“Sama ka Lig-on sa Rock of Gibraltar”

Nga mituybong titip gikan sa initon, asul nga katubigan sa Mediteranyo sa gihabogong 426 metros, ang Rock of Gibraltar mopatim-aw gayong lig-on. Sa hayag nga adlaw, gikan sa milyamilya sa habagatang Espanya ug gikan sa Morocco, tabok sa Mediteranyo, ang usa makakita dayon sa hait nga tumoy sa Gibraltar.

Ang kasaysayan sa Gibraltar mobalik niadtong gabonong mga yugto sa dihang ang karaang mga marinero, kay nagtuong patag ang yuta, naghunahuna nga ang pag-agi sa Strait of Gibraltar mohatod kanila ngadto sa ngilit sa kalibotan ug sa bung-aw sa kalaglagan. Giisip usab kining usa sa Mga Haligi ni Hercules, nga ang lain mao ang Jebel Musa sa Ceuta, sa Aprikanhong baybay tabok sa pig-ot nga agianan sa dagat. Sumala sa kasugiran gibuak kono sa Gregong bayani nga si Hercules ang kabukiran.

Nautang sa siyudad sa Gibraltar ang kalungtaran niini sa mga Arabe nga naggikan sa Amihanang Aprika sa ikawalong siglo K.P. ug sa ulahi nagtukod sa siyudad sa 1160. Ang ngalang Gibraltar nagagikan sa Arabikong ngalang Djabal-Tarik, o Bukid ni Tarik. Si Ṭāriq ibn Ziyād maoy usa ka Arabeng pangulo nga nagparot sa kataposang Gothic nga hari sa 711 K.P.

Nabihag sa mga Katsila ang Gibraltar niadtong 1462, nga unya nakuha kini sa mga Britaniko sa 1704. Hangtod karong adlawa, kini nagapabiling usa sa kataposang mga bantayanan sa kanhing Britanikong Imperyo. Apan ang Rock of Gibraltar nagapadayong usa ka simbolo sa butang lig-on ug malungtaron.

Duha ka kongregasyon (Ingles ug Kinatsila) sa mga 120 ka Saksi ni Jehova sa Gibraltar nagatanyag sa saad sa pagmando sa Gingharian sa Diyos ngadto sa mga taga-Gibraltar, usa ka saad nga labi pang lig-on kay sa Bato!​—Tito 1:1, 2; Hebreohanon 6:17-19.