhong mga paagi mismo nakaamot sa pagtungha sa bag-ong mga matang sa peligrosong mga kagaw nga dili-madutlan ug tambal.
Ang tawhanong mga gobyerno dili makahunong sa kaylap nga mga paglapas sa tawhanong katungod. Pananglitan, bisan pa sa daghang panaad ug mga balaod nga gihimo aron sa pagsanta sa kaulipnan, gibanabana nga sa tibuok kalibotan kapin sa usa ka gatos ka milyong tawo ang napugos sa pagtrabaho ilalom sa mga kahimtang nga susama sa walay-paglaom nga pagkaulipon.
Apan nganong ang tawhanong paggiya napakyas? Tagda kining mga butanga. Ang tawhanong giya nagagikan sa mga tawo—mga tawo nga adunay dagkong mga limitasyon. Ang ilang kasinatian sa kinabuhi mubo ra kaayo ug kasagaran limitado tungod sa pipila ka kultura o mga kahimtang. Ang ilang kahibalo limitado usab. Bisan unsay giya nga ilang mahatag magbanaag sa maong mga limitasyon. Sumala sa giingon ni apostol Pablo, “ang tanan nakasala ug wala makaabot sa himaya sa Diyos.”—Roma 3:23.
Sa pagkatinuod ang kadaghanang suliran ug mga kalisdanan nga ginaagoman sa mas dakong bahin sa katawhan mao ang direkta o dili-direktang resulta sa pagsalikway sa giya sa Diyos. Nan, asa man makaplagan ang maong giya? Sa unsang paagi ang Diyos nagatagana kanatog pagtultol karon? Ang mosunod nga artikulo maghisgot sa mga tubag.