Puwede Kang Magmalipayon Bisan pa sa mga Problema—Unsay Giingon sa Bibliya?

Nagkinabuhi ta sa lisod nga mga panahon, ug usahay dili nato kontrolado kon unsay posibleng mahitabo nato. Pero ang atong kalipay wala lang magdepende sa atong kahimtang, kondili sa atong tinamdan ug pagbati bahin niana. Ang Bibliya nag-ingon nga bisan pag naay problema, “ang mga tawong malipayon kanunayng nagpahimulos sa kinabuhi.” (Proverbio 15:15, Good News Translation) Unsay atong himoon aron mas magmalipayon ta? Konsideraha ang mga tambag sa Bibliya nga makatabang nimo.

Ayawg sobrang kabalaka

Ang Bibliya nag-ingon: “Ang kabalaka diha sa kasingkasing sa tawo makapaguol niya, apan ang maayong pulong makapalipay niya.”—Proverbio 12:25.

• Ang Bibliya makatabang nga dili ka sobrang mabalaka. Aron mahibaloan kon unsay angay nimong buhaton, basaha ang artikulong “Ang Giingon sa Bibliya Bahin sa Kabalaka.”

Ayawg padaog sa kamingaw ug kaguol

Ang Bibliya nag-ingon: “Ang tinuod nga higala magpakitag gugma sa tanang panahon ug siya igsoon nga masaligan panahon sa kalisdanan.”—Proverbio 17:17.

• Ang Bibliya nagtambag nga makigsuod ta sa atong mga higala aron masuklan nato ang kamingaw ug kaguol. Basaha ang artikulong “Daoga ang Kamingaw Pinaagi sa Pagpakighigala—Sa Unsang Paagi Makatabang ang Bibliya?.”

Higugmaa ang Diyos ug ang imong isigkatawo

Ang Bibliya nag-ingon: “Higugmaa si Jehova nga imong Diyos sa tibuok mong kasingkasing, sa tibuok mong kalag, ug sa tibuok mong hunahuna. . . . Higugmaa ang imong isigkatawo sama sa imong kaugalingon.”a—Mateo 22:37-39.

• Ang pag-ampo makatabang nga molalom ang atong gugma sa Diyos. Aron mahibalog dugang, basaha ang artikulong “Maminaw ba ang Diyos sa Atong mga Pag-ampo?”

• Mapakita nato ang atong gugma sa uban pinaagi sa pagsunod sa Bulawanong Lagda. Aron mahibalog dugang, basaha ang artikulong “Unsa ang Bulawanong Lagda?”

Gusto ka bang mahibalog dugang kon sa unsang paagi ang Bibliya makatabang nimo nga magmalipayon bisan pa sa mga problema? Gidapit ka namo nga sulayan ang among libreng interactive nga pagtuon sa Bibliya.