Ilang Pagpangita sa Tinuod nga Relihiyon
SUKAD pa gayod sa pagkabata ang pila ka tawo nangitag makapatagbawng mga tubag sa ilang mga pangutana bahin sa kinabuhi. Sa bata pa, sila tingali nakaatender ug relihiyosong mga serbisyo. Apan daghan kanila ang nakadiskobre nga ang mga tubag nga gihatag o ang rituwal sa simbahan wala gayod makatabang kanila sa pagsagubang sa mga suliran sa kinabuhi.
Tingali moingon sila nga sila sakop gihapon sa relihiyon sa ilang mga ginikanan, bisan pag talagsa ra silang moatender ug relihiyosong mga serbisyo. Sumala sa usa ka obispo sa Iglesya sa Inglaterra, ang ilaha maoy salin nga pagtuo. Gipadaplin na lang nila ang relihiyon. Ang uban, kay naglagot sa kasalingkapaw nga ilang nakita sa relihiyosong mga pundok, bug-os nga nagsalikway sa relihiyon. Apan, ang ilang mga pangutana bahin sa kinabuhi nagpadayon.
Kon Nganong ang Pipila Adunay Seryosong mga Pagduhaduha
Kadaghanang tawo nasayod nga daghang simbahan ang adunay mga ahensiya aron tabangan ang mga walay-puloy-anan, mag-apod-apod ug pagkaon sa mga nanginahanglan, ug magpasiugdag kultural nga mga pasundayag. Apan halos kada adlaw sila makadungog usab ug mga balita bahin sa kapintasan ug pag-ulag-dugo gumikan sa relihiyon dili lamang taliwala sa mga dili-Kristohanon kondili taliwala usab niadtong nag-angkong mga Kristohanon. Angay bang matingala kita kon sila magduhaduha nga kanang mga grupoha nga nalangkit sa maong kapintasan nagatuman sa tinuod nga relihiyon?
Daghan nga namatuto nga may relihiyon tighunahuna nga ang mga balay sa ilo nga gipasiugda sa mga simbahan maoy usa ka maayong butang. Apan, sa katuigang bag-o pa sila nalisang samtang ang mga pari sa sunodsunod nga dapit gikiha nga nag-abusar sa seksuwal nga paagi sa mga bata nga gisalig kanila. Sa sinugdan ang mga tawo naghunahuna nga pila ra ka pari ang sad-an. Karon ang pipila ka tawo nahibulong kon kaha may pangunang kadaot mismo sa simbahan.
Ang pipila, sama kang Eugenia, sa usa ka panahon dulot nga nalangkit sa ilang relihiyon. Ingong usa ka batan-on sa Argentina, siya nahiapil niadtong tighimog mga balaang panaw aron mosimba sa Birhen sa Itatí. Sulod sa 14 ka tuig siya nagpuyo sa usa ka kombento ingong madre. Unya siya migawas aron mahimong bahin sa usa ka internasyonal relihiyoso-politikanhong grupo nga nagpasiugda sa dihadiha, radikal nga kausaban sa sosyal ug ekonomikanhong mga gambalay sa katilingban pinaagig rebolusyon. Ingong sangpotanan sa iyang nakita ug nasinati, siya nawad-ag pagtuo ug pagsalig sa Diyos. Siya wala gayod mangita sa usa ka relihiyon nga iyang katuohan. Ang iyang gitinguha mao ang paagi sa pagpatunghag hustisya alang sa mga kabos—oo, ug usa ka higala nga iyang kasaligan.
Ang uban naniid kon unsay nagakahitabo sulod sa mga simbahan ug nagpahilayo sa mga simbahan. Ang usa ka ateyista kansang mga panghunahuna napatik sa 1991 diha sa magasing Sputnik prangkang miingon: “Wala akoy nakita nga bisan unsang bililhong kalainan tali sa mga kinaiyahan sa pagano ug sa Kristohanong mitolohiya.” Ingong usa ka pananglitan, gibatbat niya ang usa ka prosisyon nga niana ang mga paring nagsul-ob sa bulawan-ug-borda nga mga kupo hinayhinayng nagpas-an sa usa ka batong lungon nga may embalsamadong lawas latas sa kadalanan sa Moscow. Kadto ang lawas sa “usa ka Ortodoksong Kristohanong santos” nga gibalhin gikan sa usa ka museyo ngadto sa usa ka simbahan, ug kana nagpahinumdom sa magsusulat bahin sa mga pari ug mga embalsamadong lawas sa karaang Ehipto. Siya nahinumdom, usab, nga samtang kadtong miapil sa prosisyon sa Moscow nagtuo sa “Kristohanong Trinidad,” ang mga Ehiptohanon nagsimba usab sa usa ka trinidad sa mga diyos—si Osiris, si Isis, ug si Horus.
Ang maong magsusulat nagtumong sa Kristohanong ideya sa gugma—“ang Diyos gugma,” ug “higugmaa ang imong silingan”—ingong walay katumbas diha sa paganong Ehipto. Apan siya miingon: “Ang inigsoong gugma napakyas sa pagdaog diha sa kalibotan, bisan nianang bahin nga nagtawag sa kaugalingon nga Kristohanong kalibotan.” Ug iya kanang gisundan sa mga komento mahitungod sa daotang mga bunga gumikan sa pagpugos sa simbahan nga malangkit sa mga kahikayan sa Estado. Ang iyang nakita wala magtukmod kaniya sa pagbati nga ang mga simbahan sa Kakristiyanohan nagtanyag kon unsay iyang gipangita.
Sa kasukwahi, ang uban nakakaplag sa makapatagbawng mga tubag apan dili diha sa mga simbahan sa Kakristiyanohan.
Iyang Nasayran ang Kamatuoran Bahin sa mga Patay
Si Magdalena, kinsa karon maoy 37 anyos, nagpuyo sa Bulgaria. Sa pagkamatay sa iyang ugangang-lalaki niadtong 1991, siya naguol kaayo. Balikbalik niyang gisukna ang iyang kaugalingon, ‘Asa mopaingon ang mga patay? Hain na ang akong ugangang-lalaki?’ Siya miadto sa simbahan, ug siya miampo atubangan sa usa ka larawan sa balay, apan wala siya makabatog mga tubag.
Unya usa ka adlaw ang usa ka silingan mitelepono aron dapiton siya sa pagduaw sa iyang balay. Ang usa ka batan-ong lalaki nga nagtuon uban sa mga Saksi ni Jehova nagduaw sa silingan. Namati siya samtang gihisgotan sa batan-ong lalaki ang mahitungod sa Gingharian sa Diyos ug ang Iyang katuyoan nga himoong paraiso ang yuta diin ang mga tawo mabuhing walay kataposan diha sa kalipay. Diha sa lamesa ang librong Ikaw Mabuhing Walay Kataposan sa Paraiso sa Yuta. Nga gigamit kana, ang batan-ong lalaki nagtultol sa iyang pagtagad ngadto sa teksto sa Bibliya sa Ecclesiastes 9:5, nga nag-ingon: “Mahitungod sa mga patay, sila wala mahibalo sa bisan unsa pa.” Niadtong gabhiona mibasa siyag dugang pa. Iyang nasayran nga ang mga patay wala moadto sa laing kinabuhi sa langit o sa impiyerno; sila wala mahibalo sa bisan unsa pa, nga samag nahinanok sa pagkatulog. Sa malipayon gidawat niya ang imbitasyon sa pagtambong sa usa ka tigom sa lokal nga kongregasyon sa mga Saksi ni Jehova. Human sa tigom siya miuyon sa usa ka regular nga pagtuon sa Bibliya. Kay nakapaniid sa panagtigom sa paaging gihimo ang mga pag-ampo kang Jehova, siya usab misugod sa pag-ampo kang Jehova alang sa tabang aron mabuntog ang usa ka nakadulot-ug-lalom nga kahuyangan. Sa gitubag ang iyang pag-ampo, iyang nasayran nga iyang nakaplagan ang tinuod nga relihiyon.
Nakaplagan Nila ang Kinabuhi nga Adunay Kahulogan
Si André nagdako sa usa ka hugot nga Katolikong panimalay sa Belgium ug nakaalagad nga luyoluyo sa lokal nga pari. Bisan pa niana, niadtong panahona, siya nakakitag mga butang nga nagdaot sa iyang pagtahod alang sa simbahan. Ingong sangpotanan, siya nahimong Katoliko lamang sa ngalan.
Sulod sa 15 ka tuig siya nakadulag propesyonal nga saker. Sa usa ka higayon sa dihang ang iyang tem nakigbangga sa Italya, sila naimbitar nga makigkita sa papa. Walay butang nga makapalig-on sa espirituwal niadtong duawa, ug ang kalibotanong bahandi nga naglibot sa papa nakapalagot kang André. Ang iyang mga pagduhaduha bahin sa simbahan misamot. Ang iyang pribadong kinabuhi masulob-on tungod sa duha ka nagkabulag nga kaminyoon. Ang kahimtang sa kalibotan nakapahiubos kaniya. Niadtong 1989 siya misulat diha sa iyang talaadlawan: ‘Unsa ang kahulogan sa tanang binuang nga butang nga nagakahitabo alirong nato?’ Wala siya makakaplag ug mga tubag gikan sa iyang relihiyon.
Niadtong 1990, sa dihang si André nagtrabaho isip usa ka coach sa saker sa Iceland, si Iiris, usa ka misyonaryo sa mga Saksi ni Jehova, nakahibalag kaniya. Midawat siyag basahon ug gidapit ang misyonaryo sa pagbalik. Siya mibalik nga kauban sa iyang bana, si Kjell. Sa dihang sa kataposan sila nakalingkod na ug nakaestorya kang André, nadayag nga siya interesado kaayo nga makasabot sa Bibliya. Ang iyang asawa, si Ásta, interesado usab. Sa tungatunga sa adlaw, siya may tulo ka oras tali sa iyang mga yugto sa pagtudlo, ug gihukom nila nga gamiton kanang panahona alang sa pagtuon ug Bibliya. “Gibati ko nga labawng nahayahay pinaagi sa pagtuon sa Bibliya inay kay sa pagpahulay lamang,” matud niya. Sa anam-anam ang Bibliya nagtubag sa ilang mga pangutana. Sa inanay ang ilang pagtuo kang Jehova ug sa iyang Gingharian mitubo. Ang mahimayaong mga saad sa Bibliya nga usa ka malinawong bag-ong kalibotan, usa ka kalibotan nga nahigawas sa “tanang binuang nga butang nga nagakahitabo,” nahimong usa ka kamatuoran alang kanila. Si André ug si Ásta karon nagapakig-ambit sa ilang bag-ong-kaplag nga pagtuo sa uban.
Si Magdalena, André, ug Ásta mibatig pagkamasaligon nga sa kataposan ilang nakaplagan ang tinuod nga relihiyon. Si Eugenia usab, human sa pagpaningkamot nga masulbad ang mga suliran sa kalibotan sa politikanhong mga paagi, sa kataposan nakakaplag taliwala sa mga Saksi ni Jehova sa relihiyon nga alang kaniya maorag mao ang tinuod. Apan unsa ba gayod ang tinuod magahukom kon ang usa ka relihiyon mao ang tinuod? Palihog tan-awa ang sunod nga artikulo.
[Hulagway sa panid 7]
Ang regular nga pagtuon sa Bibliya uban sa mga Saksi ni Jehova nagatabang sa kapin sa lima ka milyong tawo sa ilang pagpangita sa makapatagbawng mga tubag