Naa Kahay Lig-ong Gobyerno nga Makamando sa Tibuok Kalibotan?—Unsay Giingon sa Bibliya?

Daghang gobyerno sa tibuok kalibotan ang huyang. Bisan ang gamhanang mga nasod dili gihapon lig-on ug panggobyerno. Ang uban nilang mga politiko nalangkit sa eskandalo, ug ang mga tawo lahilahig gisuportahan nga mga lider, nagkabahinbahin sa politikal nga mga isyu, ug nagsigeg protesta.

Pero ang Bibliya nag-ingon nga naay usa ka lig-on nga gobyerno. Tingali nakadungog na ka bahin niana nga gobyerno. Mao kana ang gihisgotan ni Jesu-Kristo sa modelong pag-ampo.

• “Busa, mag-ampo kamo niining paagiha: ‘Amahan namo nga anaa sa mga langit, balaanon unta ang imong ngalan. Paanhia ang imong Gingharian. Matuman unta ang imong kabubut-on, maingon sa langit, mao man usab sa yuta.’”—Mateo 6:9, 10.

Unsay giingon sa Bibliya bahin niana nga Gingharian?

Ang Gingharian—usa ka lig-ong gobyerno

Ang Gingharian magmando gikan sa langit.

• Si Jesus nag-ingon nga kini nga gobyerno mao “ang Gingharian sa langit.” (Mateo 4:17; 5:3, 10, 19, 20) Kanay hinungdan nga siya miingon: “Ang akong Gingharian dili bahin niining kalibotana.”—Juan 18:36.

Ang Gingharian maoy mopuli sa mga gobyerno sa tawo.

• Ang Bibliya nag-ingon: “Dugmokon ug taposon niini [nga Gingharian] kining tanang gingharian [sa tawo], ug kini ray mobarog hangtod sa hangtod.”—Daniel 2:44.

Kini nga Gingharian mandoan ni Jesu-Kristo, ug dili gyod ni malaglag.

• Ang Bibliya nag-ingon: “Ang iyang pagmando maoy hangtod sa hangtod—kini dili matapos. Ug ang iyang gingharian dili malaglag.”—Daniel 7:13, 14.

Ang Gingharian magdalag kalinaw ug kasegurohan dinhi sa yuta.

• Ang Bibliya nag-ingon: “Sila manglingkod, ang tagsatagsa ilalom sa iyang punoan sa ubas ug sa iyang kahoyng igos, ug walay usa nga makapahadlok kanila.”—Miqueas 4:4.

Pagkat-on ug dugang bahin sa Gingharian

Niadtong dinhi pa si Jesus sa yuta, siya kanunayng “nagwali sa maayong balita sa Gingharian.” (Mateo 9:35) Siya mitagna sab:

• “Kining maayong balita sa Gingharian isangyaw sa tibuok yuta sa pagpamatuod ngadto sa tanang kanasoran, ug unya moabot ang kataposan.”—Mateo 24:14.

Karon, ang maayong balita sa Gingharian gisangyaw na sa kapig 240 ka nasod ug kayutaan. Gidapit ka namo nga mokat-og dugang bahin niini nga gobyerno ug kon sa unsang paagi ka makabenepisyo sa pagmando niini.

Palihog tan-awa ang video nga Unsa ang Gingharian sa Diyos?