Mangayaong Pagpasakop sa Awtoridad

“Kamo nagmasinugtanon gikan sa kasingkasing.”​—ROMA 6:17.

1, 2. (a) Unsang espiritu ang dayag sa kalibotan karong adlawa, ug unsa ang tinubdan ug epekto niini? (b) Sa unsang paagi gipakita sa dedikadong mga alagad ni Jehova nga sila lahi?

“ANG espiritu nga nagalihok karon diha sa mga anak sa pagkadili-masinugtanon” makapakurat nga dayag karong adlawa. Kini ang espiritu sa mapatuyangong independensiya, nga nagagikan ni Satanas, “ang magmamando sa awtoridad sa hangin.” Kining espirituha, kining “hangina,” o naglabing tinamdan sa kahakog ug kamasupilon, naggamit ug “awtoridad,” o gahom, ibabaw sa kadaghanang tawo. Kini usa ka hinungdan nga ang kalibotan nakaagom sa gitawag nga krisis sa awtoridad.​—Efeso 2:2.

² Ikalipay, ang dedikadong mga alagad ni Jehova karong adlawa wala magpuno sa espirituwal nilang mga baga niining mahugaw nga “hangin,” o espiritu sa pagkarebelyoso. Sila nahibalo nga “ang kapungot sa Diyos modangat sa mga anak sa pagkadili-masinugtanon.” Si apostol Pablo midugang: “Busa ayaw pagkahimong mga mag-aambit uban kanila.” (Efeso 5:6, 7) Hinunoa, ang matuod nga mga Kristohanon naningkamot nga “mapuno sa espiritu [ni Jehova],” ug sila nag-inom sa “kaalam gikan sa itaas,” nga maoy “putli, unya makigdaiton, makataronganon, andam mosunod.”​—Efeso 5:17, 18; Santiago 3:17.

Kinabubut-ong Pagpasakop sa Pagkasoberano ni Jehova

3. Unsa ang yawi ngadto sa kinabubut-ong pagpasakop, ug unsang dakong leksiyon ang gitudlo kanato sa kasaysayan?

³ Ang yawi sa kinabubut-ong pagpasakop mao ang pag-ila sa may-katungod nga awtoridad. Gipakita sa kasaysayan sa tawo nga ang pagsalikway sa pagkasoberano ni Jehova dili mohatag ug kalipay. Ang maong pagsalikway wala mohatag ug kalipay kang Adan ug Eva, ni sa tighulhog sa ilang pagrebelde, si Satanas nga Yawa. (Genesis 3:16-19) Sa iyang pinaubos nga kahimtang karon, si Satanas adunay “dakong kasuko” kay siya nahibalo nga hamubo na lang ang iyang panahon. (Pinadayag 12:12) Ang kalinaw ug kalipay sa katawhan, oo, sa tibuok uniberso, nag-agad sa pag-ila sa matarong nga pagkasoberano ni Jehova.​—Salmo 103:19-22.

4. (a) Unsang matang sa pagpasakop ug pagkamasinugtanon ang buot ni Jehova nga ipakita sa iyang mga alagad? (b) Kinahanglang kita kombinsido sa unsa, ug sa unsang paagi kini gipahayag sa salmista?

⁴ Ugaling, tungod sa iyang mga hiyas nga kahibulongan ang pagkatimbang, si Jehova dili magmatagbawon sa di-mabinationg pagkamasinugtanon. Siya maoy gamhanan, kana ang tinuod! Apan dili siya diktador. Siya maoy Diyos sa gugma, ug buot niya nga ang intelihente niyang mga linalang sa kinabubut-on magmasinugtanon kaniya, gumikan sa gugma. Buot niya nga magpasakop sila sa iyang pagkasoberano tungod kay sa bug-os kasingkasing sila mopalabi nga ipailalom ang ilang kaugalingon sa iyang matarong ug may-katungod nga awtoridad, kay sila kombinsido nga wala nay mas maayo kay sa sila magmasinugtanon kaniya sa walay kataposan. Ang matang sa tawo nga gitinguha ni Jehova diha sa iyang uniberso samag mga pagbati sa salmista nga misulat: “Ang balaod ni Jehova maoy hingpit, nga magapasig-uli sa kalag. Ang pahinumdom ni Jehova maoy kasaligan, nga magahimong maalamon sa usang walay kasinatian. Ang mga mando ni Jehova maoy matul-id, nga magapahinabo sa kasingkasing sa paglipay; ang sugo ni Jehova maoy hinlo, nga magahimo sa mga mata nga sidlak. Ang kahadlok ni Jehova maoy putli, nga magapabilin sa walay kataposan. Ang hudisyal nga mga desisyon ni Jehova maoy matuod; silang tanan napamatud-ang matarong.” (Salmo 19:7-9) Ang bug-os nga pagsalig sa pagkaangay ug pagkamatarong sa pagkasoberano ni Jehova​—kinahanglang kini ang atong tinamdan kon buot natong mopuyo sa bag-ong kalibotan ni Jehova.

Mangayaong Pagpasakop sa Atong Hari

5. Sa unsang paagi si Jesus gigantihan tungod sa iyang pagkamasinugtanon, ug unsay atong kinabubut-ong giila?

⁵ Si Kristo Jesus mismo maoy labing maayong sulundan sa pagpasakop sa iyang langitnong Amahan. Atong mabasa nga “siya nagpaubos sa iyang kaugalingon ug nagmasinugtanon hangtod sa kamatayon, oo, kamatayon diha sa sakitanang estaka.” Si Pablo midugang: “Tungod niini mismong katarungana usab ang Diyos mibayaw kaniya ngadto sa usa ka labaw nga katungdanan ug sa maluloton mihatag kaniya sa ngalan nga labaw sa tanang uban pa nga ngalan, aron nga sa ngalan ni Jesus mangapiko ang tanang tuhod nilang anaa sa langit ug nilang anaa sa yuta ug nilang anaa ilalom sa yuta, ug ang tanang dila magaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.” (Filipos 2:8-11) Oo, kita magaluhod nga mangayaon atubangan sa atong Pangulo ug nagamandong Hari, si Kristo Jesus.​—Mateo 23:10.

6. Sa unsang paagi si Jesus nagpamatuod nga usa ka saksi ug usa ka pangulo sa nasodnong mga pundok, ug sa unsang paagi ang iyang “prinsipinhong pagmando” magpadayon human sa dakong kasakitan?

⁶ Bahin ni Kristo nga atong Pangulo, si Jehova mitagna: “Tan-awa! Ingong usa ka pamatuod ngadto sa nasodnong mga pundok ako naghatag kaniya, ingong usa ka pangulo ug komandante sa nasodnong mga pundok.” (Isaias 55:4) Pinaagi sa iyang yutan-ong ministeryo ug pinaagi sa iyang pagtultol sa buluhatong pagwali gikan sa langit human sa iyang kamatayon ug pagkabanhaw, gipakita ni Jesus nga siya maoy usa ka “matinumanon ug matuod nga saksi” sa iyang Amahan ngadto sa mga katawhan sa tanang kanasoran. (Pinadayag 3:14; Mateo 28:18-20) Ang maong nasodnong mga pundok karon gihawasan sa nag-uswag nga gidaghanon sa “dakong panon,” kinsa makalabang-buhi sa “dakong kasakitan” ubos sa pagpangulo ni Kristo. (Pinadayag 7:9, 14) Apan ang pagpangulo ni Jesus dili matapos dinha. Ang iyang “prinsipinhong pagmando” molungtad sa usa ka libo ka tuig. Alang sa masinugtanong mga tawo, siya magkinabuhi sumala sa iyang ngalan nga “Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait.”​—Isaias 9:6, 7; Pinadayag 20:6.

7. Kon buot natong si Kristo Jesus magtultol kanato ngadto sa “mga tuboran sa mga tubig sa kinabuhi,” unsay kinahanglang buhaton nato sa walay langan, ug unsay mopahinabo nga kita higugmaon ni Jesus ug ni Jehova?

⁷ Kon buot natong makabenepisyo gikan sa “mga tuboran sa mga tubig sa kinabuhi” nga ngadto niana ang Kordero, si Kristo Jesus, magagiya sa mga tawong matarong ug kasingkasing, sa walay langan kinahanglang atong pamatud-an pinaagi sa atong panglihok nga kita nagapasakop nga mangayaon sa iyang awtoridad ingong Hari. (Pinadayag 7:17; 22:1, 2; itandi ang Salmo 2:12.) Si Jesus miingon: “Kon kamo nahigugma kanako, inyong sundon ang akong mga sugo. Siya nga nagabaton sa akong mga sugo ug nagasunod niini, kana siya mao ang nahigugma kanako. Sa ingon usab siya nga nahigugma kanako higugmaon sa akong Amahan, ug ako magahigugma kaniya.” (Juan 14:15, 21) Buot ka ba nga higugmaon ni Jesus ug sa iyang Amahan? Nan magpasakop ka sa ilang awtoridad.

Mga Magtatan-aw Mangayaong Nagsugot

8, 9. (a) Unsay gitagana ni Kristo alang sa pagpalig-on sa kongregasyon, ug sa unsang bahin kinahanglan kining mga tawhana mahimong mga panig-ingnan sa panon? (b) Sa unsang paagi ang pagpasakop sa Kristohanong mga magtatan-aw gisimbolohan diha sa basahong Pinadayag, ug sa unsang paagi sila kinahanglang magtinguha ug “masinugtanong kasingkasing” sa dihang magahusay sa hudisyal nga mga butang?

⁸ “Ang kongregasyon nagapasakop kang Kristo.” Ingong Magtatan-aw niini, iyang gitagana ang “mga gasa nga mga lalaki” alang sa “pagpalig-on” sa kongregasyon. (Efeso 4:8, 11, 12; 5:24) Kining espirituwal tigulang nga mga lalaki giingnan nga ‘atimana ang panon sa Diyos nga gipaatiman kanila,’ nga dili “magaharihari niadtong maoy panulondon sa Diyos, kondili mahimong mga panig-ingnan sa panon.” (1 Pedro 5:1-3) Ang panon maoy iya ni Jehova, ug si Kristo mao ang “maayong magbalantay” niini. (Juan 10:14) Sanglit ang mga magtatan-aw tukmang nagadahom ug kinabubut-ong kooperasyon gikan sa mga karnero nga gitugyan ni Jehova ug ni Kristo nga atimanon nila, sila mismo angay nga mahimong maayong mga panig-ingnan sa pagkamapasakopon.​—Buhat 20:28.

⁹ Sa unang siglo, ang dinihogang mga magtatan-aw sa simbolikong paagi gihawasan ingong “diha sa,” o “ibabaw sa,” tuong kamot ni Kristo, nga nagpaila sa ilang pagpasakop kaniya ingong Ulo sa kongregasyon. (Pinadayag 1:16, 20; 2:1) Mao man usab karong adlawa, ang mga magtatan-aw sulod sa mga kongregasyon sa mga Saksi ni Jehova angay magpasakop sa pagtultol ni Kristo ug ‘magpaubos sa ilang kaugalingon ubos sa gamhanang kamot sa Diyos.’ (1 Pedro 5:6) Sa dihang hangyoon sa paghusay sa mga butang hudisyal, sama kang Solomon sulod sa katuigan sa iyang pagkamatinumanon pa, sila angay moampo kang Jehova: “Kinahanglang ihatag mo sa imong alagad ang usa ka masinugtanong kasingkasing aron sa paghukom sa imong katawhan, aron sa pag-ila tali sa maayo ug sa daotan.” (1 Hari 3:9) Ang usa ka masinugtanong kasingkasing motukmod sa usa ka ansiano sa pagtinguhang hisabtan ang mga butang sumala sa pagsabot niana ni Jehova ug ni Kristo Jesus aron ang desisyong gihimo sa yuta mahimong susama gayod nianang gihimo sa langit.​—Mateo 18:18-20.

10. Sa unsang paagi ang tanang magtatan-aw kinahanglang maningkamot sa pagsundog kang Jesus sa paagi sa iyang pagtratar sa mga karnero?

¹⁰ Ang nagapanawng mga magtatan-aw ug mga ansiano sa kongregasyon susamang maningkamot nga mosundog kang Kristo sa paagi sa iyang pagtratar sa mga karnero. Lahi sa mga Pariseo, si Jesus wala magpahamtang ug daghang lagda nga lisod sundon. (Mateo 23:2-11) Giingnan niya ang mga tawong samag mga karnero: “Umari kanako, kamong tanan nga nagabudlay ug nabug-atan, ug ako magapalagsik kaninyo. Isangon ang akong yugo diha kaninyo ug pagkat-on gikan kanako, kay ako malumog-buot ug mapaubsanon sa kasingkasing, ug makakaplag kamog kahayahay alang sa inyong mga kalag. Kay maluloton ang akong yugo ug gaan ang akong luwan.” (Mateo 11:28-30) Bisan pag tinuod nga ang matag usa ka Kristohanon kinahanglang “magpas-an sa iyang kaugalingong lulan,” ang mga magtatan-aw angay mahinumdom sa panig-ingnan ni Jesus ug motabang sa ilang mga igsoon sa pagbati nga ang ilang lulan sa Kristohanong responsabilidad maoy “maluluton,” “gaan,” ug makapalipay nga pas-anon.​—Galacia 6:5.

Teokratikanhong Pagpasakop

11. (a) Sa unsang paagi ang usa ka tawo mahimong magatahod sa pagkaulo apan dili gayod teokratikanhon? Iilustrar. (b) Unsay kahulogan sa pagkahimong tinuod nga teokratikanhon?

¹¹ Ang teokrasya maoy pagmando pinaagi sa Diyos. Kini naglangkit sa prinsipyo sa pagkaulo nga gipahayag sa 1 Corinto 11:3. Apan kini nagkahulogan ug labaw pa. Ang usa ka tawo tingali maorag nagpakitag pagtahod sa pagkaulo apan maoy dili teokratikanhon sa bug-os nga diwa sa pulong. Sa unsang paagi kini matuod? Sa pag-ilustrar, ang demokrasya maoy gobyerno pinaagi sa katawhan, ug ang usa ka demokrata gibatbat ingong “usa ka tawo nga nagtuo sa mga mithi sa demokrasya.” Ang usa ka tawo tingali mag-angkon nga demokratikanhon, mosalmot sa eleksiyon, ug mahimo pang aktibong politiko. Apan kon, sa iyang kinatibuk-ang panggawi, iyang gitamay ang espiritu sa demokrasya ug ang tanang prinsipyo nga nalangkit niini, ikaingon ba nga siya tinuod nga demokratikanhon? Sa susama, aron mahimong tinuod nga teokratikanhon, ang usa ka tawo kinahanglang mohimog labaw pa kay sa pagpasakop sa pagkaulo sa ngalan lamang. Kinahanglang sundogon niya ang mga paagi ug mga hiyas ni Jehova. Kinahanglang siya mandoan ni Jehova sa tanang paagi. Ug sanglit si Jehova naghatag sa iyang Anak ug bug-os nga awtoridad, ang pagkateokratikanhon nagkahulogan usab sa pagsundog kang Jesus.

12, 13. (a) Sa partikular, unsay nalangkit sa pagkahimong teokratikanhon? (b) Ang teokratikanhong pagpasakop ba naglangkit sa pagsugot sa daghang lagda? Iilustrar.

¹² Hinumdomi, buot ni Jehova ang kinabubut-ong pagpasakop nga tinukmod sa gugma. Kana ang iyang paagi sa pagmando sa uniberso. Siya mao ang personipikasyon mismo sa gugma. (1 Juan 4:8) Si Kristo Jesus mao “ang banaag sa iyang himaya ug ang tukma nga representasyon sa iya mismong pagkamao.” (Hebreohanon 1:3) Gibaoran niya ang iyang matuod nga mga tinun-an sa paghigugma sa usag usa. (Juan 15:17) Busa ang pagkateokratikanhon naglangkit dili lang sa pagkamapasakopon kondili sa pagkamahigugmaon usab. Kanang butanga masumada sumala sa mosunod: Ang teokrasya maoy pagmando pinaagi sa Diyos; ang Diyos gugma; busa ang teokrasya maoy pagmando pinaagi sa gugma.

¹³ Ang usa ka ansiano mahimong maghunahuna nga aron mahimong teokratikanhon, ang mga igsoon kinahanglang mosunod sa tanang matang sa mga lagda. Ang pila ka ansiano naghimog mga lagda gikan sa mga sugyot nga gihatag matag karon ug unya sa “ang matinumanon ug maalamong ulipon.” (Mateo 24:45) Pananglitan, gisugyot kaniadto nga aron ang mga igsoon diha sa kongregasyon mas daling magkaila, basin maayo nga dili kanunay nga molingkod sa samang lingkoranan diha sa Kingdom Hall. Kadto gituyo nga mahimong praktikal nga sugyot, dili usa ka mapig-otong lagda. Apan ang pila ka ansiano tingali makiling sa paghimo niana nga usa ka lagda ug mobati nga kadtong dili mosunod niana dili teokratikanhon. Apan, tingali adunay daghang maayong katarongan kon nganong ang usa ka igsoong lalaki o babaye tingali mopalabi sa paglingkod sa usa ka dapit. Kon ang usa ka ansiano dili mahigugmaong magkonsiderar niini, siya ba mismo tinuod nga teokratikanhon? Aron mahimong teokratikanhon, “ipahinabo ang tanan ninyong kalihokan uban ang gugma.”​—1 Corinto 16:14.

Pag-alagad nga Mangayaon

14, 15. (a) Sa unsang paagi ang usa ka ansiano makahikaw sa pila ka igsoong lalaki o babaye sa ilang kalipay sa pag-alagad kang Jehova, ug nganong kini dili teokratikanhon? (b) Giunsa pagpakita ni Jesus nga siya nagpabili sa gugma nga gipahayag sa atong pag-alagad, inay kay sa gidaghanon? (c) Unsay kinahanglang konsiderahon sa mga ansiano?

¹⁴ Ang pagkateokratikanhon nagkahulogan usab sa pag-alagad kang Jehova nga mangayaon. Si Jehova mao “ang malipayong Diyos.” (1 Timoteo 1:11) Buot niyang ang iyang mga magsisimba mag-alagad kaniyang mangayaon. Kadtong mga mapugsanon sa pagsunod sa mga lagda kinahanglang mahinumdom nga lakip sa mga lagda nga ang Israel kinahanglang “mag-amping sa pagtuman” mao ang mosunod: “Kinahanglang magmalipayon ka sa atubangan ni Jehova nga imong Diyos sa tanan nimong buluhaton.” (Deuteronomio 12:1, 18) Bisan unsa nga atong himoon diha sa pag-alagad kang Jehova kinahanglang usa ka kalipay, dili usa ka kabug-at. Ang mga magtatan-aw dakog mahimo sa pagpabati sa mga igsoon sa kalipay sa pagbuhat kon unsay ilang maarangan sa pag-alagad kang Jehova. Sa balit-ad, kon ang mga ansiano dili magbantay, sila makahikaw sa pipila sa mga igsoon sa ilang kalipay. Pananglitan, kon sila mohimog mga pagtandi, nga magadayeg niadtong nakakab-ot o nakalapaw sa aberids nga oras sa kongregasyon nga gigugol sa pagsangyaw ug pinaagi sa pagpasabot magsaway niadtong dili makakab-ot niini, unsay pagabation niadtong aduna tingaliy angayang hinungdan sa pagtaho ug mas diyutayng oras? Dili ba kini makapabati kanila ug dili angayng pagkasad-an ug maghikaw kanila sa ilang kangaya?

¹⁵ Ang diyutayng oras nga ikagahin sa pipila ngadto sa publikong pagsangyaw tingali maoy hawas sa labawng paningkamot kay sa daghang oras nga gigugol sa uban sa pagsangyaw, tungod sa mas batang edad, mas maayong panglawas, ug ubang mga kahimtang. Niining bahina, ang mga ansiano dili angay maghukom kanila. Sa pagkamatuod, si Jesus mao ang gihatagan sa Amahan sa “awtoridad sa paghukom.” (Juan 5:27) Gisaway ba ni Jesus ang kabos nga babayeng balo tungod kay ang iyang halad menos kay sa aberids? Wala, siya sensitibo sa kon unsay tinuod nga bili kaniya niadtong duha ka diyot nga salapi. Kadto mao “ang tanan nga iyang nabatonan, ang tibuok niyang pangabuhian.” Pagkalalom nga gugma kang Jehova ang gihawasan niadto! (Marcos 12:41-44) Dili ba angay nga ang mga ansiano samang masensitibo sa mahigugmaong paningkamot niadtong kansang tanan maoy ubos sa “aberids” sa gidaghanon? Kon bahin sa gugma alang kang Jehova, ang maong paningkamot basin labaw pa sa aberids!

16. (a) Kon ang mga magtatan-aw magagamit ug mga numero diha sa ilang mga pakigpulong, nganong nagkinahanglan silag salabotan ug maayong panimbang? (b) Sa unsang paagi ang mga igsoon matabangan sa labing maayo sa pagpauswag sa ilang pag-alagad?

¹⁶ Kini bang mga komentoha karon pagausbon nga usa ka bag-ong “lagda” nga ang mga numero​—bisan ang mga aberids​—dili na gayod pagahisgotan? Dili gayod! Ang punto mao nga ang mga magtatan-aw kinahanglang magmatimbang tali sa pagdasig sa mga igsoon nga pauswagon ang ilang ministeryo ug sa pagtabang kanila sa pagbuhat kon unsay ilang maarangan uban ang kangaya. (Galacia 6:4) Sa ilustrasyon ni Jesus sa mga talanton, ang agalon nagtugyan sa iyang mga katigayonan ngadto sa iyang mga ulipon “ang matag usa sumala sa iyang kaugalingong katakos.” (Mateo 25:14, 15) Ang mga ansiano sa susama kinahanglang magtagad sa mga posibilidad sa matag magmamantala sa Gingharian. Kini nagkinahanglag salabotan. Tingali ang pipila tinuod nga nagkinahanglag pagdasig sa pagbuhat ug labaw pa. Sila tingali magpabili sa tabang bahin sa mas maayong pag-organisar sa ilang kalihokan. Sa bisan unsang kahimtang, kon sila matabangan sa pagbuhat kon unsay ilang maarangan uban ang kangaya, ang maong kangaya lagmit magapalig-on kanila sa pagpauswag sa ilang Kristohanong kalihokan kon diin posible kini.​—Nehemias 8:10; Salmo 59:16; Jeremias 20:9.

Ang Kalinaw nga Naggikan sa Mangayaong Pagpasakop

17, 18. (a) Sa unsang paagi ang mangayaong pagpasakop maghatag kanatog kalinaw ug pagkamatarong? (b) Unsay atong mabatonan kon kita magapatalinghog gayod sa mga sugo sa Diyos?

¹⁷ Ang mangayaong pagpasakop sa may-katungod nga pagkasoberano ni Jehova maghatag kanato ug dakong kalinaw. Ang salmista miingon diha sa pag-ampo kang Jehova: “Ang dagayang kalinaw iya niadtong nahigugma sa imong balaod, ug alang kanila walay kapandolanan.” (Salmo 119:165) Pinaagi sa pagsugot sa balaod sa Diyos, makabaton kitag kaayohan. Si Jehova miingon ngadto sa Israel: “Kini mao ang giingon ni Jehova, ang imong Manlulukat, ang Balaang Usa sa Israel: ‘Ako, si Jehova, mao ang imong Diyos, ang Usa nga nagatudlo kanimo sa pagpahimulos, ang Usa nga nagapahinabo nga ikaw magalakaw sa dalan nga angay nimong pagalaktan. Oh kon ikaw magapatalinghog gayod sa akong mga sugo! Unya ang imong kalinaw mahisama sa usa ka suba, ug ang imong pagkamatarong sama sa mga balod sa dagat.’”​—Isaias 48:17, 18.

¹⁸ Ang halad lukat ni Kristo maghatag kanato ug kalinaw uban sa Diyos. (2 Corinto 5:18, 19) Kon kita nagtuo sa nagatubos nga dugo ni Kristo ug naningkamot sa tinuoray nga mabuntog ang atong mga kahuyangan ug buhaton ang kabubut-on sa Diyos, makakaplag kitag kahupayan gikan sa mga pagbati sa pagkasad-an. (1 Juan 3:19-23) Ang maong pagtuo, nga gipaluyohan ug binuhatan, maghatag kanato ug matarong nga pagbarog atubangan ni Jehova ug sa kahibulongang paglaom nga maluwas sa “dakong kasakitan” ug mabuhing walay kataposan sa bag-ong kalibotan ni Jehova. (Pinadayag 7:14-17; Juan 3:36; Santiago 2:22, 23) Kining tanan maangkon nato ‘kon kita magapatalinghog sa mga sugo sa Diyos.’

19. Sa unsa nag-agad ang atong kalipay karon ug atong paglaom nga walay-kataposang kinabuhi, ug giunsa pagpahayag ni David ang atong kinasingkasing nga pagtuo?

¹⁹ Oo, ang atong kalipay karon ug ang atong paglaom nga walay-kataposang kinabuhi sa usa ka paraisong yuta nasentro sa atong mangayaong pagpasakop sa awtoridad ni Jehova ingong Soberanong Ginoo sa uniberso. Hinaot nga sa kanunay atong mabatonan ang samang mga pagbati ni David, kinsa miingon: “Imoha, Oh Jehova, ang pagkadako ug ang kagahom ug ang katahom ug ang kahalangdon ug ang pagkatalahoron; kay ang tanang butang sa mga langit ug sa yuta maoy imoha. Imoha ang gingharian, Oh Jehova, ang Usang nagabayaw usab sa imong kaugalingon ingong ulo ibabaw sa tanan. Ug karon, Oh among Diyos, kami nagapasalamat kanimo ug nagadayeg sa imong matahom nga ngalan.”​—1 Cronicas 29:11, 13.

Mga Puntong Pagahinumdoman

◻ Unsang matang sa pagpasakop ug pagkamasinugtanon ang buot ni Jehova nga ipakita sa iyang mga alagad?

◻ Sa unsang paagi si Jesus gigantihan tungod sa iyang pagkamasinugtanon, ug unsay kinahanglang atong pamatud-an pinaagi sa atong panglihok?

◻ Sa unsang paagi ang tanang magtatan-aw magasundog kang Jesus sa paagi sa iyang pagtratar sa mga karnero?

◻ Unsay nalangkit sa pagkateokratikanhon?

◻ Unsang mga panalangin ang ihatag kanato sa mangayaong pagpasakop?

[Hulagway sa panid 24]

Ang mga ansiano nagdasig sa panon sa pagbuhat nga mangayaon sa bisan unsay ilang maarangan

[Hulagway sa panid 26]

Si Jehova mahimuot niadtong nagsugot kaniya gikan sa kasingkasing