Basaha ang Pulong sa Diyos ug Alagara Siya Diha sa Kamatuoran
“Tudloi ako, Oh Jehova, bahin sa imong dalan. Ako magalakaw sa imong kamatuoran.”—SALMO 86:11.
1. Sa diwa, unsay giingon sa unang gula niining basahona bahin sa kamatuoran?
SI Jehova nagpadalag kahayag ug kamatuoran. (Salmo 43:3) Siya naghatag usab kanato ug katakos sa pagbasa sa iyang Pulong, ang Bibliya, ug sa pagkakat-on sa kamatuoran. Ang unang gula niining basahona—Hulyo 1879—nag-ingon: “Ang kamatuoran, sama sa usa ka ubos gamayng bulak sa kamingawan sa kinabuhi, gilibotan ug hapit natuok sa labong kaayong mga sagbot sa kabakakan. Kon buot mo nga makaplagan kini kinahanglang magbantay ka gayod kanunay. Kon buot mo nga makita ang katahom niini kinahanglang isalikway mo ang mga sagbot sa kasaypanan ug ang mga sampinit sa pagkapig-ot ug hunahuna. Kon buot mo nga makabaton niini kinahanglang magpaubos ka aron makakuha niini. Ayaw pagkatagbaw sa usa ka bulak sa kamatuoran. Kon igo pa ang usa wala na untay lain pa. Padayon sa pagtigom, pangita pag dugang.” Ang pagbasa ug pagtuon sa Pulong sa Diyos magpaarang kanato sa pagbaton sa tukmang kahibalo ug sa paglakaw sa iyang kamatuoran.—Salmo 86:11.
2. Unsa ang resulta sa dihang gibasa ni Esdras ug sa uban ang Kasugoan sa Diyos ngadto sa mga Hudiyo sa karaang Jerusalem?
2 Human nga natukod pag-usab ang mga paril sa Jerusalem sa 455 W.K.P., gibasa sa saserdoteng si Esdras ug sa uban ang Kasugoan sa Diyos ngadto sa mga Hudiyo. Gisundan kini sa masadyang Piyesta sa mga Tabernakulo, pagsugid sa mga sala, ug taposon sa “usa ka kasaligang kasabotan.” (Nehemias 8:1–9:38) Atong mabasa: “Sila nagpadayon sa pagbasag kusog gikan sa basahon, gikan sa kasugoan sa matuod nga Diyos, kini gipatin-aw, ug ilang gihatagan ug kahulogan kini; ug sila padayon nga nakasabot sa gibasa.” (Nehemias 8:8) Ang uban nag-ingon nga ang mga Hudiyo dili kaayo makasabot ug Hebreohanon busa gihatagan kinig kahulogan sa Aramaiko. Apan ang teksto wala magpakita ug yanong pagpatin-aw lamang sa mga termino sa pinulongan. Gipatin-aw ni Esdras ug sa uban ang Kasugoan aron ang mga tawo makasabot sa mga prinsipyo niini ug makapadat niana. Ang Kristohanong mga publikasyon ug mga tigom nag-alagad usab sa ‘pagbutang ug kahulogan’ sa Pulong sa Diyos. Maingon man ang tinudlong mga ansiano, kinsa “kuwalipikado sa pagpanudlo.”—1 Timoteo 3:1, 2; 2 Timoteo 2:24.
Matunhayon nga mga Kaayohan
3. Unsa ang pipila ka kaayohang makuha gikan sa pagbasa sa Bibliya?
3 Kon magkauban ang Kristohanong mga pamilya sa pagbasa sa Bibliya, lagmit nga masinati nila ang matunhayon nga mga kaayohan. Sila masinati sa mga kasugoan sa Diyos ug makakat-on sa kamatuoran bahin sa mga doktrina, mga tagna, ug ubang mga ulohan. Human nga mabasa ang usa ka bahin sa Bibliya, ang ulo sa panimalay mahimong mangutana: Sa unsang paagi makaapekto kini kanato? Sa unsang paagi nalangkit kini sa ubang mga doktrina sa Bibliya? Sa unsang paagi magamit nato kining puntoha sa pagsangyaw sa maayong balita? Ang pamilya makabaton ug dugang pagsabot sa dihang magbasa sa Bibliya kon sila manukiduki pinaagi sa paggamit sa Watch Tower Publications Index o ubang mga indese. Ang duha ka tomo nga Insight on the Scriptures mapuslanong tan-awon.
4. Sa unsang paagi igapadapat ni Josue ang instruksiyon nga narekord sa Josue 1:8?
4 Ang mga prinsipyo nga makuha gikan sa Kasulatan makagiya kanato sa kinabuhi. Dugang pa, ang pagbasa ug pagtuon sa ‘balaang mga sinulat makapahimo kanatong maalamon alang sa kaluwasan.’ (2 Timoteo 3:15) Kon kita magpagiya sa Pulong sa Diyos, kita magpadayon sa paglakaw diha sa iyang kamatuoran ug ang atong matarong nga mga tinguha mamatuman. (Salmo 26:3; 119:130) Apan, kinahanglang mangita kita ug pagsabot, sama sa gibuhat sa kapuli ni Moises, nga si Josue. Ang “basahon sa kasugoan” dili angay ibulag gikan sa iyang baba, ug kinahanglang basahon niya kini sa adlaw ug gabii. (Josue 1:8) Ang dili pagtugot nga mabulag ang “basahon sa kasugoan” gikan sa iyang baba nagkahulogan nga dili angay mohunong si Josue sa pagsulti sa uban sa makahatag ug kadan-agang mga butang nga gipamulong niini. Ang pagbasa sa Kasugoan sa adlaw ug gabii nagkahulogan nga kinahanglang palandongon kini ni Josue, tun-an kini. Samang giawhag ni apostol Pablo si Timoteo sa ‘paghinuktok’—pagpalandong—sa iyang paggawi, ministeryo, ug pagpanudlo. Ingong usa ka Kristohanong ansiano, si Timoteo kinahanglang mag-amping gayod nga mahimong sulondan ang iyang kinabuhi ug nga magtudlo siya sa kamatuoran sa Kasulatan.—1 Timoteo 4:15.
5. Unsay gikinahanglan aron atong makaplagan ang kamatuoran sa Diyos?
5 Ang kamatuoran sa Diyos maoy usa ka hamili nga bahandi. Ang pagpangita niini nagkinahanglag pagpangalot, malahutayong pagsusi sa Kasulatan. Pinaagi lamang sa pagkahimong samag-bata nga mga estudyante sa Dakong Instruktor nga atong mabatonan ang kaalam ug makasabot sa matahaong pagkahadlok kang Jehova. (Proverbio 1:7; Isaias 30:20, 21) Siyempre, kinahanglang atong pamatud-an ang mga butang gikan sa Kasulatan. (1 Pedro 2:1, 2) Ang mga Hudiyo sa Berea “mas hamilig-hunahuna kay sa niadtong sa Tesalonica, kay ila mang gidawat ang pulong uban ang tumang kaikag sa hunahuna, nga sa adlaw-adlaw maampingong nagausisa sa mga Kasulatan kon tinuod ba kining mga butanga [nga gipamulong ni Pablo].” Ang mga taga-Berea gidayeg imbes gibadlong sa paghimo niini.—Buhat 17:10, 11.
6. Nganong nakaingon si Jesus nga walay kaayohang makuha ang pipila ka mga Hudiyo sa pagsusi sa Kasulatan?
6 Gisultihan ni Jesus ang pipila ka mga Hudiyo: “Kamo nagasusi sa mga Kasulatan, tungod kay kamo nagahunahuna nga pinaagi niini nila kamo makabaton ug kinabuhing walay-kataposan; ug kini sila mao ang mismong nagapanaksi bahin kanako. Ug bisan pa niana kamo dili buot moari kanako aron kamo unta makabaton ug kinabuhi.” (Juan 5:39, 40) Ilang gisusi ang mga Kasulatan nga may hustong tumong—nga kini makagiya kanila sa kinabuhi. Sa pagkamatuod, ang mga Kasulatan nasudlan ug Mesiyanikong mga tagna nga nagpunting kang Jesus ingong ang paagi sa kinabuhi. Apan gisalikway siya sa mga Hudiyo. Ang pagsusi sa Kasulatan, sa ingon, wala makahatag kanilag kaayohan.
7. Unsay gikinahanglan aron mouswag sa pagsabot sa Bibliya, ug ngano?
7 Aron mouswag ang atong pagsabot sa Bibliya, kinahanglan nato ang pagtultol sa espiritu sa Diyos, o aktibong gahom. “Ginasusi sa espiritu ang tanang butang, bisan ang lawom nga mga butang sa Diyos” aron masabtan ang kahulogan niini. (1 Corinto 2:10) Ang mga Kristohanon sa Tesalonica gisugo sa ‘pagtino sa tanang butang’ sa tanang tagna nga ilang nadungog. (1 Tesalonica 5:20, 21) Sa dihang gisulatan ni Pablo ang mga taga-Tesalonica (mga 50 K.P.), ang bugtong bahin sa Gregong Kasulatan nga nasulat na mao ang Ebanghelyo ni Mateo. Busa ang mga taga-Tesalonica ug mga taga-Berea makatino sa tanang butang, lagmit pinaagi sa pagtan-aw sa Gregong Septuagint nga bersiyon sa Hebreohanong Kasulatan. Kinahanglang basahon ug tun-an nila ang Kasulatan, ug maingon man usab kita.
Hinungdanon Alang sa Tanan
8. Nganong angay nga mahanas ang tinudlong mga ansiano sa kahibalo sa Bibliya?
8 Ang tinudlong mga ansiano angay gayod nga adunay dakong kahibalo sa Bibliya. Sila kinahanglang “kuwalipikado sa pagpanudlo” ug kinahanglang “nagapangupot sa kasaligang pulong.” Ang magtatan-aw nga si Timoteo angayng “sa husto nagagamit sa pulong sa kamatuoran.” (1 Timoteo 3:2; Tito 1:9; 2 Timoteo 2:15) Ang iyang inahan, si Eunice, ug iyang apohang babaye nga si Loida nagtudlo kaniya sa balaang mga sinulat sukad pa sa pagkabata, nga nagpatisok sa ‘di-salingkapaw nga pagtuo’ diha kaniya, bisag ang iyang amahan dili magtutuo. (2 Timoteo 1:5; 3:15) Ang magtutuong mga amahan kinahanglang magmatuto sa ilang mga anak “diha sa disiplina ug mapasiboong pagdumala-sa-kaisipan ni Jehova,” ug ilabina nga kinahanglang ang mga ansiano kinsa mga amahan ‘may magtutuong mga anak nga dili badlonganon o wala mailalom sa sumbong sa pagpatuyang.’ (Efeso 6:4; Tito 1:6) Nan, bisag unsa pay atong mga kahimtang, angayng magatagad gayod kita nga seryoso sa panginahanglan sa pagbasa, pagtuon, ug pagpadapat sa Pulong sa Diyos.
9. Nganong tun-an ang Bibliya uban sa isigka-Kristohanon?
9 Kinahanglang atong tun-an usab ang Bibliya uban sa isigkamagtutuo. Buot ni Pablo nga hisgotan sa mga Kristohanon nga taga-Tesalonica ang iyang tambag uban sa usag usa. (1 Tesalonica 4:18) Aron mapahait ang atong pagsabot sa kamatuoran, wala nay molabaw pa kay sa pagduyog sa ubang debotadong mga estudyante sa pagsusi sa Kasulatan. Tinuod ang sanglitanan: “Ang puthaw makabaid ug puthaw. Sa ingon niana mabaid sa usa ka tawo ang dagway sa lain.” (Proverbio 27:17) Ang usa ka himan nga puthaw matay-an kon dili kanunayng gamiton ug bairon. Sa samang paagi, kita kinahanglang regular nga magtigom ug magbairay sa usag usa pinaagi sa pagpakig-ambit sa kahibalo nga atong nakat-onan gikan sa pagbasa, pagtuon, ug pagpamalandong sa Pulong sa Diyos sa kamatuoran. (Hebreohanon 10:24, 25) Dugang pa, kini maoy usa ka paagi sa pagtino nga kita nakapahimulos gikan sa mga pangidlap sa espirituwal nga kahayag.—Salmo 97:11; Proverbio 4:18.
10. Unsay kahulogan sa paglakaw diha sa kamatuoran?
10 Sa atong pagtuon sa Kasulatan, kita tukmang makaampo sa Diyos sama sa salmista: “Ipadan-ag ang imong kahayag ug kamatuoran. Hinaot nga pagatultolan ako niini.” (Salmo 43:3) Kon buot nato ang pag-uyon sa Diyos, kita kinahanglang molakaw sa iyang kamatuoran. (3 Juan 3, 4) Kini naglakip sa pagsunod sa iyang mga kinahanglanon ug alagaron siya sa pagkamatinumanon ug katim-os. (Salmo 25:4, 5; Juan 4:23, 24) Kinahanglang alagaron nato si Jehova sa kamatuoran, ingon sa gipadayag diha sa iyang Pulong ug gipatin-aw sa mga publikasyon sa “kasaligan ug mabuot nga ulipon.” (Mateo 24:45-47) Kini nagkinahanglan ug tukmang kahibalo sa Kasulatan. Nan, sa unsang paagi basahon ug tun-an nato ang Pulong sa Diyos? Kinahanglan bang sugdan nato kini pagbasa gikan sa Genesis kapitulo 1, bersikulo 1, sa hustong pagkasunodsunod sa tibuok nga 66 ka basahon? Oo, ang matag Kristohanon nga adunay kompleto nga Bibliya sa iyang kaugalingong pinulongan kinahanglang magbasa niini gikan sa Genesis ngadto sa Pinadayag. Ug ang atong tumong sa pagbasa sa Bibliya ug sa Kristohanong mga publikasyon mao ang pagpauswag sa atong pagsabot sa daghang bahin sa kamatuoran sa Kasulatan nga gitagana sa Diyos pinaagi sa ‘kasaligang ulipon.’
Basahag Kusog ang Pulong sa Diyos
11, 12. Nganong mapuslanon nga basahog kusog ang Bibliya diha sa mga tigom?
11 Hilom tingali kita nga magbasa kon mag-inusara. Apan, sa karaang panahon, ang pribadong pagbasa gihimo sa makusog. Sa misakay ang Etiopianong eunoko sa iyang karwahi, ang ebanghelisador nga si Felipe sa ingon nakadungog kaniya nga nagbasa sa tagna ni Isaias. (Buhat 8:27-30) Ang Hebreohanong pulong nga gihubad ug “basa” pangunang nagkahulogang “tawag.” Busa kadtong sa sinugdan dili makabasa sa hilom ug makasabot sa gibasa dili angay santaon sa pagbungat sa matag pulong sa makusog. Ang hinungdanon mao ang pagtuon sa kamatuoran pinaagi sa pagbasa sa sinulat nga Pulong sa Diyos.
12 Mapuslanon nga basahong kusog ang Bibliya diha sa Kristohanong mga tigom. Giawhag ni apostol Pablo ang iyang kaubang magbubuhat nga si Timoteo: “Padayon kang magmakugihon sa publikong pagbasa, sa maawhagong pagpanambag, sa pagpanudlo.” (1 Timoteo 4:13) Giingnan ni Pablo ang mga taga-Colosas: “Sa mabasa na kining sulata taliwala kaninyo, hikaya nga kini mabasa usab sa kongregasyon sa mga taga-Laodicea ug nga mabasa usab ninyo kadtong gikan sa Laodicea.” (Colosas 4:16) Ug ang Pinadayag 1:3 nag-ingon: “Malipayon siya kinsa nagabasa sa makusog ug kadtong mga nagapaminaw sa mga pulong niini nga propesiya, ug kinsa nagasunod sa mga butang nga nahisulat niini; kay ang tinudlong panahon haduol na.” Busa, kinahanglang basahon sa publikong mamumulong ang mga teksto sa Bibliya sa pagsuportar sa iyang isulti sa kongregasyon.
Paagi sa Pagtuon Sumala sa Tema
13. Unsa ang labing epektibong paagi sa pagtuon sa mga kamatuoran sa Bibliya, ug unsay makatabang kanato sa pagpangita sa mga kasulatan?
13 Ang paagi sa pagtuon sumala sa tema mao ang labing epektibong paagi sa pagtuon sa mga kamatuoran sa Kasulatan. Ang mga konkordansiya, nga naglista sa mga pulong sa Bibliya sumala sa pagkasunodsunod sa alpabeto sa konteksto niini sumala sa basahon, kapitulo, ug bersikulo, magpadali sa pagkakita sa mga teksto may kalabotan sa usa ka tema. Ug kining mga tekstoha mahimong ipasibo sa usag usa tungod kay ang Awtor sa Bibliya wala magkasumpaki sa iyang kaugalingon. Pinaagi sa balaang espiritu, iyang gidasig ang 40 ka lalaki sa pagsulat sa Bibliya sa kapin sa 16 ka siglo, ug ang pagtuon niini sumala sa tema maoy usa ka epektibong paagi sa pagtuon sa kamatuoran.
14. Nganong tun-an ang Hebreohanon ug Kristohanon Gregong Kasulatan?
14 Ang atong apresasyon sa kamatuoran sa Bibliya angay mopalihok kanato sa pagbasa ug pagtuon sa Kristohanon Gregong Kasulatan uban sa Hebreohanong Kasulatan. Ipakita niini kon sa unsang paagi ang Gregong Kasulatan gilangkit sa katuyoan sa Diyos ug mohatag ug katin-awan sa mga tagna sa Hebreohanong Kasulatan. (Roma 16:25-27; Efeso 3:4-6; Colosas 1:26) Ang dako kaayong tabang niining bahina mao ang New World Translation of the Holy Scriptures. Giandam kini sa dedikadong mga alagad sa Diyos kinsa nagpahimulos sa nag-uswag nga kahibalo nga mabatonan labot sa orihinal nga teksto sa Bibliya maingon man sa likod nga impormasyon niini ug sa idiomatic nga mga ekspresyon. Hinungdanon, usab, mao ang mga giya sa pagtuon sa Bibliya nga gitagana ni Jehova pinaagi sa “kasaligan ug mabuot nga ulipon.”
15. Unsaon nimo sa pagpamatuod nga husto ang pagkutlo sa tanang bahin sa Bibliya?
15 Ang uban tingali moingon, ‘Libolibo ang ginakutlo sa inyong mga publikasyon gikan sa Bibliya, apan nganong gikuha ninyo kini sa tanang bahin?’ Pinaagi sa pagkutlo niini sa nagkalainlaing bahin sa 66 ka basahon sa Bibliya, gigamit sa mga publikasyon ang daghang dinasig nga mga saksi sa pagpamatuod sa pagkatinuod sa usa ka doktrina. Gigamit mismo ni Jesus kining paagiha sa pagpanudlo. Sa dihang iyang gihatag ang iyang Wali sa Bukid, siya migamit ug 21 ka kinutlo sa Hebreohanong Kasulatan. Kadtong diskursoha may tulo ka kinutlo gikan sa Exodo, duha sa Levitico, usa sa Numeros, unom sa Deuteronomio, usa sa Ikaduhang mga Hari, upat sa Salmo, tulo sa Isaias, ug usa sa Jeremias. Sa paghimo niini, si Jesus ‘naningkamot lang ba nga mapamatud-an ang bisan unsang butang’? Wala, kay ‘nagtudlo siya kanila ingong tawo nga adunay awtoridad, ug dili ingon sa mga eskriba.’ Kana tungod kay gipaluyohan ni Jesus ang iyang pagtulon-an pinaagi sa awtoridad sa sinulat nga Pulong sa Diyos. (Mateo 7:29) Mao man si apostol Pablo.
16. Unsang mga kinutlo sa Kasulatan ang gihimo ni Pablo sa Roma 15:7-13?
16 Diha sa teksto nga makita sa Roma 15:7-13, si Pablo mikutlo gikan sa tulo ka bahin sa Hebreohanong Kasulatan—ang Kasugoan, ang mga Manalagna, ug ang mga Salmo. Iyang gipakita nga himayaon sa mga Hudiyo ug mga Hentil ang Diyos, ug sa ingon angay dawaton sa mga Kristohanon ang mga tawo sa tanang kanasoran. Si Pablo miingon: “Mahinangpong dawata ang usag usa, maingon nga ang Kristo usab mahinangpong midawat kanato, alang sa himaya sa Diyos. Kay ako nagaingon nga si Kristo sa tinuod nahimong usa ka ministro nilang mga tinuli alang sa pagkamatinud-anon sa Diyos, aron lig-onon ang mga saad nga Iyang gihatag sa ilang mga katigulangan, ug nga ang mga nasod makahimaya sa Diyos tungod sa iyang kaluoy. Maingon gayod sa nahisulat [sa Salmo 18:49]: ‘Mao kana nganong ilhon ko ikaw sa dayag taliwala sa mga nasod ug sa imong ngalan ako magasaluma.’ Ug usab siya nagaingon [sa Deuteronomio 32:43]: ‘Panagsaya, kamong mga nasod, uban sa iyang katawhan.’ Ug usab [sa Salmo 117:1]: ‘Dayega si Jehova, kamong tanang kanasoran, ug padayega ang tanang katawhan kaniya.’ Ug usab nagaingon si Isaias [11:1, 10]: ‘Aduna unyay gamot ni Jese, ug aduna unyay usang magabangon aron sa pagmando sa mga nasod; diha kaniya ang mga nasod magsandig sa ilang paglaom.’ Hinaot nga ang Diyos nga nagahatag ug paglaom magapuno kaninyo sa tanang kangaya ug pakigdait pinaagi sa inyong pagpanuo, aron kamo modagaya sa paglaom uban ang gahom sa balaang espiritu.” Pinaagi niining paggamit sumala sa tema, gipakita ni Pablo kon unsaon pagkutlo sa kasulatan aron pamatud-an ang mga kamatuoran sa Bibliya.
17. Nahiuyon sa unsang sumbanan nga nagakutlo ang mga Kristohanon sa tanang bahin sa Bibliya?
17 Ang unang dinasig nga sulat ni apostol Pedro nasudlan ug 34 ka kinutlo gikan sa napulo ka basahon sa Kasugoan, ang mga Manalagna, ug ang mga Salmo. Diha sa iyang ikaduhang sulat, si Pedro tulo ka higayong mikutlo gikan sa tulo ka basahon. Ang Ebanghelyo ni Mateo may 122 ka kinutlo gikan sa Genesis ngadto sa Malaquias. Sa 27 ka basahon sa Gregong Kasulatan, may 320 ka direktang mga kinutlo gikan sa Genesis ngadto sa Malaquias maingon man sa ginatos pang ubang mga paghisgot sa Hebreohanong Kasulatan. Nahiuyon sa sumbanan nga gipakita ni Jesus ug gisunod sa iyang mga apostoles, sa dihang ang modernong-adlawng mga Kristohanon magtuon sumala sa usa ka tema sa ulohan sa Kasulatan, sila mokutlo sa tanang bahin sa tibuok nga Bibliya. Tukma gayod kini niining “kataposang mga adlaw,” diin ang kadaghanan sa Hebreohanon ug Gregong Kasulatan nagakatuman. (2 Timoteo 3:1) Bug-os nga gipahimuslan sa ‘kasaligang ulipon’ ang paggamit sa Bibliya diha sa mga publikasyon niini, apan wala gayod kini magdugang ug bisan unsa diha sa Pulong sa Diyos o magkuha gikan niana.—Proverbio 30:5, 6; Pinadayag 22:18, 19.
Paglakaw Kanunay Diha sa Kamatuoran
18. Nganong ‘maglakaw diha sa kamatuoran’?
18 Dili gayod nato kuhaag bisan unsa ang Bibliya, tungod kay ang tanang Kristohanong mga pagtulon-an sa Pulong sa Diyos mao “ang kamatuoran” o “ang kamatuoran sa maayong balita.” Ang pagpabilin diha niining kamatuorana—‘maglakaw’ diha niini—hinungdanon sa kaluwasan. (Galacia 2:5; 2 Juan 4; 1 Timoteo 2:3, 4) Sanglit ang Kristiyanidad mao man “ang dalan sa kamatuoran,” pinaagi sa pagtabang sa uban sa pagpalambo sa mga intereses niini, kita mahimong “mga isigkamagbubuhat diha sa kamatuoran.”—2 Pedro 2:2; 3 Juan 8.
19. Sa unsang paagi kita ‘makapadayon sa paglakaw diha sa kamatuoran’?
19 Aron kita ‘makapadayon sa paglakaw diha sa kamatuoran,’ kinahanglang basahon nato ang Bibliya ug pahimuslan nato ang espirituwal nga tabang nga gitagana sa Diyos pinaagi sa ‘kasaligang ulipon.’ (3 Juan 4) Hinaot himoon nato kini alang sa atong kaugalingong kaayohan ug aron makatudlo sa uban bahin kang Jehova nga Diyos, kang Jesu-Kristo, ug sa diyosnong katuyoan. Ug magmapasalamaton kita nga ginatabangan kita sa balaang espiritu ni Jehova sa pagsabot sa iyang Pulong ug molampos sa pag-alagad kaniya diha sa kamatuoran.
Unsay Imong mga Tubag?
◻ Unsa ang pipila ka matunhayong mga kaayohang makuha sa pagbasa sa Bibliya?
◻ Nganong tun-an ang Bibliya uban sa mga isigkamagtutuo?
◻ Nganong husto ang pagkutlo gikan sa nagkalainlaing bahin sa tibuok Bibliya?
◻ Unsay kahulogan sa ‘paglakaw diha sa kamatuoran,’ ug sa unsang paagi mahimo nato kana?
[Hulagway sa panid 17]
Mga ginikanan, tudloi ang inyong mga anak sa Kasulatan
[Hulagway sa panid 18]
Sa iyang Wali sa Bukid, si Jesus mikutlo sa nagkalainlaing mga bahin sa Hebreohanong Kasulatan