Ang Bibliya—Usa ka Librong Gilaraw nga Masabtan

ANG pila ka tawo nagtuo nga ang Bibliya mao ang tin-awng Pulong sa Diyos nga kinahanglang sabton sa literal nga paagi. Alang sa uban, “ang mensahe sa Bibliya makalibog kaayo.” Mao kanay giingon sa 12-ka-membro nga komite sa pagtuo ug teolohiya alang sa kinadak-ang Protestanteng denominasyon sa Canada. Ang klerigong si Clifford Elliott, sa United Church, mibati nga alang sa pipila “ang Bibliya nahimong lisod sabton, dili personal ug dili mapadapat.”

Ang maong mga hunahuna nagpatungha ug tukmang mga pangutana nga angayng tubagon. Lakip sa hinungdanong mga pangutana mao, Nganong gisulat ang Bibliya? Makalibog ug komplikado ba kaayo kini nga dili masabtan? Masabtan ba kini sa komon nga tawo? Unsang tabang ang gikinahanglan aron ang usa makasabot sa kahulogan sa Kasulatan? Ug nganong ang tukmang kahibalo sa Bibliya hinungdanon niining magubot nga kapanahonan?

Nganong Gisulat ang Bibliya?

Ang pagtuon sa Pulong sa Diyos kanunayng maoy kinahanglanon alang niadtong buot makabaton sa pabor ug pag-uyon sa Labing Hataas nga Diyos, si Jehova. Ang mga hari, mga pari, mga ginikanan, mga lalaki, mga babaye, ug mga bata​—dato ug kabos​—parehong gisugo sa paggahin ug panahon gikan sa adlaw-adlawng mga kalihokan sa kinabuhi aron sa paghatag ug seryoso ug mainampoong pagpalandong sa nasulat nga Pulong sa Diyos.​—Deuteronomio 6:6, 7; 17:18-20; 31:9-12; Nehemias 8:8; Salmo 1:1, 2; 119:7-11, 72, 98-100, 104, 142; Proverbio 3:13-18.

Pananglitan, si Josue gisugo: “Tinoa nga ang basahon sa Kasugoan kanunayng basahon diha sa inyong pagsimba. Tun-i kana adlaw ug gabii, ug tinoa nga tumanon nimo ang tanang nahisulat niana. Unya ikaw mouswag ug magmalamposon.” (Josue 1:8, Today’s English Version) Ang maong mainampingong pagtuon ug pagpadapat sa Kasugoan sa Diyos mosangpot sa kalamposan ug kalipay. Katuyoan ni Jehova nga “ang tanang matang sa mga tawo” dili lamang makasabot sa iyang Pulong, ang Bibliya, kondili magatuman usab niana, nga may paglaom nga makadawat sa gasa sa kinabuhi.​—1 Timoteo 2:3, 4; Juan 17:3.

Komplikado ba Kaayo ang Bibliyanga Dili Masabtan?

Sa wala pa mosaka si Jesus sa langit, gitin-aw niya nga buot niyang ang dakong programa sa pagtudlo sa Bibliya magpadayon sa tibuok yuta. (Buhat 1:8) Nasayod siya nga ang Bibliya gilaraw nga masabtan. Human ipatin-aw nga si Jehova naghatag kaniya sa tanang awtoridad sa langit ug sa yuta, iyang gipagula ang direktang sugo: “Busa panglakaw kamo ug paghimog mga tinun-an [o, mga tigkat-on] sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo.”​—Mateo 28:19, 20.

Una pa sa bawtismo, ang bag-ong mga tinun-an kinahanglang tudloan mahitungod kang Jehova, sa iyang Anak, ug sa paglihok sa balaang espiritu. Dugang pa, kinahanglang tudloan sila sa kasugoan sa Kristohanong sistema sa mga butang. (1 Corinto 9:21; Galacia 6:2) Aron makab-ot kining maong resulta, ang mga takos kinahanglang motuo una nga ang Bibliya gikan kang Jehova ug ikaduha nga kana gilaraw nga masabtan.​—Mateo 10:11-13.

Unsay gikinahanglan sa imong bahin aron makasabot sa Bibliya? Ang Anak sa Diyos mihimog linaing paningkamot sa pagpatin-aw sa Kasulatan. Nasayod siya nga ang Balaang mga Sinulat maoy matuod ug nga kini sila naundan sa gipahayag nga kabubut-on ni Jehova. (Juan 17:17) Mahitungod sa giasayn kaniya nga buluhaton, si Jesu-Kristo miingon: “Ako natawo ug mianhi sa kalibotan tungod niining usa ka katuyoan, ang pagsulti mahitungod sa kamatuoran. Kinsa kadtong iya sa kamatuoran mamati kanako.” (Juan 18:37, TEV; Lucas 4:43) Si Jesus nagtudlo niadtong may madinawatong mga kasingkasing ug mga hunahuna. Sa Lucas 24:45, kita giingnan: “Unya iyang [Kristo Jesus] bug-os gibuksan ang ilang mga kaisipan aron makasabot sa kahulogan sa mga Kasulatan.”

Panahon sa ministeryo ni Jesus siya libreng mikutlo gikan sa sinulat nga Pulong, nga nagsaysay ug naghisgot sa kasulatan diha “sa balaod ni Moises ug sa mga Propeta ug mga Salmo.” (Lucas 24:27, 44) Kadtong nakadungog sa iyang mga pagsaysay sa Kasulatan natandog pag-ayo sa katin-aw sa iyang pagsabot, maingon man sa iyang katakos sa pagtudlo. (Mateo 7:28, 29; Marcos 1:22; Lucas 4:32; 24:32) Alang kaniya, ang mga Kasulatan maoy usa ka basahon nga sayon sabton.

Ang Bibliya ug ang mga Sumusunod ni Jesus

Si apostol Pablo, nga usa ka tigsundog ni Jesu-Kristo, nakakita sa panginahanglan sa pagtudlo sa uban kon unsay anaa sa Kasulatan. Siya nasayod usab nga kini gilaraw nga masabtan. Mao kanay hinungdan nga siya nagtudlo sa publiko ug sa walay duhaduha nagsaysay sa Kasulatan diha sa mga balay niadtong buot mosabot niini. Gipahibalo ni Pablo ang iyang kahimtang sa dihang siya miingon: “Nasayod kamo nga ako wala magpugong sa bisan unsang butang nga makatabang kaninyo samtang ako nagsangyaw ug nagtudlo sa publiko ug sa inyong mga balay.” (Buhat 20:20, TEV) Panahon sa iyang mga panaghisgot siya nangatarongan gikan sa Kasulatan, nga nagpatin-aw ug nagpamatuod sa iyang mga punto pinaagig mga pangutlo. (Buhat 17:2, 3) Siya interesado nga motabang sa uban nga makasabot sa kahulogan sa Kasulatan.

Nangandoy ka ba sa pagsabot sa mga butang nga gitudlo ni Jesus ug sa iyang mga tinun-an? (1 Pedro 2:2) Ang mga molupyo sa karaang Berea may ingong tinguha, ug sila mahinangpong mituo kon unsay gitudlo ni apostol Pablo kanila bahin sa Kristo. Busa sila nadasig sa pagtuon sa Kasulatan adlaw-adlaw ug sa ingon nakaseguro nga ang maayong balita nga ilang nadungog mao gayod ang kamatuoran. Tungod kay ang ilang mga hunahuna madinawaton, “daghan kanila ang nahimong mga magtutuo.”​—Buhat 17:11, 12.

Aron masabtan ang Bibliya, kinahanglang ang usa adunay hustong kahimtang sa kasingkasing, usa ka sinserong tinguha nga mokat-on, ug ‘pagkamahunahunaon sa espirituwal nga panginahanglan sa usa.’ (Mateo 5:3) Sa dihang gipangutana si Jesus: “Nganong nagapamulong ka man kanila pinaagig paggamit ug mga sambingay?” siya mitubag: “Kaninyo gikatugot ang pagsabot sa sagradong mga tinago sa gingharian sa mga langit, apan kanila kini wala ikatugot.” Gitagna nga siya ‘magbuka sa iyang baba uban ang mga sambingay ug magmantala sa mga butang tinago.’ (Mateo 13:10, 11, 35) Busa si Jesus misulti pinaagig mga sambingay aron pinigon ang dili interesadong mamiminaw ug mausisaong mamiminaw gikan sa sinserong tigsusi. Ang mga tinun-an ni Jesus nagpakita sa ilang kasinsero sa usa ka panahon sa dihang sila miuban kaniya sa sulod sa balay ug miingon: “Ipatin-aw kanamo ang sambingay sa mga bunglayon diha sa uma.”​—Mateo 13:36.

Dayag nga nagkinahanglan kitag tabang aron makasabot sa Bibliya. Ang klerigong si Hal Llewellyn, ang sekretaryo sa teolohiya, pagtuo, ug ekumenismo sa United Church, miingon: “Hinungdanon kaayo ang pagpatin-aw kon unsay kahulogan sa Bibliya alang kanato ug kon sa unsang paagi kini basahon ug hubaron.” Apan bisan pag dili ang tanan nakaamgo niana, ang kamatuoran mao nga kita dili makasabot sa Bibliya nga magkinaugalingon. Nagkinahanglan kitag tabang.

Unsang Tabang ang Mabatonan?

Anaa sa Bibliya ang matalinghagaong mga panultihon, makalibog nga mga pangutana, ug laglom nga mga pahayag nga nagkinahanglan ug pagbadbad. Tingali gituyo kini nga dili dayon mabadbad, nga naggamit ug makahuloganong mga pagtandi nga gilarawng dili masabtan sa panahon nga gisulat kini. Apan kini sila naglakip gayod sa mga katuyoan ni Jehova. Pananglitan, ang Pinadayag 13:18 nag-ingon nga “ang numero sa mapintas nga mananap” maoy “unom ka gatos ug kan-umag-unom.” Bisan tuod ang bersikulo nag-ingon nga “dinhi niini mosulod ang kaalam,” wala kini magpatin-aw sa kahulogan nianang numeroha. Apan, si Jehova, pinaagi sa iyang organisasyon, nagtugot sa iyang maunongong mga alagad sa pagsabot sa kahulogan niana karon. (Tan-awa ang kahon, “Agianan sa Pagsabot sa Bibliya.”) Ikaw usab makabaton niini nga pagsabot pinaagi sa tabang niadtong nasinati sa ‘hustong paggamit sa pulong sa kamatuoran.’​—2 Timoteo 2:2, 15, 23-25; 4:2-5; Proverbio 2:1-5.

Usahay si Jesus migamit ug mga ilustrasyon sa pagpakita sa pagsanong o kakulang sa pagsanong sa mensahe sa Gingharian. Iyang gipakita nga ang uban dili mouswag tungod kay naluya sila sa mga pagsupak gikan sa mga higala ug mga paryente. Ang uban motugot “sa kasakitan o paglutos” nga modaot sa ilang apresasyon sa mensahe sa Gingharian. Ang uban usab motugot sa adlaw-adlawng mga kalihokan sa kinabuhi, “ang kabalaka niining sistemaha sa mga butang ug ang malimbongong gahom sa mga bahandi,” nga magwala sa bisan unsang gugma nila sa maayong balita. Sa laing bahin, anaa kadtong malipayong mosanong ug andam nga mamati sa bililhong pulong ug nakasabot niana. Sila “nagapanghupaw ug nagaagulo tungod sa dulumtanang mga butang nga ginahimo” sa Kakristiyanohan, nga sa ngalan kunohay ni Jesu-Kristo. Ang maong mga tawo nagtinguha nga matudloan sa dalan ni Jehova ug sa ingon makasabot kon unsay ilang ginabasa diha sa Bibliya.​—Mateo 13:3-9, 18-23; Ezekiel 9:4; Isaias 2:2-4.

Alang niadtong buot nga makabaton ug pagsabot sa mga katuyoan ni Jehova sa tinagsatagsa, tinoon ni Jehova nga itagana ang gikinahanglang tabang. Sa pag-ilustrar, ang Bibliya nagaasoy nga ang espiritu ni Jehova nagtultol sa ebanghelistang si Felipe aron tabangan ang usa ka Etiopiano nga namalandong sa basahon ni Isaias sa Bibliya samtang siya nagpanaw gikan sa Jerusalem. Sa iyang pagpauli, siya nagbasa niana diha sa iyang karro. Ingong pagsunod sa pagtultol sa balaang espiritu ni Jehova, si Felipe midagan ubay sa karro ug nangutana: ‘Nakasabot ka ba sa imong gibasa?’ Ang tawo mapainubsanon ug matinud-anon kaayong midawat nga siya nagkinahanglan ug tabang. Si Felipe malipayong nagtudlo niining gutom sa espirituwal ug matudloang tawo. Ang pagtudlo nagtabang kaniya sa pagsabot sa Kasulatan. Siya nakakat-on kon unsay iyang kinahanglang buhaton sa pagpahimulos ug pinaborang relasyon uban kang Jehova aron makabaton ug kinabuhing walay kataposan. Siya nahimong usa ka malipayon, bawtismadong alagad ni Jehova, kinsa nagkinabuhi nga gikahimut-an sa Diyos.​—Buhat 8:26-39.

Tingali aduna kay Bibliya sa imong balay, ug tingali makadaghan na nimo kining nabasa. Lagmit kaayong nasinati nimo ang samang suliran nga nasinati sa sinsero, mapainubsanong Etiopiano. Wala niya masabti ang iyang gibasa. Nagkinahanglan siyag tabang ug wala magpanuko sa pagdawat sa tabang nga malipayong gitagana ni Jehova nga Diyos. Sama kang Felipe, ang mga Saksi ni Jehova malipayong motabang kanimo sa pagsabot sa mga butang mahitungod sa Diyos nga nasulat sa iyang Pulong, ang Bibliya. Sila nasayod nga si Jehova nagtagana sa Bibliya ug naglaraw nga kana masabtan gayod.​—1 Corinto 2:10; Efeso 3:18; 2 Pedro 3:16.

Nganong Kinahanglanon ang Bibliya?

Nagkinabuhi kita sa labing dinaliang panahon sa tawhanong kasaysayan. Ang Bibliya naghisgot niana nga “katiklopan sa sistema sa mga butang.” (Mateo 24:3) Ang daghang hitabo nga nagakahitabo ingong katumanan sa tagna sa Bibliya sukad sa tuig 1914 nagpakita nga sa dili madugay ang langitnong Gingharian sa Diyos ‘magadugmok ug magaut-ot sa tanang ubang mga kagamhanan.’​—Daniel 2:44.

Basaha mismo kon unsay gitagna sa Bibliya diha sa Mateo kapitulo 24, Marcos kapitulo 13, ug Lucas kapitulo 21. Mapanid-an nimo nga ang mga hitabo nga gibatbat makapabalaka sa tibuok yuta. Kini nagalakip sa mga gubat sa kalibotan​—nga lahi sa tanang ubang mga gubat. Sukad sa Gubat sa Kalibotan I, nakita nato ang gitagnang mga kanihit sa pagkaon, mga linog, ug usa ka panahon sa talagsaong kamalapason. Ug karon ang mga nasod daw haduol nang mohimog pangangkon nga magtagana ug dili-masayop nga ilhanan nga haduol na ang kalaglagan sa kalibotan. Mahitungod niini, si apostol Pablo misulat: “Ang adlaw ni Jehova moabot nga sama gayod sa usa ka kawatan diha sa kagabhion. Sa diha nga sila magaingon: ‘Kalinaw ug kasegurohan!’ niana ang kalit nga kalaglagan modangat dihadiha kanila; . . . ug sila dili gayod makaikyas.” (1 Tesalonica 5:2, 3) Kinsa kadtong dili makaikyas? Si Pablo misaysay: ‘Kadtong wala makaila sa Diyos ug kadtong wala mosunod sa maayong balita bahin sa atong Ginoong Jesus.’ (2 Tesalonica 1:7-9) Ang bahin sa daghag-bahin nga ilhanan pagatumanon niadtong nagsugot sa sugo nga gihatag sa Mateo 24:14 nga isangyaw ang “maayong balita sa gingharian . . . sa tibuok gipuy-ang yuta.”

Minilyong Saksi ni Jehova nagatuman niining sugoa diha sa 231 ka kayutaan ug kaislahan sa dagat. Sila nagaduaw sa mga balay sa katawhan ug personal nga nagadapit kanila sa pagkat-on mahitungod sa Ginghariang kagamhanan ni Jehova. Sila malulutong nagatudlo kon unsay buhaton sa matag usa aron mahilakip sa mga mamaluwas niining sistemaha sa mga butang ug magpuyo sa paraiso sa yuta diin wala nay pagminatay, panghupaw, kasakit, o kamatayon.​—Pinadayag 21:3, 4.

Nagakapupos na ang panahon alang niining daotan nga kalibotan, ug gikinahanglang ang tanan nga buot molabang-buhi sa kataposan niining kalibotana mokat-on kon unsay nalakip sa ‘pagsunod sa maayong balita’ ug sa ingon makaikyas sa kalaglagan. Sa sunod higayon nga moduaw ang mga Saksi ni Jehova sa imong balay, nganong dili dawaton ang pagdapit nga magtuon sa Bibliya matag semana? Labi pang maayo, nganong dili sila hangyoon nga magtuon sa Bibliya uban kanimo tungod kay buot nimong makasabot niana?

[Kahon sa panid 8]

AGIANAN SA PAGSABOT SA BIBLIYA

SI Jesus nagpasalig kanato nga human sa iyang kamatayon ug pagkabanhaw, siya magbangon ug usa ka “kasaligan ug mabuot nga ulipon” nga magsilbing iyang agianan sa komunikasyon. (Mateo 24:45-47) Si apostol Pablo nagpaila niining maong agianan ngadto sa mga Kristohanon sa Efeso sa dihang siya misulat nga “ikapahibalo pinaagi sa kongregasyon ang nagkadaiya uyamot nga kaalam sa Diyos, sumala sa katuyoang dayon nga iyang gihimo may kalabotan sa Kristo, si Jesus nga atong Ginoo.” (Efeso 3:10, 11) Ang kongregasyon sa dinihogang mga Kristohanon, nga natukod sa Pentekostes 33 K.P., maoy gisaligan sa “mga butang gipadayag.” (Deuteronomio 29:29) Ingong grupo, ang dinihogang mga Kristohanon nagsilbing kasaligan ug mabuot nga ulipon. (Lucas 12:42-44) Ang ilang tinudlong asaynment gikan sa Diyos mao ang pagtagana ug espirituwal nga pagsabot sa “mga butang gipadayag.”

Maingon nga ang tagna sa Bibliya nagpunting ngadto sa Mesiyas, nagtultol usab kini kanato ngadto sa suod nga lawas sa dinihogang Kristohanong mga Saksi nga nag-alagad karon ingong kasaligan ug mabuot nga ulipon.a Motabang kini kanato sa pagsabot sa Pulong sa Diyos. Ang tanan nga buot makasabot sa Bibliya kinahanglang moapresyar nga ang “nagkadaiya uyamot nga kaalam sa Diyos” mahibaloan lamang pinaagi sa agianan sa komunikasyon ni Jehova, ang kasaligan ug mabuot nga ulipon.​—Juan 6:68.

[Mga footnote]