Unsay Giingon sa Bibliya Bahin sa Nukleyar nga Giyera?

Ang gamhanang mga nasod nagmentinar ug nagpadaghan sa ilang nukleyar nga mga armas, mao nga ang kalibotan padayong nag-atubang sa hulga sa nukleyar nga giyera. Ang mga tawo nabalaka nga tungod sa kadaghan sa nukleyar nga mga armas, posibleng mahitabo ang nukleyar nga giyera. Ang uban nahadlok pa gani nga kon ang usa ka nasod mogamit ug nukleyar nga bomba, basin makaaghat ni sa daghang nasod nga makiggiyera pinaagi sa ilang nukleyar nga mga armas, nga makadaot sa atong planeta. Ang Bulletin of the Atomic Scientists miingon nga kita nagkinabuhi sa panahon nga “naa kanunay ang kapeligrohan nga mahitabo ang nukleyar nga giyera.”

Pero posible ba gyong mahitabo ang nukleyar nga giyera? Kon oo, malaglag kaha ang atong planeta? Ug unsay atong buhaton aron dili ta sobrang mabalaka nga basin mahitabo ang nukleyar nga giyera? Atong tan-awon ang giingon sa Bibliya.

Niining artikuloha

• Ang Bibliya ba nagtagna bahin sa nukleyar nga giyera?

• Tugotan ba sa Diyos nga mahitabo ang nukleyar nga giyera?

• Malaglag kaha ang atong planeta?

• Unsay imong himoon aron dili ka sobrang mabalaka nga basin mahitabo ang nukleyar nga giyera?

• Ang Bibliya ba nagtagna nga ang Armagedon mahitabo pinaagig nukleyar nga giyera?

• Unsang solusyon ang giingon sa Bibliya bahin sa mga giyera?

• Ang basahon sa Bibliya nga Pinadayag naghisgot ba bahin sa nukleyar nga giyera?

Ang Bibliya ba nagtagna bahin sa nukleyar nga giyera?

Wala espesipikong gihisgotan sa Bibliya ang nukleyar nga giyera. Pero nagtagna ni bahin sa mga panghitabo ug kinaiya sa mga tawo nga tungod niana naay kapeligrohan sa nukleyar nga giyera.

Konsideraha ang mosunod nga mga teksto sa Bibliya ug itandi ni sa mga nagakahitabo karon sa kalibotan:

Teksto sa Bibliya: Ang mga tinun-an ni Jesus nangutana: “Unsa man unyay ilhanan sa imong presensiya ug sa hinapos sa sistema sa mga butang?” Si Jesus mitubag: “Ang nasod makiggubat batok sa nasod ug ang gingharian batok sa gingharian.”—Mateo 24:3, 7.

Nagakahitabo karon: Nagsige na lag giyera ang mga nasod, apil na kadtong naay nukleyar nga mga armas.

“Grabe na gyod ka bayolente ang mga tawo karon; mas nagkadaghan ang mga giyera nga nagakahitabo.”—The Armed Conflict Location & Event Data Project.

Teksto sa Bibliya: “Sa panahon sa kataposan ang hari sa habagatan makigtinuloray [sa hari sa amihanan].”—Daniel 11:40.

Nagakahitabo karon: Sama sa gitagna sa Bibliya, ang magkaaway nga mga nasod ug ang ilang mga kaalyado nagtinuloray, o nagkompetensiyahay, kon kinsay mas labaw nilag gahom. Bisag wala pa direktang naggiyerahay ang mga nasod nga naay daghang nukleyar nga mga armas, padayon silang naghimo ug mas daghan ug mas makamatayng nukleyar nga mga armas.

“Sa milabay nga 10 ka tuig, nakita nato nga misamot ang pagkontrahay sa mga nasod, ug ang nagkontrahay nga mga nasod gisuportahan sa dagkong mga nasod.”—The Uppsala Conflict Data Program.

Teksto sa Bibliya: “Sa kataposang mga adlaw moabot ang kuyaw nga mga panahong lisod sagubangon. Kay ang mga tawo unya . . . dili ikasabot, tigbutangbutang, walay pagpugong sa kaugalingon, bayolente.”—2 Timoteo 3:1-3.

Nagakahitabo karon: Sama sa daghang tawo karon, ang mga lider sa mga nasod dali ra kaayong masuko. Ug imbes sulbaron sa malinawong paagi ang ilang dili pagsinabtanay, sagad ilang hulgaon ang ilang kontra. Kini makapasamot sa kapeligrohan nga mahitabo ang nukleyar nga giyera.

“Kon walay himoong mga paningkamot aron masulbad ang mga isyu, mas magkagrabe pa gyod ang kahimtang.”—S. Saran and J. Harman, World Economic Forum.

Tugotan ba sa Diyos nga mahitabo ang nukleyar nga giyera?

Walay giingon ang Bibliya. Pero naghisgot ni bahin sa “makalilisang nga mga talan-awon,” o makahahadlok nga mga panghitabo, sa atong panahon. (Lucas 21:11) Apil niini nga mga panghitabo ang paghulog sa mga atomic bomb panahon sa Ikaduhang Gubat sa Kalibotan. Gisaysay sa Bibliya kon nganong gitugotan sa Diyos nga mahitabo ang mga gubat. Aron makakat-og dugang, tan-awa ang video nga Nganong Gitugotan sa Diyos ang Pag-antos?

Malaglag kaha ang atong planeta?

Dili. Bisan pag ang tawo mogamit pag-usab ug nukleyar nga mga armas, dili tugotan sa Diyos nga moabot sa punto nga malaglag ang atong planeta. Ang Bibliya nag-ingon nga ang atong planeta magpabilin hangtod sa hangtod ug mahimong puy-anan sa mga tawo.

Ang uban nagtuo nga sa umaabot, ang yuta mahimong samag desyerto nga lisod na kaayong puy-an ingong resulta sa nukleyar nga giyera, maong gamay na lang ang mabuhi dinhi. Pero ang Bibliya nagpakita nga ang yuta bug-os maulian gikan sa tanang kadaot nga gipahinabo sa mga giyera.

Nindot kaayo ang pagkalalang sa Diyos sa yuta, kay kayang ayohon sa atong planeta ang iyang kaugalingon gikan sa tanang kadaot. Pero sa umaabot, gamiton sa Diyos ang iyang gahom aron ipasig-uli ang yuta kay katuyoan niya nga mahimo ning nindot kaayong puy-anan sa tawo hangtod sa hangtod.—Salmo 37:11, 29; Pinadayag 21:5.

Unsay imong himoon aron dili ka sobrang mabalaka nga basin mahitabo ang nukleyar nga giyera?

Ang uban nabalaka pag-ayo nga basin mahitabo ang nukleyar nga mga giyera ug sa mahimong epekto niini. Ang Bibliya naghatag ug mga saad ug mga tambag nga makatabang nato aron dili ta sobrang mabalaka o mahadlok. Unsa kana?

Ang Bibliya naghisgot ug nindot kaayo nga paglaom para sa yuta ug sa mga nagpuyo niini. Kini nga paglaom magsilbing “angkla sa atong kinabuhi” aron dili kaayo ta sobrang mabalaka. (Hebreohanon 6:19) Mamenosan pod ang atong mga kabalaka kon dili ta magsigeg hunahuna sa mga posibleng mahitabo sa umaabot. Sama sa giingon ni Jesus, “ang mga problema karong adlawa mao ray hunahunaa.”—Mateo 6:34.

Importante kaayo nga atimanon nato ang atong emosyon ug mental health. Mahimo nato ni pinaagi sa dili pagsigeg tan-aw ug pagpaminaw ug balita o pagbasag impormasyon nga makapasamot sa atong mga kabalaka, sama sa mga panaghisgot o pagbayloanay ug mga opinyon bahin sa nukleyar nga mga armas. Wala ni magpasabot nga atong gibalewala ang mga nagakahitabo karon. Gusto lang natong dili ma-stress sa mga butang nga wala tay kontrol o basin dili gani mahitabo.

Imbes magpokus sa dili maayong mga balita, pagpokus sa positibong mga butang sa imong kinabuhi.

Ang pagkat-on ug dugang bahin sa mga saad sa Diyos maghatag nimog paglaom, kalipay, ug kalinaw sa hunahuna ug kasingkasing.

Ang Bibliya ba nagtagna nga ang Armagedon mahitabo pinaagig nukleyar nga giyera?

Ang uban naghunahuna nga ang Armagedon maoy nukleyar nga giyera nga mahitabo sa tibuok yuta. Tungod niana nagtuo sila nga moresulta nig grabe gyod nga kadaot.

Pero sa Bibliya, ang pulong “Armagedon” nagtumong sa gubat tali sa Diyos ug sa “mga hari sa tibuok gipuy-ang yuta,” o mga gobyerno sa tawo.a (Pinadayag 16:14, 16) Ang Armagedon dili sama sa nukleyar nga mga bomba nga makalaglag sa yuta ug sa daghang tawo, matarong man o daotan. Ang mga daotan lang ang laglagon sa Diyos sa Armagedon, mao nga naa na unyay tinuod nga kalinaw ug kasegurohan.—Salmo 37:9, 10; Isaias 32:17, 18; Mateo 6:10.

Unsang solusyon ang giingon sa Bibliya bahin sa mga giyera?

Ipakita ni Jehovab nga Diyos ang iyang awtoridad ibabaw sa nagkontrahay nga mga nasod pinaagi sa pagtapos sa ilang panag-away ug paglaglag sa ilang mga armas. Iya ning himoon pinaagi sa iyang Gingharian, usa ka langitnong gobyerno nga maoy mopuli sa pagmando sa tibuok yuta.—Daniel 2:44.

Ang Gingharian sa Diyos magtudlo sa mga tawo kon unsaon pagkinabuhi nga malinawon ug may panaghiusa. Kay usa na man lang ka gobyerno ang magmando sa tibuok yuta, wala nay mga nasod nga magkontrahay. Ang mga tawo dili na makakat-on sa pagpakiggubat! (Miqueas 4:1-3) Unsay resulta? “Sila manglingkod, ang tagsatagsa ilalom sa iyang punoan sa ubas ug sa iyang kahoyng igos, ug walay usa nga makapahadlok kanila.”—Miqueas 4:4.