Ang Nukleyar nga Hulga—Nawagtang na sa Dayon!
ANG pagkinabuhi sa daotang kahadlok dili maoy gusto sa Diyos alang sa mga tawo. Ingong “ang malipayong Diyos,” gusto niya nga sila magtagamtam sa kalinaw ug magpuyo sa kasegurohan—sa mubo, nga magmalipayon. (1 Timoteo 1:11) Sa kalibotang puno ug nukleyar nga mga hulga, tin-aw nga kini imposible.
“Kalinaw ug Kasegurohan”—Usa ka Mini
Angay madayag nga ang nukleyar nga hulga sa pagkatinuod wala pa mawagtang. Sa gihapon, bisan pa sa politikanhon, ekonomikanhon, ug sosyal nga kagubot, ang mga nasod sa kinatibuk-an maoy malaomon. Ang nagapadayong paningkamot sa paghanaw sa kapeligrohan dayag na sukad sa Internasyonal nga Tuig sa Pakigdait sa HK niadtong 1986.
Ang The Bulletin of the Atomic Scientists sa miaging napulo ka tuig nagliso sa iyang orasan sa adlaw sa kalaglagan—iyang metodo sa pagpaila sa posibilidad sa nukleyar nga gubat—gikan sa 3 ka minutos una pa sa tungang gabii balik sa 17 ka minutos una pa sa tungang gabii. Niadtong 1989 ang Stockholm International Peace Research Institute mipahayag nga “ang paglaom alang sa malinawong pagsulbad sa panagbangi mas maayog pasikaranan kay sa bisan unsang laing tuig sukad sa pagkatapos sa Gubat sa Kalibotan II.”
Sa katuigang bag-o pa ang Hiniusang Kanasoran napalig-on sa pagdumala sa internasyonal nga mga dapit sa kagubot. Ang kalamposan niini, bisan pag dili bug-os, igo na nga makaamot sa kinatibuk-ang espiritu sa pagkamalaomon. Lagmit mahitabo sa umaabot ang dugang bag-o ug malamposong mga kaugmaran. Ang mga singgit nga “kalinaw ug kasegurohan” lagmit mahimong mas kusog ug mas init. Basin pag madugangan ang pagkakatuohan niini.
Apan pagbantay! “Sa diha nga sila magaingon: ‘Kalinaw ug kasegurohan,’” nagpasidaan ang Bibliya, “niana ang kalit nga kalaglagan modangat dihadiha kanila ingon sa pag-ul-ol sa kasakit sa usa ka babayeng mabdos; ug sila dili gayod makaikyas.” Busa, ang mga singgit nga “kalinaw ug kasegurohan” magpahibalo sa panahon sa Diyos “sa pagpahinabo sa kagun-oban niadtong [si kinsa pinaagi sa polusyon, nukleyar ug sa laing paagi, maoy] nagagun-ob sa yuta.”—1 Tesalonica 5:3, 4; Pinadayag 11:18.
Matikdi nga ang Bibliya wala mag-ingon nga ang mga nasod makakab-ot ug “kalinaw ug kasegurohan.” Dayag nga sila magsultihanay mahitungod niini sa talagsaong paagi, nga magapahayag sa pagkamalaomon ug pagtuo nga wala batia sa nangagi. Ang purohan nga makab-ot ang kalinaw ug kasegurohan mopatim-aw nga mas duol na kay sukad masukad. Bisan pa sa nagapadayong nukleyar nga hulga, ang mga nasod gilaylayan ngadto sa dili-matuod nga pagbati sa kasegurohan.
Bisan pa niana, ang matuod nga mga Kristohanon dili kalimbongan. Uban ang dulot nga kaikag sila molantaw saylo sa tawhanong kalinaw ug kasegurohan ngadto sa butang nga mas maayo!
Kalinaw ug Kasegurohan—Ang Tiunay nga Butang
Sumala sa Salmo 4:8, ang tinuod nga kalinaw ug kasegurohan makaplagan sulod lamang sa kahikayan ni Jehova nga Diyos: “Sa kalinaw ako magahigda ug matulog, kay ikaw lamang, Oh Jehova, ang magapapuyo kanako diha sa kasegurohan.” Ang bisan unsang singgit nga “kalinaw ug kasegurohan” nga ipahayag sa gawas sa konteksto sa kahikayan ni Jehova sa Gingharian sa yano dili tinuod. Dili makab-ot niini ang bisan unsa nga malungtaron ug bili.
Ang Gingharian sa Diyos ilalom ni Kristo dili magmatagbawon sa pagtaganag dili-bug-os nga mga solusyon. Ang balaang kagamhanan mohimog labaw pa kay sa pagpakunhod sa gidaghanon sa nukleyar nga mga armas; kini bug-os nga magawagtang niini ug sa tanang ubang armas sa gubat. Ang Salmo 46:9 nagsaad: “Siya nagapahunong sa mga gubat hangtod sa kinatumyan sa yuta. Iyang bunggoon ang pana ug putolputolon ang bangkaw; ang mga karro iyang sunogon sa kalayo.”
Sa samang paagi, ang nukleyar nga mga hulga nga ipahinabo sa gubaong nukleyar nga mga reaktor o sa radyoaktibong biya mahimong mga butang sa kagahapon. Kay kon dili ang mga pulong mahimong bakak: “Sila sa pagkamatuod magalingkod, ang matag usa ilalom sa iyang kaparrasan ug ilalom sa iyang kahoyng igira, ug walay mausa nga magapakurog kanila; kay ang baba mismo ni Jehova sa mga panon ang namulong niini.” Ang Diyos dili makabakak. Walay katarongan nga magduhaduha kita sa iyang mga pulong.—Miqueas 4:4; Tito 1:2.
Malipay ka ba nga makabaton sa kalaoman nga magpuyo sa usa ka kalibotan diin ang nukleyar nga hulga nawagtang na sa dayon? Ikaw makahimo, kay ang Pulong sa Diyos tin-awng nagpahayag sa mga kinahanglanon. Pinaagi sa pagkakat-on bahin niini ug pagkinabuhi sumala niini, usa ka adlaw maangkon nimo ang kalipay sa pagsulti uban ang panghayhay sa kahupayan: “Ang nukleyar nga hulga—sa kataposan nawagtang na!”
[Hulagway sa panid 7]
Ang kalinaw magahari sa bag-ong kalibotan sa Diyos nga walay nukleyar nga mga hulga
[Credit Line]
M. Thonig/H. Armstrong Roberts
[Picture Credit Line sa panid 6]
Letrato sa U.S. National Archives