Gidaghanon sa mga Hayop Miubos ug 73% Sulod sa 50 ka Tuig—Unsay Giingon sa Bibliya?

Niadtong Oktubre 9, 2024, ang World Wildlife Fund mihatag ug makapabalakang report bahin sa kon unsay nahitabo sa mga hayop tungod sa ginahimo sa mga tawo. Kini nag-ingon nga “sulod sa milabayng 50 ka tuig (1970-2020), miubos ug 73% ang gidaghanon sa gimonitor nga mga hayop.” Ang report midugang: “Makaingon gyod ta nga ang kaugmaon nato ug sa atong planeta nagdepende sa kon unsay mahitabo sa sunod nga lima ka tuig.”

Normal lang nga daghan ang mabalaka kon makadungog ug ingon ani nga mga balita. Ganahan kaayo ta sa atong nindot nga planeta ug maguol tang makita nga mag-antos ang mga hayop. Mobati ta ani kay gidisenyo ta sa Diyos nga ganahang moatiman ug mga hayop.—Genesis 1:27, 28; Proverbio 12:10.

Busa makapangutana tingali ka, ‘Naa kaha tay mahimo aron masalbar ang mga hayop? Unsay giingon sa Bibliya?’

Nindot nga paglaom sa umaabot

Bisag naningkamot ta pag-ayo nga masalbar ang mga hayop sa atong planeta, ang Diyos ra gyod ang makasulbad ani nga problema. Gitagna sa Bibliya, sa Pinadayag 11:18, nga ang Diyos ‘maglaglag sa mga nagalaglag sa yuta.’ Kana nga teksto nagtudlo nato niining duha ka punto:

1. 1. Dili gyod tugotan sa Diyos nga bug-os madaot sa mga tawo ang yuta.

2. 2. Hapit nang molihok ang Diyos. Nganong makaingon ta ana? Kay kon itandi sa una, mas nameligro na gyod karon ang mga hayop tungod sa dili maayong mga butang nga ginahimo sa mga tawo.

Unsay himoon sa Diyos aron masulbad ni nga problema? Gamiton niya ang iyang langitnong gobyerno, o Gingharian, aron mandoan ang tibuok yuta. (Mateo 6:10) Pinaagi ani nga gobyerno, ang matinumanong katawhan tudloan ug bansayon aron ilang maatiman ug maprotektahan ang tanang hayop sa yuta.—Isaias 11:9.