Mga Magmamantala sa Gingharian Nagtaho
“Usa ka Pamatuod sa Espiritu sa Pagtinabangay”
HADUOL sa kinahabagatang tumoy sa Espanya nagbuntaog ang usa ka dakong bato nga anapog nga nailhang Bato sa Gibraltar. Sulod sa ginatos ka katuigan, kining maong bato nahimong hilom nga saksi sa politikal nga panagbangi ug internasyonal nga dili-pag-uyonay. Sa kasukwahi, ang Bato sa Gibraltar di pa dugay maoy paluyong talan-awon sa usa ka pasundayag sa pagtinabangay ug panaghiusa nga talagsa rang makita sa kalibotan karong adlawa.
Tulo lamang ka kilometro gikan sa Bato nahimutang ang lungsod sa La Línea, Espanya. Didto ang pagtukod sa usa ka Kingdom Hall sa mga Saksi ni Jehova nagtigom sa ginatos ka boluntaryong mga trabahante nga andam moamot sa ilang panahon ug kusog. Samtang sila naghago aron sa pagtukod ug usa ka angayan nga dapit alang sa pagsimba sa Maglalalang, si Jehova nga Diyos, bisan ang halangdong paluyong talan-awon nga Bato sa Gibraltar nawad-an sa kahinungdanon kon itandi sa nagpadayong pagtukod.
Ang mga magmamantala sa Gingharian nianang bahina sa kalibotan nagpadala sa mosunod nga taho:
“Siyam ka gatos ka madasigong mga boluntaryo nagtrabaho adlaw ug gabii, nga nagsugod sa Biyernes sa hapon, Septiyembre 24, 1993. Pagka alas siyete sa gabii sa Dominggo, usa ka bag-ong karatula nga nagpaila sa tinukod ingong Kingdom Hall sa mga Saksi ni Jehova gipatindog, ug ang maanindot nga bag-ong tinukod gigamit sa una gayod niining miting publiko.
“Daghang Saksi gikan sa haduol nga Gibraltar ang mitabok sa utlanan aron pagtabang sa ilang Espanyol nga mga igsoon. ‘Ang politikal nga pagkabahinbahin wala magpaluya sa espiritu sa atong internasyonal nga pag-igsoonay,’ misaysay ang usa sa boluntaryong mga trabahante, nga usa ka lumad sa Gibraltar. Siya midugang: ‘Daghang katuigan kanhi, ang mga higala gikan sa La Línea miabot aron sa pagtabang kanamo sa pagtukod sa among Kingdom Hall sa Gibraltar, busa karon malipay kami sa pagbalos sa ilang kaayo.’
“Aron sa pagdugang sa way-kutong paningkamot sa duha ka kongregasyon sa mga Saksi ni Jehova ug sa ginatos ka hanas nga magtatabang gikan sa rehiyon sa Andalusia, ang siyudad sa La Línea mihukom sa pag-amot sa gikinahanglang luna. ‘Sa naandan, ang Espanyol nga lokal nga mga awtoridad kanunayng magtagana ug yuta nga tukoran sa Katolikong mga simbahan,’ misaysay ang mayor sa La Línea panahon sa usa ka pagduaw sa dapit nga gitukoran. ‘Nganong dili himoon ang susama alang sa ubang relihiyosong mga denominasyon? Ako nadani kaayo sa pagkadili-mahakogon sa mga boluntaryo, ug gibati nako nga takos sila sa atong pagpaluyo. Gikinahanglan nato ang labaw pa niining matanga sa espiritu niining nabahin nga kalibotan karon.’
“Gipunting niya ang Kingdom Hall ingong ‘usa ka pamatuod sa espiritu sa pagtinabangay.’ Sa pagkatinuod, ang labing madanihong bahin dili mao ang arkitektural nga disenyo ni ang gidak-on sa tinukod. Hinunoa, ang nakapadani sa daghan diha sa katilingban mao ang kamatuoran nga kana bug-os nga gitukod sa mga boluntaryo ug gitukod lamang sulod sa 48 oras!”
Dayag nga ang mga Saksi ni Jehova sa La Línea ug sa palibot nga mga dapit niini nagatuman sa mga pulong sa Galacia 6:10. Didto si apostol Pablo nagtambag sa isigka-magtutuo: “Nan, sa pagkatinuod, samtang kita may panahong paborable alang niini, buhaton nato ang maayo ngadto sa tanan, apan ilabina kanilang iglabot nato sa pagtuo.”